2015-03-31

Un imno noncoreta es oiada a un max de futbal

Organizores de un max amin de futbal entre Salvador e Arjentina ia repenti pos jua la imno de la Isola Man – un isola peti entre Britan e Er.

Fanes de Salvador ia sibila antipatiosa e se juores ia es confondeda en cuando la imno noncoreta ia es oiada ante la max en la SUA a saturdi.

La organizores ia dise ce los "aseta la encarga intera per la era onesta".

Ellan Vannin – la nom manes per la Isola Man – e Salvador ia es visina la un a la otra en la lista de imnos nasional.

Plu ca 50 mil oservores ia vade a un stadio en la stato Maryland per regarda la max amin.

Alga de la juores salvadoran ia lasa ce se manos cade lenta de se petos en cuando "Pais de nos nase" ia es oiada en loca de se imno nasional.

Un portavose per la organizores ia dise ce esta no ia es fada con "intendes malvolente" e ce lo va "adota medios per preveni ce esta aveni denova".

Arjentina, ci ia jua sin se capitan Lionel Messi, ia gania la max con du goles par Ever Benega e Federico Mancuello. Salvador ia fa no goles.

En se intervisa pos la max, Albert Roca, la manejor de la ecipo salvadoran, no ia refere a la era.

2015-03-30

Nijerianes eleje se presidente

On conta la votas en la eleje de presidente nijerian. Goodluck Jonathan, la postor esistente, fronti un defia forte de Muhammadu Buhari, un renor militar pasada.

La comision de eleje ia dise ce lo espera anunsia oji la ganior.

La Nasiones Unida ia loda la metodo de vota, an entre problemes tecnical, protestas, e violentia liada con Boko Haram.

La prosede de vota ia comensa se dia du en alga partes de la pais, pos problemes con lejecartas eletronical nova.

Jonathan ia es entre los ci no ia pote fa se vota usante acel tecnolojia, cual on ia introdui per preveni froda. Se partito ia oposa la lejecartas, e ia nomi la fiasco "un embarasa nasional enorme".

La xef de la comision de eleje, Attahiru Jega, ia asentua ce sola un cuantia peti de la 150 mil lejecartas usada ia malfunsiona.

La vota ia es posponeda tra ses semanas par causa de la rebela par combatosas de Boko Haram. La islamistes ia ataca voterias en statos norde-este, e on ia declara un proibi de sorti en la stato Bauchi pos un batalia entre securiores e la grupo.

Ban Ki-moon, la secretor jeneral de la NU, ia loda la "determina e dura" de votores nijerian.

Ma on ia esperia tensa en la stato Rivers, do miles de persones ia protesta contra la matas alegada de oposores e contra fasetas noncoreta de la prosede de vota.

La comision de eleje ia descrive se como "consernada" par la cexas, ajuntante ce un de se ofisias ia es ensendeda par la turbores.

On ave ancora no indica ofisial sur cual partito va gania.

2015-03-29

La rituo funeral de la padre nasional de Singapor

Singapor ia dise adio a Lee Kuan Yew, se padre nasional, ci ia mori a lundi a la eda de 91.

Se caxon funeral ia es portada en prosegue tra la stradas pluvosa de la capital a un rituo do xefes de stato global ia es presente. Se corpo ia es senida en un rituo privata de familia.

En la semana pasada, plu ca milion persones ia visita locas de tribui tra la pais per mostra se respeta a Lee. Plu ca 415 mil persones, o 12% de la sitizanes de Singapor, ia visita la Casa de Parlamento per vide se caxon.

La pais ia fa un minuto de silentia pos la rituo funeral, e multe de la sentros comersial de la pais ia clui.

Lee ia es la ministro xef de Singapor tra 31 anios, renunsiante la posto en 1990. El la supravide la autonomi de la pais de Britan e se separa de Malaisia, e on ia respeta jeneral el como la arcitetor de la ricia de Singapor. La produi nasional bruta per person ia des-sincupli entre 1960 e 1980.

Ma Lee ia introdui ance medios sever. Se governa ia restrinje forte la librias de parla e de jornalisme, e oposores political ia es prosededa en corte.

Parlante en 2010, el ia comenta: "Me no dise ce tota me atas ia es coreta, ma tota me atas ia es con intende onorable."

2015-03-28

Du astronautas comensa un anio en spasio

La astronautas Scott Kelly de la SUA e Mikhail Kornienko de Rusia ia ariva per comensa un periodo de 12 menses abitante la Stasion Spasial Internasional.

Esta va es la tempo continuante la plu longa tra cual cualce person ia resta en la satelite, cual orbita a 400 cilometres supra la Tera.

Siensistes espera comprende plu bon la efetos a la corpo umana de vive en microgravita tra periodos estendeda. La ajenterias de spasio dise ce esta datos va es esensal per se projetas de envia final un mision a Marte.

An si Kelly e Kornienko va rompe un recordo de dura per la Stasion Spasial Internasional, alga de la abitas en Mir, la plataforma rusce vea, ia es multe plu longa.

A tempos diversa, cuatro astronautas is abita Mir tra plu ca un anio, e Valeri Polyakov ia spende 437 dias en orbita en 1994 e 1995.

On sabe aora multe plu ca en la eda de Mir per redui la efetos danante de vive en microgravita, e on previde ce Kelly e Kornienko va reveni en state plu bon ca la abrivias temprana.

Programes de nuri e eserse preveni aora multe de la perde de densia de oso e la debilia de musculo cual astronautas ia esperia en pasada.

Ma dotores nesesa ancora studia e comprende otra problems. Los no ave multe datos sur la efeto a la sistem de imunia, per esemplo.

Los es ance consernada sur la dana cual la microgravita causa a la oios. Esta es un fenomeno nova reconoseda, e pare ave un relata con la manera de restribui de licuida en un corpo sin pesa. Un presa crese en la cranio e la nerve oial, e multe astronautas cexa, pos reveni a Tera, ce los no vide tan bon como a ante.

Kelly es un caso spesial interesante, car el ave un frate jemelo identica, Mark, ci mesma ia es un astronauta asta 2011. On va usa la du en un studia comparante.

La teoria de relativia dise ce Scott Kelly va senese min ca se frate par causa de la rapidia de se viaja orbitante – ma sola par un pico de milisecondos en la anio.

2015-03-27

On investiga perce un copilote ia cade se avion

La polisia deutx ia saisi ojetos parteninte a la copilote ci, parente, ia xoca se avion en la Alpes franses a martedi, matante tota 150 pasajores e ecipores.

Datos de la rejistravose de la avion sujesta ce Andreas Lubitz ia ata con intende en comensa un desende en cuando la pilote xef ia es escluida de la piloteria.

Alga airocompanias ia promete cambia se regulas per serti ce a la min du ecipores es sempre presente en la piloteria.

Polisiores ia esplora la aparte de Lubitz en Düsseldorf e la casa cual el ia comparti con se jenitores en Montabaur, a norde de Frankfurt.

Los ia porta a via alga ojetos, incluinte caxas e un computador, de ambos locas.

Un portavose ia dise: "Nos ia trova un cosa cual nos va esamina atendente. Nos no pote ja dise cual lo es, ma lo es cisa un indica multe importante sur la aveni."

Alga reportas en Deutxland, nonconfirmada, dise ce Lubitz ia sufri de depresa, ma polisiores ia dise ce la cosa descovreda no es un nota de suiside.

En la entretempo, ofisiores de la governa deutx ia clari ce Lubitz no es conoseda a la servis de securia de la pais.

Plu temprana, Carsten Spohr, la xef de Lufthansa, ia dise ce la copilote ia pasa tra instruis intensa e ia "conveni a 100% per vola sin restrinjes".

El ia dise ce la instrui a Lubitz ia es interompeda per alga menses a ses anios ante aora, ma el no ia clari la razona. La instrui ia recomensa pos cuando "on ia redetermina ce la aspiror conveni".

Ier, Brice Robin, un avocato prosedente de Marseille, ia dise ce la copilote ia pare desira "destrui la avion". Sitante informas de la rejistravose, el ia dise ce Lubitz ia es solitar en la piloteria en la minutos ante la cade.

El ia dise ce on oia "un silentia asoluta en la piloteria" en cuando la pilote xef luta per reentra a lo.

Controlores de trafica airal ia fa multe atentas de contata la avion, ma sin susede.

Robin ia ajunta ce la pasajores no ia es consensa de la problem "ante la momento ultima", cuando crias es oiada. Los ia mori direta.

2015-03-26

Inondas en la deserto Atacama

En la deserto Atacama de Txile, un de la areas la plu seca de mundo, inondas subita ia mata du persones e desapare 24.

Pluves forte en la Andes ia envia acua a la vales e vilas a su.

La rio ia supraflue en la site Copiapó, famosa per un asidente de mina en 2010 cual ia trapi 33 persones per 69 dias.

38 mil persones ave aora no eletrica e cuasi 50 mil ave no acua bevable.

On previde plu pluve, e salvores ia comensa usa elicotores per sorti persones, temente ce la tera va lisca.

Un de la mores ia es caturada par un tal lisca. La otra ia es eletrocutada sur la strada.

La governa descrive la situa presente en la vila de Chañaral como "estrema".

La presidente Michelle Bachelet ia cansela se taxas e va vola a Copiapó.

La tempestas ia comensa a la sera de martedi. Los ia isoli vias, causa rompes de eletrica, e sutrae medios de comunica.

Esta inondas ia aveni en cuando Txile sude batalia ja focos savaje enorme, malida par un periodo de secia estrema.

2015-03-25

Un avion cade en la Alpes sin survivores

Un avion deutx, portante 150 persones, ia cade ier en la Alpes franses en via de Barcelona a Düsseldorf.

La Airbus A320 ia cade entre Digne e Barcelonnette. Nun ia survive.

La avion ia desende rapida tra oto minutos, sin envia un sinial per aida.

On ia trova un de la du caxa negras – la rejistrador de vose – ma lo es danada e on ancora no sabe la causa de la cade. On espera trova oji la rejistrador de datos de vola.

Entre la pasajores, 16 studiantes deutx ia es reveninte de un viaja de intercambia cultural.

La avion parteni a Germanwings, un airocompania de custa basa cual es poseseda par Lufthansa. La compania ave un istoria eselente de securia.

La gidores franses, espaniol, e deutx ia espresa se xoca e intende visita la loca.

Un ecipo de salva ia ateni la loca, en un canion montanial distante. Los ia debe sesa se labora en la sera, ma los ia recomensa oji a lus prima.

La ministro xef de Espania, Mariano Rajoy, ia declara tre dias de lamenta nasional.

2015-03-24

On trova un zona colpada par asteroide en Australia

Siensistes en Australia dise ce los ia descovre la area la plu grande colpada par asteroide.

La zona ave un largia de 400 cilometres. Lo es profonda enterada en la crosta de la Tera e es composada de du sicatrises separada.

La ecipo de la Universia Nasional Australian dise ce la asteroide ia rompe a du pesos ante colpa, e ce cada peso ia ave un largia de plu ca 10 cilometres.

On crede ce la colpa ia aveni a 300 milion anios ante aora, cisa plu.

La crater a la surfas ia desapare ja longa de Australia sentral, ma modeles jeofisical de su la surfas ia trova indicas de du colpas enorme.

Dotor Andrew Glikson, la gidor de la ecipo, ia dise: "Suposable esta ia causa la fini de multe spesies de vive sur la planeta a acel tempo."

Ma la ecipo no ia susede relata la colpa con cualce estingui conoseda, donce los suspeta ce la colpa es an plu vea ca los crede.

La rocas sirca la zona de colpa ave entre 300 e 600 milion anios, ma on ia deteta no deponeda de sene ejetada en stratos de roca de la mesma periodo.

La meteorite grande sur cual on crede ce lo ia mata la dinosauros a 66 milion anios ante aora coresponde a un strato de deponeda en rocas tra la mundo.

"Tal colpas grande ia ave cisa un rol multe plu importante en la evolui de la Tera ca nos ia crede a ante," Glikson ia comenta.

La zona de colpa en la Basin Warburton ia es acaso descovreda cuando siensistes ia fora a 2 cilometres su la surfas de la Tera per un projeta de rexerca jeotermal.

Acel escava ia presenta indicas ce roca ia deveni vitro en un temperatur e presa estrema, sujestante un colpa jigante.

2015-03-23

La mori de Sunido

Nos regrete anunsia ce Jean-Claude Caraco, un elefeniste major, ia mori en febrero a la eda de 65 anios.

Jean-Claude ia contribui multe a la vici de elefen, usante la nometa "Sunido" – un tradui esperanto de la nometa "fio de sol" de un de se treavos.

Sunido ia es forte interesada par linguas construida, e la veas e la novas. El ia aprende esperanto en 1967, e ia es un membro respetada de la comunia de elefen tra la sinco anios pasada.

Estra esperanto e elefen, el ia developa un interesa spesial sur la linguas uropi e kah, e ia parla tan bon volapük ce el ia deveni un membro de la academia de acel lingua. La disionario esperanto-volapük de André Cherpillod mostra alga fotos de Jean-Claude con se amis volapükiste.

La vici de elefen conteni ancora alga traduis eselente creada par Sunido, per esemplo "La Mestre Gato o la Gato con botas" par Charles Perrault de la sentenio 17, e "Grasias, ami!" par la esperantiste Claude Piron.

Nos compatia se familia grande. Multe comunias va senti se manca.

2015-03-22

La "om de acua barati" gania un premio internasional

Un onora con nometa "la Premio Nobel de Acua" ia es donada a un campanior barati ci ia trae acua a mil viletas.

Seguente la judores de la Premio Stockholm de Acua, se metodos ia preveni ance inondas, ia restora la tera e la rios, e ia reatrae la viventes savaje. Los dise ce se tecnica es simple e sin custa grande, e on debe aplica lo tra la mundo.

La premior, Rajendra Singh, usa un varia moderna de recolie pluve, un tecnica antica barati.

On construi colinetas basa de tera per resiste la flue de acua en la saison pluvosa e per permete ce la acua permea la tera per usa futur.

Singh ia es prima instruida como mediciste, ma cuando el ia comensa un posto en un vileta campanial en la secia de Rajastan, on ia informa el ce la cosa la plu nesesada es no aida medical ma acua bevable.

La ativia de cultivores ia consuma la acua de tera. E en cuando la acua ia desapare, la cultivas ia fali, la rios, forestas e animales savaje ia desapare ance, e la abitores ia parti a la vilas.

Singh ia dise: "Cuando nos ia comensa nos labora, nos ia regarda sola la crise de acua bevable. Oji la nos intende es plu alta. Esta es la sentenio de esplota, contamina e viole. Para tota de esta, converti la gera de acua a un pas – esta es la gol de me vive."

La Instituida Internasional de Acua de Stockholm, cual ia presenta la premio, ia dise ce la lesones de Singh es esensal en cuando la cambia de clima altera la meteorolojia sirca la globo.

2015-03-21

Un consenta diplomata de Xina, Japan e Corea Sude

La ministros esterna de Xina, Japan e Corea Sude consenta per se discutes prima de tre anios.

Esta encontra en Seoul va consentra probable sur modos de redui la tensa sur disputas teritorial e diplomata.

La tre statos es economial forte liada, ma se relatas mutua es ancora danada par problemes nesolveda con orijin de atas japanes en la Gera Mundal Du.

Un portavose per la departe xines de esternas ia dise ce el espera ce la ministros va pote "avansa se regarda a la futur".

Yun Byung-se de Corea Sude ia bonveni Fumio Kishida de Japan e Wang Yi de Xina a la capital de Corea Sude.

Ministros de esternas de la tre paises ia consenta la plu resente en april 2012. Acel ia es numero ses de se consentas anial triladal.

En la anio seguente, la consenta ia es canselada pos cuando Shinzo Abe, la ministro xef de Japan, ia coleri la otra du paises par visita un santeria onorante la mores japanes de gera, incluinte alga criminales major de gera.

Japan ia coloni la penisola corean e ia ocupa partes de Xina en la Gera Mundal Du, e ambos paises ia acusa ce lo no ia espia sufisinte se atacas.

Kishida ia encontra se corespondente corean ante la consenta triladal, disente ce "an con problemes difisil entre la du paises", la du lados va "comunica ancora a niveles diversa per forti nos colabora".

Aora la coleria de 2012 ia fri, donce esta consenta nova atenta fa un paso nova a comunica formal. Lo aveni a alga dias pos la confere alta prima de cuatro anios entre Xina e Japan sur securia.

On crede ce acel discutes relata a la crea de un linia direta de comunica maral entre la du paises, pos tensa sur isolas en la Mar de Xina Este.

2015-03-20

Un eclis de sol en Europa

Europa es a media de esperia un eclis solal la plu bon de multe anios. Un curso sur la surfas de la Tera es ombrida car la Luna covre la Sol.

La ombra ia comensa en la Atlantica norde en la ora pasada. Un parte de lo traversa Africa norde, e lo move norde en dirije a la Sirculo Artica. Lo va fusa final con la oscuria normal de note en Rusia.

Tra un anio, la Sol pare segue un curso definida contra la fondo de la stelas (si on iniora la jira de la Tera cual causa la efeto dial de leva e reposa de la Sol).

Oji es ance la dia prima de primavera en la emisfera norde – la dia cuando esta curso anial de la Sol pare traversa la plana de la ecuator de la Tera, en dirije a norde.

La resulta de esta coaveni nonusual es ce, a la Polo Norde mesma, la eclis va aveni en cuando la Sol apare de su la orizon a se ves prima de ses menses.

Esta eclis es intera: a esta momento, la distantias de la Sol e la Luna de nos es tal ce la diametre parente de la Luna es pico plu grande ca lo de la Sol. A la sentro de la ombra, tota lus es ascondeda per no plu ca tre minutos.

An tal, la Isolas Faro e Svalbard es la sola locas abitada e atenable par transporta publica cual la sentro de la ombra va traversa. Locas su otra partes de la ombra va vide mera un eclis partal.

Multe astronomistes ia viaja a la Isolas Faro, do la site capital Tórshavn va esperia la eclis intera per du minutos, comensante a 09:41 de ora universal.

On averti ce on debe no regarda direta la Sol, car on ta risca dana sever se oios o deveni an sieca. On debe es spesial atendente si on vole fotografi la eclis con telefoneta. La fotografi mesma no es perilosa, ma on risca regarda la Sol cuando on posa la camera.

Esta eclis es la prima con un efeto cisa mesurable a la sistem de eletrica, car aora on usa multe la potia solal per jenera eletrica en la Uni European.

2015-03-19

Teroristes ataca un museo en Tunis

La presidente de Tunis ia promete combate terorisme "sin pardona", pos cuando un ataca par fusilores a la Museo Bardo en la capital ia mata 19 persones.

Des-sete de la mores ia es turistes, incluinte visitores de Japan, Italia, Colombia, Australia, Frans, Polsca e Espania. Du tunisis, de ci un ia es un polisior, ia es ance matada.

Plu ca 40 persones, incluinte turistes e tunisis, ia es ferida.

Securiores ia mata du fusilores ma xerca ancora aidores.

La presidente, Beji Caid Essebsi, ia dise ce la pais es "en un gera con teror". En televisa nasional, el ia dise: "Esta minorias monstrin no asusta nos. Nos va resiste los asta la fini la plu profonda e sin pardona. Democratia va vinse e lo va survive"

A la tempo de la ataca, delegadas en la construida visina de parlamento ia discute leges antiterorisme. On ia vacui la construida, ma la parlamento ia reasembla per un consenta spesial en la sera.

Multe tunisis ia vade sur la stradas de Tunis sentral per protesta contra la ataca, brandinte banderas e ensendente candelas estra la museo.

Gidores de mundo ia condena la ataca e ia espresa se suporta per la laboras par la pais contra terorisme.

La Consilio de Securia de la Nasiones Unida ia declara ce no ata teroriste pote reversa la dirije de Tunis a democratia. La declara ia ofre compatia a los ci la ataca ia afeta, e ia recomenda forte ce on puni la atacores.

La ataca es un colpa sever per la industria turiste de Tunis e per se governa, cual ia emerji a mera menses ante aora pos un traversa longa political.

Combatosas islamiste ia atenta ruina la cambia a democratia, cual es frajil ma resta como la resulta la plu positiva de la Primavera Arabi de Asia sude-ueste.

La turisme es un campo major de la economia tunis, con un cuantia grande de visitores european a la vacanserias de la pais.

La ansia sur securia en Tunisia ia crese en menses resente en cuando Libia, un pais visina, ia deveni sempre min stable.

2015-03-18

Buzz Aldrin envia un mesaje a Marte de Stonehenge

Buzz Aldrin, la person du ci ia pasea sur la luna en 1969, ia envia "un mesaje a la planeta roja" de Stonehenge.

Stante ante la monumento preistorial famosa, la astronauta ia es fotografida en abri se jaca per revela un camiseta con slogan recomendante ce on vade pronto a Marte.

Pos se visita a la sirculo de rocas en England sude-ueste, el ia tuita: "Cuando me ia es a Stonehenge, me ia deside envia un mesaje a la universo."

La astronauta veteran ia recomenda ja laboras nova no sola per envia un mision abitada a Marte ma ance per coloni acel planeta.

La organiza English Heritage (Erita Engles), cual maneja Stonehenge, ia reseta alga demandas esce la foto de Aldrin es real.

Un portavose ia dise: "Esta ia es un visita privata per el e se familia. Nos ia oia ce el va visita a sirca un semana ante aora, e cadun ia es multe stimulada ante encontra el."

Pos turi la loca antica, Aldrin ia demanda ance bromosa "do on asconde la estrateranes".

2015-03-17

Un aresta en Arjentina sur oro de la sentenio 19

La autoriosas arjentina dise ce los ia aresta du omes de Paraguai ci ia atenta traversa la frontera con un bara de oro con valua de plu ca $2 milion.

La bara ia pesa 25 cilogrames e ia es impresada con la enscrive "Banco Sentral de Paraguai 1824".

Un de la arestadas ia dise ce los ia compra lo de un grupo de persones nativa per sirca $50 mil.

On ia saisi ance sirca un cilogram de arjento cuando la camion de la omes ia es parada per un xerca costumal.

Los ia traversa de la vila Encarnación en Paraguai a Posadas en Arjentina.

Con scanador, duanores ia trova la bara ascondeda su un seja de pasajor.

Reportas dise ce cisa lo ia es enterada per securia par un familia rica en la gera de la Alia Truple entre 1864 e 1870, cuando Paraguai ia batalia contra Arjentina, Brasil e Uruguai.

Paraguai ia es vinseda per la alia. Lo ia sufri un cuantia grande de moris e ia perde teritorios.

2015-03-16

Grupos ge partisipa en la parada de San Patrisio en Boston

A la ves prima, grupos ge e lesbian ia partisipa ofisial en un parada de la Dia de San Patrisio en la site Boston en la SUA.

Ante aora, los ia es proibida par la organizores, la Consilio Aliada de Veteranes de Gera de Boston Sude, de ci se disposa ia es suportada par la Corte Suprema de la pais.

Ma la organizores ia cambia se opina e ia informa Outvets, la grupo cual representa veteranes militar ge, ce lo es bonvenida.

Bryan Bishop, la fundor de Outvets, ia dise: "Final en la site Boston, nos vide la inclui sur cual nos ia crede ce nos va vide nunca lo. Personal, esta es un de la dias la plu bon de me vive."

La Dia de San Patrisio selebra la cultur eres e eres-american.

En 1995, la Corte Suprema ia susta un proibi contra grupos ge e lesbian, sitante diretos de parla libre. La organizores ia espresa ce se prinsipes catolica ta es violeda.

Ma la Consilio de Veteranes ia altera se disposa. On reporta ce se comandor, Brian Mahoney, ia dise "Perce me ta judi?" cuando on ia demanda a el sur la tema de orienta sesal.

La maior de Boston, Marty Walsh, ia pasea en la parada a la ves prima en 20 anios. A ante, maiores ia boicota la aveni par causa de se disposa antige. "Con la parada de esta anio," el ia comenta, "Boston avansa pos anios de controversia."

Boston es la capital de Massachusetts, cual en 2004 ia deveni la stato prima SUA cual permete sposis ge.

2015-03-15

La Vatican suporta la usa de fortia contra Stato Islamiste

La Vatican ia dise ce, si on no trova un solve political, la usa de fortia va es cisa nesesada per para atacas par Stato Islamiste contra cristianes e otra minorias de Asia sude-este.

La arcibispo Silvano Tomasi, la diplomata xef de la Vatican a la Nasiones Unida en Genève, ia dise ce jihadistes fa un "spesie de jenoside" e ce on debe para los.

Tradisional, la Vatican oposa intervenis militar en la area. An tal, Pape Fransisco ia denunsia la destesti de 21 cristianes copta par Stato Islamiste en Libia en febrero.

La combatosas ia ataca minorias relijial en la partes de Suria e Irac cual los controla. Miles plu persones ia es obligada a fuji de se casas.

La arcibispo ia dise: "Nos debe para esta spesie de jenoside. Si no, nos va cria en futur sur la razona per cual nos no ia ata, perce nos ia permete la aveni de un trajedia tan xocante."

"Cristianes, eziditis, xias, sunis, alauis – tota es umanas de ci se diretos merita es protejeda," el ia ajunta.

Seguente el, un alia ta debe inclui statos muslim de Asia sude-este e es gidada par la Nasiones Unida.

2015-03-14

Un siclon ruina la isolas de Vanuatu

Siclon Pam ia bate la arcipelago Vanuatu en la sude de la Mar Pasifica, causante destruis estrema.

Lo ia mata desuples de persones, e es cisa entre la desastres la plu sever en la istoria de la Pasifica.

La siclon ia porta ventas de asta 270 cilometres per ora e deluvias de pluve.

La stradas en la capital, Port Vila, es aora covreda con un marania de tetos, arbores desradisida, e linias eletrical cual ia cade.

On reporta ce, en areas distante, viletas intera ia es destruida.

Un portavose de Unicef ia descrive la siclon como "30 minutos de teror asoluta" cuando lo ia traversa la capital. "Me ia vide cuando la venta ia sutrae la portes liscable de me sala en me otel de tre niveles. Lo ia es asustante."

Ban Ki-moon, la secretor jeneral de la Nasiones Unida, ia dise ce el teme ce la dana e destrui pote es vasta. "Nos espera ce la perde de vive es minima," el ia ajunta en un confere mundal en Japan sur risca e redui de desastres.

Seguente reportas nonconfirmada, 44 persones ia mori en la provinse Penama en la norde-este de Vanuatu.

La ministro de esternas australian ia dise ce la pais prepara envia un ecipo de crise a Vanuatu, si nesesada. "On ave ventas destruinte, pluves, inondas, liscas de tera, ondones, e mares multe turbada, e la tempesta es forte destruosa ala. Nos evalua ancora la situa, ma nos sta preparada per aida."

Tota ses provinses de Vanuatu ia es a vijila masima, tal ce on ia consela ce cadun xerca refuja sin pausa. Miles de persones ia pasa la note en refujas de crise, ma multe plu ia es obligada a esperia la tempesta en se casas propre.

Situada a sirca un cuatri de la distantia de Australia a Hauaii, Vanuatu ave un popla de 267 mil persones sur 65 isolas. Sirca 47 mil abita en la capital.

Esta siclon tropical ia causa ja danas major sur otra isolas de la Pasifica, incluinte Ciribati e la Isolas Solomon.

Tuvalu, un grupo de nove isolas pico a norde-este de Vanuatu, ia declara ance un state de crise pos un aveni de inondas subita causada par la siclon.

2015-03-13

Un setica sur morbilio debe paia sento mil dolares

Un corte ia comanda un paia par un biolojiste deutx ci ia ofre plu ca sento mil dolares a cualcun ci ta demostra ce morbilio es un virus.

Stefan Lanka, ci crede ce la maladia es psicosomatica, ia fa la promete a se loca de rede a cuatro anios ante aora.

A pos, la premio ia es reclamada par David Barden, un dotor deutx, ci ia colie atestas de studias medical diversa. Lanka ia rejeta la atestas.

Ma la corte en la vila Ravensburg ia judi ce la demostra sufisi.

Reatante a la deside, Lanka ia dise ce el va apela. "Lo es un maladia psicosomatica," el ia dise. "On deveni malada pos separas traumal."

Un aveni resente de morbilio en Deutxland ia provoca un debate sur esce on debe obliga vasinis contra la maladia.

Un xico de 18 menses ia mori en Berlin en febrero par causa de morbilio.

La Organiza Mundal de Sania ia descrive se como "surprendeda" par la 22 mil avenis reportada tra Europa de pos 2014, e ia recomenda un aumenta de vasinis.

Morbilio es un maladia estrema comunicable, distinguida par un febre sever, un irita de la pel, e un senti jeneral de nonsania. La casos la plu grave pote mata.

2015-03-12

Frans oposa un moneta con imaje de Waterloo

Un desinia nova per un moneta de €2 cual mostra un mapa de un batalia european ia divide opinas en Bruxelles.

La moneta pituri la Colina de Leon, un monumento locada a Waterloo. Beljia ia proposa lo per onora la batalia ala fada a 18 junio 1815.

Ma un membro de la Uni European opina ce lo no conveni.

En un letera oposante, la governa franses razona ce la desinia conteni "un simbol negativa" per alga europeanes.

La letera sujesta ce la Batalia de Waterloo, do Napoléon ia es vinseda, es un aveni con resonas spesial en la memoria coletiva de Europa, e es plu ca mera un caso de combate militar.

On averti ce la monetas risca provoca un disposa nonfavorente en Frans, an cuando la governas de la Eurozona atenta aumenta la unia e la colabora.

Ma no cadun acorda ce Waterloo es cargada con tan multe sinifia en la sentenio 21. Un diplomata ia espresa se surprende ce "pos du sentenios, un proposa per monetas con imaje de colina pote causa un tal reata en Paris".

Beljia debe aora deside esce lo vole retira o cambia la desinia.

Si lo eleje reteni lo en se forma presente, la paises membros de la Eurozona va vota sur reali la moneta nova.

2015-03-11

Romania era en diplomatia deutx con un mapa franses

La ministreria de esternas romanian ia demanda es pardonada pos dona a un diplomata deutx un libreta cual onora la relata entre la du paises, ma cual ia mostra la bandera de Deutxland sur un mapa de Frans.

La ofisia de governa ia dise ce esta ia es "un era tecnical e regretable".

Bogdan Aurescu, la ministro de esternas en Romania ia dona la libreta a se corespondente Frank-Walter Steinmeier a un presenta jornaliste.

Esta es la ves du en du menses ce la ministreria de esternas ia debe es pardonada per un era.

En febrero, la ambasada romanian en Paris ia envia invitas a un selebra formal, ma ia afisa acaso un fix conteninte descrives nonfavorente de alga invitadas como "nondesirable" o "repulsante".

Steinmeier ia fa un visita de un dia a Romania a lundi per discutes sur OTAN e Ucraina este, e per onora la aniversario 135 de relatas diplomatal entre Romania e Deutxland.

La libreta ia es produida par Agerpres, la ajenteria nasional de novas en Romania. Lo ia dise ce la intende es "catura momentos unica en la relatas biladal" entre la du paises.

Lo ia clari ce la ministreria de esternas ia reseta la varia coreta de la libreta en forma eletronical, ma ce "la malprimida ia es un era tecnical" par se, per cual lo ia demanda la pardona de ambos minstrerias.

2015-03-10

On prisoni la dama prima pasada de Costa Ivor

Simone Gbagbo, la sposa de la presidente pasada de Costa Ivor, ia es condenada a 20 anios en prison per se rol en la violentia cual ia segue un vota en 2010.

Gbagbo, ci ave 65 anios, ia es acusada de sumina la securia de la stato.

Se sposo, Laurent Gbagbo, va es prosededa a la Corte Criminal Internasional.

Plu ca 3000 persones ia mori en la violentia pos la eleje presidental, cuando la gidor pasada ia refusa aseta se defeta par Alassane Ouattara.

On ia aresta la duple en 2011, cuando soldatos ia ataca un buncer cual ia refuja los en Abidjan, la site xef.

Gbagbo, nomida "la Dama de Fero" a ves pasada, ia es prosededa en Abidjan. On ia acusa el ance de disturba la ordina publica e de organiza ganges enarmada.

La corte ia es en acorda unida sur se condena de 20 anios, la duple de la tempo cual la avocatos prosedente ia demanda. Se avocato propre ia dise ce los va apela.

Laurent Gbagbo va es prosededa sur cuatro alegas a la CCI en Den Haag, incluinte omiside, viole sesal, e persegue.

La Corte Criminal Internasional ia atenta aresta ance Simone Gbagbo, ma esta demanda ia es refusada par la governa ivorian.

2015-03-09

Un avion solal comensa se vola sirca la globo

Un atenta recordo de vola sirca la mundo en un avion de enerjia solal ia comensa.

La avion – nomida Solar Impulse-2 – ia enaira de Abu Dhabi en la Amirias Arabi Unida, viajante a este en dirije a Muscat en Oman.

Tra la sinco menses veninte, lo va move de continente a continente, traversante e la Mar Pasifica e la Mar Atlantica en se viaja.

André Borschberg ia controla la veculo de un person cuando lo ia enaira a 07:12 de ora local (03:12 universal).

Tra la viaja, el va divide la taxe pilotal con un otra suiz, Bertrand Piccard.

Los intende para a locas diversa sirca la globo, per reposa e manteni, e ance per distribui un mesaje de campania sur tecnolojias limpa.

La viaja oji a Oman va traversa sirca 400 cilometres e ocupa sirca 12 oras. On posta detalias de la viaja en la interede.

La avion segue un prototipo de la mesma projeta, e se largia entre alas es 72 metres, plu ca un jeto 747. An tal, lo pesa sola 2,3 tones.

Lo porta 17 mil selulas solal sur se alas, e va usa pilas de ion de litio per susta se en la note.

Se capasia de opera en oscuria va es spesial importante cuando la avion traversa la Pasifica e la Atlantica. Car lo viaja lenta, esta partes de se viaja va ocupa un serie de dias e notes sin pausa.

La pilote va debe resta vijilante tra cuasi tota acel tempo. El va pote fa dormetas de no plu ca 20 minutos.

El va debe tolera ance la descomforta fisical de es encluida en un piloteria cual no es multe plu grande ca un ciosco de telefon.

2015-03-08

Xina sutrae de la rede un filma sur contamina

La autoriosas en Xina ia sutrae de la rede un filma atestante cual parla sur la problem sever de contamina en la pais.

Su la cupola esplica la custas sosial e sanial de contamina, e plu ca 100 milion persones ia regarda enlinia lo en min ca 48 oras, provocante debates.

On ia sutrae lo a sola du dias pos cuando Li Keqiang, la ministro xef, ia descrive la contamina como un malinte a la vives de la popla.

Esta problem de ambiente ia domina la consenta presente de la parlamento xines en Beijing, e Li ia promete combate lo con tota la fortia de la governa.

Ma lo pare ce la popularia enorme de un filma pasionida e nondependente sur la problem ia fa ce la autoriosas comuniste deveni ansiosa.

Un investiga tra un anio de contamina en Xina – fada par Chai Jing, un jornaliste investigante famosa, ci ia finansia ance lo – la filma critica forte la leges laxe de Xina sur la ambiente.

Stante ante un salon de escutores, Chai parla franca tra la video de 103 minutos.

Partes de la filma es profonda personal. Prosima a la comensa, Chai intervisa un enfante de ses anios ci abita la provinse Shanxi, do on mina carbon e cual es entre la locas la plu contaminada sur la planeta.

"Esce tu ia vide stelas?" Chai demanda. "No," la xica responde.

"Esce tu ia vide un sielo azul?" La xica dise: "Me ia vide un sielo cual es pico azul."

"Ma esce tu ia vide nubes blanca?" "No," la xica suspira.

La filma es ancora regardable en YouTube, con sutesto engles.

2015-03-07

Xamanes tanzanian es arestada per preveni matas de albinos

La polisia en Tanzania ia aresta 32 xamanes en Geita, un area norde-ueste, como parte de labora per preveni la matas de albinos.

A jovedi, la Corte Alta ia condena cuatro persones a mori per la omiside en 2008 de un fem albino en la mesma area. Se sposo ia es entre la condenadas. Ma on no sabe serta esce la condenas va es realida, car la puni de mori es tempora proibida en la pais.

Ante alga semanas, on ia descovre la corpo mor de un xico de un anio, de ci se brasos e gamas ia es sutraeda.

La governa ia deslegali xamanes en janero, seguente un teme ce la vota jeneral de esta anio va provoca un aumenta de violentia contra albinos.

Albinisme es un state medical cual afeta la produi de pigmento de pel. Lo es notable comun en Tanzania, do un de 1400 persones es afetada. En paises ueste, la cuantia es sola un de 20 mil.

La xamanes crede ce la partes de corpos de albinos ave potias spesial, capas de atrae susedes e bon fortunas. Seguente la Crus Roja, xamanes pote paia asta $75 mil per un colie completa de partes de corpo albino.

De pos 2000, Tanzania ia vide 75 omisides relatada con albinos.

La xef de polisia ia dise ce "la xamanes ia es arestada en posese de cosas diversa, incluinte preparas e olios de un fonte nonconoseda". El no ia clari esce on ia acusa la xamanes, o esce on ia catura los con cualce cosa relatada con albinos.

Jakaya Kikwete, la presidente de Tanzania, ia promete elimina un pratica cual el descrive como "un malia continuante" cual vergonia la pais.

2015-03-06

Miles de persones fuji de la batalia en Tikrit

La Nasiones Unida dise ce un opera militar per recatura la site Tikrit en Irac de Stato Islamiste ia causa ce sirca 28 mil persones fuji de se casas.

La deslocadas vade en dirije a la site Samarra, ma multe familias es impedida a postos de controla. Ajenterias de la NU envia convoias de furnis per aida la afetadas.

La opera per recatura Tikrit envolve sirca 30 mil soldatos e militiores xia, e es aora en se dia sinco. Los atenta ensirca la combatores de Stato Islamiste, ma se avansa es lentida par bombas poneda sur la via pos cuando la site ia es saisida en junio de la anio pasada.

Jetos e elicotores iraci suporta la soldatos sur tera, ma aviones de la alia SUA no partisipa.

La combatosas ia ensende ier posos de petrolio estra la site, creante nubes de fuma, parente per asconde blancos de atacas airal.

En cuando la batalia continua, la ansia crese per la popla nonmilitar.

La Casa Blanca e organizas de diretos umana ia averti ance sur un peril de contratacas setal par militiores xia en la area xef suni.

Tikrit es la vila propre de la presidente pasada Saddam Hussein. Lo es un gol major per la governa iraci en se intende de recatura Mosul, la site du de la pais, cual Stato Islamiste ia saisi ance en 2014.

2015-03-05

La ambasador SUA a Corea Sude es atacada

Un nasionaliste combatosa de Corea Sude ia talia la fas de la ambasador SUA a un consenta de come de matina en Seoul.

Mark Lippet, ci ave 42 anios, ia es ance taliada a se mano sinistra, ma el no ia es grave ferida.

Securiores ia vinse la atacor – supresante el con sapato a se colo – e on ia aresta el.

Lippert ia es ospitalida, ma ia dise a pos ce el recovre bon. Dotores ia nesesa 80 sutures per clui la feri a se fas, cual ia es 11 sentimetres en longia con profondia de 3 sentimetres.

Atestores ia descrive ce la atacor, un om de 55 anios con istoria de ativisme combatosa nasionaliste, ia cria esijes per la reuni de Corea Norde e Sude.

El ia condena ance eserses anial militar par Corea Sude e la SUA, cual aveni presente. Esta eserses envolve plu ca 200 mil soldatos, e Corea Norde descrive los como un pratica per un invade. Lo ia promete un contrataca. Ma on ave no indica ce la atacor ia es un ajente de Corea Norde.

En pasada, la atacor ia lansa beton a la ambasador japanes a Corea Sude.

2015-03-04

Netanyahu averti la SUA contra acorda sur potia nucleal irani

La ministro xef de Israel ia averti ce un acorda discuteda sur la program nucleal de Iran ta pote "pave se via a la bomba", en loca de bari lo.

En un parla ier a la Congresa de la SUA, puntuada con aplaudis starante, Benjamin Netanyahu ia descrive Iran como "un menasa a la mundo intera".

Negosias sur la program nucleal irani prosimi a se limita de tempo, en la tarda de marto, per la ateni de un acorda jeneral.

La parla ia aveni a mera du semanas ante un vota en Israel de cual se resulta no es previdable.

Netanyahu ia insiste ce el no atenta interfere en la politica interna de la SUA.

La Casa Blanca ia critica se intende de parla a la Congresa – invitada par la republicistes, sin consulta la Casa Blanca – disente ce la gidor israeli vole aumenta la oposa SUA contra un acorda con Iran.

Pos la parla, la presidente Barack Obama ia informa reportores ce el ia vide no cosa nova en la transcrive de la parla, e ce on ia presenta no alternativa realable de preveni Iran de oteni un arma nucleal.

La SUA, Rena Unida, Frans, Deutxland, Rusia, e Xina atenta acorda per redui la program nucleal irani en intercambia per un diminui de punis economial.

Los teme ce Iran aspira construi un bomba nucleal. Iran nega esta, insistente ce lo usa mera se direto a potia nucleal pasosa.

Negosiores labora per ateni un acorda jeneral con Iran en esta mense. Lo ta es segueda par un acorda detaliosa ante la fini de junio.

Ma Netanyahu ia dise: "On ia informa nos ce un manca de acorda es plu bon ca un mal acorda. Ma esta es un mal acorda, un acorda multe mal."

2015-03-03

Aida finansial afin Siera Leon recovre pos Ebola

Siera Leon va reseta plu ca 80 milion dolares sin pospone, per aida la pais a fini la aveni de Ebola e recovre de se efetos.

La Reserva Monal Internasional ia promete un scema de aida finansial con 187 milion dolares per suporta la economia debil de la pais.

Gidores mundal va consenta oji en Bruxelles per parla sur Ebola e projetas plu longa per batalia contra la maladia.

Cuasi 10 mil persones ia mori en esta aveni. La plu de los ia es en Gine, Liberia, e Siera Leon.

Ier, la Nasiones Unida ia comenta ce la luta per limita la epidemica ateni aora "un fase du".

Ma David Nabarro, la ambasador spesial de la NU sur Ebola, ia dise ce la comunia internasional debe no deveni autosasiada, car ateni zero casos es "la parte la plu difisil".

Sirca 600 delegadas va encontra oji per discute la responde a la maladia.

Gidores de la mundo, incluinte la presidentes de tota tre nasiones la plu colpada, va parla sur la modo la plu bon de reconstrui la economias pos la fini de la epidemica, e sur la modo de responde durante a Ebola.

La aveni ia mata 9714 persones en Africa ueste de pos se comensa en la anio pasada, con 23 913 casos confirmada.

2015-03-02

Un maraton noiante en Hongkong

Sentos de corores ia compete en la ultramaraton prima en site de Hongkong, an si la organizores mesma ia descrive la curso como "alga noiante".

On defini un ultramaraton como cualce corsa tra plu ca la distantia normal de maraton.

En la corsa de 50 cilometres en Hongkong, la competores ia core longo la mesma estende de strada a 25 veses.

Nestor Wong ia gania la compete, fininte en 3 oras, 24 minutos e 20 secondos. El ia defende la curso, disente ce el ia es aidada par oia la folas aclamante.

Ma ante la aveni, corores local la critica la curso.

Un ia dise: "Lo va es noiante e mute difisil, si no mareante, per la corores, ci va debe traversa a 25 veses la mesma parte de via."

Un otra ia comenta: "Me no oposa cursos monotonosa, ma esta es un monotonia alga estrema per me preferes."

Kwan Kee, la presidente de la Asosia Atletal de Amatores de Hongkong e un de la organizores de la corsa, ia aseta ce la curso es noiante. Ma el ia dise ce la partisipa de oservores va aida, ajuntante: "Lo ia es eselente ce nos ia pote oteni esta curso en la cor de la site. La spasio asi en Hongkong es multe limitada."

2015-03-01

La Museo de Irac reabri

La museo nasional de Irac en Baghdad ia reabri ofisial, a 12 anios pos clui en la tempo seguente la invade gidada par la SUA. On ia regania e restora aora multe de la anticalias furada en la gera.

La abri ia es avansada en responde a un video par Stato Islamiste cual mostra la destrui de scultas en Mosul.

La ministro xef de Irac, Haider al-Abadi, ia promete puni la culpables. A la abri de la museo, el ia dise: "Acel teroristes barbar e criminal atenta destrui la cosas eritada de la sivilia umana e iraci. Nos va xasa los afin los paia per cada gota de sangue perdeda en Irac e per la destrui de la sivilia de Irac."

La Museo de Irac estima ce sirca 15 mil ojetos ia es saisida en la caos cual ia segue la despone de Saddam Hussein. On ia retrova cuasi un tri de los.

La colie estende tra 7000 anios de istoria, e presenta Mesopotamia (como on ia nomi Irac tra multe de la istoria umana) como la cuna de sivilia.

La realia en Irac moderna es min sivil. La areas en e sirca Baghdad continua vide violentia a cada dia. Ier, a la min 25 persones ia es matada en du atacas separada, a norde de la capital.