2013-12-31

Plu inondas es prevideda en Britan

Meteorolojistes predise pluves e ventas forte tra England e Cimri en la dia prima de 2014. Los averti sur un menasa continuante de inundas.

Sentuples de familias recovre ancora pos tempestas cual ia inunda se casas e ia falta la eletrica a natal.

Frontinte la prevides nova, organizas local autoriosa prepara abitadas de crise.

On ia sorti sirca 150 persones de se casas pos pluve deluviante a lundi, spesial en partes de Scotland.

On destesti enfantes en la Republica de Africa Sentral

La Nasiones Unida ia dise ce on ia destesti a la min du enfantes en Bangui, la capital de la Republica de Africa Sentral. Ala, la violentia ia ateni un "punto basa nova de cruelia".

Sirca 16 enfantes es matada en Bangui de pos 5 desembre, e on enscrive un cuantia cresente de los a grupos enarmada.

Per la plu, la violentia aveni entre fortes militar cristian e muslim. Ante marto, la Republica ia es governada par presidente François Bozizé de la majoria cristian de la popla.

En marto, la potia ia es saisida par Michel Djotodia, un gidor pasada de rebelores muslim. Bozizé ia es obligada a fuji como un escluida.

La NU ia dise ce enfantes es direta atacada par venjores.

Sete mori en un onda de caldia en Arjentina

En la semana pasada, un onda de caldia en Arjentina ia mata sete persones. La plu de los ia es vea.

La caldia es malida par faltas de eletrica cual ia impedi multe persones de usa frescadores.

En la provinses norde, la temperatur ia asende a ultra 45°C. Meteorolojistes dise ce esta es la onda de caldia la plu estrema en la area de pos la comensa de arcivos en 1906.

Uigures xines es librida de campa Guantanamo

La SUA ia libri la tre finales de la uigures muslim xines ci ia es prisonida a se campa de prisoni militar a Baia Guantanamo en Cuba, descrivente la aveni como un "ateni importante".

On ia vola los a Bratislava, la capital de Slovensco. Nun de los es suspetada como teroristes.

Campa Guantanamo conteni aora 155 prisonidas, reduida de plu ca 750. Multe es ja ala tra plu ca un desenio, e desuples de los ia es desculpada a alga anios ante aora.

La SUA refusa renativi prisonidas uigur a Xina, temente ce los ta es maltratada. Xina reata sever contra uigures ci oposa es governada par Beijing.

Frans anunsia un redui grande de soldatos en Mali

Jean-Yves Le Drian ia dise ce, tra la tre menses veninte, Frans va redui se cuantia de soldatos en Mali par 60%.

Frans ia interveni militar en janero per estrae gerores islamiste ci ia ocupa la norde de la pais. A la punto la plu sever de la crise, Frans ia ave sirca 4500 soldatos en se colonia pasada.

Mil soldatos va resta en Mali per aida a batalia la grupos relatada a al-Qaidah ci ataca ancora la deserto vasta norde.

On prosede un dotor xines per contrabanda de bebetas

On prosede Zhang Shuxia, un ostetriciste xines, ci ia fura sete bebetas per vende los a contrabandores de enfantes.

Pos informa la jenitores ce se enfantes es malada, seniora Zhang ia convinse los a sede la bebes.

El ia confesa en un corte en Fuping, en la provinse Shaanxi.

La caso ia comensa cuando du jenitores ia vade a la polisia, suspetante ce Zhang ia saisi se bebeta.

Zhang ia vende sete bebes a contrabandores entre novembre 2011 e julio 2013, incluinte un duple de jemelos. On ia salva ses de los, ma un bebeta fema ia mori.

Un pato enorme creve en Taiuan

En Taiuan, un pato jala e jigante de plastica ia creve per un razona nonclar.

La pato inflada ia ave un altia de 18 metres. Lo ia colasa subita a la dia 11 de cuando on ia esibi lo en la porto de Kelang. Cisa lo ia es atacada par agilas.

Florentijn Hofman, un artiste nederlandes, ia desinia lo como un varia enorme de un jueta popular de banio.

En novembre, un otra pato simil en Taiuan ia es deflada par un falta eletrical causada par un trematera. E en setembre, on ia move un pato tre de sur la mar per evita ce lo deveni danada par un siclon.

La state de Michael Schumacher boni pico

Sirurjistes ia opera sur Michael Schumacher per lejeri la presa a se serebro. Se state ia boni pico como resulta.

Un scane en la note ia indica ce el es "plu bon ca oji", an si el es ancora "no estra peril".

La xampion pasada de corsa de autos ia sufri feris de testa a soldi en un asidente de sci en la Alpes franses. El es aora en un coma medical induida en un ospital en Grenoble.

Discutes va aveni entre la oposores en Sudan Sude

La governa de Sudan Sude va comensa discutes con rebelores en Itiopia, esperante ateni un acorda sur la sesa de gera.

La discutes es la primas de pos du semanas ante aora, cuando batalias ia esplode entre la fortes fidosa de presidente Salva Kiir e los de Riek Machar, se suordinada desempleada.

A la min 1000 persones ia mori, e on crede ce plu ca 121 600 ia fuji de se casas.

A lundi, la presidente de Uganda, Yoweri Museveni, ia menasa la rebelores con atas militar si, ante la fini de martedi, los no acorda un sesafusili e comensa discutes.

Volgograd vijila pos bombas umana

En Volgograd en Rusia sude, pos du atacas par bombas umana, miluples de polisiores patrulia aora la sistemes de transporta publica e esamina la trafica privata.

La cuantia de persones matada par la bombas ia ateni 34, e 60 persones es ferida. On no sabe esce la cuantia de matadas inclui la bombores. Los ia ataca la stasion de ferovia a soldi e un trambus a lundi.

On ia entera la vitim prima, un polisior matada a la stasion.

En se comenta publica prima sur la atacas, presidente Vladimir Putin ia dise: "Nos basi nos testas ante la vitimes de la atas asustante de teror. Nos va continua ferose e coerente la batalia contra teroristes asta cuando los es completa eliminada."

Investigores crede ce la du atacas es relatada, ma no grupo ia proclama se como culpable. La atacas es simil a presedentes nondistinguinte fada par gerores islamiste de Caucaso norde.

On vide la vagador xines a la surfas de la luna

Un satelite american ia imaji Yutu, la vagador xines, a la surfas de la luna.

La veculo, cual ave 150 sentimetres de largia, apare como un pixel en la pitures de la Orbitador de Oserva Lunal de NASA. Ance vidable es la aterador par cual Yutu ia ariva sur la Mar de Pluves a 14 de desembre.

La satelite orbita a un altia de 150 kilometres. Lo no ia es bon posada per imaji la atera mesma.

Ambos aparatos brilia contra la surfas oscur de la luna, e los crea ombras longa. Per esta razona, on ia reconose fasil los en imajes de ante e pos la atera.

Yutu sinifia "coneo de jada". Lo es la mision prima de Xina cual atera sur la Luna.

Pos desende a la surfas longo un rampa, la vagador ia viaja en sirculo afin la siensistes serti ce se sistemes opera bon. Aora lo dormi tra la note longa de la Luna, cual dura tra du de nos semanas. Pos velia, Yutu va esplora la jeolojia de la tereno sirca se.

Un barcon de salva deveni fisada en jelo

En Antartica, lo es posible ce un barcon de salva ia deveni mesma trapida.

La barcon de rexerca Akademik Shokalskiy es ja fisada en jelo tra cuasi un semana. Lo conteni 74 persones. Los dise ce los ave un bon cuantia de comedas e ce los no es en peril.

Cuando la clima permete, on ia vole usa un elicotor de la barcon xines Xue Long per estrae sincodes-du pasajores e cuatro ecipores. Ma la barcon xines ia move apena en 24 oras, e on teme ce lo ia deveni ance fisada en la jelo.

Xue Long es un de du rompejelos en la area visina. La otra es un barcon australian, Aurora Australis. Pos la elicotor, on ia intende usa ance un barco per move la persones de la barcon xines a la barcon australian.

Un anio nova comensa

Tra la mundo, on selebra la ariva de 2014.

En Zeland Nova, la anio nova ia comensa ja a la ora 11 de UTC. En Australia, folas espeta la presenta famosa de focos de arte en Sydney.

En Japan, pretes xinto asembla a santerias per bonveni la anio nova.

Dubai va atenta presenta focos de arte en cuantia recordo. La organizores dise ce la presenta va estende longo 48 cilometres de la borda de mar, e ce la focos la plu alta va asende tra plu ca un cilometre.

Natural, on va selebra ance con focos de arte en multe otra sites de la mundo.