2014-07-31

Un panica matante a un conserta ginean

A la min 34 persones ia mori en un panica en Gine, a un conserta per selebra la fini de Ramadan, la mense santa muslim.

La ofisia de la presidente ia declara un semana de lamenta nasional per lo cual lo ia descrive como "un drama trajediosa" a un conserta par Instinct Killers, un grupo rap de la pais.

Lo pare ce tota la mores ia es adolesente. Desuples de otra persones ia es ance ferida.

La conserta ia aveni a la sera de martedi sur un plaia en Ratoma, un suburbe norde de la capital, Conakry. Atestores ia reporta ce asta 10 mil persones ia es presente.

Esta no es la aveni prima de esta spesie en Gine. En janero de la anio pasada, ses persones ia es matada sur un otra plaia de la suburbe a un conserta rege.

On ia desemplea aora la xef de la comite governal per divertis.

2014-07-30

Un xica japanes confesa mata un otra

Un xica japanes ci on ia aresta a soldi ia confesa ce el ia mata e desmembri un otra xica en se clase. La polisia ia dise ce el ia confesa "desira mata algun" e desmembri un corpo.

Japan ia esperia alga matas de enfantes par enfantes. Un caso simil ia aveni en la mesma site, Sasebo, a des anios ante aora.

En la caso presente, la corpo de Aiwa Matsuo – ci ia ave 15 anios – ia es trovada en la casa de la suspetada en la matina temprana de soldi. Se jenitores ia clama la polisia cuando el no ia reveni a casa.

La suspetada no pote es nomida, car el es un enfante, ma el ave 16 anios. A la note de saturdi, el ia revade con la vitim a se casa propre, do el ia abita sola de pos april. Ala, el ia colpa la retro de la testa de Matsuo con un util e ia strangula el con un corda.

On ia trova la vitim con se testa e mano sinistra taliada a via, e con se ventre abrida par talia. La polisia ia trova un martel e un siera a la casa.

Lo pare ce la suspetada ia publici ance alga mesajes sur un foro de interede, incluinte fotos de un mano sanguosa. Esta mesajes ia comensa a sirca du oras pos la mori de Matsuo.

La suspetada ia ave un istoria de problemes. Se madre ia mori de canser en la anio pasada, e se padre ia resposi resente. El mesma ia es preparante per studia estra pais. Aora on va fa un evalua psiciatrial sur el.

2014-07-29

Liberia isoli se par causa de Ebola

La plu de locas do on pote traversa la borda en Liberia ia es cluida. Comunias atacada par la virus Ebola va es isolida per atenta para la estende de la maladia.

On prepara ance sentros de esamina a la poca locas major de entra cual va resta abrida, per esemplo la airoporto xef.

En la entretempo, Arik Air, la compania la plu grande de volas en Nijeria, ia pospone tota aviones a Liberia e Siera Leon pos la vola de un om con Ebola a la airoporto de Lagos en Nijeria en la semana pasada.

La virus ia mata a la min 660 persones en Africa Ueste de pos febrero 2013.

La aveni ia comensa en Gine sude, de do lo ia estende a Liberia e Siera Leon. Lo es la plu matante de mundo asta aora.

Tota locas de entra a Nijeria es aora estrema vijilante.

2014-07-28

La NU demanda un sesafusili sin restrinje en Gaza

La Consilio de Securia de la Nasiones Unida ia demanda "un sesafusili umaniste, direta e sin restrinje" en la Banda de Gaza.

Un consenta de crise ia suporta un declara demandante un sesafusili a la fini de Ramadan "e continuante".

Ambos la ambasadores filastini e israeli a la NU ia critica la declara, ma per razonas diferente.

La fini de semana ia es puntuada par sesafusilis corta ofreda par ambos lados, ma la operas militar israeli e la xutas de rocetos par Hamas ia continua.

Plu ca 1030 filastinis ia mori, de cual la plu ia es nonmilitar, e 45 israelis ia es matada, de cual 43 ia es soldatos. Un tai en Israel ia mori ance.

A soldi, la ministreria de sania de Gaza ia redui la cuantia declarada de mores filastini par 30, pos cuando alga relatadas ia retrova membros de se familias.

Oji, la militares de israel ia reporta un ataca nova par roceto en la matina, disente ce lo ia colpa un area de Israel sin construidas.

En la note, la batalia en la Banda de Gaza ia pausa, e la plu de la abitores ia bonveni la reposa pos tre semanas de gera.

Ma con tan multe moris e tan multe destrui, Gaza ave poca per selebra a la festa de Eid a fini de Ramadan.

2014-07-27

Un ferovia rapida es abrida en Turcia

Turcia ia abri un ferovia multe rapida entre Istanbul e Ankara. Esta dui la sete oras nesesada a ante per viaja entre la du sites.

Recep Tayyip Erdoğan ia viaja sur la tren prima de Ankara, e ia para a un vila en via per fa un parla political campaniante.

La ferovia permete ce trenes ateni un rapidia de 250 cilometres per ora.

Erdoğan es un aspiror en la elejes presidental cual va aveni en agosto. El ia promete refresci la rede de transporta en la pais.

La abri de la ferovia ia es ja posponeda per causas diversa, de cual la plu resente ia es la xoca de un tren a un veculo de manteni.

La servi nova va fini en la suburbe Pendik de Istanbul, sur la lado asian de la Streta de Bosforo.

La governa intende construi un otra ferovia nova, su la Bosforo, gidante a la sentro de la site. Ma on no sabe cuando esta va es realida.

2014-07-26

Wikipedia proibi editas de la Salon Basa de la SUA

Dirijores de Wikipedia ia proibi editas anonim per 10 dias par computadores a la Salon Basa de la SUA.

La proibi segue la ajunta de cambias a articles sur politicistes, companias, e avenis istorial major.

On ia edita la biografia de Donald Rumsfeld, la ministro pasada de defende SUA, per dise ce el es "un lezardo estrateran ci come bebes mexican".

Editas de computadores a la adirije redal de la Salon Basa ia es ja proibida a ante, pos atas simil de vandalisme.

Wikipedia permete ce cualce usor fa cambias a un paje, an anonim a la plu de pajes. Ma la cambias es esaminada par bonvolores, ci desfa mal editas e bloci usores ci iniora constante la regulas de la ensiclopedia libre.

Esta proibi la plu resente segue la revela de mal editas par @congressedits, un flue de Twitter, cual publici cada cambia fada a la ensiclopedia par la adirije governal.

Un de la cambias revelada ia es a la paje sur la asasina de John F. Kennedy. Algun ia edita lo per dise ce Lee Harvey Oswald ia ata "representante la governa de Fidel Castro".

Un article sur la teorias de conspira sur la atera lunal ia es editada per dise ce los ia es "promoveda par la governa cuban". Un otra, sur Nataliya Vitrenko, un politiciste ucrainsce, ia es cambiada per descrive el como "un pupeta rusce".

Ma la edita cual ia provoca final la proibi de editas anonim de la Salon Basa ia apare en la article sur Mediaite, un pajeria de novas jornaliste. La cambior ia descrive la blog como "sesiste" e "transfobica", disente ce "lo suposa automata ce un person es mas sin atesta".

A ante, Mediaite ia publici un article sur la mal editas de computadores congresal.

Jimmy Wales, la fundor de Wikipedia, ia comenta ce la proibi no surprende el, car vandalisme "ia aveni sempre e va continua sempre".

Alga empleadas de la Salon Basa ia protesta ce on no debe puni la organiza intera per la mal atas de sola du o tre persones.

2014-07-25

Un avion de pasajores cade en Mali

En Mali, on ia trova la ruinas de un avion cual ia desapare portante 116 persones en vola de Burcina Faso a Jazair.

Soldatos franses en la area vade per securi la loca de cade, cual es a sirca 50 cilometres de la borda. La pasajores ia inclui 51 sitizanes franses.

Controlores de trafica airal ia perde se contata con la avion a un ora temprana de jovedi, pos cuando la pilotes ia reporta tempestas sever. On crede ce la avion ia desintegra.

Mali ia acorda la xerca, comensada pos cuando un abitor de Gossi ia descrive vide un cade de avion a sude-ueste de la vila.

Un elicador de Burcina Fas ia trova restas umana e la ruinas de la avion, intera ardeda e sperdeda, en la vileta Boulikessi.

A ante, jetos franses e elicadores NU ia xerca la ruinas en la deserto plu distante de Mali norde, entre Gao e Tessalit.

Comunicas con la avion AH 5017 ia sesa a 50 minutos pos se enaira de Ouagadougou. La pilote ia contata la tore de controla a Niamey en Nijer, indicante ce el va cambia se dirije par causa de un tempesta de arena.

La otra pasajores ia inclui 27 de Burcina Faso, oto lubnanis, ses jazairis, du luxemburgeses, sinco canadianes, cuatro deutxes, un camerunes, un beljes, un misri, un ucrainsce, un suiz, un nijerian, e un malian. La ses ecipores ia es espaniol.

2014-07-24

Dotores estrae plu ca 200 dentes de un boca

En un opera de sete oras, dotores en Barat ia estrae 232 dentes de la boca de un xico de 17 anios.

Ashik Gavai ia es ospitalida con se mandibula destra en un state inflada. El ia sufri tra 18 menses, e ia viaja a la site de se vileta cuando se dotores local no ia susede trova la causa de la problem.

Se esperia ia es descriveda como "multe rara" e "un recordo de mundo".

Se maladia ia es un odontoma, un spesie de tumor nonosiva. Un jenjiva ia formi tro multe dentes.

La dotores ia debe comensa par usa un martel e sisel per estrae la odontoma. Cuando los ia abri la tumor, dentes peti e perlin ia sorti, la un pos la otra.

La opera ia es fada par du sirurjistes e du aidores. Ashik ave aora 28 dentes.

2014-07-23

On comensa identifia la vitimes de la avion MH17

Investigores siensal de crimin ia comensa identifia la vitimes de la cade de la avion MH17 en Ucraina.

La restas, cual on ia move plu temprana de la teritorio ocupada par rebelores prorusce, va es transportada a Nederland de la site Kharkiv.

Ma sola 200 corpos ia ariva en Kharkiv, e no 282 como la rebelores ia dise. Investigores va revade a la loca de cade per fa un xerca nova.

La avion de la compania Malaysia Airlines ia cade a jovedi pasada, en un area controlada par rebelores. Tota la 298 pasajores e ecipores ia es matada. La plu de los ia es nederlandes.

Nasiones ueste dise ce los vide sempre plu indicas ce la rebelores ia tira la avion a tera, usante un misil furnida par Rusia. Rusia ia sujesta ce fortes de la governa ucrainsce es culpable.

Oservores de la Organiza per Securia e Colabora en Europa ia esamina la ruinas, e ia trova ce on ia talia pesos major de la avion, tal ce partes grande aspeta aora diferente.

Paises direta afetada par la desastre – como Nederland, Australia, e la Rena Unida – es consernada ce on no ia isoli sufisinte la loca de cade. La risca esiste ce trasas importante pote es danada o perdeda.

Rebelores ia dona la rejistradores "caxa negra" de la avion a ofisiores malaisian. On va analise los en la Rena Unida, do on ave un de la sola du laborerias en Europa con la aparatos spesialiste per escuta la sonas rejistrada. La otra es en Frans.

2014-07-22

On pirati la conta Twitter de la fortes defendente de Cenia

La contas Twitter de la fortes de defende cenian e de se portavose ia es atacada par ativistes ci protesta sur froda.

La tuitas piratida ia es suscriveda par Anonim, un grupo ativiste.

La portavose militar Major Emmanuel Chirchir usa frecuente Twitter per furni novas sur la gera contra al-Shabab, un grupo combatosa de Somalia.

La atacores ia critica la governa de Presidente Uhuru Kenyatta. Los ia dise ce la governa proteje sola la consernas de la persones superior, e no fa sufisinte contra la problemes de xasores nonlegal e drogas contrabandada.

Coronel Willy Wesonga ia dise ce no sistemes interna militar ia es infiltrada, e ce tecnicistes atenta aora descovre la identia de la atacores.

Problemes de securia en la flue de tuitas de la ministreria de defende es embarasante per la governa, car on ia critica ance se respondes a alga defias resente de securia.

En la anio pasada, un grupo nomida Africa Anonim ia entra a la conta de la ministreria de defende de Zimbabue, e ia ataca la pajeria de la Congresa Nasional African cual governa Sudafrica.

2014-07-21

Un tempesta enorme colpa Xina sude

La siclon la plu grande en Xina sude en 40 anios ia mata 17 persones, pos causa moris e danas en la Pilipinas.

Silcon Rammasun ia mata a la min oto sur la isola Hainan, do otra persones manca ancora, e ia mata nove en la area Guangxi.

Lo ia ariva de la mar a venerdi. Se venta ia esede 200 cilometres per ora.

Plu temprana en la semana, a la min 94 persones ia es matada cuando la siclon ia bate la parte norde de la Pilipinas.

La tempesta afeta ance Vietnam, do on previde pluves forte ante un debili a lundi.

En Xina, la trafica de aira, ferovia e strada ia es suspendeda.

Canales televisal ia mostra stradas sur cual la venta ia sperde multe detrito, incluinte arbores desradisida e tetos de casas.

2014-07-20

La violentia continua en Gaza

Un familia filastini e un padre badaui israeli ia es entre la matadas a saturdi, cuando la cuantia de persones matada par atacas israeli sur tera e atacas con roceto de Gaza ia suprapasa 300.

La badaui ia mori, e membros de se familia ia es ferida, cuando un roceto ia colpa se camperia en Israel sude. La familia de oto filastinis ia es entre 30 persones matada, cisa plu.

Ban Ki-moon, la secretario jeneral de la Nasiones Unida, vade a la area per aida laboras de reconsilia.

Se visita intende aida israelis e filastinis a "fini la violentia e trova un modo de progresa".

A venerdi, la presidente SUA Barack Obama ia dise ce el es "profonda consernada" sur moris nonmilitar en la gera.

Israel ia comensa atacas sur tera en Gaza pos cuando 10 dias de atacas par avion ia fali para ce Hamas xuta rocetos a ultra la borda.

2014-07-19

Sudafrica onora la aniversario de Mandela con un dia de limpi

Sudafricanes ia onora la Dia de Mandela a la ves prima pos la mori de acel icon antiapartait.

Sirca la mundo, on ia fa avenis, e on ia recomenda ce persones pasa 67 minutos en aida otras, per selebra la 67 anios de servi publica par Nelson Mandela.

Ier ia es la aniversario 96 de se nase.

Mandela, ci ia mori en desembre 2003, ia es forte respetada tra la mundo per se batalia contra la governa par la minoria blanca en Sudafrica.

Pos spende 27 anios en prison, el ia deveni la presidente negra prima de la pais en 1994.

En jovedi, on ia subasta ojetos diversa cual el ia suscrive, per colie reservas carital. Esta ia jenera $160 mil – min ca on ia previde.

Jacob Zuma, la presidente presente de Sudafrica, ia recomenda ce persones ala prende scopas per partisipa en la campania "Limpi per Madiba". Madiba ia es la nom clanal de Mandela.

La presidente ia aida limpi un scola en Mvezo, la vileta distante do Mandela ia nase en 1918.

Otras ia aida en casas de veas e orfanerias, o ia crea covreletos per aida persones sin casa en la inverno de la emisfera sude.

2014-07-18

Un avion malaisian cade en Ucraina este

Un avion malaisian, portante 295 persones, ia cade en Ucraina este en media de vola de Amsterdam a Kuala Lumpur. On alega ce lo ia cade pos es atacada par xuta.

On trova no indicas de survivores a la sena de cade, prosima a la vileta Grabovo, cual es controlada par rebelores separadiste.

Avion MH17 ia es a punto de entra a la aira rusce cuando on ia perde la contata con lo.

La presidente ucrainsce ia descrive la perde de la avion como "un ata de terorisme". Ma la rebelores ia nega ce los ia xuta a lo.

An tal, on crede ce separadistes ia tira a tera du aviones militar de Ucraina super la area en dias resente.

Alexander Borodai, la gidor de la organiza rebelante cual nomi se la Republica de la Popla de Donetsk, defiante la governa ucrainsce, ia dise ce on ta pote acorda un sesafusili per "alga dias" per permete investigas e laboras de salva.

Companias major de avion ia anunsia ce los evita aora Ucraina este.

2014-07-17

Du laborores de la metro de Moscva es arestada

Investigores rusce ia anunsia la aresta de du laborores de la metro de Moscva per nonsegues de regulas de securia. Un tren ia salta de la reles a martedi, matante 21 persones.

La comite investigante suspeta ce la supravidor de reles e se aidor ia usa un spesie debil de filo eletrical en laboras sur la ferovia en maio. La filo ia rompe.

On ia interoga la du omes, e on previde ce on va acusa los pos un tempo corta.

La investigores crede ce un ondon de eletrica ia causa la xoca, cual ia feri ance 162 persones.

Criticistes cexa ce la autoriosas ia spende tro multe sur estende la sistem de metro, e no sufisinte sur manteni la partes esistente.

La tren ia salta entre la stasiones Bolevar Slaviansci e Parce de Vinse, en la ueste de la site. Parce de Vinse es la stasion la plu profonda en Moscva, causante ce la opera de salva ia es spesial difisil.

Martedi ia es ofisial un dia de lamenta en la capital rusce.

La metro de Moscva es un de la plu folidas en la mundo. Lo es un arteria esensal de transporta per la site, movente plu ca nove milion persones su la stradas en cada dia de labora.

2014-07-16

Un om reclama un parte de Africa per se fia

Un om de la SUA ia reclama un area peti de Africa, car se fia desira deveni un prinsesa.

Jeremiah Heaton ia viaja de Virginia con un bandera per proclama la area como "la Rena de Sudan Norde".

La area es situada entre Misre e Sudan. Lo conteni 2000 cilometres cuadrida de deserto seca, e lo parteni a no pais.

Heaton dise ce el ia fa demandas ofisial sur la posese de la area a ambos nasiones visina, ma ambos no ia responde.

El descrive como se fia Emily ia adota "un tono seria" e ia demanda "esce a un dia el va es un prinsesa". Donce se padre ia rexerca areas de tera nonreclamada e ia descovre esta parte, cual persones local nomi Bir Tawil.

Per selebra la aniversario sete de se fia, Heaton ia viaja a la area, arivante a 16 junio. El ia planta un bandera desiniada par se fia en la tera.

El insiste ce se reclama a la area es valida. Par causa de un disputa teritorial entre Sudan e Misre, Bir Tawil es un de la ultimas de la areas nonreclamada sur la planeta.

Heaton dise ce el intende demanda suporta de la Uni African, razonante ce multe paises, incluinte la Statos Unida, ia es reclamada tra la anios par la ata simple de planta un bandera.

Prinsesa Emily, como se familia nomi aora el, ia comanda ce se pais nova deveni un sentro de cultiva. El porta aora se corona reial a tota tempos.

Ma no sola Misre e Sudan, ma ance la Nasiones Unida, va debe reconose la Rena de Sudan Norde ante cuando el va deveni ofisial la fia de un re.

2014-07-15

Israel aseta un proposa de sesafusili

Israel ia aseta un proposa egipsian per un sesafusili en la gera en Gaza.

Hamas, cual controla Gaza, no ia responde formal. Ma se ala enarmada ia rejeta la proposa como "un sede".

La proposa recomenda la comensa direta de un sesafusili, segueda par un serie de consentas en Cairo con delegas alta de ambos lados.

Ofisiores filastini dise ce a la min 192 persones ia es matada par atacas airal israeli, lansada a oto dias ante aora per preveni ce ativistes xuta rocetos a Israel.

La NU estima ce plu ca tre cuatris de estas ia es persones nonmilitar.

On estima ce 1400 filastinis ia deveni ferida.

A la min cuatro israelis ia es grave ferida de pos la eruta de la violentia, ma nun ia es matada.

2014-07-14

Samsung descovre labora par enfantes a un de se furnores

La compania de eletronicales Samsung dise ce lo ia trova "indicas de labora suspetada par enfantes" a un fabriceria de Eletronicales Dongguan Shinyang, se furnor xines.

Samsung ia investiga la furnor pos cuando China Labor Watch, un grupo campaniante en New York, ia acusa ce lo emplea enfantes.

La compania de Corea Sude ia suspende "tempora" se comersia con la furnor, par causa de la investiga. Lo ia dise ce autoriosas xines esplora ance la caso.

Lo ia anunsia: "Si la investigas conclui ce vera la furnor ia emplea nonlegal enfantes, Samsung va sesa permanente se comersia con la furnor, en acorda con se politica de nontolera asoluta de labora par enfantes."

"Plu, Samsung va forti se prosede de emplea, no sola a se complesos de produi ma ance a se furnores, per preveni la reveni de un tal caso."

La compania ia esamina la furnor a tre veses de pos 2013. La plu resente ia fini a 25 junio de esta anio. Esta esaminas no ia trova casos de labora par enfantes.

An tal, lo ia fa un investiga nova pos la alegas, e ia trova indicas de un prosede nonlegal de emplea cual ia aveni a 29 junio.

La furnor no ia comenta.

2014-07-13

La final de la Copa Mundal va aveni

Deutxland e Arjentina va compete oji en la max final de la Copa Mundal de 2014, ante un fola televidente de probable plu ca mil milion.

Si Deutxland gania a la ves prima de pos 1990, los ta deveni la ecipo european prima ci gania la torneo en America Sude. Si Arjentina gania, esta ta es se ves prima de pos 1986, cuando los ia vinse Deutxland Ueste.

Deutxland ia gania la Copa a tre veses presedente. Se ecipo ia vinse forte Brasil, la ecipo ospitante, con 7-1 en la semifinales. Arjentina ia gania ja a du veses, e – pos un max egal de zero goles – ia vinse Nederland con 4-2 par xutas de la punto punal.

Rio prepara lo cual se autoriosas descrive como "la opera la plu grande de securia en la istoria de la site". Plu ca 25 mil persones es envolveda.

La areas xef preocupante es terorisme, scaramuxas entre fanes, la presentia de 15 membros de governas stranjer, e la securia de Dilma Rousseff, la presidente brasilera.

La max de soldi va es la culmina de un torneo cual la popla brasilera regarda como un susede enorme. On ia teme protestas publica vasta, simil a los cual ia manxa la Copa de Federas de FIFA en la estate pasada, ma estas no ia aveni.

692 mil turistes de 203 paises ia entra a Brasil en la mense de torneo.

2014-07-12

Un bebeta es trovada en un baldon de botelas

On ia trova un bebeta fema abandonada en un baldon de resicli botelas en Rouvroy, un vila en Frans norde.

La xica ia es descovreda par un pasor ci ia crede prima ce la crias veni un gato trapida.

La corda ombilical ia es ancora juntada a la bebeta.

On trata la enfante per talias de pel e per ipotermia a un ospital en Lens, un vila prosima. La polisia dise ce la vive de la enfante no es en peril.

Un investiga ia comensa per identifia la madre.

La maior local, Jean Haja, ia comenta ce el nesesa sabe plu sur la caso ante pote espresa se judi. El ia demanda: "Esce la madre ia ata tal par teme o despera? Me no sabe. Esce lo es un ata desperante?"

2014-07-11

Fanes de futbal de Gana xerca refuja en Brasil

La polisia federal de Brasil dise ce sirca 200 ganaianes ia demanda refuja pos entra a la pais con visas de turiste per regarda la Copa Mundal.

La ganaianes dise ce los es muslimes ci fuji de combates relijiosa en se pais propre.

Los ia rejistra se en Caxias do Sul, un site sude, en un de la areas la plu rica de Brasil.

On previde ce mil plu ganaianes va demanda deveni refujadas pos la fini de la torneo.

La autoriosas brasilera crede ce multe de la ganaianes xerca la direto de labora legal en la pais. Leges en Brasil permete ce refujadas futur labora legal en la pais direta pos rejistra se.

La xef de la polisia federal ia dise ce la area atrae aora multe laborores stranjer. "On vade sur la stradas e on vide multe aitianes e senegaleses ci vende CDs piratida e orolojetas. La area es suprafolida."

Caxias do Sul es situada a plu ca 1600 cilometres de la locas do la ecipo ganaian ia jua: la sites Natal e Fortaleza en la norde-este, e la capital, Brasilia.

La ecipo, nomida la Stelas Negra, ia perde du maxes a la SUA e Portugal, ma ia fa un egal contra Deutxland. Los ia fali progresa a la niveles de elimina direta en la compete.

La plu de la ganaianes en Caxias do Sul es refujada par eglesas catolica local.

2014-07-10

Ban Ki-moon parla sur la situa tensada en Gaza

Ban Ki-moon, la secretario jeneral de la Nasiones Unida, ia dise ce la situa en Gaza es estrema perilosa, e ia recomenda forte ce Israel e combatosas filastini sesa batalia.

El ia averti ce la area "no pote tolera un plu gera completa".

Israel ia dise ce Hamas ia xuta desuples de rocetos a sites israeli en la note de mercurdi, seguente atacas de aira en Gaza par israelis.

Plu ca 60 filastinis ia mori de pos martedi en tal atacas contra combatosas. Ofisiores medical en Gaza dise ce un dui de la mores ia es siviles, incluinte femes e enfantes.

Oto filastinis ia es matada en un ataca de aira contra un casa prosima a Khan Younis, un vila sude, temprana a jovedi.

Un portavose militar israeli ia descrive la mores como "un trajedia – no intendeda par nos", car persones ia revade tro pronto a la construida pos un averti telefonida.

Nove plu persones ia es matada en un ataca contra un cafe en la mesma vila.

La situa ia tensa en la semana pasada, cuando tre israelis joven ia es matada en la Riva Ueste ocupada, e un adolesente filastini ia es matada en Ieruxalim. Israel alega ce Hamas ia saisi e mata la tre jovenes. Hama nega lo.

A la dia pos la funerales de la tre jovenes, la filastini ia es saisida en Ieruxalim este e matada. La polisia ia aresta ses suspetadas iudi e dise ce lo pare ce la adolesente, de 16 anios, ia es matada par causa de se nasionalia.

Ban Ki-moon ia dise: "La situa dejenerante gida a un spiral desendente de cual on ta pote rapida perde la controla. La risca ce la violentia va crese an plu es real."

El ia esije ce combatosas de Hamas para xuta rocetos, e ia recomenda forte ce la governa israeli restrinje se e respeta obligas internasional de proteje persones nonmilitar.

La Consilio de Securia NU va consenta per discutes urjente sur la crise, plu tarda en jovedi.

2014-07-09

On anunsia la via de un canal tra Nicaragua

La governa nicaraguan ia acorda sur un via con un compania cual vole construi un canal entre la Mares Atlantica e Pasifica.

La canal ta estende tra 278 cilometres de Punta Gorda en la Mar Caribean, tra Lago Nicaragua, asta la boca de la rio Brito a borda de la Pasifica.

Ambientises ia espresa consernas sur la projeta de construi esta canal, cual ta compete con lo de Panama.

Nicaragua dise ce lo intende comensa construi la projeta en esta anio. Lo va costa $40 mil milion. Lo va ave un profondia de 27,6 metres e largias de entre 230m e 520m.

On ia eleje la via de la canal per evita areas de biodiversia grande, teritorios nativa, e locas ambiental protejeda.

Ma ambientistes resta consernada sur la efeto posible de la canal sur Lago Nicaragua, la lago la plu grande de America Sentral e un fonte importante de acua dulse.

La comision encargada con construi la canal ia dise ce lo va fa studias sur la efetos ambiental e sosial de la via, e ce cambias es ancora posible.

Lo previde ce la construi va comensa en desembre, e va es finida pos sinco anios. Ma seticas indica ja ce la SUA ia nesesa des anios per construi la Canal de Panama, cual ave min ca un tri de la longia de la canal projetada per Nicaragua.

2014-07-08

On avansa a un proba de sangue per la maladia de Alzheimer

Siensistes brites ia fa "un avansa major" en developa un proba de sangue per predise la comensa de la maladia de Alzheimer.

Par rexerca sur plu ca mil persones, on ia identifia en la sangue un grupo de protenas capas de predise la comensa de la dementia con esatia de 87%.

On va usa la descovre per boni probas de drogas nova.

Espertas ia avisa ce la proba es ancora no preparada per usa dial par dotores: par causa de la nonesatia, on ta risca informa persones sana ce los va developa la maladia, e esta ta pote causa ansia e depresa.

La rexercas sur maneras de trata la maladia de Alzheimer ia encontra multe problemes. Entre 2002 e 2012, 99,6% de probas intendeda per preveni o reversa la maladia ia fali.

Dotores crede ce la manca de susede es causada par trata pasientes cuando la tempo la plu conveninte es ja pasada, car sintomes apare a un desenio pos la comensa de la maladia.

Donce la identifia temprana de pasientes es un de la goles la plu importante per la rexercas sur dementia.

Esta grupo de rexercores conteni siensistes de universia e industria. Lo ia xerca diferes en la sangue de 452 persones sana, 220 con alga descapasi conosal, e 476 con la maladia de Alzheimer.

Con esatia de 87%, los ia pote indica cual pasientes con alga descapasi conosal va developa la maladia en la anio seguente.

2014-07-07

Un siclon forte prosimi a la sude de Japan

Un siclon potiosa prosimi a Okinawa, un cadena de isolas japanes, portante ventas forte e pluves deluviante.

Siclon Neoguri move a 250 cilometres per ora, ganiante plu potia en cuando lo vade a norde.

On previde ce lo va crese a un tempesta estrema intensa a o ante martedi. Ma probable lo va es min forte ca Siclon Haiyan, cual ia mata miles de persones en la Pilipinas en la anio pasada.

Un portavose de la Departe Meteorolojial de Japan ia dise ce la tempesta va veni la plu prosima a Okinawa a la matina de martedi. El ia averti ce lo pote jenera ondas alta.

On recomenda ce persones es atendente, resta en construidas, e evita fa laboras a estra o viajas nonenesada.

Reportas en la televisa local ia mostra pexores ci tira se barcos de la acua.

Okinawa es la provinse la plu sude de Japan. Lo conteni bases major de la SUA: sirca 26 mil soldatos SUA ave se postos ala, su un acorda durante de securia.

2014-07-06

La gidor de ISIS apare en video

Abu Bakr al-Baghdadi, la gidor de la grupo estremiste ISIS, ia demanda ce muslimes obedi el, en se predica video prima.

El ia es nomida como califa par la grupo jihadiste, ci ia saisi aora areas grande de Irac e Suria.

Lo pare ce on ia filma la video a venerdi, en un predica a la mascita Al-Nouri en Mosul, en Irac norde. La filma ia es publicida a saturdi, entre reportas ce Baghdadi ia es ja matada o ferida en un ataca de aira iraci.

En la predica, a la monumento la plu famosa de Mosul, Baghdadi ia loda la institui de "la stato muslim" cual ISIS ia declara a soldi pasada.

La gidor no ia apare en video a ante, e on ia ave sola alga fotos de el.

El ia dise ce el no ia xerca la posto de califa, descrivente esta como "un carga".

Sutitulos en la video ia refere a el como "Califa Ibrahim", un nom cual el ia usa de cuando la estremistes ia declara el como la gidor de se stato.

Plu temprana a saturdi, Nouri al-Maliki, la ministro xef de Irac, ia desemplea du de se xefes de securia, seguente la colasa de la armada iraci en la norde de la pais en junio.

En la entretempo, estremistes gidada par ISIS ia destrui a la min des santerias en la provinse Nineveh en Irac norde. Los ia destrui locas xia, suni, e cristian, e ia publici imajes de la atas en redes sosial.

Plu ca milion persones ia fuji par causa de la situa, e cuasi 2500 ia es matada en la mense pasada.

2014-07-05

On descovre antrax en carne de bove en Magiar

On monitori sinco persones a un ospital magiar pos descovre antrax, un maladia matante, en carne de bove.

La sinco ia es ospitalida pos consernas ce cisa la maladia ia infeta los.

On ia descovre la maladia en la carne jelada de du animales ci ia es nonlegal matada.

Antrax es causada par un bateria cual esiste natural en tera.

La sintomes de esposa a lo inclui ulseras de pel, nauseas, vomitis, e febres. Si on no trata la maladia en umanas, lo pote mata.

On reporta ce la animales en la aveni resente ia es matada a un cultiveria en Tiszafüred, un vila a 160 cilometres a este de la capital, Budapest.

2014-07-04

Colombia permete un posmedia libre afin on regarda la futbal

Juan Manuel Santos, la presidente de Colombia, ia permete ce laborores governal sesa labora a la posmedia de venerdi per pote vide la ecipo nasional jua contra Brasil, en un max de la nivel du ante la final de la Copa Mundal de futbal.

El mesma va vola a Brasil per regarda la max, cual va es juada en Fortaleza.

Colombia ia ateni nunca esta grado de la torneo a ante, e se susede en esta anio ia crea un senti de joia tra la pais. Ma on va proibi vendes de alcol a la dia de la max, car violes familial ia crese subita pos la vinse prima de Colombia.

Angelino Garzón, la vispresidente, ia recomenda ance ce ofisias de governa local permete un posmedia libre a se empleadas. La maior de Cali – la site tre de la plu grandes de la pais, e conoseda per se selebras – ia dise ce el va dona la mesma permete.

Colombia ia gania tota de la cuatro maxes cual lo ia jua en esta Copa Mundal. Ma la polisia ia es clamada a cuasi 5000 veses en e pos la max prima a 14 junio, cuando Colombia ia vinse Elas. En sola acel note, nove persones ia es matada en combates en Bogotá, la capital.

En responde, multe sites ia proibi vendes de alcol a dias de max. Esta ia redui notable la cuantia de avenis violente. Posesores de bares e tavernas ia protesta ce la proibi priva los de revenu.

En alga sites, la autoriosas ia proibi ance ce persones porta publica farina e crema de rasa, car la lansa de ambos en selebras ia gatili multe combates.

Si Colombia vinse a venerdi, los va jua contra o Deutxland o Frans en la antefinal.

2014-07-03

Israel recomenda calmia pos la mata de un adolesente filastini

Gidores israeli ia apela per calmia, pos cuando la descovre de la corpo de un adolesente filastini saisida ia causa scaramuxas en Ieruxalim Este.

Mohammed Abu Khdair ia ave 17 anios. On ia vide el forsada a entra en un auto a un ora temprana a martedi.

Benjamin Netanyahu, la ministro xef de Israel, ia condena la "omiside despetable", e la maior de Ieruxalim ia recomenda forte ce persones restrinje se sentis de reata.

Gidores filastini ia dise ce los regarda Israel como culpable per la mata, entre alegas ce lo ia aveni en venja per la mata de tre adolesentes israeli.

On previde ce la rituo funeral de la adolesente filastini va aveni en jovedi, e ce lo va es un causa nova de tensa.

La polisia israeli investiga ancora la motivas posible per la mori.

Netanyahu ia clari ce el ia comanda la polisia a labora "tan rapida como posible per trova ci ia organiza la omiside odiable de la joven". El ia apela ance a ambos lados ce los no reata en modo nonlegal.

2014-07-02

On teni Sarkozy sur alegas de malusa de influe

On ia deslibri Nicolas Sarkozy, la presidente de Frans entre 2007 e 2012, per interoga el sur alegas ce el ia malusa se influe political.

Sarkozy es tenida a Nanterre, prosima a Paris, en un paso sin presedente contra un presidente pasada.

On atenta descovre esce Sarkozy ia promete un rol prestijiosa en Monaco a Gilbert Azibert, un judor major, en intercambia per informas secreta sur un investiga de alegas ce metodos nonlegal de suporta finansial ia es usada en un campania political.

On esplora aora alegas ce on ia averti Sarkozy ce se conversas telefonal es secreta escutada como parte de acel investiga pasada.

Comentores regarda esta developa como un ostaculo per la atentas de Sarkozy de regania la presidentia en 2017.

On ia clama Azibert, un de la judores la plu major a la corte de apela, per un interoga a lundi. On ia interoga ance un otra judor, Patrick Sassoust, e Thierry Herzog, la avocato de Sarkozy.

Esta es la ves prima a cual la polisia ia teni un xef pasada de Frans. Investigores pote teni Sarkozy per un periodo inisial de 24 oras, cual los pote estende a du dias.

La presedente en la posto, Jacques Chirac, ia es condenada a prison (ma la puni ia es suspendeda) per froda e rompe de fida cuando el ia es la maior de Paris. Ma el ia es sempre un om libre cuando on ia interoga el.

2014-07-01

Indonesia suprapasa Brasil en rapidia de desforesti

Un studia nova mostra ce, tra un periodo de 12 anios, Indonesia ia perde sirca 60 mil cilometres cuadrida de foresta, un area prosima a la grandia de Island.

La desforesti ia deveni tan rapida ce, a la ves prima, Indonesia ia esede Brasil en la rapidia de se elimina de forestas tropical.

Siensistes ia oserva la crese de tera desforestida en Indonesia entre 2000 e 2012, usante satelites. Los dise ce la tera ia es vacuida per crea spasio per cultiverias, incluinte los de olio de palma.

En 2012, Indonesia ia perde 8400 cilometres cuadrida de foresta, en cuando Brasil ia perde 4600.

La rexercores dise ce la desforesti causa un aumenta de emetes de gas invernerial, e un redui de biodiversia.

Indonesia ave 10% de la plantas e 12% de la mamales de la mundo. Lo es bon conoseda per la diversia de se animales, incluinte orangutanes e tigres sumateran.

La governa ia suscrive un proibi de desforesti en 2011, intendente lenti la prosede.

Ma ambientistes dise ce politicistes frodante tende ancora vende areas vasta de foresta per profita. Los recomenda plu monitoris e punis per preveni ce Indonesia perde tota se forestas.

En la anio pasada, on ia crea focos savaje e enorme en Indonesia per sutrae arbores. Estas ia envia un nebla fumosa a Malaisia e Singapor, provocante consernas sur sania en acel paises visina.

Noria ia paia cuasi 50 milion dolares a Indonesia per aida crea instituidas nova per redui la desforesti. La pais scandinavian ia promete mil milion plu dolares si Indonesia pote demostra un intende seria de para la prosede.