2014-08-31

La UE pote aumenta se punis contra Rusia pos un semana

La Uni European ia dise ce si Rusia no reversa se curso en Ucraina en la semana veninte, lo va es plu punida.

Herman Van Rompuy, la presidente de la Consilio European, ia dise ce la UE labora urjente sur plu medios restrinjente.

Plu temprana, Petro Poroshenko, la presidente de Ucraina, ia comenta ce se pais es "prosima a un punto de nonreveni – un gera vera" con Rusia.

Rusia nega acusas par la Ueste ce se soldatos ia traversa nonlegal a en Ucraina per suporta ala separadistes.

Rebelores prorusce ia progresa contra soldatos ucrainsce en dias resente en Donetsk e Luhansk, areas este. Sirca 2600 persones ia mori en la combates.

La disputa en la este ia eruta en april pos cuando Rusia ia ajunta a se la penisola Crim en la sude de Ucraina en marto.

Gidores ueste dise ce on ave atestas clar ce unias normal de la militaria rusce opera en Ucraina con armas forte.

Parlante pos un confere alta en Bruxelles, Van Rompuy ia dise ce la UE "sta preparada per fa plu pasos major, en considera la evolui de la situa". El ia continua: "Cadun es intera consensa ce nos debe ata rapida."

El no ia spesifa la spesie de la punis ajuntable, ma ia dise ce la proposas va es ja preparada pos un semana.

2014-08-30

Salvores libri escavores nicaraguan trapida

En Nicaragua, on ia libri la plu de 24 escavores de oro ci ia deveni trapida par un colasa de un mineria.

La escavores ia es pico desidratada ma ia es en bon sania en otra modos.

On ancora no ia reporta esce on ia trova la escavores restante.

Los ia deveni trapida cuando un duto a la mina El Comal ia colasa pos pluves forte a jovedi.

La mina es situada prosima a Bonanza, un vila a 420 cilometres a norde-este de Managua, la capital.

La omes ia es escavores luable ci no ia es direta empleada par un compania escavante.

La posesor de la mineria, la compania Hemco de Colombia, ia comenta ce lo ia descovre resente ce la mineria es nonsecur.

Pos la moris de du omes en un lisca de tera en julio, la compania ia averti ja escavores contra entra a la minerias.

2014-08-29

Plu ca tre milion suris es ofisial refujadas

La departe de refujadas de la Nasiones Unida dise ce plu ca tre milion suris es aora rejistrada como refujadas, e ce la crise mali ancora.

Suria es aora "la crise umaniste la plu grande de nos eda". Cuasi un dui de tota suris ia deveni obligada a fuji de se casas.

La majoria ia vade a paises visina a Suria. 1,14 milion xerca un refuja en Lubnan.

Plu ca 190 mil ia mori en la gera interna de Suria, cual ia dura tra tre anios.

Grupos oposante en la pais ia combate soldatos fidosa a Presidente Bashar al-Assad, de cuando se governa ia supresa protestas contra el en marto 2011.

En menses resente, la situa ia es maliada par la formi e avansa de la grupo "Stato Muslim", cual controla aora areas vasta de Suria e Irac.

La NU dise ce un oti de tota suris ia traversa la frontera, e ce 6,5 milion otras es deslocada en la pais. Plu ca un dui de estas es enfantes.

Familias ci ariva a campas de refujadas en paises visina es multe fatigada e asustada. Alga de los ia spende plu ca un anio en fuja de un vileta a un otra en Suria.

La viaja sortinte de Suria deveni ance plu difisil: ganges enarmada esije sobornas de multe persones.

En ajunta a la refujadas rejistrada, la visinas de Suria estima ce sentos de miles de otra suris xerca un refuja en se paises, causante un tensa enorme.

2014-08-28

Brasil rompe un gang ci destrui la foresta

Autoriosas en Brasil dise ce los ia desasembla un organiza criminal sur cual los crede ce lo ia es la destruor la plu grande de la foresta de la Amazon.

On acusa ce la gang ia invade, talia, e arde areas grande de tera publica e ia vende nonlegal los per cultiva, e per come a pasto.

Seguente la Polisia Federal Brasilera, la grupo ia fa crimines con valua de plu ca $220 milion.

Un judor federal ia fa 14 comandas de aresta per membros alegada de la gang. On ia fa ance 22 comandas de xerca, e on interoga cuatro suspetadas.

La opera polisial covre cuatro statos de Brasil, incluinte São Paulo. On ia aresta ja sinco omes e un fem en la stato Pará en la norde de la pais.

La detalias es ancora nonclar, partal car la opera es focada sur un de la partes la plu distante e nonasedable de la foresta.

Froda par politicistes e polisiores resta comun en la interna de Brasil. Par esta causa, e ance par causa de problemes funsional en la governa federal, taliores de arbores e escavores pote labora sin es punida.

La membros de la gang pote reseta condenas de asta 50 anios en prison, an si 30 anios es la periodo la plu longa cual la leges brasilera permete ce un person resta en prison.

En la anio pasada, la governa brasilera ia dise ce la rapidia de desforesti en la Amazon ia crese denova par 28% entre agosto 2012 e julio 2013, pos anios de redui. En 2009 lo ia promete redui la desforesti par 80% ante 2020.

Brasil conteni la area la plu grande de la foresta Amazon. Esta es un area vasta do on trova un desi de tota spesies conoseda de animal e un dui de la forestas tropical de la planeta.

2014-08-27

Israel e Filastin acorda un sesafusili permanente

On ia acorda un sesafusili permanente entre militiores israeli e filastini en la Banda de Gaza.

La acorda fini sete semanas de batalia cual ia mata plu ca 2200 persones. Lo ia es negosiada par Misre e ia comensa a 19:00 de ora local (16:00 en Tempo Universal Coordinada).

Moussa Abu Marzouk, la visgidor political de Hamas, ia dise ce la acorda representa "un vinse per la rebelores".

Ofisiores de la governa israeli ia dise ce Israel va redui se blocis de vias a Gaza per permete ce on entra con aida e materias de construi.

Discutes nondireta sur temas plu controversa, incluinte un desira par Israel ce grupos militial en Gaza ta desarma se, va comensa en Cairo pos min ca un mense.

La avansa grande ia aveni en cuando ambos lados ia continua intercambia xutas Un vola final de cartuxes de mortero de Gaza ia mata un nonmilitar israeli e ia feri ses otras.

Plu temprana en martedi, a la min ses filastinis ia es matada en un serie de atacas airal en Gaza par Israel.

La sesafusili esije un fini permanente de atacas, la abri direta de la frontera de Gaza con Israel e Misre, e un estende de la zona de pexa de la teritorio en la Mediteraneo.

Pos un mense, la du partitos va discute la construi de un airoporto e un porto de mar en Gaza, e la libri de sirca 100 prisonidas ci on ia libri ja en 2011 ma ci on ia rearesta resente.

Israel e Ejipte esije ance un garantia ce on no va contrabanda armas a Gaza.

La anunsia ia es salutada con fusilis selebrante en la stradas de la Site de Gaza.

2014-08-26

La sentro iudi en Mumba reabri a ses anios pos un ataca

Un sentro iudi en la site barati Mumbai va reabri, a cuasi ses anios pos cuando fusilores teroriste ia ataca lo.

Ses iudis ia mori a la sentro, cual ia es un de alga locas atacada en novembre 2008.

Soldatos barati ia regania ultima la controla de la sentro e ia mata alga fusilores.

La atacas – contra un stasion de ferovia, oteles lusosa, e la sentro – ia prende 166 vives. Nove fusilores ia es ance matada.

Rabi Gavriel Holtzberg e se sposa Rivkah, ci ia maneja la sentro cultural iudi ia es matada, ma se fio de du anios ia survive.

El ia es trovada plorante a lado de se corpos par se enfantor barati, ci ia asconde se en un armario en la ataca, ma ia emerji per salva la enfante pos la moris de se jenitores.

25 rabis de Asia intera va asembla oji a la sentro renovida. Los va anunsia un projeta per un museo en la construida.

La sentro conteni aora un sinagoga, ofisias, salas per visitores, un restorante, un cosina comersial, e salas de securia.

Rabi Moshe Kotlarsky, un membro xef de la promove ci ia organiza la reconstrui ia dise: "On pote vinse defias, an la plu asustantes. On pote e debe reconstrui, e esta projeta opera como un faro de lus e espera ce malia no va domina."

En 2012, Barat ia esecuta Mohammad Ajmal Amir Qasab, la sola fusilor ci ia survive. El ia es un parte de un unia forte enarmada de 10 persones ci ia ateni Mumbia par mar a 26 novembre 2008.

La omes ia divide en grupos per ataca blancos diversa tra plu ca du dias.

2014-08-25

La ministro xef de Frans resinia sur la economia

Manuel Valls, la ministro xef de Frans, ia presenta la resinia de la governa a Presidente François Hollande, ci ia demanda ce el formi un consilio nova en loca.

La governa ia es grave secuteda a soldi par criticas par Arnaud Montebourg, la ministro economial, sur se maneja de la economia.

A momentos pos la resinia de Valls, Hollande ia declara ce el ia demanda ce Valls asembla un consilio nova, "coerente con la dirije cual Hollande ia deside per la pais".

La ministro xef ia acusa ja ce Montebourg ia "traversa un linia jala" pos cuando la ministro sur economia ia ataca medios sever cual el ia descrive como strangulante la crese de Frans.

Montebourg ia informa un asembla de sosialistes en Frans este ce esta es la bon momento per furni "un resista justa e sana" a "la oseses esedente de la conservistes de Deuxtland".

A saturdi, el ia dise a un jornal nasional ce Deutxland es trapida en un politica sever cual el ia obliga tra Europa.

Valls ia deveni la ministro xef en marto pos cuando la partito sosialiste de Hollande no ia susede bon en elejes local.

Plu temprana en esta mense, la governa ia confesa ce lo no pote ateni un crese de 1%, como lo ia previde a ante.

2014-08-24

La airoporto de Tripoli pasa de un militia a un otra

La parlamento nova elejeda de Libia ia condena como teroristes la alia de militias cual dise ce lo ia catura la airoporto internasional de Tripoli.

Parlamentores ia dise ce la alia es aora un blanco valida per la fortes enarmada.

La alia inclui islamistes e combatores de la site Misrata. Un portovose per los ia comenta ce la parlamento nova es nonlegal, e ia recomenda la reveni de la governa presedente de la pais, la Consilia Nasional Jeneral, xef islamiste.

On reporta ce batalias continua entre grupos enarmada oposante a la esternas de la site, e ce esplodes es oiada.

La pais esperia batalias entre militias diversa cual ia gida la revolta de 2011 contra Muammar Gaddafi. Sentos de persones ia mori en un aumenta resente de la situa.

La alia ia anunsia se controla de la airoporto an pos es airal atacada a du veses en la semana pasada.

La saisi de la airoporto es un problem per un otra militia de la site Zintan, aliadas de Jeneral Khalifa Haftar ci, plu temprana en esta anio, ia comensa un campania contra la Consilia Nasional Jeneral. Esta militia ia controla la airoporto tra cuasi tre anios.

La parlamento es situada en Tobruk, un site este, car Tripoli e Benghazi es apena controlada par la governa.

2014-08-23

Rexercores esposa la nonsecuria de Gmail en telefonetas

Rexercores ia susede intrui en contas de Gmail a 92% de veses, par esplota la nonsecuria de la memoria de telefonetas.

Los ia pote asede alga programes, incluinte Gmail, par desembla un program malvolente como un otra program descargada.

Entre la programes popular cual la rexercores ia proba, Gmail ia es un de la plu fasil asedables. Los ia usa un telefoneta de Android, ma los crede ce la truco pote opera ance en otra sistemes de opera, incluinte iOS e Windows.

Un portavose per Google ia dise ce la compania bonveni la rexerca, car lo permete forti e securi plu la produida.

La truco usa un program malvolente ma desemblada (como un pitur fondal, per esemplo) per asede la memoria compartida de un telefoneta.

Esta parte de la memoria es usada par tota programes, e per analise la usa de lo, on pote descovre cuando un person identifia se a programes como Gmail. Esta permete la fura de nomes de usor e de parolas secreta.

Un de la rexercores ia comenta: "On ia suposa sempre ce esta programes no pote interfere fasil la un con la otras. Nos mostra ce la esta suposa no es coreta, e ce un program pote fa un efeto importante a un otra e causa resultas nosiva per la usor."

En un otra esemplo, la rexercores ia esplota un parte de la program de la banco Chase cual permete ce on envia un xece par fotografi lo con telefoneta. La rexercores ia susede fura la foto a la momento de se crea, tal oteninte la suscrives e la detalias de banco.

La rexerca ia es presentada a un confere de sibersecuria en San Diego, California.

2014-08-22

Un lisca de tera en Japan mata 39

Pluves forte ia impedi la laboras de salva en la provinse Hiroshima de Japan, do un lisca de tera ia mata 39 persones, cisa plu.

La cuantia de persones mancante ia ateni 51 pos cuando polisiores ia intercambia informas con pompores.

Sirca 3000 salvores labora en la area, ma los ia debe pausa se xercas par causa de la pluve en la note de jovedi.

Pluves deluviante ia obliga ce asta 100 mil persones parti de la area.

On teme ce plu liscas de tera va aveni. Los ia es causada cuando la cuantia de pluve tipal per un mense ia cade en sola 24 dias ante la matina de mercurdi.

Desuples de casas en un area abital ia deveni covreda par tera, prosima a un monte.

Un de la matadas ia es un salvor de 53 anios ci ia mori cuando la tera ia lisca denova, pos cuando el ia tira ja alga persones a securia.

Reportas dise ce el ia es matada en cuando el ia teni un enfante joven ci el ia es salvante. Un padre ia es donante se fio a la salvor, ma ambos ia deveni engolida su la lisca nova.

Un survivor ia descrive la esperia: "On ia persepi un odor vera strana, un odor multe cru e terin. Cuando nos ia abri un fenetra per vide lo cual aveni, la lado intera de la monte ia desende con un ruido crepitante, un ruido tonante.

El e se sposo ia fuji a no plu ca momentos ante cuando fango ia flue tra se casa, lasante rocones do los ia veni de dormi.

2014-08-21

La militaria SUA ia atenta libri James Foley sin susede

La SUA ia declara ce lo ia fa ja un mision secreta militar per atenta libri la reportor James Foley e otra ostajes en Suria. La mision ia fali, car la ostajes no ia es presente a la loca pertinente.

La revela segue la publici a martedi de un video de la destesti de Foley par ativistes de la Stato Muslim, ci ia dise ce se mori es un venja per atacas airal par la SUA contra se bataliores en Irac.

Presidente Barack Obama ia condena la mata de Foley como "un ata de violentia cual xoca la consiensa de la mundo intera".

El ia compara la Stato Muslim, ci controla aora partes grande de Suria e Irac, a "un canser", e ia descrive la ideolojia de la grupo como "bancarota".

La Nasiones Unida, Rena Unida, e otras ia espresa ance se repulsa a la video.

Diane Foley, la madre de la matada, ia dise: "El ia sacrifia se vive en atenta esposa a la mundo la sufri de la popla suri."

La Comite de Proteje Jornalistes ia dise ce lo es "estrema consernada per tota jornalistes" ancora tenida par la Stato Muslim, descrivente Suria como "la plu perilosa loca de mundo per un reportor".

La declara par la SUA no ia spesifa esce la mision ia intende salva Foley, ci ia deveni saisida en Suria en novembre 2012. Ma ofisiores xef de la governa, parlante con anonimia, ia confirma esta.

2014-08-20

Calmia reveni en Missouri pos dias de protestas violente

Folas de protestores ia marxa pasosa tra Ferguson, la vila en la SUA cual ia esperia dias de scaramuxas sur la fusili de un adolesente negra par la polisia.

Sentos de polisiores ia es sur la stradas, ma los no ia envolve se.

La vila, en la stato Missouri, ia deveni denova calma pos dias de violentia en cual polisiores ia xuta gas lacrimojen e alga protestores ia lansa bombas de Molotov.

A 9 agosto, un polisior ia fusili e mata Michael Brown, ci ia ave 18 anios e no ia porta un arma. Atestores dise ce Brown ia es fusilida cuando el ia leva se manos en posa de sede, ma suportores de Wilson dise ce el ia fusili en media de un combate con Brown.

La aveni ia crea coleria e frustra entre abitores local, de cual multe es convinseda ce on no ia puni ja la polisior, Darren Wilson. On ia dona a el un periodo ofisial de asentia de labora.

Multe protestores ia apare a cada note tra plu ca un semana. La polisia ia responde par pleni la vila con sentos de polisiores protejeda contra tumultas, e on ia critica esta como un responde tro forte.

La polisia ia aresta desuples de persones, e protestas ia aveni en otra locas tra la pais.

Gidores political ia recomenda ce abitores resta en se casas per permete ce un state pasosa deveni denova normal.

Ier, un otra om negra ia es fusilida en Missouri. Multe ia teme ce esta va mali la tensa en Ferguson. Ma la calmia ia reveni.

Oji, atestas contra Wilson va es presentada a un juria ci va deside esce on debe acusa el sur un crimin.

2014-08-19

Island prepara per un eruta volcanal

La risca de un eruta a la volcan Bárðarbunga en Island ia aumenta. Lo mostra indicas de moves continuante de magma.

La ofisia meteorolojial de la pais ia dise ce lo ia alti la risca a aviones a la nivel orania, supra cual sola la nivel roja es plu perilosa.

Cualce eruta ta pote causa inondas o emetes de gas.

La volcan Eyjafjallajökull ia eruta en 2010, produinte un nube de sene cual ia disturba multe la usa de aviones en Europa e ia restrinje la viajas de sentos de miles de pasajores.

La sistem de Bárðarbunga es situada su la area norde-ueste de la glasia Vatnajökull.

Un ativia sismica intensa ia comensa en la volcan a saturdi. En la oras temprana de lundi, la area ia esperia se trematera la plu forte de pos 1996.

La nivel orania indica ce un volcan mostra "un turba grandinte con posibles aumentada de eruta" o ce lo eruta ja, ma sin emetes major de sene volcanal.

La nivel roja sinifia ce un eruta es a punto de aveni, o ce lo aveni ja "con emetes notable de sene volcanal a la atmosfera".

2014-08-18

Pasientes de Ebola desapare en Liberia

On oia reportas contradisente sur 17 pasientes con Ebola ci ia desapare pos cuando persones ia fura benes de un sentro isolinte en Monrovia, la capital de Liberia. Plu ca 400 persones ia mori ja de la virus en la pais.

Un manada coler ia ataca la sentro en la sera de saturdi en West Point, un munisipa densa poplida.

Un ofisior major de sania ia dise ce tota pasientes es moveda a un otra compleso medical. Ma un otra reporta dise ce 17 pasientes ia evade, e ce 10 otras ia es prendeda a via par se familias.

Alga dise ce la protestores ia es nonfelis ce on ia introdui resente pasientes de otra partes de la capital. Otras dise ce la atacores ia crede ce la crise de Ebola es un engana, e ia desira obliga la sentro a clui.

La ataca crea un problem grande en la batalia per para la sperde de la virus.

Ebola es sperdeda par contata con la licuidas corpal de un person infetada, per esemplo se sua o sangue. On dispone ancora no remedia o vasin.

Ma la protestores ia prende materases manxada con sangue de la sentro, e ance multe aparatos medical. Un polisior xef ia descrive la aveni como "un de la cosas la plu stupida cual me ia vide en me vive".

Como resulta de la furas, la virus pote aora sperde tra la intera de la area West Point. Descriveda como un visineria misera, la loca conteni sirca 50 mil persones.

La epidemica de Ebola ia comensa en Gine en febrero, e ia ateni aora Liberia, Siera Leon, e Nijeria.

2014-08-17

Comentas ofendente sur autonomia scotes

La ministro xef de Scotland ia dise ce comentas par la ministro xef de Australia sur autonomia scotes es "fol, ipocrita, e ofendente".

Alex Salmond ia reata pos cuando Tony Abbott ia informa un jornal ce "on no vide fasil como la mundo ta es aidada par un Scotland autonom".

Abbott ia comenta ance ce los ci vole divide la Rena Unida "no es la amis de justia e libria", e ce "la paises ci ta aclama la idea no es los de ci on ta desira se acompania".

Salmond ia dise ce esta ofende la popla scotes, e ce la comentas es ipocrita car Australia mesma es autonom e susedosa.

Votores en Scotland va vota a 18 setembre sur la demanda "Esce Scotland debe es pais autonom?".

La governa scotes crede ce la uni de 300 anios no conveni plu. Ma la governa de la RU oposa la cambia, disente ce Britan es entre la unis la plu susedosa de mundo.

La presidente de la SUA, Barack Obama, e la ministro xef de Xina, Li Keqiang, ia indica ja ce los suporta reteni la Rena Unida.

En se visita a London en la semana pasada, Abbott ia discute ance con Philip Hammond, ministro brites de esternas, sur la crise en Ucraina e la cade de avion MH17 ala.

2014-08-16

La pape onora martires catolica de Corea Sude

En Seoul, Pape Fransisco ia fa un misa grande su sielo per beatifia 124 de la catolicas prima de Corea Sude. Un tal declara es un paso nesesada ante la santi completa de la person.

El ia loda la coreanes ci ia mori per se crede en la sentenios 18 e 19. Sentos de miles de persones ia es presente a la rituo, cual ia aveni en la plaza do, istorial, on ia esibi catolicas nonrepentinte ante mata publica los.

La catolicas corean prima ia es unica, car los no ia es convertida par misionores veninte a Corea. En loca, los mesma ia aprende sur catolicisme e ia retrae libros a se pais per atenta estende la relijio.

La rituo ia ocupa la dia tre de la visita de la pape a Corea Sude, como un parte de se viaja prima a Asia pos emprende la posto en marto 2013.

La pape ia encontra survivores de la desastre de la naveta Sewol, e ia fa se misa prima publica en la area en venerdi, en un stadion de futbal.

El ia averti catolicas sur "un canser de despera" en sosias material oseseda, disente ce materialisme estende como un deserto spirital tra la mundo rica. El ia recomenda ance ce coreanes sude prea per un uni con Corea Norde.

La pape spende sinco dias en Corea Sude, do la Eglesa Catolica crese. Lo ave aora pico plu ca 5,4 milion membros – plu ca 10% de la popla.

En via a ala, el ia telegrafi se bondises a la governa de Xina, como el fa tradisional sempre cuando el vola supra un pais. Ma la governa no ia reseta la mesaje. (On ia envia denova lo de la ambasada italian en Beijing, a pos.)

Esta ia es la ves prima cuando Xina ia permete la usa de se spasio airal a un pape. La Vatican e Xina ia ave no relatas formal pos la comensa de la rena de la partito comuniste en 1949.

2014-08-15

Maliki resinia per fini la crise political en Irac

Nouri Maliki, la ministro xef de Irac, ia resinia pos oto anios de potia. On espera ce esta va fini un crise political en Baghdad. La NU e la SUA ia bonveni se resinia.

On ia culpa se refusa plu temprana de resinia per la profondi de la crise.

La governa no ia susede para ce gerores de la Stato Muslim saisi areas vasta en Irac norde. Esta ia causa un crise de securia e ia forsa cisa 1,2 milion iracis de se casas.

Aparente en la televisa nasional con otra politicistes de la majoria xia, Maliki ia parla sur la menasa "teroriste" grave, e ia anunsia alora se parti.

A ante, el ia insiste ce el debe reteni la direto de formi la governa, car el gida la partito la plu grande en parlamento.

Se oto anios de potia ia es frecuente dividente, car on ia acusa ce se governa ia favore la majoria xia. Oposores dise ce se politicas setal ia provoca la crise presente.

En otra novas relatada, ministros de la UE en Brusseles va xerca un aproba per la transporta de armas a curdis iraci ci batalia la Stato Muslim. E la Consilio de Securia de la NU va vota sur un deside ru cual ta puni la enscrive e la finansia de combatores stranjer a la Stato Muslim.

2014-08-14

Un sesafusili de sinco dias comensa en Gaza

La israelis e la filastinis ia comensa un sesafusili nova de sinco dias en Gaza, acordada a la fini de un sesafusili de tre dias.

Ma an cuando on ia anunsia esta, Israel ia ataca de aira en responde a rocetos sur cual lo alega ce los ia veni xutada de Gaza.

Hamas, cual controla Gaza, ia nega ce se membros ia lansa esta rocetos a Israel. Lo pare ce no lado ia sufri moris a esta ves.

No plu reportas de violentia ia segue en la note. On previde ce la du lados va continua se discutes nondireta en Cairo, arbitrada par Misre.

Israel ia comensa se opera militar en Gaza a 8 julio, atentante para atacas de Gaza.

La filastinis dise ce la sesafusili estendeda va crea un pausa per permete plu negosias. Ma la discutes va es estrema difisil.

La lado filastini desira ce on sutrae la bloci de Gaza. La lado israeli desira ce on desarma intera la teritorio.

Israel ia ocupa Gaza en 1967, e no ia retira se soldatos e colonistes asta 2005. An tal, lo controla ancora la plu de la fronteras, acua e spasio airal de Gaza. La frontera sude es controlada par Misre.

2014-08-13

Un leoneta gida un om a se madre mor

En un refuja barati de animales, un leoneta de 15 menses ia gida gardaforestas a la corpo de se madre mor.

Un gardor ia vide la leoneta ascondeda en la arboretas. Car un leoneta tan joven es normal sempre acompaniada par se madre, la gardor ia segue el, e ia descovre la corpo sur un colina prosima.

Alora la leoneta ia senta vijilante se madre asta cuando la gardor ia reveni con ofisiores de foresta e polisiores per prende la corpo a via.

La autopsia ia sujesta ce la madre ia mori en combate con otra animales, cisa un manada de bufalos. El ia ave costelas rompeda e feris interna, e ia mori par emoraje.

Seguente la conta la plu resente de la anio 2010, la parce Gir, en la stato Gujarat, conteni 411 leones asian.

Anshuman Sharma, la Visconservor de Forestas en Gir, ia descrive la condui de la leoneta como "rara" e "multe strana". El ia esperia nunca un tal cosa a ante en se multe anios de oserva leones.

Sharma ia dise ce leones es conoseda per se condui sosial: "Los no es simil a canes – los no presa pedetas con manos, e no secute se codas. Ma nos crede ce los reconose la umanas ci los vide a cada dia."

La leoneta es aora constante oservada par empleadas de la parce. On previde ce el va junta se a un otra grupo, o cisa un otra leon fema va comensa cura el.

2014-08-12

Robin Williams es trovada mor a se casa

Robin Williams, un ator e comediste famosa de la SUA, ia suiside a se casa a la eda de 63.

La polisia en California ia trova ce el es mor pos responde a un telefoni sirca mediadia.

Williams ia es bon conoseda per tal filmas como Bon Matina, Vietnam e Club de Poesistes Mor, e ia gania la premio Oscar como la ator suportante la plu bon pos se rol como terapiste en Bon Will Hunting.

Se anunsior ia dise ce el ia "batalia un depresa sever". En la pasada, William ia parla – e broma an – sur se lutas contra alcol e drogas.

El ia revade resente a un sentro de resani per "ajusteta" se sobria.

La polisia suspeta ce se mori es un suiside par asfixia, ma on va investiga ancora detaliosa.

Se sposa, Susan Schnedier, ia demanda ce on respeta la privatia de la familia en se tempo de lamenta, e ce on recorda no la modo en cual Williams ia mori, ma "la multe momentos de joia e rie cual el ia dona a miliones".

2014-08-11

Kasparov atenta deveni la presidente de xace internasional

Garry Kasparov, un campion pasada de xace, va atenta prende la posto xef de la jua de Kirsan Ilyumzhinov, un multimilionor ci dise ce el ia viaja con estrateranes.

La luta political entre la du rusces va aveni a lado de la Olimpiada de Xace en Tromsø, un site norsce artica.

Ilyumzhinov es ja la presidente de la Federa Internasional de Xace tra 19 anios. Se criticas acusa ce el es un pupetin de la Kremlin, e ce el ia cultiva relatas con Saddam Hussein e Muammar Gaddafi.

Kasparov, ci ave 51 anios, es notada como un campanior de diretos umana e un oposor de la presidente de Rusia, Vladimir Putin.

El acusa Ilyumzhinov sur un prosimia esedente con Putin, e dise ce se presidentia de la Federa de Xace ia es manxada par "maltratas e prejudis".

El ia ajunta: "Tota ambasada rusce en la mundo es ativida per suporta ce Ilyumzhinov resta en se posto. Xace no es la tema. Esta batalia es intera political."

Ilyumzhinov ave 52 anios. El alega ce, a un ves pasada, el ia es caturada par estrateranes ci ia comunica telepatica e ia prende el a un otra planeta en un barcon spasial jigante.

Se criticas dise ce tal declaras ia forsa sponsores a via de la jua.

2014-08-10

Un avion irani cade prosima a un airoporto de Tehran

Plu ca 40 persones, incluinte alga enfantes, ia mori cuando un avion peti ia cade prosima a Tehran, la capital irani.

La avion ia colpa un area abitada, prosima a un airoporto en la ueste de la site, a la matina de soldi.

On reporta ce la avion ia es en via a Tabas, un site en la este de la pais.

Iran ia esperia un serie de cades de avion, per cual on culpa la eda de la veculos e un istoria de manteni mal los.

La pais usa ancora aviones comprada ante la revolui en 1979, cual ia es segueda par un crise en cual 52 diplomatas SUA ia es ostajida en Tehran tra 444 dias. Par causa de la crise, restrinjes internasional ia es introduida sur comersia con Iran.

Multe aviones irani usa partes reservada cual ia es nonofisial fabricada.

En la 25 anios pasada, plu ca 200 asidentes ia envolve aviones irani, causante plu ca 2000 moris.

La reportas prima indica ce la asidente de oji pertine a un jeto Iran-140 cual ia porta cuatrodes pasajores e oto ecipores.

2014-08-09

Canada mapa la fondo de mar artica

Canada ia comensa un mision de mapa la fondo de la mar artica, per suporta se intende de estende se teritorio asta la Polo Norde.

La mision de ses semanas aveni entre reclamas competente de otra paises, incluinte Rusia.

Du rompejelos vade aora de Tera Nova (Newfoundland) per colie datos de un dorso su mar cual comensa prosima a la Insula Ellesmere e continua asta la polo. On crede ce la area inclui reservas grande de petrolio e gas.

En desembre 2013, Canada ia rejistra ofisial con la Nasiones Unida se intende de crese multe se frontera atlantica.

Rusia e Danmarc ia fa ance reclamas sur un area enorme de la fondo de mar sirca la Dorso Lomonosov.

Tota tre paises xerca un demostra siensal ce la dorso es un estende su mar de se plano continental propre.

On estima ce la area conteni 13% de la petrolio nondescovreda de la mundo, e ance asta 30% de se reservas ascondeda de gas natural.

Su la regulas de la NU, un nasion costal pote reclama la direto economial escluinte a recursos natural sur o su la fondo de mar, asta 200 milias maral (370 cilometres) ultra se teritorio teral.

Ma si la plano continental estende ultra acel distantia, la pais debe furni datos a un comision NU cual ta fa alora recomendas sur la defini de un limita esterna.

2014-08-08

Obama comanda atacas airal contra la gerores de Stato Muslim

Barack Obama, la presidente de la Statos Unida de Amercia, ia dise ce el ia comanda atacas airal contra militaristes muslim en Irac norde, ma ce el no intende reenvia se soldatos a la pais.

El ia clari ce la SUA va ataca gerores de la Stato Muslim per preveni la masacra de minorias relijiosa, o si la gerores perili interesas american.

On ia fa ancora no colpas, ma la SUA ia cade pacos de avion per aida iracis ci es menasada par la gerores.

La Stato Muslim ia saisi Qaraqosh, la vila cristian la plu grande de Irac, obligante la abitores a fuji.

Parlante en la Casa Blanca en la sera de jovedi, pos consentas con se conselores de securia nasional, Obama ia dise ce aviones militar ia distribui comedas e acua a membros de la comunia relijiosa iezidi ci la militaristes ia trapi sur Monte Sinjar.

Ofisiores ia averti ce la iezidis va mori de famia e desidrata si los resta sur la montania, ma ce los va es matada par la Stato Muslim si los fuji.

Obama ia dise: "La SUA no pote e no debe interveni sempre cuando un crise aveni en la mundo." Ma el ia esplica ce la SUA no pote iniora la previde de violentia "a grado xocante", spesial cuando la governa iraci ia demanda un aida.

El ia continua: "Nos pote ata, atendosa e fidable, per preveni un ata posible de jenoside. Oji, America veni per aida."

2014-08-07

On trova cocaina en un barcon de marina espaniol

La polisia espaniol ia saisi 127 cilogrames de cocaina trovada en un sala de furnis de un barcon de instrui marinores. Los dise ce la cocaina ia entra a la barcon cuando lo ia para en Colombia.

Tre marinores ia es ja arestada cuando la barcon ia reveni a Espania en julio.

Contrabandores de drogas ia contrata con la marinores per transporta la drogas cuando la barcon ia reposa a porto en la site Cartegena de Indias.

La drogas ia es saisida en Cadiz, en Espania sude-ueste. Los ia es ascondeda entre la velas reservada de la barcon.

La polisia ia deveni consensa sur la drogas cuando la autoriosas SUA ia aresta du colombianes, sur ci los ia suspeta ce los ia oteni 20 cilogrames de cocaina de la marinores en un visita a New York en maio.

La barcon, un goleta nomida Juan Sebastián de Elcano, ia veni de completi un turi de ses menses, viajante tra 18 mil milias maral.

2014-08-06

Migrores african scaramuxa en Calais

En Calais, un site de Frans norde, scaramuxas entre migrores african ia lasa plu ca 50 feridas.

Un combate ia comensa a la sera de lundi a un sentro de distribui comedas. Polisia ia para lo, ma lo ia continua a pos tra la note.

Sentos de migrores abita en campas nonformal en la porto Calais, de do los atenta traversa nonlegal la Manga per ateni Britan.

La polisia ia spende menses en atenta elimina la campas, ma la migrores dise ce los ave no otra loca per vive.

Esta combate la plu resente ia aveni entre migrores sudani e ertri. On ia envia polisiores de tumulta per para lo a la ves du.

Un aveni simil ia es esperiada a soldi. Sirca 13 persones ia es alora ferida.

En maio, pos un judi de corte, la autoriosas ia atenta sorti la migrores de la campas prosima a la porto. Ma multe de los ia move simple a areas diferente en la site.

2014-08-05

Un fotografiste vesti controversa un sculta antica

En Italia, un fotografiste ia deveni controversa par vesti un sculta famosa, con eda de 2500 anios, en un tanga leopardin e un boa de plumas ros.

La Bronzes de Riace es du scultas de gerores elinica, e es entre la tesoros arceolojial la plu importante de la pais.

On ia descovre los en la fondo de mar prosima a la costa italian en 1972. Los ia reposa ala tra du milenios. Aora se state es estrema frajil, e los veni de es delicata restorada.

Gerald Bruneau ia reseta un permete de fa fotos de los en un museo en la site Reggio Calabria en Italia sude.

Ma on ia para se laboras cuando on ia descovre ce el ia pone vestes nonconveninte sur la obras.

Un politiciste local demanda aora un investiga formal. La idea ce algun ia pote ajunta vestes a los crea consernas sur la cualia de cura cual on furni a la scultas.

La xef de la departe arceolojial ia dise ce on ia dona la permete de fotografi a Bruneau car el ia fa ja un xuta con un velo a la Galeria Borghese en Roma en modo refinada.

La museo no ia sabe a ante ce la fotografiste intende pone vestes nonconveninte sur un de la Bronzes. Empleadas ia interveni tan pronto como posible per para el.

2014-08-04

Un trematera forte colpa Xina sude-ueste

Xina ia envia 2500 soldatos a Yunnan, un provinse sude-ueste, pos un trematera cual ia mata sentos de persones.

A la min 381 persones ia mori e plu ca 1800 ia es ferida par la aveni a soldi.

La trematera de grandia 6,1 ia es la plu forte cual ia aveni en la provinse montaniosa en 14 anios.

Soldatos xines con detetadores de vive e aparatos de escava vade a la area per aida con la laboras de salva.

Los va junta se a plu ca 300 polisiores e pompores de Zhaotong e sirca 400 laborores de crise e canes detetante de la provinse intera.

Li Keqiang, la ministro xef, vade ance a la area.

12 mil casas ia es destruida e sirca 30 mil ia es danada. La governa ia envia 2000 tendas, 3000 letos pliable, 3000 covreletos, e 3000 jacones a la zona de desastre.

Ma los ci atenta trae la furnis encontra problemes en ateni la loca, par causa de un pluve nonsesante e liscas de tera cual ia dana multe la vias.

La trematera ia es focada a sola 10 cilometres su la area Zhaotong en la norde-este de Yunnan.

2014-08-03

Netanyahu anunsia ce la gera en Gaza va continua

Benjamin Netanyahu, la ministro xef de Israel, ia dise ce la operas militar israeli en Gaza va continua, an pos la destrui de tota tuneles de Hamas, asta cuando sitizanes israeli es denova secur.

El ia dise ce Hamas va paia "un custa nontolerable" per se atacas contra Israel.

Se parolas ia veni en cuando esperas ia pali sur la discutes en Misre sur un sesafusili.

La sesafusili la plu resente ia colasa corta pos cuando on ia declara lo a venerdi, car un soldato israeli, Hadar Goldin, ia deveni caturada par Hamas. A pos, on ia descovre ce el es mor.

1655 filastinis, de cual la plu ia es persones nonmilitar, e 65 israelis, de cual sola du no ia es soldatos, ia mori ja de pos la comensa de la gera a plu ca tre semanas ante aora.

Ance un laboror tai ia es matada en Israel, e 8900 filastinis ia es ferida.

Israel ia comensa se campania de bombarda a 8 julio, con intende de para atacas par roceto veninte de Gaza. A pos, lo ia comensa operas militar sur tera, contra lanserias de roceto e contra la tuneles usada par Hamas per entra secreta a Israel.

On ia fa atentas diversa de organiza sesafusilis, ma tota ia fali. Ambos lados ia acusa ce la otra ia rompe la acordas de sesafusili.

2014-08-02

Delhi usa imitores per asusta simias

On empleas cuatrodes omes barati ci imita simias, per asusta la simias vera a via de la parlamento e otra construidas governal en Delhi.

La omes fa ruidos xiliante, simil a los de langures de fas negra, per asusta la macacas de fas roja.

Miles de macacas vaga en la stradas de la capital, destruinte jardines e ofisias, e atacante persones per reseta comedas.

Ma la animales es regardada como santa par indus, ci nuri frecuente los, corajinte los a resta.

A ante, la autorias de Delhi ia usa langures vera per teni simias a distantia de la compleso parlamental.

Ma on ia debe abandona esta pratica pos protestas par ativistes sur diretos de animales. Un corte ia judi ance ce la teni de simias caturada es un ata cruel.

Aora, un grupo talentosa de omes asconde pos arbores e imita la crias e abaias de langures.

La popla grande de simias vagante es ja un problem tra tempo longa en Delhi. On ia trova los en trenes de metro o vagante tra parlamento. Los ia invade an la ofisia de la ministro xef.

2014-08-01

La periodo tempora de refuja rusce fini per Edward Snowden

La permete a Edward Snowden de resta per un anio en Rusia ia fini, con no confirma ce on va estende plu lo. Snowden ia publici la atas de la departe de securia SUA a un anio ante aora.

Se avocato e portavose, Anatoly Kucherena, ia dise ce el va resta cisa en la pais tra cuando on trata se demanda per un estende de periodo.

On sabe poca sur la ativia de Snowden en Rusia. Per esemplo, on no sabe do el abita e esce el labora.

An tal, el ia provoca grande la interesa publica en april, cuando el ia apare en un mesaje rejistrada en la consenta anial televisada de Presidente Vladimir Putin. Se demanda alora ia es esce Rusia spia contra se sitizanes.

En un intervisa a tv rusce en jovedi, se avocato ia asentua ce se cliente ia reseta "un permete tempora per resta" en Rusia, e no "un refuja political".

Snowden ia fuji a Rusia, corta pos revela detalias de un opera internasional par la Ajenteria de Securia Nasional de la SUA cual monitori e escuta telefonis.

Un avocato SUA ci ia consela Snowden ia dise ce probable el va continua resta en Rusia.

A la fini de maio, John Kerry, la ministro SUA de internas, ia recomenda forte ce Snowden reveni a se pais propre per es legal prosededa.