2014-05-31

Viaja a la airoporto sur un valis

Un cultivor en Xina ia inventa un valis motorida, capas de porta la vestes de viajores en cuando lo transporta ance la viajores a la airoporto.

La aparato ave du rotas peti a la retro e un a la fronte, e es la creada de He Liang, un cultivor de la provinse Hunan.

Lo pote porta asta du pasajores tra distantias de asta 60 cilometres. La rapidia masima cual lo pote manteni es 20 cilometres per ora.

Lo prende se enerjia de un pila recargable de litio, e on pote dirije lo con manicos cuando on senta sur lo.

He ia spende des anios en developa esta valis spesial, cual el nomi la Taxi de Site. El dise ce lo ave la mesma spasio per vestes como en bagaje normal, e cuando lo es vacua, lo pesa mera 7 cilogrames.

El ia patenta la valis como un veculo multiusa, e espera vide pronto persones usante lo sur la stradas.

2014-05-30

Ocupores nonlegal en Barcelona combate la polisia

En Espania, la polisia en la site Barcelona ia scaramuxa con ganges de jovenes con capetas, en la note tre de violentia causada par la proposa de destrui un casa de ocupores nonlegal.

A la min 25 persones ia es arestada cuando sirca 2000 protestores ia fronti la polisia. La protestores ia lansa botelas e petras a la polisiores.

En lundi, on ia ejeta ocupores nonlegal de Can Vies, un construida publica cual estremistes sinistriste ia ocupa tra 16 anios.

Un portavose de la polisia ia dise ce polisiores elmida ia core atacante contra la protestores pos cuando estas ia penetra un linia de securia. La protestores ia responde par cade baldones, rompe fenetras, e lansa misiles.

La protestores ia usa taticas simil en notes presedente, cuando los ia ataca ance furgones de polisia e bancas.

La construida Can Vies es situada en Sants, un visineria de clase laborante cual es poseseda par la autoriosa transportal de Barcelona. En 1997, ativistes ia saisi lo e ia usa lo per consertas, cursos, e otra avenis. La autoriosa vole destrui lo per redevelopa la area.

La polisia ia responde a un comanda de corte per vacui la construida. La comanda ia es donada pos la falta de discutes entre la ocupores e la autoriosa.

2014-05-29

Pasientes de Ebola es prendeda de un clinica en Siera Leon

En Siera Leon, ses persones, sur ci on suspeta ce los ave la virus matante Ebola, ia es "violente" prendeda de un clinica par se relatadas, en defia de la empleadas medical.

Un de los ia mori, e on teme ce esta virus estrema comunicable pote sperde.

On no sabe perce la relatadas ia prende la pasientes a via.

Cuasi 200 persones ia mori de Ebola en Afria ueste de pos la reporta prima de un apare en Gine en marto.

No remedia o vasin esiste per la virus, cual es entre la plu matantes de mundo.

Ma lo es plu probable ce un person va survive si on identifia temprana la problem, e si el reseta alora un trata medical.

Ebola pote mata asta 90% de se infetadas. Lo es comunicada par contata con la licuidas de persones o animales infetada, per esemplo urina, sua, o sangue.

2014-05-28

On proposa reformi la UE a un confere en Bruxeles

Britan e Frans ia recomenda un reformi de la Uni European, cuando gidores ia ariva en Bruxeles per un confere pos un vota fortinte per la partitos eurosetica.

Presidente François Hollande ia demanda ce Europa ta "atende" la avenis en Frans, do se partito sosialiste ia perde contra la destristes estrema de la Fronte Nasionaliste.

David Cameron, de ci se partito conserviste brites ia perde contra la Partito per Autonomia de la Rena Unida, ia dise ce Bruxeles es "tro grande, tro dominante".

Partitos popliste e estrema destriste tra tota la UE ia esperia aumentas de suporta.

La elejes ia forti la disposa de los ci oposa la UE en la Parlamento European. An tal, jeneral, la partitos proeuropean ia gania la plu de votas.

La confere nonformal a martedi ia es la momento prima a cual gidores de tota 28 statos membros ia pote discute la via futur pos la elejes de la semana pasada. Multe de la presentes ia veni de un serie de mal dias political.

Hollande ia descrive se resultas como "dolosa".

2014-05-27

La Pape visita locas santa en Ieruxalim

En la dia final de se turi de Asia sude-ueste, Pape Fransisco ia visita la locas santa la plu importante per muslimes e iudis en la Site Vea de Ieruxalim.

A la compleso de la mascita al-Aqsa, el ia recomenda forte ce persones de tota relijios "labora juntada per justia e pas". A pos, el ia prea a la Mur Ueste, situada direta su la mascita, basinte se testa en cuando el ia toca la petras.

La pape ia es selebrada par Israel e la filastinis, e el ia invita se presidentes a la Vatican. Ambos de Shimon Peres de Israel e Mahmoud Abbas de la filastinis ia responde positiva.

Pape Fransisco ia desapone se sapatos per entra a la Cupola de la Roca, de do la tradision muslim dise ce la Profeta Muhammed ia asende a la sielo. La pape ia pasea alora a la mascita prosima.

Parlante a la Mufti Grande de Ieruxalim, la Pape ia devia de se comentas preparada per espresa la desira ce cristianes, iudis, e muslimes "ta ama la un la otras como frates e sores".

"Ta ce nos aprende comprende la sufri de otras," el ia dise. "Ta ce nun malusa la nom de Dio en violentia."

El ia lasa ance un prea scriveda en un fesur en la petras antica de la Mur Ueste, ante abrasa du amis prosima de Arjentina (se pais de nase): un imam e un rabi ci ia viaja con el.

A pos, la Pape ia visita un semetero, do el ia pone un garlanda a la tomba de Theodor Herzl, la fundor de sionisme moderna. A la demanda de Benjamin Netanyahu, la ministro xef de Israel, el ia para ance nonprevideda a un monumento per siviles israeli matada en atacas filastini.

El ia partisipa en un rituo seria a Yad Vashem, la loca ofisial nasional de recorda la vitimes iudi de la Olocausto, e ia fa un conversa privata con Presidente Peres, de ci el ia demanda la garantia ce peregrinores va pote asede libre la locas santa de la site.

2014-05-26

Obama surprende soldatos par un visita a Afganistan

Barack Obama, la presidente de la SUA, ia fa un visita nonanunsiada a se fortes militar en Afganistan.

Obama ia vola tra la note de Washington a la campo de avion a Bagram, prosima a Kabul, do el ia parla a soldatos.

Se visita ia aveni a la dia ante la Dia de Memoria, cuando persones en la SUA recorda soldatos mor.

En esta visita Obama no ia encontra la presidente afgan, Hamid Karzai.

La plu de soldatos stranjer va retira se de la pais ante la fini de esta anio, ma la SUA espera reteni ala un cuantia peti de soldatos tra un tempo plu longa, per instrui fortes de securia afgani.

An tal, la esta espera depende de la presidente veninte de Afganistan, ci on va eleje en junio. El va debe suscrive un acorda biladal de securia, cual Karzai ia refusa.

La Taliban ia aumenta se atacas ante la retira de fortes de OTAN e la SUA.

2014-05-25

Un ataca par fusil a un museo iudi en Beljia

Un om ia mata tre persones par fusil a la Museo Iudi en Bruxelles, la capital de Beljia. Un person cuatro ia es grave ferida.

La atacor ia ariva par auto, ia sorti de la veculo, ia fusili persones a la entra de la museo, e ia revade a la Audi, cual ia move rapida a via.

Un de la persones prima ci ia ariva pos la aveni ia es Didier Reynders, la ministro de esternas. El ia dise ce el ia es xocada par la ataca: "Me ia oia ruidos de xuta, ia freta a asi, e ia vide la corpos sur la tera."

Yvan Mayeur, la maior de Bruxeles, ia dise ce tre omes e un fem ia es atacada en lo cual ia es probable "un ata teroriste". El ia dise: "La aveni es clar estrema seria, e ance a la Museo Iudi. Acel no es un coaveni."

Un atestor ia descrive vide du corpos en la atrio de la construida. Un ia es un fem joven covreda con sangue, teninte un folieta, con aspeta de turiste.

Alga persones ia es medical tratada per xoca pos la fusili en la sentro de la site.

Joëlle Milquet ia comenta ce tota indicas sujesta un ataca antisemita. La ministro xef, Elio Di Rupo, ia espresa se compatia e suporta per la familias de la vitimes.

2014-05-24

Trenes franses es tro larga per la plataformas

SNCF, la compania nasional de trenes en Frans, ia descovre ce 2000 trenes nova, comandada a custa de 15 mil milion euros (20,5 mil milion dolares), es tro larga per multe plataformas provinsal.

La era ia custa ja plu ca 50 milion euros a la compania. On ia comensa laboras per ajusta la plataformas de stasiones per dona un spasio sufisinte per la pasa de la trenes. Ma on debe ancora cambia sirca mil plataformas.

Lo pare ce la era ia aveni car RFF, la compania nasional de ferovias, ia furni dimensiones noncoreta a SNCF.

On ia mesura plataformas construida a min ca 30 anios ante aora, oblidante ce multe plataformas provinsal ia es construida a plu ca 50 anios ante aora, cuando trenes ia es min larga.

La problem es ce la bordas de la plataformas es tan prosima a la reles ce la trenes no pote entra a la stasiones.

Un portavose per la RFF ia dise ce los ia "descovre alga tro tarda la problem".

Frédéric Cuvillier, la ministro de transporta, ia culpa "un sistem asurda" per la caos. El ia comenta: "Cuando on ave companias separada per ferovias e trenes, tal cosas aveni."

2014-05-23

Yingluck encontra gidores militar pos un colpa de stato en Tai

En Tai, a la dia pos un colpa de stato par soldatos, Yingluck Shinawatra, la gidor desponeda ia apare a un compleso militar en Bangkok. El es entre plu ca 100 politicistes clamada par la armada.

La militaria ia proibi ce 155 politicistes major parti de la pais sin permete.

En jovedi, la armada ia suspende la constitui, ia proibi asemblas, e ia teni politicistes, disente ce la bon ordina sosial es nesesada pos menses de protestas tumultosa contra la governa.

En la posmedia de venerdi, lo ia pare ce Yingluck ia parti de la loca a do on ia clama el, e ia vade a un otra compleso militar. On no sabe esce el es libre.

Alga membros de parlamento ci favore la governa ia asconde se. La promove antigoverna ia declara un vinse, e ia envia se suportores a casa.

Internasional, on ia critica vasta la colpa de stato, cual ia aveni a la dia du pos la declara de un rena militar. La Nasiones Unida ia recomenda forte "un revade pronto a un rena constitual, sivil, democrata."

En la entretempo, tais ia pasa la note su un proibi de sorti, cual ia dura de 22:00 a 05:00. Bangkok ia es jeneral pasosa.

En la 16 oras prima de la rena militar, autoriosas ia fa du comandas e 19 anunsias. Cada es lejeda con repetes en canales de radio e TV – cual es silente a otra tempos, estra ce los jua musica tradisional usada per saisis militar. De tempo a tempo, portavoses de la armada apare per un tempo corta e leje anunsias ofisial.

2014-05-22

Xina e Rusia suscrive un acorda enorme sur gas

Vladimir Putin, la presidente de Rusia, ia suscrive un acorda con Xina sur furnis de gas per tredes anios.

La preparas de la acorda entre la compania rusce Gazprom e la Corpora Nasional Xines de Petrolio ia ocupa des anios.

Rusia ia desira trova un mercato nova per se gas, car lo fronti la posible de punis economial par Europa sur la crise en Ucraina.

On no ia anunsia un custa ofisial, ma espertas estima ce la acorda ave la valua de plu ca 400 mil milion dolares.

La suscrive ia aveni a un confere en Xanghai. On previde ce lo va furni 38 mil milion metres cubo de gas natural per anio a la economia de Xina, comensante en o sirca 2018.

La discutes xef ia pertine a la custa, e analistes crede ce Xina ia negosia forte per redui esta.

En la des anios pasada, la pais ia trova ance otra furnores de gas. Turcmenistan es aora se furnor stranjer la plu grande, e en 2013 la pais ia comensa importa gas natural par tubo de Miama.

2014-05-21

Un scermo de sol per un rascasielo

On va ajunta un scermo permanente a un rascasielo nova en London per preveni ce la lus cual lo refleta de la sol dana imobilas visina.

En la estate pasada, la brilia de la construida nomida "Walkie-Talkie" (radio de du dirijes) ia fonde veculos parcida e ia causa dana a botecas prosima. La scermo va sustitui per un sistem tempora cual on ia erije pos multe cexas en la anio pasada.

En setembre, en cuando la rascasielo de 37 niveles ia es ancora en construi, botecores en un strada visina ia trova ce la lus refletada ia buli la pinta sur se imobilas, ia rompe telias, e ia scalda stofas e tapetos de porte.

La brilia e caldia estrema ia dana ance veculos, incluinte un Jaguar, de cual se miror ladal, se paneles, e se insinia ia deveni fondeda.

La posedor de la rascasielo ia paia sirca mil paundes (1,7 mil dolares) a la motoriste, e ia ajunta un scermo tempora a la construida.

On dise ce la erije de la scermo nova no va impedi clientes de comensa usa la rascasielo. La spende no va afeta multe la custa orijinal estimada de construi: 200 milion paundes (335 milion dolares).

2014-05-20

Un rena militar comensa subita en Tai

La armada tai ia crea un rena militar a media de un crise political, "per manteni la bonordina sosial".

En la anunsia surprendente, la armada ia reseta ance potias forte per enforsa se deside.

La militaria ia insiste ce esta no es un colpa de stato. An tal, soldatos ia saisi stasiones de televisa e radio, e ia bloci stradas en la capital, Bangkok.

Esta segue menses de tensas cresente entre la governa e la oposa.

La cambia pote furia suportores de la governa, spesial si on va regarda lo como un colpa de stato. La armada ia fa a la min 11 tal colpas de pos la fini de la monarcia asoluta en 1932.

Soldatos ia entra a la construida xef de governa en Bangkok, cual ia sta nonocupada pos menses de protestas violente par oposores ci vole despone un governa cual los descrive como frodante.

La militaria ia comanda ance un sensura jornaliste per aida "la securia nasional".

On ia comanda protestores oposante e nonoposante a no fa marxas en cualce loca, per preveni combates.

2014-05-19

On teme un ondon inondante en Serbia

En Serbia, laborores de crise prepara per un "ondon inondante" sur un de la rios xef de la pais. On previde ce la acua de la Rio Sava va ateni un profondia estrema, menasante la sentro eletrical la plu grande en Serbia.

Esta segue la inondas la plu sever en desenios, cual ia lasa plu ca 35 persones mor e ia obliga desuples de miles de persones a fuji de se casas.

En Bosnia e Hersegovina, liscas de tera ia covre casas e disturba minas teral cual on ia depone en la gera de la desenio de 1990.

La inondas afeta ance Corvatsca. Tre menses de pluve ia cade sur la area en sola un pico de dias, causante ce rios supraflue e entra en la casas de la popla. On ave ancora avisas de inonda en multe partes de Serbia e Bosnia norde.

En soldi, on ia regania des-du corpos de Obrenovac, un vila serbsce. Con estas, la cuantia de mores en Serbia deveni 17.

En la entretempo, on crede ce 19 persones, e cisa plu, ia mori en Bosnia, e la autoriosas averti ce la cuantia pote crese ancora.

En la capital serbsce, Beograd, la pluve ia sesa final. Ma ofisiores teme ce acua fluente de Corvatsca e Bosnia pote crea un ondon sur la Rio Sava. Laborores e bonvolores ia pila sacos de arena longo la rio en Beograd e otra vilas.

2014-05-18

On descovre la dinosauro la plu grande de istoria

On ia desentera la osos fosilida de un dinosauro, sur cual on crede ce lo es la animal la plu grande cual ia sta a cualce tempo sur la tera.

Calculas fundida sur se osos de coxa revela ce lo ia ave 40 metres de longia e 20 metres de altia – egal a un construida de sete niveles. Lo ia pesa 77 tones, tan pesosa como 14 elefantes african, e plu pesosa par 7 tones ca la recordo presedente, Argentinosaurus.

Siensistes crede ce lo es un spesie nova de titanosauro, un erbivor enorme cual ia esiste en la periodo Crestasica Tarda.

Un cultivor local ia trova prima la restas en la deserto prosima a La Flecha, a sirca 250 cilometres a ueste de Trelew en Patagonia.

La fosiles ia es escavada par un ecipo de paleontolojistes de un museo. Los ia desentera la sceletos partal de sete individuas – sirca 150 osos en soma – de cual tota ia es en "un state notable bon".

An con se grandia vasta, la dinosauro recordo ancora no ave un nom. La rexercores ia dise: "On va nomi lo per descrive se merveliosia, e per onora no sola la area ma ance la cultivores ci ia avisa nos sur se descovre."

2014-05-17

Modi anunsia la vinse forte de se partito en Barat

Narendra Modi, la minstro xef futur de Barat, ia anunsia un vinse "monumental" par se partito, la BJP, en la vota nasional.

Grasiante suportores en se stato propre de Gujarat, Modi ia dise ce los ia scrive un capitol nova en la istoria de la pais.

La conta de votas asta aora sujesta ce la BJP va fa la vinse la plu forte par cualce partito en 30 anios, desponente la Partitio de Congresa.

La gidor controversa ia campania sur prometes de revive la economia. Ma multe baratis es ancora profonda consernada par alegas ce el ia fa poca per para tumultas publica en Gujarat en 2002, cuando el ia es la ministro prima de acel stato. A la min mil persones ia mori, de cual la plu ia es muslim. Modi ia nega sempre la alegas.

Cuando lo ia deveni clar ce la BJP ia vinse, Modi ia tuita: "Barat ia gania – bon dias es a punto de ariva". Esta ia deveni la tuita la plu reenviada en la istoria de la pais.

Disente ce el va rena per tota baratis, el ia descrive la noncomunia de la vinse a se suportores: "En la istoria de 60 anios de autonomia barati, me ia vide nunca en la medios publica lo cual vos ia fa en nos pais." Se suportores ia cria se nom a multe veses.

2014-05-16

Un malversa de petrolio sur la stradas de Los Angeles

En la SUA, un tubo ia malversa sirca 38 mil litres de petrolio en la stradas de Los Angeles.

Un geser de petrolio ia jeta a un altia de ses metres, covrente un area con longia de cuatro sincis de un cilometre.

On ia clui la tubo de un controleria distante, e ia suca la plu de la petrolio a via ja ante la ora ses de la matina.

Cuatro persones ia reporta problemes de respira, e du ia vade a ospital. Alga companias comersial ia es afetada, e un loca de note ia es vacuida.

La tubo no ia es situada su la tera. Lo ia rompe en la oras temprana de jovedi, prosima a un strada major.

On ave "no atestas vidable" ce petrolio ia entra a la cloacas tempestal de la site, cual porta acua de pluve a la rio. An tal, lo es posible ce alga petrolio ia trova un via su la covrentes de bucos de cloaca en la area.

Ecipores ia usa arena per aida bloci la petrolio fluente, e la departe local de transporta ia aida maneja la problemes de trafica.

2014-05-15

Coleria contra Erdoğan pos un desastre de mina turces

Pos un desastre matosa en un mina de carbon en la vila Soma en la ueste de Turcia, la popla ia coleri contra se governa.

Persones en la vila ia cria insultas en cuando los ia ensirca la auto de Recep Tayyip Erdoğan, ci ia visita la sena. Protestores ia combate con la polisia en Istanbul e Ankara.

Un esplode a martedi ia causa la colasa de la mina, matante a la min 245 laborores.

Salvores xerca ancora desuples de minores mancante, sur ci on teme ce los ia mori. On ia salva cuasi 450 laborores, ma la trova de survivores nova ia sesa, e la state de plu ca 100 es ancora nonconoseda. On ia trata otodes de la salvadas per se feris, cual no ia es grave.

La tera sirca la ospital es ocupada par la familias de la minores. Se espeta ia deveni un vijila. Alga de los senta con regarda fisada a la tera. Otras plora. De tempo a tempo, paramedicistes porta a via algun ci ia desmaia.

Protestores ia pedi la auto de Erdoğan, clamante per se resinia, pos cuando el ia fa un confere jornaliste sur la desastre. Cuando el ia emerji, el ia debe refuja se en un boteca, ensircada par se gardacorpos.

On ia critica se calosia pos cuando el ia defende se governa par refere a multe otra asidentes de mina tra la mundo. El ia promete un investiga plen.

En la entretempo, polisia en la capital, Ankara, ia xuta gas lacrimojen a sirca 800 protestores ci ia atenta marxa de un universia a la ministreria de enerjia. Protestas ia aveni ance en Istanbul, estra la xeferia de la compania cual posese la mina.

2014-05-14

On trova cisa la ruina de la barcon prima de Colombo

Un investigor SUA crede ce el ia descovre su acua la ruina de la Santa Maria, la barcon prima de la mision famosa de Cristoforo Colombo.

Barry Clifford ia dise ce la indicas "sujesta forte" ce un ruina prosima a la costa norde de Aiti es acel barcon. Con se ecipo, el ia mesura la ruina e ia fa fotos de lo.

El labora aora con la governa aitian per proteje la loca per permete un investiga plu detaliosa.

La Santa Maria, con ance la Niña e la Pinta, ia partisipa en la viaja de Colombo en 1492, cual ia esplora isolas en la Mar Caribean en atenta trova un pasaje a ueste en dirije a Asia.

La barcon prima ia es perdeda en la mision, no longa ante la reveni de Colombo a Espania.

Clifford ia identifia la loca posible de la Santa Maria par studia descovres arceolojial plu temprana cual ia indica un loca probable per la fortres de Colombo – un construida sur cual espertas ia crede sempre ce on ia erije lo prosima a do la barcon ia encalia.

El ia usa ance informas de la jornal personal de la esploror. Un projeta resente de tufa, prosima a la loca, ia forti se crede ce el ia trova la Santa Maria. On ia trova ala ance un canon de un desinia de la sentenio 15.

2014-05-13

Turcia debe paia 90 milion euros per se invade de Cipros

La Corte European de Diretos Umana ia deside ce Turcia debe paia 90 milion euros (123 milion dolares SUA) en compensa per se invade de Cipros en 1974. Entre la compensas comandada asta aora par la corte, esta es un de la plu grandes.

La isola resta divideda depos 1974, cuando Turcia ia invade la norde en responde a un colpa militar ala cual la governa elinica ia suporta De acel tempo, la tri norde es xef abitada par cipricas turces, e la du tris sude par cipricas elinica.

En la judi a lundi, la corte ia trova ce Turcia es ancora obligada a paia compensas, an pos la cuatrodes anios cual ia pasa.

La corte ia deside ce Turcia debe paia 30 milion euros per la sufri de relatadas de los ci ia desapare en la invade. Lo ia comanda un plu paia de 60 milion euros per la sufri de cipricas elinica ci abita sur la penisola Karpas, un enclave en Cipros norde.

Turcia no ia segue sempre la comandas de la corte. Lo ave ancora sirca 30 mil soldatos sur la isola, e lo es la sola pais cual reconose Cipros norde como un teritorio separada.

La Nasiones Unida estima ce 165 mil cipricas elinica ia fuji o ia es escluida de la norde, e 45 mil cipricas turces de la sude. Ma la partitos consernada dise ce la cuantias es an plu grande.

Gidores ciprica fa aora discutes nova con espera de reconsilia la diferes e reuni la isola.

2014-05-12

Xina va construi un ferovia nova en Africa este

En Nairobi, la capital de Cenia, on ia suscrive acordas formal per un projeta de construi un linia nova de ferovia en Africa este con aida xines.

Lo va vade de Mombasa a Nairobi, e va estende ultima tra Uganda a Ruanda e Sudan Sude. En Cenia, lo va recambia un linia streta cual on ia construi a plu ca 100 anios ante aora, su la rena colonial brites.

Xina va finansia 90% de la costa de la paso prima, estimada a 3800 milion dolares, e la labora va es realida par un compania xines.

On previde ce la construi va comensa en otobre de esta anio, e ce la ferovia de 610 cilometres entre Nairobi e la mar va es finida en la temprana de 2018.

Uhuru Kenyatta, la presidente de Cenia, ia dise: "La costa de move nos persones e nos benes a traversa de nos bordas va diminui multe." En pasada, el ia clari ce la lia nova va redui la costa de envia un ton de carga tra un cilometre de 0,2 de un dolar SUA a 0,08.

Li Keqiang, la ministro xef de Xina ia comenta: "Esta projeta mostra ce on ave colaboras egal e beneficas mutua entre Xina e la paises de Africa Este, e la ferovia es un parte multe importante de la developa de infrastrutur transportal."

Seguente la detalias de la acorda, la Banco de Esportas-Importas en Xina va furni 90% de la costa de la fase prima de la ferovia, e Cenia va furni la resta.

La construi de la linia orijinal ia comensa en Mombasa en 1895, e la ferovia ia ateni Nairobi en 1899 e Lago Victoria en desembre 1901.

La labora ia es difisil e perilosa. A la min 2000 laborores ia mori, de cual multe ia es baratis venida a Africa per fa la construi. Problemes ia es causada no sola par asidentes, ma ance par maladias como malaria e disenteria – e par animales savaje.

2014-05-11

Restas nonidentifiada es redonada a Punto Zero en Manhattan

En un rituo formal, miles de restas nonidentifiada pos la atacas de 9 setembre 2011 ia es redonada a Punto Zero.

Des-sinco veculos ia porta los de la Ofisia de la Esaminor Medical Xef a un compleso dedicada, su do la Sentro de Comersia Mundal ia sta. La move ia divide opinas entre la familias de vitimes, de cual alga ia fa un protesta a la loca.

La atacas ia mata sirca 3000 persones en New York, la area de Washington DC, e Pennsylvania. La restas es 7930 fratos de texeda umana cual ecipos investigante no ia susede identifia. On ia pone los en caxas de metal, ia covre los con la bandera SUA, e ia prende los en un convoia de camiones de pompor e veculos de polisia a la sentro de Manhattan.

Pompores e polisiores ia pone la caxas en un compleso su la Museo de Recorda ala, a 20 metres su la tera. On va permete ce sola membros de familia e ecipos investigante asede los. En esta modo, on va pote fa atentas nova de identifia la restas, seguente avansas posible de siensa.

Alga membros ia protesta silente, fininte se vijila direta ante la aveni de la rituo. Los crede ce la restas de la vitimes debe es situada en un monumento respetosa, e no en la susolo de un museo. Ma otra familias ia suporta la deside.

De la 2753 persones ci ia mori a la Sentro de Comersia Mundal, 1115 es nonidentifiada.

On ia construi ja un rascasielo nova a la loca de la tores jemelo presedente. Lo es aora la construida la plu alta en la emisfera ueste.

2014-05-10

Putin es tratada como un eroe en un visita a Crim

La presidente rusce, Vladimir Putin, ia fa se visita prima a Crim de pos cuando Rusia ia prende lo de Ucraina en marto.

A folas festinte la vinse soviet contra la nazis en 1945, el ia dise ce Crim ia mostra un fida a "un veria istorial" cuando los ia eleje deveni un parte de Rusia. Ma la governa ucrainsce ia protesta contra la visita, descrivente lo como "un viole grande de la autonomia de Ucraina".

Kiev ia reporta ance ce alga persones ia mori en un opera de securia contra separadistes en Mariupol. Arsen Avakov, la ministro ucrainsce de internas, ia dise ce sirca 20 protestores prorusce e un securior ia es matada en la porto sude. Soldatos ucrainsce e separadistes ia combate a la xeferia de polisia, cual on ia ensende.

En Sevastopol, un porto crimsce, Putin ia grasia la fortes militar per se rol en la Gera Mundal Du, e ia bonveni la ajunta de la penisola a la Federa Rusce.

El ia regarda un parada volante de aviones rusce, e ia parla a marinores sur barcones, en cuando folas ia asembla sur presipes regardante la porto. En cuando el ia pasea tra la plaza xef, presante manos con persones crimsce, on ia trata el como un eroe vinsente.

Plu temprana, Putin ia parla a miles en un parada enorme en la Plaza Roja de Moscva, prometente defende "la pais propre". El ia dise ce 9 maio, conoseda en Rusia como la Dia de Vinse, es "un dia de lamenta e recorda eterna", e ia asentua como "la vole ferin de la popla soviet" ia salva Europa de sclavia.

2014-05-09

Un japanes es arestada per crea fusiles con un primador 3D

En Japan, on ia aresta un om de 27 anios de prosima a Tokyo, alegante ce el ia posese fusiles creada con un primador de tre dimensiones.

La polisia ia saisi sinco fusiles, de cual du es capas de xuta baletas en modo matante, e ance la primador cual ia produi los. On no ia trova munis usable.

Polisiores ia reata pos cuando Yoshitomo Imura ia esibi se fusiles en videos enlinia. Esta es la aresta prima de se spesie en Japan.

Imura ia dise ce el no ia comprende ce primi la fusiles es nonlegal.

La fusil prima creada con un primador 3D ia es xutada en maio 2013 en la SUA, par un grupo ci ia publici enlinia la scemas. La governa SUA ia esije rapida ce on sutrae la scemas de la rede.

2014-05-08

Barcones de Xina e Vietnam colpa mutua

Barcones viet e xines ia colpa la un la otra en la Mar de Xina Sude, cuando la marina viet ia atenta impedi la xineses de institui un plataforma de petrolio en un area reclamada par ambos nasiones.

No fusiles ia es usada, ma ofisiores viet ia dise ce on ia usa canones de acua contra se barcones. Alga marinores ia es ferida.

Esta es la aveni maral la plu grave entre la du paises en multe anios, e desuples de barcos es aora en la area.

La vietes ia dise ce la barcones xines ia puxa se barcones con intende, e ce esta es la ves tre de un tal xoca de pos 3 maio.

Ofisiores xines ia dise ce la plataforma es situada en la acuas teritorial de Xina.

A la mesma tempo, la polisia pilipina ia saisi un barco xines de pexa, e ia aresta se 11 ecipores en un otra parte disputada de la Mar de Xina Sude. La ministeria de esternas xines ia descrive esta ata como provocante, e ia esije ce on libri direta la pexores, ci on ia prende ia un porto pilipina.

Xina reclama partes grande de acel mar, incluinte resifes e paradores de arena prosima a la costa de la Pilipinas. Tota de Vietnam, la Pilipinas, Brune, Malaisa, Xina, e Taiuan es en compete sur la posese de la area.

2014-05-07

On ofre un monte engles per vende

Un aristocrata brites atenta vende un monte per paia se impostas vasta. El ia prefere vende lo, en loca de descasi otras ci abita sur la imobila cual se familia posese ja tra sentenios.

Hugh Lowther, la Conte de Lonsdale, ia ofre Blencathra, un monte con altia de 869 metres, contra 1,75 milion paundes. Lo es situada en la Distrito Lagosa en la norde-ueste de England.

Par erita pos la mori de se padre en 2006, el debe aora 9 milion paundes de impostas.

La person ci compra la monte va reseta ance la direto de usa la titulo "Baron de la Feudo de Threlkeld", e de pone 5471 oveas fema, 732 oveas joven, e 200 ovetas a pasto.

Blencathra es ance conoseda como Saddleback ("dorso de sela") par causa de se forma notable. Alfred Wainwright, un autor famosa de libros gidante pasada, ia descrive lo como "un de la ojetos la plu grandiosa en la Distrito Lagosa, e un de la plu bon conosedas".

Lo atrae paseores e turistes de la mundo intera, e es vidable tra un area grande de la parte norde de la contia Cumbria.

John Robson, ci organiza la vende de la monte, ia dise ce lo no es simil a cualce ben cual el ia maneja a ante.

2014-05-06

Migrantes a Elas afoca cuando se barcos inversa

La gardacosta elinica dise ce du barcos portante migrantes ia inversa en la Mar Ejean. A la min 22 persones ia afoca, e sete otras manca. On ia salva 36 survivores de la mar, e la xerca continua.

Elas es un porton major per migrantes e refujadas ci atenta ateni la Uni European. Multe traversa la mar de Turcia, e asidentes aveni frecuente.

La trafica maral de refujadas ia crese agu en la anio pasada, par causa de controlas plu sever a la borda teral entre Elas e Turcia a la norde. La gera continuante en Suria ia es ance un causa contribuinte.

En esta caso, la du barcos ia afonda a lundi, a un distantia de sirca milias maral de la isola elinica Samos, prosima a la costa turces. On ancora no sabe la nasionalia de la migrantes.

Barcos de gardacosta, barcos de pexa, du elicadores de xerca e salva, e un barcon de turi aida la xerca per survivores.

Elas, Italia, e Malta ia demanda repeteda ce la otra paises en la UE fa plu per aida los a maneja la cuantias grande de migrantes cual ariva a se costas. La barcos es usual suprafolida e organizada par traficores en Turcia ci fatura miles de dolares per la traversa perilosa.

Elas ia aumenta la securia de se borda con Turcia en agosto 2012.

La UE dise ce lo investa a plu patrulias maral, pos cuando plu ca 400 persones ia afoca en du ruinas de barco a Lampedusa, un isola italian, en otobre 2013.

2014-05-05

Jinastas de sirco es ferida en un asidente

Des-un persones ia es ferida cuando un grupo de jinastas fema ia cade de un plataforma a un sirco en la state Rhode Island de la SUA. Un person es en un state grave.

La oto jinastas ia cade tra sirca 10 metres pos la colasa subita de la strutur cual ia suporta los.

Los ia es en la media de un presenta, pendente par se capeles, en un "candelabro umana". La presenta ia envolve ance motosicles.

Seguente la pajeria de la sirco, la grupo es capas de "jira, pende de anelos, e desende sedas, en cuando los es suspendeda sola par se capeles".

On ia lansa un investiga sur la asidente.

2014-05-04

Nijeria clui scolas per securi un confere

La governa de Nijeria va clui scolas e ofisias de governa tra la capital Abuja per la aveni de un confere major en la semana veninte.

On promete un securia forte per proteje plu ca 1000 delegadas a la consenta de tre dias, pos du bombis matante en la capital.

Un esplode en la tarda de jovedi ia mata 19 persones, e un bombi prosima ia lasa 75 mores a du semanas a ante. On culpa Boko Haram, un grupo combatosa islamiste, per la violentia. La nom de la grupo sinifia "instruis ueste es proibida" en hausa.

On crede ce la mesma grupo ia organiza la saisi de plu ca 200 xicas adolesente de se scola en la state Borno en la norde-este de la pais, a plu ca du semanas ante aora.

Boko Haram ia fa un serie de atacas en Nijeria norde en la anios resente, matante sirca 1500 persones en mera esta anio.

La governa de presidente Goodluck Jonathan dise ce 5000 polisiores e soldatos va garda la Foro Economial Mundal sur Africa, cual va comensa a martedi. La ministro xef de Xina, Li Keqiang, va partisipa a la confere, como ance la presidentes de Ruanda, Senegal, e Cenia.

La razona ofisial per la clui es serti un flue lisca de trafica, ma lo es multe probable ce on vole ance aumenta la nivel de securia. Con min veculos sur la stradas, xercas pote es plu atendosa, e la cuantia de blancos posible per bombis nova va es reduida.

2014-05-03

Un focon svensce esplode botes de pexes putrida

Un focon en un beneria a la costa este de Sveria ia causa ce botes de pexes fermentada ia esplode e vola tra la aira.

Cuando lo ia arde, la construida ia conteni mil botes de surströmming (arenges putrida), un de la comedas la plu malodorosa de mundo.

Cuatro persones dorminte supra la beneria ia evade sin feris.

La focon ia aveni a la matina de jovedi, prosima a la vila Enånger en la area Hudiksvall.

La botes de arenge ia crese ja par causa de la gases potios de fermenta cual los ia conteni. Los ia deveni plu caldida par la focon, e ia esplode tra un periodo de ses oras.

Un de la botes ia vola supra la teto de un latrina, e un otra ia traversa la baia e ia atera a un casa visina. A la comensa, la pompores ia crede ce la esplodes ia es causada par botelas de propano.

Surströmming es un plato tradisional de Sveria norde. On fermenta arenges baltica en bariles tra menses, ante pone lo en botes per continua la fermenta. La odor de la comeda es tan repulsante ce on come comun lo su sielo.

Alga airolinias major ia proibi lo, razonante ce lo es un compresada e donce capas de esplode.

2014-05-02

La David de Michelangelo es perilida par se talos

La sculta de David par Michelangelo risca colasa su se pesa propre, par causa de tensa a se talos debil.

La sculta, cual sta en la site italian Firenze, ave un pesa de 5,5 tones e un altia de 5 metres. Lo mostra indicas de fratos pico en se gamas.

La plu de la pesa es suportada par un trunca de arbor siselida, pos la gama destra de David, ma ance esta pote conteni fesures. On ia covre los con jeso tra la anios, ma los tende sempre reapare.

On ia descovre locas debil en la talos de la sculta orijinal pos un serie de probas par sentrifuga a copias fada de jeso. Rexercores suspeta ce esta ia developa en cuando David ia sta tra plu ca tre sentenios en la plaza xef de Firenze, apoiante a ante a un angulo perilosa.

La sculta ia es ja frajil par causa de la grado povre de marmo cual Michelangelo ia eleje per se obra mestral.

On ia sujesta ce un trematera, o an reparas de strada, ta pote fa ce lo cade. On ia recomenda move David a un sala secur contra tremas, o a un loca nova estra la site.

2014-05-01

Viajores es atacada a un stasion en Xinjiang

Xi Jinping, la presidente de Xina, ia recomenda forte "atas nonvasilante" contra atacas teroriste en Xinjiang, pos un bomba matante a un stasion de ferovia.

La esplode ia aveni a martedi en cuando la presidente ia completi un turi de la area ueste. Tre persones ia es matada, e 79 ia es ferida. La atacores ia usa coteles e esplodentes a la stasion sude de Urumqi.

Xinjiang ia esperia un serie de atacas violente en la anio pasada. Beijing culpa separadistes de la minoria uigur, xef muslim, per la violentia.

Esta ataca nova segue un simil a la stasion de Kunming en Xina sude en marto. Alora 29 persones ia mata. On ia culpa uigures ance per acel.

La visita de Xi a Xinjiang ia es se prima de pos deveni presidente en 2012. El ia dise ce lo es esensal ce on "comprende profonda la separadisme de Xinjiang".

La ataca a Urumqi ia comensa con un esplode a un sorti de la stasion a sirca 19:10, en cuando la tren de Chengdu ia ariva. La atacores ia coteli persones a la sorti de la stasion, e ia crea un esplode a la mesma tempo.

Tota la feridas reseta cura medical.

Atestores ia dise ce la esplode ia pare aveni en bagaje lasada sur la tera entre un sorti e un parabus.