2015-02-28

Un politiciste rusce oposante es matada

Boris Nemtsov, un politiciste oposante rusce e un ministro xef suordinada pasada, ia es matada par fusili en Moscva.

Un atacor nonidentifiada en un auto ia fusili la dorso de Nemtsov a cuatro veses en cuando el ia traversa un ponte en vista de la Kremlin.

El ia mori a oras pos apela per suporta per un pasea protestante en Moscva a soldi contra la gera en Ucraina.

La Kremlin ia dise ce la presidente Vladimir Putin condena la omiside. Se portavose ia clari ce Putin ia emprende "controla personal" de la investiga sur la mata.

Barack Obama, la presidente de la SUA, ia condena la "omiside savaje" e ia recomenda ce la governa rusce fa "un investiga rapida, nonpartisan, e transparente".

Thorbjørn Jagland, ia secretor jeneral de la Consilio de Europa, ia condena ance la mata, disente en un tuita: "Me es xocada e angusada ce la gidor major oposante Boris Nemtsov ia es fusilida. La matores debe fronti justia."

En un intervisa resenta, Nemtsov ia dise ce el teme ce Putin va fa ce on mata el par causa de se oposa de la gera en Ucraina.

Nemtsov, ci ia ave 55 anios, ia servi como ministro xef suordinada su presidente Boris Ieltsin en la desenio de 1990.

Cuando el ia es governor de Nijni Novgorod, un de la sites la plu grande de Rusia, el ia gania un reputa como un reformor economial. El ia desacorda con Putin, la seguor de Ieltsin, e ia deveni un politiciste franca oposante.

2015-02-27

Un fem de Hongkong es prisonida per maltrata se servor

On ia condena un fem de Hongkong a ses anios en prison per maltrata se servor indonesian de casa.

Plu temprana en esta mense, on ia judi ce Law Wan-tung es culpable de feri sever, menasa criminal, e fali paia a se servor, Erwiana Sulistyaningsih.

Erwiana ia atrae la atende mundal en 2014 cuando el ia revade a Indonesia per trata en ospital.

En la prosede, el ia descrive como se empleor ia bate el e ia fami el.

La caso ia es intensa oservada en Hongkong, do un cuantia notable de familias depende de servores de casa.

La abitores de la site emplea sirca 300 mil servores fema de otra partes de Asia, xef de Indonesia e la Pilipinas.

En ajunta a se condena a prison, Law, ci ave 44 anios e du enfantes, ia es ance multada per 15 mil dolares de Hongkong (1725 euros). El ia risca un condena masima de sete anios en prison.

La prosede ia dura tra ses semanas. La corte ia oia ce Law ia bate Erwiana con ojetos diversa de casa, e ia priva el de comeda conveninte, permetente sola un cuantia peti de ris e pan.

Law ia permete ance ce Erwiana dormi per sola cuatro oras per note. A un ves, Law ia colpa el tan forte ce se dentes sisorante ia frati.

Presentante la condena, la judor Amanda Woodcock ia dise ce Law "ia mostra no compatia" a Erwiana e se otra aidores de casa. El ia vide los como "persones inferior". La judor ia recomenda ce autoriosas en Hongkong e Indonesia investiga la state de vive de laborores.

Erwiana ave 24 anios. El ia ariva en Hongkong en 2013, ia labora per Law per sirca oto menses, e ia revade a se vileta en Djava sentral en 2014.

El ia reveni bateda e contusada, tro debil per pasea, e con no mone. Se fas, manos e gamas ia es covreda con sicatrises e laseras, e partes de se pel ia es negrida e desintegrante. Fotos de el ia causa coleria publica en Indonesia.

2015-02-26

Un vila nederlandes proteje se contra atacas par bu

On recomenda ce abitores en Purmurend, un vila en Nederland norde, porta parapluves a note, pos un serie de atacas par un bu.

Desuples de persones ia sufri feris de testa en la tre semanas pasada par causa de la garas de la avia, cual es un bu real. La preda usual de esta spesie es avias e mamales peti.

Du corores ia es atacada a martedi, e un de los ia nesesa sutures per sinco feris diversa de testa.

Un de la locas de la atacas ia es un casa per persones descapasida. Un portavose ia dise ce abitores e laborores ala ia sufri a la min 15 atacas separada par la avia notal, cual resta libre.

"En la dia, on ave no problem," el ia dise. "Ma a note aora, nos vade a estra sola pos enarma nos con parapluves, elmos, xapos, o cualce cosa simil per proteje nos."

Rabobank, un banco nederlandes, ia dona parapluves a la casa, e un portavose per la compania ia informa la televisa local ce lo intende envia ance un falconor.

La Funda Nederlandes de Bus dise ce la condui nonusual de la animal es cisa la resulta de se eleva sin libria e donce de un asosia entre umanas e comeda. O cisa la bu ave simple un nivel altida de ormones a comensa de la saison de reprodui.

La comite local de Purmurend ia recomenda ce abitores no atenta catura la avia.

Bues real es entre la spesies de bu la plu grande de mundo. Se alas ave un estende de asta 1,8 metres, e los pote pesa asta 3 cilogrames.

2015-02-25

La polisia canadian investiga un tunel misteriosa

En Canada, la polisia en Toronto demanda ce la popla aida identifia la intende de un buncer trovada a tre metres su la tera, prosima a un loca cual la Juas Panamerican va usa en julio.

Mark Saunders, la xef suordinada de polisia, ia dise ce no parte de la buncer sujesta un intende criminal, ma ce lo ia es construida con un "sofistica notable".

La tunel ave un altia de cuasi 2 metres, un largia de cuasi un metre, e un longia de 10 metres. Lo es suportada par strutures de lenio.

On ia trova lo en janero, a min ca un cilometre de la Sentro de Tenis Canadian, en la compleso de la Universia de York, do competes profesal de tenis va aveni a esta estate.

La tunel ia es trovada cuando un ofisior de conserva ia descovre un cuantia grande de tera escavada prosima a un serca en la bosce pos la sentro.

A interna, la polisia ia trova un bote de gasolina, contenadores de comedas, un jenerador, e un careta de jardin. Los ia trova ance bulbos de lus secur contra umidia e un pompa per sutrae acua de su la tera.

Un crus a la fini de un cadena de perletas rosarial, con un papavera liada, ia es trovada pendente de un clo en la buncer.

La entra a la tunel ia es ascondeda par un covrente de lenio.

"Me no ave an un teoria inisial," Saunders ia dise. El ia ajunta ce la buncer ia es serta construida par algun ci "ave clar alga espertia sur fortia strutural".

On ia repleni ja la tunel con tera.

2015-02-24

Hollande desira severi la leges sur crimines de odia

La presidente franses, François Hollande ia proposa forti la leges sur crimines de odia antisemita, raziste e omofobica.

Parlante a la come de sera de un grupo iudi en Paris ier, Hollande ia reserti a iudis ce los es bonvenida e secur en Frans. El ia nota ance ce muslimes deveni sempre plu atacada.

Se proposas segue la matas de 17 persones en la xutas a Charlie Hebdo e un aseja de supramercato caxer en janero. La pais es ancora en un state de vijila estrema pos acel atacas.

Ier, Hollande ia dise ce el desira "punis plu rapida, plu capas" contra la odia parlada.

Plu temprana en esta mense, sentos de tombas iudi ia es violeda en Frans este. Grupos muslim franses ia reporta ance un aumenta de avenis islamofobica pos la atacas a Charlie Hebdo.
La anunsia par Hollande ia es alga ombrida par un disputa entre gidores de la comunias iudi e muslim de Frans.

Un grupo muslim importante ia boicota la come post cuando un figur iudi major ia declara ce seguores joven de Islam es culpable per tota crimin violente.

Esta ia aveni ance ier, cuando la autoriosas franses ia confisca la pasaportes de ses sitizanes sur ci on ia alega ce los intende viaja a Suria per partisipa con jihadistes.

Bernard Cazeneuve, la ministro franses de internas, ia dise ce la departe de securia crede ce esta omes desira junta se a la grupo combatosa Stato Islamiste.

2015-02-23

Un asidente de naveta en Bangladex

Un naveta ia inversa en Bangladex sentral, matante a la min 69 persones, incluinte multe enfantes.

La naveta ia porta plu ca 100 persones. Lo ia xoca un barcon de carga sur la rio Padma a sirca 40 cilometres a norde-ueste de la capital, Dhaka.

Desuples de pasajores ia nada a la riva o ia es salvada. Los ci ia mori ia es xef trapida a la niveles basa.

Asidentes es comun en la rede de rios bangla. La barcos es suprafolida e mal construida.

On ia leva la naveta a la surfas e ia tira lo a la riva a esta matina.

Nun sabe esata cuanto persones ia es sur lo, car navetas bangla no ave usual listas formal de pasajores.

La polisia ia aresta tre persones, incluinte a la min un ci ia es encargada de dirije la barcon de carga.

Un asidente simil, plu temprana en febrero, ia mata sete pasajores, cisa plu, en Bangladex sude.

En agosto 2014, plu ca 100 persones ia mori cuando un naveta ia inversa, portante plu ca 200 persones. Lo ia es ofisial capas de porta 85.

2015-02-22

Turcia vacui un tomba turces en Suria

Sentos de soldatos turces en veculos blindada ia entra a Suria norde e ia vacui un tomba osmanian istorial.

Turcia opina ce lo ave la autoria ultima sur esta santeria.

Ahmet Davutoğlu, la ministro xef de Turcia, ia dise ce on ia prende tempora la restas de Suleyman Shah a Turcia, ma ce on intende move los a un otra loca en Suria, plu prosima a la frontera turces.

Suleyman Shah ia es la avo de la fundor de la impero osmanian, Osman la Prima.

Soldatos ia destrui la compleso de la tomba, parente per preveni ce ativistes de Stato Islamiste usa lo.

La bandera turces ia es levada supra la santeria. La soldatos no ia es atacada en la opera, ma un de los ia mori asidental.

La opera ia comensa sirca 21:00 de ora local ier, e ia fini a esta matina.

Un convoia grande, incluinte 600 soldatos e sirca 100 tances e veculos blindada, ia pasa tra Kobani – la site cual soldatos curdi suri ia recatura de SI en la mense pasada. Los ia viaja tra 35 cilometres a sude, asta la tomba a lado de la rivas de la rio Eufrates.

On crede ce Suleyman Shah ia mori en la rio.

La tomba ia es sempre gardada par un grupo de sirca 40 soldatos, con intercambias periodal.

La loca es un parte de la teritorio turces, seguente un trata suscriveda en franses en 1921.

A acel tempo, la tomba e enclave legal ia es a 80 cilometres plu sude de se loca presente. On ia move los pos cuando la tomba orijinal ia es inondada par la crea de Lago Assad en 1974.

2015-02-21

Un focon en un rascasielo en Dubai

En Dubai en la Amirias Arabi Unida, un focon ia pasa tra la rascasielo Marina Torch, un de la construidas abital la plu alta de mundo.

Ventas forte ia aida la foco a estende tra la construida de 336,1 metres en la distrito de la barceria. On ia estingui ja lo.

Un atestor ia reporta "detrito a cada loca, cadente a en construidas visina".

On ancora no sabe serta cual ia causa la focon, ma lo pare ce lo ia comensa a la nivel 50. Sentos de persones ia es sortida, e on ia reporta no feris o moris.

La construida es iconin, e persones ia veni sur balcones ensircante per regarda la arde, an a la ora 3 de matina cuando lo ia aveni.

Un abitor ia dise ce el ia vide paneles de la rascasielo cual ia ensende, deveninte saisida par la venta e cadente a la tera. Los ia cade ancora en flamas e ia colpa construidas visina.

En 2012, un focon ia ruina la 34 niveles de la Tore Tamweel en Dubai. Nun ia es ferida en acel aveni, parente causada par un sigareta, ma sentos de abitores ia es lasada sin casa.

2015-02-20

Tai proibi la usa comersial de madres sustitua

Tai ia aproba un lege cual proibi stranjeres de paia a femes tai afin los deveni madres sustitua. Du casos major ia causa un debate en la anio pasada.

La lege proibi ance la usa de tal ajenterias, e de tota anunsias sur femes volente crese bebes per otras.

En 2014, la caso de un xico naseda con sindrom de Down ia fa ce la mundo persepi la industria de madres sustitua en Tai. Se madre sustitua ia dise ce se jenitores australian ia abandona la xico, ma ia prende se sore jemelo sana con se.

Consernas sur la industria ia aumenta cuando on ia descovre ce un om japanes ia jenita plu ca des bebes con madres sustitua diversa.

Lo ia pare ce la comite medical de Tai ia proibi ja la usa de madres sustitua en 1997. An tal, acel industria ia buma denova, atraente multe stranjeres.

La legor Wanlop Tangkananurak ia dise ce la lege, prima presentada en parlamento en novembre, intende preveni ce Tai deveni "la utero de la mundo".

La lege defini un condena masima de 10 anios en prison per cualcun ci lua comersial un madre sustitua.

No tota sustituas es proibida. Duples tai pote continua usa sustituas si la fem pertinente ave plu ca 25 anios.

La caso de la xico bebe ia deveni conoseda tra la mundo. La xico, Gammy, ia resta en Tai con se madre sustitua, Pattaramon Chanbua, ci ave 21 anios. Aora, Australia ia aseta el como sitizan afin el pote reseta cura medical.

2015-02-19

Arjentinas protesta contra la mori de un investigor

Sentos de miles de persones ia partisipa en un pasea tra Buenos Aires, la capital de Arjentina, a un mense pos la mori de Alberto Nisman, un avocato prosedente.

La familia de Nisman e politicistes antigoverna ia es presente.

Los ia iniora un pluve forte per esije justia per Nisman, ci ia investiga la governa.

On ia trova el, mor, en se aparte a 18 janero, con un feri de baleta a se testa e un fusil a se lado. On ancora no sabe esce el ia mata se o ia es asasinada.

Nisman ia investiga la bombi de la sentro iudi AMIA en 1994, la ataca teroriste la plu matante en Arjentina.

A poca dias ante se mori, el ia publici un reporta de 300 pajes, en cual el ia acusa ce Presidente Cristina Fernández de Kirchner e Héctor Timerman ia asconde la rol alegada de Iran en la bombi. El ia es a punto de apare ante un comite congresal per presenta plu detalias de se alegas.

La pasea silente ier ia es clamada per otra avocatos per esije un investiga completa. Protestas simil ia aveni tra la pais, e arjentinas abitante en Espania, Frans, Israel e otra paises ia asembla ance.

Ofisiores ia denunsia la pasea como un move political per debili la governa.

En un letera publica en se loca de rede, Fernández ia sujesta ce ajentes renegada ia dona informas falsa a Nisman per destabli se governa. El ia dise ance ce el es convinseda ce la mori no ia es un suiside.

A alga dias plu tarda, el ia anunsia ce el intende disolve la departe nasional de colie informas. Oposores ia responde ce el fa esta per diverje la atende de la mori de Nisman.

2015-02-18

Foles diverti se par salta de fenetras en un Boston nevosa

La neva en Boston en Massachusetts es aora tan profonda ce la maior ia debe recomenda forte ce on no diverti se par salta de fenetras a en lo.

Martin Walsh ia dise ce la ativia, cual on ia comparti en redes sosial, pote es multe perilosa. "Lo es un ata fol, e on ta pote mata se."

Febrero ia rompe la recordo per la mense la plu nevosa de istoria en Boston, cual la reseta la desuple de se cuantia de neva tipal de inverno.

Ier, la area la prende asta sinco plu sentimetres de neva, ma otra partes de la SUA ia debe responde a cumulas plu grande.

La neva de tempestas presedente ancora no ia fonde en Boston. On ave aora tan multe neva ala ce on ia usa cuasi tota la spasio disponable per dejeta lo.

On previde ce lo va neva an plu en la site a esta fini de semana.

2015-02-17

Magiares protesta ante un visita par Putin

Sirca 2000 persones ia pasea tra Budapest, la capital magiar, ante discutes entre la ministro xef Viktor Orbán e la presidente rusce Vladimir Putin.

La visita oji va es la prima par Putin a un gidor de la Uni European de pos junio 2014.

Magiar vole negosia un acorda nova per furnis de gas rusce.

La plu de statos membros de la UE ia evita Rusia par causa de la situa en Ucraina este, an si Rusia nega la acusa ce lo ia provoca la violentia.

Protestores ia asembla en Budapest a la sera de lundi, portante banderas con la parolas "Putin Niet, Europe Yes" (Putin No, Europa Si).

La visita par Putin aveni a min ca du semanas pos cuando Angela Merkel, la canselor deutx, ia visita Budapest ante un semana de diplomatia intensa, con resulta ce on ia anunsia un sesafusili en Ucraina este.

La presidente rusce desira forte mostra ce el ave ancora aliadas en la UE e OTAN.

En se visita a Budapest, el va pone un garlanda a un monumento soviet de gera cual onora soldatos ci ia mori en supresa la revolta magiar en 1956.

Magiar ia suporta punis donada a Rusia par la UE sur la situa ucrainsce, ma ia parla ance sur la efeto negativa de los.

En 2014, Orbán ia dise ce la UE ia "xuta se a la pede" en restrinje la comersias con Moscva.

Magiar depende de Rusia per la plu de se furnis de gas, e desira negosia un acorda flexable de periodo longa per segue la acorda presente cual va fini en esta anio.

Orbán ia deveni importante como un gidor de studiantes, con un disposa forte anticomuniste e antirusce. A venerdi, el ia informa la radio magiar ce tensas psicolojial esiste con Rusia, ma ce el vole vinse estas.

On regarda el como un de la aliadas la plu prosima de Putin en Europa.

Ma multe de la protestores ci ia pasea tra Budapest ier ia dise ce los es cauta sur lias plu prosima con Rusia.

2015-02-16

Satelites segue caracoles per redui maladia en Africa

Siensistes usa satelites per segue la trasa de caracoles, con intende de impedi la sperde de maladias parasital en Africa.

La informa es usada per predise la locas probable de infeta, permetente ce ajenterias de sania organiza plu bon se laborores.

Esta es un esemplo de la influe cresente de datos spasial en aplicas nova de aida medical.

On ia anunsia la developa a un encontra de la Asosia American per la Avansa de Siensa, en San Jose.

Natural, on no pote persepi caracoles individua de orbita, ma spesialistes va ave un idea estrema bon de la locas do esta animales prefere es, e de la states en cual los abunda.

Caracoles de acua porta la larvas de la vermes cual sperde xistosomiase tra poplas umana en Africa. La maladia no mata usual, ma lo debili sufrores.

En Cenia, siensistes crea mapas satelital de tota rios e canales do esta caracoles abita probable. Los projeta como los va move tra la campania. On compara alora esta informa con datos satelital sur la abitadas de persones en acel campania.

Par combina la du mapas, on vide la locas con risca la plu alta, do on debe foca programes de sania.

On fa un labora simil con insetos cual sperde maladias, como moscitos.

2015-02-15

Un fusilor es matada en København

En Danmarc, la polisia de København ia fusili un om sur ci los crede ce el ia fa plu temprana du atacas matante en la capital.

Los ia mata la om en la distrito Nørrebro, pos cuando el ia comensa xuta a los.

Esta ia segue la mata ier de un om iudi e la feri de du polisiores a un debate sur la libria de espresa, en un caferia prosima a la sinagoga xef de la site.

La polisia dise ce la monitoris video ia sujesta ce la mesma om ia fa ambos atacas. Los no crede ce cualce otra persones ia en envolveda.

La site ia es forte vijilante pos la xutas ier.

Temprana a esta matina, la polisia ia anunsia ce los ia oserva un adirije en Nørrebro, espetante la reveni de la abitor.

Cuando el ia apare, el ia vide la polisiores, ia estrae un fusil, e ia comensa fusili. La polisia ia responde par mata el. Esta ia aveni prosima a la stasion ferovial de Nørrebro.

Plu temprana, la polisia ia averti abitores ce los no va es secur en la sentro de site, an si los ia asentua ce los no enforsa un proibi de sorti.

La cartuniste Lars Vilks, ci ia fronti ja menasas de mori sur se pitures de la profeta Muhammad, ia espresa se opina ce el ia es la blanco intendeda de la ataca prima. El no ia es ferida.

La ambasador franses, François Zimeray, ia es ance presente a la ataca.

La anunsia de la debate a la cafe ia demanda esce artistes pote "osa" blasfema pos la atacas par fusilores islamiste contra la jornal Charlie Hebdo en Paris en janero.

2015-02-14

Un presidente pasada de Txad va es prosededa

Un corte en Senegal ia comanda Hissène Habré, la presidente pasada de Txad, a es prosededa sur alegas de crimines de gera, tortura, e crimines contra umania.

Judores a la Camera African Estracomun ia dise ce on ave atestas sufisinte contra Habré, ci es en prison en Senegal.

La corte ia es fundida par Senegal e la Uni African per atenta prosede Habré pos se aresta en 2013.

Se prosede va es la usa prima de autoria universal en Africa.

Habré, ci ave aora 72 anios, es acusada de miles de matas political en se presidentia de 1982 a 1990, cual ia fini cuando la presidente presente, Idriss Déby, ia despone el.

El nega la alegas e refusa reconose la legalia de la corte.

En 2008, en se asentia, Txad ia condena el a mori per se gida de un rebela enarmada en la pais, plu temprana en acel anio.

On previde ce la prosede va comensa en maio o junio. Lo va es manejada par un comite de tre persones: du judores senegales e un judor xef stranjer de un otra stato membro de la Uni African.

Jacqueline Moudeina, avocato xef per la vitimes alegada en la caso, ia comenta; "Pos tan multe anios, la vitimes de Habré es aora a punto de vide justia per lo cual los ia sufri."

Clément Abaifouta, un prisonida political en la rena de Habré, ia dise: "Nos va pote final fronti nos tormentor xef e regania nos dinia como umanas."

Descriveda como "la Pinochet de Africa", Habré ia es prima acusada en Senegal en 2000, ma la cortes de la pais ia judi alora ce on no pote prosede el ala.

En 2005, Beljia ia acusa el sur crimines contra umania e tortura, ma Senegal ia refusa cuatro demandas de estradi el.

2015-02-13

Caos en la parlamento de Sudafrica

La parlamento de Sudafrica ia deveni caososa cuando parlamentores sinistriste ia scaramuxa con securiores a media de un parla major anial par presidente Jacob Zuma.

La Bataliores per Libria Economial (EFF en engles), gidada par Julius Malema, ia interompe Zuma a multe veses, esijente respondes sur un scandal de spende.

Alora, la xef de parlamento ia comanda ce on sutrae los de la sala, causante scaramuxas.

La partito oposante la plu grande, la Alia Democrata, ia sorti ance en protesta a la esclui de la EFF. Se gidor, Mmusi Maimane, ia dise: "On no pote usa la polisia contra la parlamento."

La EFF ia usa la aveni de la parla anial sur la State de la Nasion per fa demandas a Zuma sur bonis a se abitada privata, cual ia es publica finansiada e ia custa miliones de dolares.

Un cuantia grande de securiores ia esclui los de la sala. Malema ia es entre la escluidas.

El ia defende la atas de se parlamentores, indicante ce la interompes ia es un atenta valida de defende la democratia. El ia ajunta ce sete de se partito ia deveni ferida e va fa acusas.

Lo no es clar esce la securiores ia es de la polisia o la parlamento. La difere es importante, seguente un parlamentor ci ia dise ce la usa de polisiores ta es un modo de menasa la oposante.

Malema e Zuma ia es aliadas prosima en la pasada, ma los ia desacorda.

La EFF ia secute la mundo political en Sudafrica con un serie de proposas popliste per redistribui la ricia.

En 2014, un esamina autonom ia trova ce Zuma ia "benefica nonmeritada" de la bonis custosa a se casa en la vileta Nkandla. Los ia custa sirca $23 milion e ia inclui un pisina e un ensirca de boves. La presidente ia nega ce el ia fa mal.

An con criticas de la bonis a se casa e la economia staniante de la pais, la partito de Zuma, la Congresa Nasional African, ia es forte reelejeda en la anio pasada.

2015-02-12

On fali acorda sur la deta de Elas

Ofisiores de Elas e la Eurozona ia fali acorda sur la crise de deta elinica. An tal, ambos lados ia dise ce on espera ancora ateni un acorda.

Sete oras de discutes en Bruxelles ia fini sin un declara juntada per resoma la pasos seguente. La discutes va continua en lundi.

Elas dise ce se acorda presente con la Uni European es un puni, e debe sesa. La UE ia averti ce Elas debe onora la acorda.

La governa elinica, gidada par la partito sinistra Syriza, opina ce la restrinjes de la acorda, cual ia presta €240 mil milion a la pais, ia povri ance lo.

La governa ia proposa revisa 30% de se obligas acordada, sustituinte un scema de des reformis per los.

Ma la creditores de Elas en la UE, gidada par Deutxland, insiste ce on no pote cambia la acorda.

Ofisiores de ambos lados ia fa negosias con intende de reali un acorda nova sur la repaia de deta, per distanti la posible ce la pais va sorti de la Eurozona. La mercatos teme acel sorti.

Jeroen Dijsselbloem, la presidente de la Eurogrupo (de ministros de finansia en la Eurozona), ia clari: "Nos ia fa un discute intensa, construosa, esplorante multe temas, ance progresante, ma ancora no sufisinte per ariva a concluis juntada."

Yanis Varoufakis, la ministro de finansia elinica, ia comenta ce la oras de negosia en Bruxelles ia produi "discutes multe bon".

On dise ce la elinicas ia rejeta un acorda proposada par la Eurogrupo cual ia sujesta estende la acorda presente. Acel acorda va desvalidi a la fini de esta mense.

La governa elinica xerca un "acorda de ponte" cual va permete ce lo resta nonpaiante asta cuando lo pote reali un projeta nova de reformis tra cuatro anios con se creditores.

A mercurdi, miles de protestores de politica sinistra ia asembla en Atina per suporta la proposa de se governa.

2015-02-11

Mamales australian deveni rapida estinguida

Australia ia perde ja un desi de se spesies de mamales nativa en la 200 anios pasada. No otra nasion ia esperia un rapidia tan alta de perde de mamales de tera en acel periodo.

La perde es xef causada par la ativias predorin de la gato savaje e la volpe roja, cual on ia introdui de Europa. Focones grande per maneja la tera fa ance un efeto.

Como un nasion rica con popla peti, on ta previde ce la animales de Australia es relativa secur de tal menasas como la perde de abitadas.

Ma un esplora nova de la mamales nativa, publicida en la jornal Prosegues de la Academia Nasional de Siensas, sujesta ce la problem es plu grave ca on ia suposa.

De 1788, 11% de 273 spesies de mamales nativa sur tera ia deveni estinguida; 21% es perilida; e 15% es prosima a peril. La situa es alga plu bon per mamales de mar.

On estima ce la continente conteni sirca 15 e 23 milion gatos savaje.

Medios pratical per proteje la spesies nativa inclui boni la biosecuria sur isolas costal, do on trova min gatos e volpes savaje.

La isolas ta pote ance opera como arcas per spesies perilida. On considera an la usa cauta de foco e otra medios per elimina esta predores.

Ma la rexercores averti ce cisa australianes va nesesa final revisa se modo de vive per impedi la perde de natur.

2015-02-10

Aitianes protesta sur la custa de gasolina

La polisia en Aiti ia scaramuxa con protestores antigoverna ci es coler sur la custa alta de carburante.

Alga persones ia es ferida en cuando polisiores ia avansa per reabri vias en la capital, Port-au-Prince.

Organizores de la protesta ia dise an ce motoristes ci ta entra a la sentro de la site en la protesta de du dias ta risca se vives.

Aiti ia esperia menses de protestas contra se presidente Michael Martelly sur un vota posponeda.

La governa ia redui resente la custa de gasolina e gasolio, ma la protestores desira un redui par 50%, per refleta la cade en la custa internasional de petrolio tra la ses menses pasada.

Evans Paul, la ministro xef, ia apela per calmia, disente: "Nos no pote redui la custa de gasolina. Esta no es car nos no vole, lo es car nos no pote."

Protestores dise ce los va bloci denova vias en Port-au-Prince oji.

Martelly ia comensa governa en la mense pasada pos la fini de la periodo ofisial de parlamento. En la entretempo, el ia acorda con la oposantes ce on va formi un governa nova e fa votas jeneral e local, cual es ja tarda par tre anios.

Ma la noncontentia continua en esta nasion la plu povre de la emisfera ueste, colpada en 2010 par un trematera cual ia ruina multe de la capital.

2015-02-09

Misre suspende futbal pos un tumulta matante

Misre ia suspende tota maxes ofisial de futbal pos scaramuxas ier a un stadion en Qahira (Cairo) cual ia mata 22 persones, cisa plu.

Persones ia es craseda pos cuando la polisia ia xuta gas lacrimojen a suportores de la ecipo Zamalek, ci ia atenta entra par forsa per vide un max contra se competores ENPPI. A la min 20 otra persones ia es ferida.

La fanes ia culpa la autoriosas per abri sola un porte a la stadion. An pos la violentia, on ia fa la max.

On ia comanda la aresta de la gidores de la Cavalores Blanca, la grupo de suportores de Zamalek.

Maxes ofisial de futbal ia es ance suspendeda en 2012 pos la moris de 74 fanes en tumultas a un jua en Porsaid.

Fanes dedicada de futbal misri es comun profonda politicosa, e los ia ave un rol en la despone de presidente Hosni Mubarak en 2011.

Multe persones opina ce la polisia ia permete la violentia en Porsaid per venja se contra la rol de la fanes en tumultas contra Mubarak. La polisia nega la alega.

Resente, on ia sutrae restrinjes de la cuantia de persones ci pote regarda maxes de futbal, pos la moris a Porsaid. Ma aora esta restrinjes va es reajuntada.

A la stadion, montones de sapatos lasada par la mores e feridas ia atesta silente la aveni de ier.

2015-02-08

Gerililas colombian invita Seniora Universo a negosias

Rebelores de la militia FARC de Colombia ia invita la Seniora Universo nova coronida a aida se negosias per pas con la governa.

En un declara publicida a se loca de rede, la grupo ia dise ce los aseta un ofre fada par Paulina Vega, de Colombia, en se xerca per gania se titulo.

Vega, ci ave 22 anios, ancora no ia responde a esta.

La armada rebelante es ja en discute con la governa tra la du anios pasada. Lo fa ja un gera de gerilia contra la governa tra 50 anios.

Representores de ambos lados atenta ateni un acorda, ma la discutes en Habana, la capital de Cuba, ia ariva a un state de nonprogresa.

On ia acorda sur temas de reformi de tera e de la entra de la FARC a politica formal. Ma un trata final de pas resta nontrovable.

En intervisas ante se coroni como Seniora Universo, Vega ia parla sur se desira de vide pas en Colombia.

En se declara, la rebelores de FARC ia dise ce los bonveni se "volentia" de viaja a Habana, ajuntante: "Nos invita tu a reali tu visita afin nos informa tu sur la developa de la discutes de pas."

On estima ce sirca 220 mil persones, de ci la plu ia es nonmilitar, ia es matada de pos la rebelores, con inspira marxiste, ia comensa se batalia enarmada en 1964.

2015-02-07

On xasa e aresta "la fantasma de la opera"

En Austria, on ia aresta un om a la Opera de Stato de Wien ci ia ocupa a multe veses sejas plu cara ca los per cual el ia paia.

A la mostra prima de la baletia Verklungene Feste ("Festas Pasada") a la sera de mercurdi, un aidor ia vide un senior sentante en un de la suites.

La om de 63 anios ia es conoseda per se abitua de paia per un bileta la plu barata, e move alora a un seja plu cara pos la comensa de la presenta.

Polisiores ia xasa el tra la teatro ante fisa securipolsos a el.

On no ia nomi la om, ma jornalistes local ia dona a el la nometa "la fantasma de la opera".

A veses presedente, el ia susede evita deveni caturada par cambia se seja a multe veses tra un presenta.

La empleadas ia deside clama la polisia a mercurdi, pos fali catura la ofendor per acel razona.

Sejas en la suites – comun reservada per ofisiores alta de la stato – es tipal vendeda per 139 euros, en contrasta de la sejas la plu barata de sola 12 euros.

Cuando on ia fronti el, la "fantasma" ia declara ce el es un jornaliste e ia ataca un de la polisiores atentante aresta el.

El ia spende alga oras en prison, e on ia impedi el de tota presentas futur a la teatro de opera.

2015-02-06

Un max de futbal en Gana deveni un tumulta

On ia descrive la max semifinal de la Copa African de Nasiones, entre Gana e la ospitores Gine Ecuatoral, como "un zona de gera". La jua ia es pausada per plu ca 30 minutos par causa de tumultas.

La juores ia debe evita botelas lansada de la fola; fanes ganaian ia xerca refuja pos un gol; polisiores ia usa gas lacrimojen; e un elicotor ia flota supra la stadion.

La Asosia de Futbal Ganaian ia tuita "Esta es aora como un zona de gera", alegante ce "atas barbar de vandalisme" e "atacas violente e nonprovocada" ia aveni en la stadion.

Cuando la max ia recomensa, Gana ia gania par 3–0 per ateni la final a soldi. Alora los va jua contra Costa Ivor, ci ia vinse la Republica Democrata de Congo par 3–1 a mercurdi.

La tumultas ia eruta a medijua. Juores ganaian ia debe es protejeda par polisiores con scermos plastica en parti de la campo, pos fa ja du goles.

On ia para la dui du de la jua a oto minutos ante la fini, cuando suportores de Gana ia core sur la campo pos es atacada.

Ofisiores de la Federa de Futbal African ia usa la sistem de parladores per menasa abandona la max si la fola no sesa lansa ojetos a la juores de Gana.

A pos, on ia trova sur la campo un peso de miror rompeda, un dui de un plato, e un roca.

2015-02-05

Un monce momida medita ancora

Un monce momida, ci on ia trova en state conservada en Mongol en la semana pasada, ia stona e confonde los ci ia descovre el.

Budistes major dise ce la monce, ci senta en la posa de nelumbo, es en un transe profonda de medita e no es mor.

On fa esaminas medical sur la restas, cual ia es envolveda en peles de bove en Mongol norde-sentral.

Siensistes ancora no ia determina como la monce es tan bon preservada, ma alga pensa ce la clima fria de Mongol pote es la causa.

Ma dotor Barry Kerzin, un mediciste de la Dalai-Lama, la gidor spirital de Tibet, ia dise a jornalistes ce la monce es en un state rara de medita nomida "tukdam".

"Si la meditor pote continua resta en esta state de medita, el pote deveni un buda," el ia comenta.

On ia descovre la monce pos cuando un om ia fura el, esperante vende el a la mercato negra.

La polisia mongol ia aresta la furor, e on garda aora la monce a la Sentro Nasional de Espertia de Investiga Legal.

La identia de la monce no es clar, ma on divina ce el es la ensenior de Lama Dashi-Dorzho Itigilov, ci on ia trova ance como momia.

On dise ce en 1927, Itigilov ia informa se studiantes ce el va mori, e ce los debe desentera se corpo pos 30 anios. El ia senta en la posa de nelumbo, ia comensa medita, e ia mori. Cuando on ia desentera el, la lejenda dise ce se corpo ia es ancora bon conservada.

Temente un interfere par la autoriosas soviet, se seguores ia entera denova el. On ia redesentera el en 2002, e ia trova ce el es ancora bon conservada. Se seguores ia loca el en un temple budiste afin on pote adora el per eternia.

2015-02-04

Batalias desastrosa per nonmilitares en Ucraina

Asta 16 persones nonmilitar ia mori e desuples de otras ia es ferida en 24 oras de batalia en Ucraina este. La Nasiones Unida averti ce la aumenta nova de violentia deveni desastrosa.

Representores de la governa e la rebelores ia reporta la moris la plu resente en locas tra la areas de Donetsk e Luhansk.

La armada de Ucraina ia dise ance ce sinco soldatos ia mori combatente rebelores prorusce prosima a Debaltseve, un vila stratejial.

La cuantia de moris nonmilitar ia crese multe en semanas resente par causa de atacas par la rebelores.

La Nasiones Unida dise ce plu ca 5350 persones ia mori aora, e ce plu ca 12 mil otras ia es ferida par la batalia.

On ia esperia multe combate sirca Debaltseve, la loca de un junta major de ferovia tra la semana pasada, en cuando rebelores ia atenta ensirca soldatos de la governa.

La vila es cuasi intera destruida e multe abitores es trapida – ascondente en susolos, sin comedas, eletrica e furnis de acua.

En un otra developa, la governa en Ciiv ia anunsia regulas nova per restrinje la documentos cual rusces pote usa per entra a Ucraina. On predise ce la esta cambia va alti la tensa contra Moscva.

De 1 marto, rusces va nesesa un pasaporte esterna per pote entra a la pais, e no plu sola se documentos interna de identia.

2015-02-03

Parlamentores brites vota sur bebes de tre persones

Oji en Britan, parlamentores va vota per deside esce on debe permete la crea de bebes con ADN de tre persones.

La tecnica intende preveni comunica maladias jenetical matante de madre a enfante.

La Rena Unida ta pote deveni la pais prima cual legali bebes de tre persones, e esta ta pote aida sirca 150 duples per anio. Ma la idea ia provoca un debate etical forte, e persones major relijial ia recomenda bloci la proposa.

An tal, si la Salon basa vota aprobante, la bebe prima de tre persones ta pote nase en 2016.

Mitocondrios es partes pico en cuasi cada selula de la corpo, e los converti comeda a enerjia. Los ave se ADN propre cual no afeta tal cualias como la aspeta de un person.

Mitocondrios defetosa, cual desende sola de la madre, pote causa dana de serebro, atrofia de musculos, malfunsiona de cor, e siecia.

La tecnica nova usa un varia de fertili in vitro per combina la ADN de la du jenitores con la mitocondrios sana de un donor fema. Lo produi bebes de ci 0,1% de se ADN veni de la fem du, e esta es un cambia permanente cual va desende tra la jeneras.

La governa brites suporta la proposa. Ma parlamentores va pote vota libre, sin presa de se partitos, car esta es un demanda de consiensa.

Doug Turnbull, la dirijor de la sentro de rexerca mitocondrial do on ia abri la via de la tecnica, ia recomenda un vota favorente. El ia dise: "La rexerca es sujestada par pasientes, suportada par pasientes, e per la pasientes."

A la min 40 otra siensistes de 14 paises ia recomenda simil. Ma no cadun acorda.

En la semana pasada, la eglesas catolica e anglican en England ia dise ce la idea es no secur no etical, partal car lo envolve la destrui de embrios.

Otra grupos dise ce la adota de la tecnica ta abri un porte a plu alteras jenetical de enfantes en futur.

An tal, un fem de ci se tia ia mori de un maladia mitocondrial, ia dise ce on ia esamina la sistem de regula "a grado sin presedente", e ce on ia malinforma multe sur la risca de bebes jenetical alterada per belia o intelijentia.

"On no considera cambia la ADN nucleal, ma sola preveni maladias."

2015-02-02

Un jornaliste stranjer es librida de prison en Misre

La familia de Peter Greste, un jornaliste de al-Jazira, ia dise ce el no va reposa ante cuando on libri se du colaborores de prison en Misre.

Ier, pos 400 dias en prison, Greste ia es librida e deportada. El ia ariva secur en Cipros, en via a Australia, se pais propre.

On ia aresta el en 2013, acusante ce el sperde novas falsa e aida la Fratia Muslim.

Se colaborores de al-Jazira, Mohamed Fahmy e Baher Mohamed, es ancora prisonidas. Fahmy ave un sitizania duple de Misre e Canada, e lo es posible ce on va libri el pos cansela se sitizania misre. Ma on es ancora consernada sur senior Mohamed, un sitizan sola de Misre.

Andrew Greste, la frate de la jornaliste, ia grasia los ci ia suporta se frate e ia labora per reali se libri. El ia dise: "Nos es mera rotas peti en esta campania jigante."

On ia acusa la tre jornalistes de colabora con la Fratia Muslim, un organiza proibida, pos la despone de presidente Mohammed Morsi par la militares en 2013.

Tota la acusadas ia nega la acusas, disente ce se prosede es un finje. Fahmy e Greste ia es condenada a sete anios en prison, e Mohamed a des. On ia descondena los a 1 janero, ma los ia resta en prison per un reprosede.

Se libri a soldi ia aveni pos un campania longa internasional. La indicetas prima ia es persepida en novembre, cuando presidente Abdul Fatta al-Sisi ia dise ce el considera pardona la du jornalistes stranjer. El ia suscrive plu temprana un comanda sur renativi prisonidas stranjer.

Seguente la grupo campaniante Reporters Without Borders (= Reportores sin fronteras), 165 jornalistes es aora prisonida tra la mundo, en paises incluinte Xina, Iran, Ertra, Misre, Uzbecistan, e Rusia.