2015-05-31

Furores de meteorites es arestada en Arjentina

Polisiores en Arjentina ia aresta cuatro omes ci, parente, ia atenta fura plu ca un ton de meteorites en Chaco, un provinse en la norde-este de la pais.

La polisia de via dise ce los ia trova plu ca 200 pesos grande de meteorites ascondeda su la sejas de un camion cual los ia para per un esamina acaso.

Tre arjetinas e un paraguai ia es arestada.

La provinse de Chaco es famosa per meteorites, e los es protejeda par leges de Arjentina.

Lo conteni un area conoseda como "Campo de la Siel", estendente tra 1300 cilometres cuadrida, e plen de meteorites cual ia cade a sirca 4000 anios ante aora.

La plu grande, nomida El Chaco, ia es descovreda con un detetador de metales en 1967. Lo pesa 37 tones, e es la meteorite du de la plu grandes trovada en la mundo.

Ance lo ia velia un avaria entre investores e coliores. En 1990, un polisior de via arjentina ia aborta un conspira de fura lo per vende a un colior en la SUA.

2015-05-30

Paris va sutrae securadores de ama de se pontes

En Frans, on va sutrae la securadores cual duples enamada ia fisa simbolin a un de la pontes xef de Paris.

Lo ia deveni un tradision per turistes en anios resente ce on lia un "securador de ama" a la Ponte de Artes ante lansa la clave en la Rio Seine.

Ma un parte de la ponte ia colasa su la pesa en 2014. Ofisiores de la site dise ce tota securadores va es sutraeda, comensante a lundi, car los crea un risca a securia.

On previde ce on va talia cuasi milion securadores pendente, con pesa de 45 tones.

La Ponte de la Arcibispo, prosima a la catedral Notre Dame, va perde ance la securadores fisada a se lado.

Per la estate, pintis va sustitui per la grilias de metal a la lado de la Ponte de Artes, construida en 1804. Plu tarda en esta anio, on va instala paneles transparente en loca.

Bruno Julliard, la vismaior de Paris, ia dise: "Nos vole ce Paris resta la capital de ama romantica." El ia ajunta ce la site va crea ideas nova per coraji persones a espresa se ama en otra maneras.

Un campania par la site en la anio pasada, afin persones fa un selfi en loca de ajunta un securador, no ia susede.

A venerdi, la comite de la site ia declara ce la tradision "ia gida a du problemes grande: danas notable a nos construidas istorial, e un risca a la securia de visitores".

Venezia ia luta ance per impedi ce turistes afisa securadores a la Ponte de Rialto. E en New York, clavores-amatores ia inisia un campania per sutrae securadores de la Ponte de Brooklyn.

2015-05-29

Ecuador saisi 200 000 pinas de selacos

En Ecuador, la polisia ia saisi sirca 200 mil pinas de selacos cual ia es a punto de deveni nonlegal esportada a Asia.

La pinas, comun usada per fa sopas, ia es descovreda pos atacas a nove locas en Manta, un site de porto.

Ses persones, incluinte un sitizan xines, ia es arestada e acusada de dana viventes savaje.

José Serrano, la ministro de internas, ia dise ce la contrabandores ia mata 50 mil selacos, cisa plu.

El ia ajunta ce la autoriosas ia "dona un colpa major a un rede internasional cual ia contrabanda pinas de selacos. Nos debe fini esta redes criminal ci es consernada sola par se interesas economial propre e ci destrui la ecosistem."

La pexa de selacos es proibida en Ecuador. On no pote vende los estra si los ia deveni acaso caturada en redes de pexa.

2015-05-28

Sponsores de FIFA es ansiosa sur arestas per froda

FIFA, la organiza governante de futbal, va abri oji se congresa anial, an pos avertis par sponsores ce los va repensa cisa se relatas pos la aresta de ofisiores major en acusas de froda.

Coca-Cola, Adidas e Visa ia es entre la companias ci ia vosi se ansia.

La organiza european de futbal, UEFA, va deside esce lo va boicota doman la vota per la presidente seguente de FIFA.

Sete ofisiores major de FIFA ia es arestada en Zürich ier, entre 14 persones acusada.

Ance ier, FIFA ia anunsia ce 11 de acel persones es proibida de ativia relatada a futbal per la presente. Ma lo ia dise ce la eleje de presidente a venerdi, en cual la rolor esistente Sepp Blatter xerca un periodo sinco de preside – va aveni.

Blatter, ci no es nomida en la investigas, ia declara: "Tal malcondui ave no loca en futbal, e nos va serti ce los ci partisipa en lo es escluida de la jua."

El va fa oji se apare publica prima pos la arestas, a la congresa de FIFA en Zürich en Suiz.

Avocatos prosedente ia comensa ance un investiga separada sur la sistem de subasta per la torneos de la Copa Mundal en Rusia en 2018 e en Catar en 2022.

La sponsores xef de FIFA reseta esposa en stadiones e ave la direto de usa marcas comersial de FIFA en se anunsias comersial.

Blatter ia es sever reproxada par UEFA, cual ia dise ce la avenis es "un desastre per FIFA e un manxa a la reputa intera de futbal". Lo ia alega ce la froda ave radises profonda en la cultur de FIFA.

UEFA ia fa ance la comenta ce la congresa risca deveni "un farsa" e ce on debe pospone la vota.

2015-05-27

Xina aresta 175 persones sur fura de relicias

La polisia en Xina ia aresta 175 persones per regania relicias furada.

En un opera estrema grande, los ia trova 1168 relicias cultural con valua de plu ca 500m iuan ($80 milion).

On crede ce la ojetos ia es nonlegal estraeda de escavas en Niuheliang, un loca arceolojial neolitica en la provinse Liaoning en la norde-este.

La ministreria de securia publica ia dise ce la atas de la furores ia dana grave la loca.

Unesco dise ce la loca en Niuheliang ave de 5000 a 5500 anios, e ce lo ia es un sentro de entera e sacrifia en la tarda de la periodo de la cultur de Hongshan.

Entre la ojetos trovada es un dragon enrolada de jada, un de la pituris la plu temprana cual on conose de acel bestia mital.

Un polisior ia comenta: "Tal relicias es rapida vendeda e frecuente comersiada en un tempo corta."

Jornalistes nasional ia descrive la opera polisial como la plu grande de se spesie de pos la fundi de Xina moderna en 1949.

On no ia furni la data de la opera, ma la ministreria ia declara formal ce lo ia envolve 1000 polisiores.

La furores ia es divideda en des ganges encargada con tota aspetas, de la escava mesma a la vende de la relicias. On reporta ce la ganges ia conteni cuatro arceolojistes.

2015-05-26

La temperatur en Barat mata 500 persones

A la min 500 persones ia mori en un onda de caldia cual traversa Barat. Allahabad en Uttar Pradesh ia rejistra 48°C, e la temperatur ia esede 44°C en la capital, Delhi.

Autoriosas ia recomenda forte ce on resta en casa e bevi multe licuidas.

La plu de la moris ia aveni en Telangana e Andhra Pradesh, statos sude, do plu ca 140 persones ia mori de pos saturdi.

Un state simil calda domina acel du statos de pos la media de april, ma la plu de la moris ia aveni en la semana pasada.

246 persones ia es matada par la temperatur en Andhra Pradesh en esta semana. 62 ia mori ier.

La majoria de la vitimes ia es direta esposada a la sol. Los ave comun 50 anios o plu, e parteni a la clases laborante.

On recomenda la usa de parasoles e xapetas, la bevi de cuantias grande de licuidas como acua o lete fermentada, e la porta de vestes de coton.

186 ia mori en Telangana, incluinte 58 ci ia mori de pos saturdi.

Rajasthan, un stato desertin en la norde-ueste, ia reporta ance alga moris par la caldia, incluinte un fem ci ia colasa a lado de un strada en la site Bundi.

La departe meteorolojial ia informa ce la caldia es causada par un manca de pluve, e ce la situa va continua probable per alga dias.

19 persones, cisa plu, ia mori en Bengal Ueste, un la stato en la este de la pais.

En Kolkata, la capital de la stato, on ia deside ce taxis sin frescadores no va opera per la sinco oras la plu calda de la dia, car la temperatur ia mata ja du taxistes.

2015-05-25

Partitos nova gania en Espania

En elejes local e areal en Espania, la promoves nova antifroda ia gania de la partitos tradisional xef.

A cuasi la fini de conta, la Partito Poplal governante ia gania la plu votas (27%). Ma lo pare ce lo va perde la consilio de Madrid a la ves prima en 20 anios. La partito sosialiste ia reseta 25%.

Espania ia emerji aora ofisial de retrosede, ma la economia de la pais ia es un conserna major per votores. Multe es ance coler sur reduis de spende publica e reportas de froda political.

On vide e la governa de la ministro xef, Mariano Rajoy, e la governa sosialiste presedente como culpable.

La du partitos tradisional xef no ia ateni majorias asoluta en la plu de areas. Los ia perde un cuantia notable de votas a la grupos Ciudadanos ("Sitizanes") e Podemos ("Nos pote").

Como prevideda, pos la crise economial e la scandales de froda cual ia manxa la reputa de la partitos tradisional en Espania, la pais ia entra a un eda nova de politica.

Partitos liada a la promove Podemos a la sinistra estrema (cual esiste tra apena un anio) cual oposa medios sever, ave aora la prestijia de potia en Barcelona. E los va formi cisa un alia per governa en la capital, Madrid.

La maior nova de Barcelona va es Ada Colau, un fem ci ia deveni conoseda par campania per los ci no pote repaia se ipotecas e risca es descasida par la bancos pos la creve de la bola finansial de construi de imobilas en Espania.

La Partito Poplal ia perde majorias asoluta en parlamentos areal tra la pais, incluinte en se nucleos tradisional como Valencia, do la partito ia es grave danada par froda.

Cisa lo va nesesa ance alia se con la partito Cuidadanos, cual favore la comersia, en tal locas como Murcia e La Rioja.

Espania no conose bon alias governante, car la Partito Poplal e la Sosialistes ia domina tra desenios.

La anio pasada ia es la ves prima de un crese economial tra la anio intera en Espania de pos 2008, cuando la bola de imobila ia creve, desempleante miliones de persones e cuasi gidante la pais a aseta suporta finansial.

La nonemplea resta alta – cuasi un de cuatro laborores es sin posto – partal par causa de reformis par la governa cual ia redui la custa de emplea e desemplea.

Pico plu persones ia partisipa en esta eleje ca en la presedente en 2007.

2015-05-24

Un referendo en Er favore forte la sposi ge

Un de la eglesores catolica major de Er ia recomenda un "regarda a realia" per la Eglesa pos un referendo cual ia favore forte la sposi ge en la pais.

La referendo ia trova ce 62% de la popla favore cambia la constitui per permete la sposi de duples ge e lesbian. La sposis prima va aveni probable en la temprana de la autono.

Diarmuid Martin, la arcibispo de Dublin, ia dise ce la Eglesa en Er nesesa rejunta se a persones joven.

El ia comenta: "Nos [la Eglesa] debe pausa e fa un regarda a realia, no entra a un nega de realias. Nos no va recomensa con un senti de renovi si nos ave un senti de nega. Me reconose como omes e femes ge e lesbian senti a esta dia. Ce los senti tal es un cosa cual rici se modo de vive. Me pensa ce lo es un revolui sosial."

El mesma ia vota "no", razonante ce on debe respeta diretos ge "sin cambia la defini de sposi".

El ia ajunta: "La plu de esta persones joven ci ia vota «si» es produidas de 12 anios de nos sistem de scolas catolica. Me dise ce un defia grande esiste en vide como nos ta espresa la mesaje de la Eglesa."

Er es la pais prima de mundo cual legali la sposi ge par un vota de popla, e lo ia fa se referendo a 22 anios pos la descriminali de atas omosesal en la pais.

En soma, 1 201 607 persones ia vota per favore sposis ge, e 734 300 ia vota per oposa.

De 43 sejas parlamental, sola un – xef campanial en la media de la isola – ia trova ce un majoria (51%) de votores ia dise "no".

Er ave un constitui scriveda cual pote es cambiada sola par referendo.

La governa va introdui un projeta legal per reali la vole de la popla, e dise ce lo espera ce esta va deveni un lege ante la fini de la parlamento eres en la estate. Per esta razona, lo no es probable ce la sposis prima va aveni ante setembre.

La sposi omosesal es aora legal en 20 paises de mundo.

2015-05-23

Baghdad para la flue de refujadas de Baghdad

La autoriosas en Baghdad ia clui un ponte major, preveninte ce refujadas fujinte de la site Ramadi entra a la capital iraci.

Plu ca 40 mil persones ia sorti de Ramadi pos se catura par soldatos de la Stato Islamiste (SI), plu temprana en esta semana.

Lo no es clar perce on ia clui la ponte de Bzebiz, ma alga persones ia es ansiosa ce soldatos pote infiltra la capital par misca se con la deslocadas.

On regarda Bzebiz como la sola pasaje secur a Baghdad de la provinse Anbar.

La Program de Nuri Mundal de la Nasiones Unida ia dise ce lo ia comensa envia comedas aidante a la provinse. Sirca 25 mil persones ia reseta tal aida a jovedi, e on envia ja furnis per 15 mil otras.

On reporta ce SI vade a este de Ramadi longo la vale de la rio Eufrate, en dirije a Habbaniya, do soldatos de la governa asembla per un contrataca proposada contra Ramadi.

Si los catura Habbaniya, SI va es prosima a un lia direta con Falluja, un site prosima a Baghdad cual lo ia ocupa tra plu ca un anio, an pos atacas repeteda par soldatos de la governa.

Ier, la visministro xef de Irac, Saleh al-Mutlaq, ia averti ce la batalia contra SI ia sesa es "un cosa local", e ia recomenda ce la comunia internasional ata.

En la avansa la plu resente, SI ia saisi ier la pasaje final controlada par la governa suri entre Suria e Irac. La perde de esta pasaje de frontera, al-Tanf, segue la ocupa de Palmira, un site antica suri, a jovedi.

2015-05-22

Mexico investiga desapares nova en Guerrero

En Mexico, investigores federal rexerca la desapare de 15 persones, cisa plu, en la site Chilapa en la stato Guerrero, pos cuando lo ia es invadeda par sentos de fusilores.

Familias ia informa la polisia ce la fusilores ia declara se como polisiores de comunia e ce los ia prende alga omes joven a via.

Chilapa es caturada en batalias entre du ganges de drogas ci combate per controla la teritorio.

Jornalistes local dise ce la cuantia de desaparedas pote es multe plu grande.

La fusilores ia invade Chilapa entre 9 a 14 maio, desarmante polisiores local e obligante la xef de polisia a parti.

Los ia dise ce los veni per fini la violentia en la site entre la ganges Los Rojos e Los Ardillos, e ce alga polisiores labora per Los Rojos.

Plu tarda, la fusilores ia redona la armas de la polisia.

Pos se parti, alga abitores ia reporta ce la fusilores ia asembla e fura omes. La plu de la omes ia ave min ca 30 anios.

Avocatos federal ia anunsia ier ce los envia detetores e espertas a Chilapa per xerca la persones desapareda.

Ance ier, la polisia ia trova a la min tre corpos desmembrida, envolveda en covreletos en un semetero prosima a Chilapa. On no ia identifia los.

En la anio pasada, 43 studiantes ia desapare en Iguala, un otra vila en Guerrero.

2015-05-21

Malaisia xerca e salva barcos de migrores

Najib Razak, la ministro xef de Malaisa, ia dise ce se pais va fa misiones de xerca e salva per barcos de migrores rohingia en la Mar Andaman. Aidas umaniste va es ance furnida par tera e mar.

Se anunsia segue semanas en cual la autoriosas ia rejeta barcos de migrores e ia move los a ultra acuas malaisian.

La ministros de esternas de Malaisia e Indonesia es en Nay Pyi Taw, la capital de Miama, per discute la crise de migrores. On crede ce sirca 7000 persones es trapida a mar.

La migrores es muslimes rohingia ci fuji de persegue en Miama, e ance banglas, sur ci on crede ce los es migrores economial.

Malaisia e Indonesia ia dise ce los va refuja tempora los ci atera sur se teritorio, ma los nesesa la aida de la comunia internasional per relocali los.

En se conta de Twitter, Najib ia dise ce "la compatia umana fundal" obliga furni aida a la fames e la maladas. El ia ajunta ce la marina e autoriosa maral de la pais nesesa xerca e salva per "preveni perdes de vive".

Malaisia ia es entre alga statos en la area cual ia refusa aseta la migrores a ante. Lo ia tira la barcos a la acuas de otra paises, creante un situa cual criticistes ia descrive como un max matante de tenis de table.

Alga persones vide la discutes de oji como un avansa grande, car a ante Miama ia nega se culpablia per la crise e no ia es presente a la consenta de ministros de esternas de la area ier, do on ia acorda usa refujas tempora e no diverje plu la barcos.

La dirijor pasifica de Amnestia Internasional ia dise ce la deside de refuja va aida los ci ia veni ja a tera, ma "fa no cosa per la miles ancora vagante a mar, con furnis diminuinte de comeda e acua, o per cualce otras ci segue los".

Tai ia dise ce lo va para tira barcos a mar, ma no ia suscrive la acorda de refuja, disente ce lo luta ja per maneja desuples de miles de refujadas miama.

Plu ca 3000 es ja salvada par persones local o ia atera mesma en Indonesia e Malaisia.

Acel du paises ia apela per aida de otra nasiones per recasi la migrores ante la pasa de un anio. La departe de esternas SUA ia dise ce la Statos Unida va aseta volente refujadas, per gida un taxe multinasional de recasi los.

Miama (ance conoseda como Burma) regarda la rohingias como migrores de Bangladex, an pos cuando multe jeneras de los ia abita en Miama. Lo restrinje se moves e vives personal, e la rohingias es persegueda par la popla major budiste.

2015-05-20

La ferovia suiz emplea oveas-cortierbas

Cuando pasajores de tren en Suiz regarda tra la fenetras, los va vide cisa la enscrivedas la plu nova de la compania nasional de ferovia – un manada de oveas.

La animales opera como cortierbas cuatropedal per Ferovias Federal Suiz, aidante manteni la bonordina de la erba longo la reles.

Los es spesial usosa sur inclinas presipe, cual es min atenable per cortierbas macinal.

La sistem famosa de ferovias suiz estende tra plu ca tre mil cilometres de reles, e multe de la vias traversa un tereno montaniosa.

En cuando los come a pasto, la oveas resta secur car on usa sercas de rede e de cordeta eletricida.

Si on vole segue la progresa de la manada, on pote regarda un mapa enlinia cual mostra la loca de la oveas.

La animales ia comensa se labora en esta mense, e la compania ia loda multe los. Lo dise ce la oveas es "plu bon ca cortierbas normal" car los eleje curante se comedas "en loca de falxi tota en modo de macina", e multe flores savaje es tal salvada.

En ajunta a es ecolojial sana, la oveas es estrema nonperosa, pausante per dormi en sola du oras per dia.

La compania dise plu ce, comparada con un cortierba comun, los es "multe plu divertinte per oserva".

2015-05-19

On prisoni polisiores afgani per no preveni la mata de un fem

On ia condena des-un polisiores afgani a un anio en prison per fali proteje un fem matada en Kabul en marto.

Farkhunda Malikzada, un fem de 28 anios, ia es bateda a moria pos es acusada de arde un copia de la Curan, an si atestores dise ce el no ia fa esta.

Plu temprana en esta mense, on ia condena cuatro omes a mori per la mata, e oto otras a periodos en prison.

La aveni ia provoca multe protestas contra la trata de femes.

Oto otra polisiores acusada en la caso ia es remeteda oji.

Farkhunda ia disputa con un vendor sur se pratica de vende joalas majiosa a femes a la santeria Shah-Do Shamshira, cual es prosima a la palasio presidental e la bazar xef de Kabul.

La vendor ia es un de los ci on ia condena a mori plu temprana en esta mense.

En la curso de la disputa, Farkhunda ia es acusada de arde la Curan. Un fola ia oia esta e ia ataca el. En declaras lejeda en corte, alga de la acusadas ia confesa ce los ia es saisida par la alega.

Un investigor ofisial ia dise ce no atesta esiste ce el ia arde la Curan.

2015-05-18

Militias vade per aida Ramadi contra Stato Islamiste

On reporta ce la governa iraci envia militias suportada par Iran a Ramadi per recatura lo de Stato Islamiste (SI), cual ia saisi ier lo.

Sirca 500 persones ia mori cuando la militaria iraci ia abandona se postos en la site, a 112 cilometres a ueste de Baghdad.

Un ofisior de governa areal ia dise ce persones fuji de Ramadi, la capital de la provinse Anbar, "en cuantias grande". Ma la SUA ia descrive la situa en la site como "fluente e disputada".

La militias xia, conoseda como la Movabli Popular, ia es esensal en la recatura de Tikrit, un site a norde de Baghdad, a du menses ante aora. Los ia retira se de Tikrit pos reportas de violentia e fura de benes.

La governa iraci ia teme la efetos setal de envia fortias xia a Ramadi, un area forte suni.

La polisia e militaria ia retira se la area en un modo caososa, pos dias de combate intensa.

Un declara, parente par SI, ia dise ce se soldatos ia "purga la site intera". Lo ia dise ce SI ia catura la base militar de la Brigada 8, e ance tances e lansamisiles cual on ia abandona ala.

La ofisia de la governor de Anbar ia sujesta ce Ramadi es aora completa controlada par SI, e ce tota soldatos governal ia retira se.

Un ofisior militar, anonim parlante, ia dise ce la plu soldatos ia parti a un base militar en la site Khalidiya, a este de Ramadi, an pos cuando Haider al-Abadi, la ministro xef, ia comanda ce los resta. Soldatos governal ave poca munis, e no pote forsa a via la atacas enorme par SI.

Fortias iraci ia fuji pos un serie de atacas par bombas umana en autos a soldi.

Cuatro esplodes cuasi simultan ia colpa la polisia ci ia defende la distrito Malaab en Ramadi sude. Plu tarda, tre plu bombas umana ia gida autos esplodente contra la porton de la xeferia militar provinsal.

La perde de Ramadi representa un problem multe seria per la governa, e ofisiores iraci es alarmada.

La provinse Anbar covre un estende vasta de la pais, de ueste de la capital Baghdad asta la frontera suri. Lo conteni vias esensal cual lia Irac a Suria e Jordan. On reporta ce SI controla plu ca un dui de esta teritorio.

Plu ca 500 persones ia mori en la du dias pasada de combate en e sirca Ramadi, incluinte polisiores ci ia usa tota se munis, e persones nonmilitar colpada par fusilis crusada.

Sirca 8000 persones ia deveni deslocada en la mesma periodo corta, seguente la Organiza Internasional per Migra.

2015-05-17

La pape va santi du monces filastini

Pape Fransisco va santi du monces fema de la sentenio 19 ci ia abita Filastin, alora un parte de la Impero Osmanian, e ci ia parla arabi como se lingua propre.

Marie Alphonsine Ghattas e Mariam Bawardy va es entre cuatro santas nova declarada en la Plaza de San Pedro en Roma.

La presidente filastini, Mahmoud Abbas, e plu ca du mil peregrinores cristian de la area va es presente a la rituo. On vide la ata como un simbol de suporta vatican per comunias cristian diminuinte en Asia sude-ueste.

Ier, la pape ia encontra Abbas en la Vatican, descrivente el como "un anjel de pas". Se visita segue a no plu ca alga dias pos la reconose formal par la Vatican de Filastin como un stato.

La documento declara ce la Seja Santa favore solve la disputa con Israel par ave du statos, e permete ce la Vatican supravide aspetas de la vive catolica en la areas controlada par Abbas.

Israel ia espresa se delude con la acorda, cual usa la terma "stato filastini".

Marie Alphonsine Ghattas ia nase en un familia filastini en Ieruxalim, e ia cofundi la Instituida de la Sores de Rosaria, cual maneja oji multe scolas e jardines de enfantes.

Mariam Bawardy ia nase en Galilea a jenitores elinica catolica de Suria e Lubnan. El ia es un mistica. On dise ce el ia fa miracles e ia esperia stigmas – feris representante los de Jesus sur la crus.

Ambos monces ia vive en un ambiente difisil. Los ia vinse povria, maladia, e la domina mas en la sosia osmanian, a la mesma tempo como aida otra persones. On dise ce los ia vide alusinas de Maria la Virjin, e ia resta en comunica con el.

Par santi esta femes, la Eglesa selebra se bon laboras, ma lo mostra ance suporta per cristianes en la loca do acel relijio ia comensa.

La cuantia de cristianes en Israel e la teritorios filastini ia diminui a min ca 2% de la popla. Esta es partal causada par la crese de la poplas iudi e muslim, ma ance par la gera e la posible de vive estra la pais.

2015-05-16

On condena la bombor de Boston a mori

En la SUA, un juria ia condena Dzhokhar Tsarnaev, la bombor de Bostono, a mori par injeta.

Tre persones ia es matada, e 260 ia es ferida, pos cuando Tsarnaev e se frate ia pone bombas a la fini de la Maraton de Boston en 2013.

Lo es probable ce on va move Tsarnaev, ci ave aora 21 anios, a un prison federal en Indiana ante se esecuta, ma cisa anios de apelas va segue.

Vitimes ia plora a la leje de la puni, ma Tsarnaev is mostra no emosia.

"Aora el va vade a via e nos pote progresa. Justia. En se parolas propre, «un oio per un oio»," Sydney Corcoran ia dise, ci ia sangui cuasi a mori, e de ci se madre ia perde ambos se gamas en la bombi.

Pos 14 oras de discutes, la juria ia conclui ce Tsarnaev ia mostra no repenti e ce on debe donce esecuta el.

On ia judi en la mense pasada ce el es culpable de aida reali la ataca, e ance de mata un polisior par fusil.

Como stato, Massachusetts ia abandona la puni de mori en 1984, ma on ia prosede Tsarnaev sur crimines federal, con resulta ce se esecuta ia es permetable.

Pos la anunsia de la condena, Lorreta Lynch, la avocato jeneral SUA, ia dise: "La puni ultima es un puni conveninte per esta crimin xocante, e nos espera ce la completi de esta prosede va clui a alga mesura la situa per la vitimes e se familias."

Ma no tota la vitimes ia suporta la puni de moria per Tsarnaev.

La jenitores de Martin Richard, un xico de oto anios ci ia es matada en la esplode, ia scrive un article en un jornal en april, demandante ce la governa no xerca un puni de moria, car esta ta pospone se reposa emosial.

Jornalistes ia telefoni ier a Anzor Tsarnaev, la padre de la bombor, en la area Dagestan en Rusia. Pos oia la condena, el ia jemi e descomuta.

En la prosede, la ecipo defendente Tsarnaev ia confesa ce el ia fa un rol en la atacas, ma los ia dise ce la motor vera ia es se frate plu vea, Tamerlan, ci la polisia ia fusili.

Avocatos ia asentua ance se vive temprana difisil. La familia Tsarnaev – etnical txetxen – ia vive en Cirgistan e Dagestan, prosima a Txetxnia. Los ia move a la SUA en 2002.

Ma la acusores ia razona ce Dzokhar Tsarnaev ia es un partisipor egal en la ataca, mostrante a la juria un mesaje cual el ia scrive sur la barco do on ia aresta el: "Sesa mata nos nonculpables e nos va sesa."

2015-05-15

La du xefes de Cipros recomensa negosia

En Cipros, la xefes de la comunias divideda elinica e turces va recomensa negosias de pas, arbitrada par la Nasiones Unida, cual ia es abandonada en la anio pasada.

La presidente Nicos Anastasiades e la xef de a cipricas turces Mustafa Akıncı va reinisia oji la prosede de pas en la zona neutra en Nicosia.

On ia eleje Akıncı a se posto en april, e la discutes ia es anunsiada pos un consenta a lundi.

La norde de la isola, controlada par Turcia, ia separa en 1974 pos un despone corta inspirada par la elinicas.

Pos acel, la isola ia deveni divideda: la tri norde es aora abitada par cipricas turces e la du tris sude par cipricas elinica. La Republica Turces de Cipros Norde, autodeclarada, es diplomatada isolida: sola Turcia reconose lo.

La discutes de pas ia sesa en otobre 2014, cuando la elinicas ia sorti en protesta sur la presentia de un barcon turces xercante gas natural a lado de la costa sude.

Fortias de la Nasiones Unida ci manteni la pas estima ce 165 mil cipricas elinica ia fuji o ia es escluida de la norde, e 45 mil cipricas turces de la sude. Ma la du lados oposante mesma dise ce la cuantias es plu alta.

La compensas per la deslocadas resta como un de la temas la plu difisil en la negosias.

Analistes sujesta ce on ave esperas ce Akıncı, un sinistriste moderada, es capas de progresa la situa. El ia vinse se presedor noncomprometente, Derviş Eroğlu, en april.

2015-05-14

Soldatos combate en Burundi pos un colpa de stato

En la capital de Burundi, grupos oposante de soldatos batalia entre se en nonsertia sur la susede de un colpa de stato atentada contra la presidente.

On ia oia fusilis e esplodes forte en la note, prosima a la stasion nasional de radio e televisa.

La xef de la armada dise ce la colpa, gidada par un xef pasada de securia, ia fali. Ma la presidente, Pierre Nkurunziza, no ia susede reveni de Tanzania, e on no sabe do el es.

La tumulta ia comensa cuando Nkurunziza ia anunsia ce el xerca un periodo tre de ofisia. Oposores dise ce esta defia la constitui. Nkurunziza ia deveni presidente en 2005.

El ia parti per Tanzania ier, e a pos, la major jeneral Godefroid Niyombare, se aliada pasada, ia anunsia la colpa. "La governa es suvertida," el ia dise en un difusa de radio.

Miles de persones ia vade sur la stradas per selebra la anunsia, marxante a la sentro de la capital, Bujumbura, a lado de soldatos e du tances.

Un protestor ia comenta ce esta es un vinse pos semanas de protestas.

Ma la ecipo de la presidente ia rejeta la colpa de stato como "imajinal". En la note, jeneral Prime Niyongabo, la xef de la armada, ia anunsia: "La colpa atentada es finida."

El ia dise esta pos un note de negosias con la ministro de defende, ci suporta la colpa.

Ma lo pare ce poca acorda esiste entre la soldatos mesma. Grupos fidosa a cada lado ia comensa combate la un la otra per controla la stasion de radio e televisa.

La presidente ia vola a Dar es Salaam, la capital de Tanzania, per discute la crise con otra xefes de paises de Africa este.

El ia intende vola denova a Burundi pos deveni informada sur la colpa. Ma Niyombare ia comanda la clui de la airoporto e la fronteras, donce Nkurunziza ia debe revade a Dar es Salaam. On no sabe esce el es ancora ala.

La otra xefes de stato a la consenta en Tanzania ia condena la colpa. La Nasiones Unida e la SUA ia recomenda forte ce ambos partitos freni se.

La crise ia comensa a 26 april, e ia causa ja la moris de plu ca 20 persones. Desuples de miles de burundeses ia fuji a paises visina en la semanas resente.

Nkurunziza ia rejeta sujestas ce el pospone la vota de la mense veninte. An tal, la consenta de xefes en Tanzania ia recomenda ce el fa esta.

La gidor pasada de rebelores ave 51 anios. El crede ce el ave la direto de xerca un periodo tre car la posto ia es direta donada a el par la parlamento en 2005.

La constitui de Burundi dise ce un presidente pote governa tra no plu ca du periodos, ma la corte constitual de la pais ia suporta la interprete de Nkurunziza, plu temprana en esta mense.

2015-05-13

Nepal esperia un plu trematera sever

Un trematera major ia colpa la este de Nepal, prosima a Monte Sagarmata (Everest), a du semanas pos la mori de plu ca 8000 persones en un trema destruosa.

A la min 65 nepalis ia es matada e cuasi 2000 ia es ferida par la trema nova. 17, cisa plu, ia mori en Barat.

La trematera ia colpa prosima a la vila Namche Baza e ia envia miles de abitores panicante a la stradas de la capital de Nepal, Kathmandu.

Lo ia mesura 7,3 a la scala de Richter. La trema de 25 april ia mesura 7,8.

On ia envia elicotores a distritos a este de Kathmandu sur cual on crede ce los es la plu sever afetada. La polisia en Charikot, a 80 cilometres a norde-este de la capital, ia dise ce 20 persones ia mori ala.

Plu temprana ier, la militaria SUA ia anunsia ce un elicotor partisipante en la labora de salva ia desapare prosima a Charikot. Lo ia porta oto persones.

Un portavose per la governa nepali ia dise ce la trematera nova ia afeta 31 de la 75 distritos de la pais.

La ministro xef, Sushil Koirala, ia clama per "coraje e pasientia" e ia recomenda forte ce tota ci ia aida Nepal pos la trema de 25 april "estende denova vos manos aidante".

A la min cuatro persones ia es matada en la vila Chautara, a este de Kathmandu, do on reporta ce un cuantia de construidas ia colasa.

La Organiza Internasional de Migra ia dise ce on estrae corpos de la detrito ala, do alga liscas de tera ia aveni.

Liscas de tera ia es reportada ance en Sindhupalchok e Dolakha. Un portavose per la organiza Salva la Enfantes ia dise ce se empleadas ia debe "evita rocas jigante cual ia rola de sur la monte".

La trematera nova ia colasa plu casas en la area de Monte Sagarmata, ma poca turistes ia es ancora en acel loca pos la trematera presedente.

Lo ia aveni a profondia de 15 cilometres, la mesma como la trema de april. Tremas min profonda tende causa plu danas a la surfas.

La trema de ier es probable un de la plu grandes cual Nepal ia esperia. Lo ia es segueda par ses replicas sismica de grandia 5,0 o plu. Un tal, a 30 minutos pos la trema xef, e sentrida a la distrito Ramechhap a este de Kathmandu, ia mesura 6,3.

2015-05-12

La situa finansial en Elas deveni urjente

La ministro de finansia de Elas dise ce la situa finansisal en se pais es "estrema urjente" e ce la crise pote culmina pos sola du semanas.

Yanis Varoufakis ia fa la averti pos cuando ministros de finansia de la eurozona ia consenta en Bruxelles per discute la parte final (7,2 mil mlion euros) de la projeta de 240 mil milion euros de la Uni European e la Reserva Monal Internasional (RMI) per salva Elas.

Ministros ia dise ce Elas ia fa "progresa" ma ce plu labora es nesesada.

La governa elinica no susede fasil reali se repaias obligada.

Plu temprana, Elas ia comensa envia 750 mil euros de interesa de deta a la RMI, a un dia ante la limita de tempo per acel paia.

Elas debe ateni un acorda de reformi con se creditores internasional ante la fini de junio. Se reservas de mone es tan basa ce lo ia nesesa demanda aida de organizas publica.

La crise ia introdui la posible ce Elas pote fali paia se detas e parti de la euro.

La eurozona insiste sur un sistem sever de reformis, incluinte reduis de pensiones, par intercambia per la salva. Ma la governa elinica, gidada par la partito sinistriste Syriza, oposa medios sever e resiste la proposas.

On ia teme ce Elas va fali repaia oji se deta a la RMI. Ma un ofisior de la ministreria finansial de la pais ia dise ce la comanda per repaia ia es realida a lundi.

Elas ia dona ja cuasi mil milion euros a la RMI de pos la comensa de esta mense.

Lo no es clar como la governa ia oteni la mone, ma la maior de Thessaloniki, la site du de la pais, ia revela en la semana pasada ce el ia dona biletas e monetas en responde a un apela per mone.

Syriza ia dise ce lo no va rompe se prometes elejal de oposa severia, e esta ia presenta la posible de un referendo sur cualce acorda negosiada en Bruxelles.

La ministro finansial de Deutxland, Wolfgang Schäuble, ia dona se suporta a la idea. El ia comenta: "Cisa esta ta es la modo coreta de permete ce la popla elinica deside esce lo es preparada per aseta la nesesada."

2015-05-11

Un polisior misri es prosededa sur mata un protestor

On ia comensa la prosede de un polisior misri ci on ia acusa de mata un ativiste fema nonenarmada.

Yassin Hatem Salahedeen, un teninte de polisia ci ave 24 anios, fronti un acusa de mata sin intende sur la mori de Shaimaa al-Sabbagh.

El ia mori pos pare es fusilida par un polisior mascida a un protesta pasosa en Cairo en janero.

Se momentos final ia es filmida e ia sperde virusin tra la rede, provocante coleria en Misre.

La judor ia comanda la teni de Salahedeen a la escuta inisial ier. A ante, el ia es libre su cautia.

La ativiste ia ave 32 anios. El ia mori pos es fusilida con granes de plomo.

En la dias cual ia segue, la polisia misri ia nega ce los usa tal baletas contra protestores.

An tal, su un presa cresente par la sosia de Misre, la presidente Abdel Fattah el-Sisi ia interveni. El ia promete un investiga completa, referente a Sabbagh como "me fia propre".

La prosede va recomensa a 14 maio, cuando atestores prosedente va apare.

Sabbagh ia es un libriste political, un poesiste publicida, e un madre de un xico de sinco anios. Se mori ia xoca Misre.

A 24 janero, el ia pasea con amis a la Plaza Tahrir en Cairo per pone un garlanda per recorda la revolui de 2011, cuando polisiores mascida ia xuta gas lacrimojen e granes de plomo a la grupo.

Un video ia mostra como el ia colasa a la tera e ia es comfortada par un ami.

La ativia de polisia a protestas en Misre es un fonte recorente de critica. Seguente la organiza Human Rights Watch ("Vijila de diretos umana"), 1150 protestores ia es matada sola en julio e agosto 2013.

2015-05-10

Colombia proibi un erbiside carsinojen

Colombia ia anunsia ce lo va sesa usa un erbiside controversa per destrui cultiverias nonlegal de coca, la ingrediente cru per cocaina.

La deside segue un averti par la Organiza Mundal de Sania ce glifosato es "probable carsinojen".

On ia usa la cimical en programes antinarcotica per duxi campos en America Sude.

La presidente de Colombia, Juan Manuel Santos, ia dise ce la pais va debe trova otra metodos de combate la produi de coca.

Ofisiores antinarcotica en Colombia va prepara un projeta alternativa ante otobre.

Santos ia ajunta ce la pais no va "basi la garda" en se batalia contra contrabanda de drogas.

La program colombian de elimina drogas ia comensa en 1994. La autoriosas consentra xef a areas controlada par la FARC (Fortes Enarmada Revoluinte de Colombia), la grupo la plu grande de rebelores en la pais.

La FARC usa la revenu de produi cocaina per finansia se ativias enarmada.

Ance otra paises en la area cual produi coca, incluinte Ecuador e Peru, ia usa la erbiside per destrui campos de coca.

Cultivores dise ce la fumiga airal ia ruina campos intera de cafe e otra produidas legal.

2015-05-09

Un parada militar enorme en Rusia

Rusia presenta se parada militar la plu grande, a 70 anios pos la defeta de Deutxland nazi en la Gera Mundal Du.

Miles de soldatos marxa sur la Plaza Roja, e on va mostra tecnolojia nova a la ves prima.

Plu ca 20 xefes de stato es en Moscva, ma multe otras boicota la aveni par causa de la rol alegada de Rusia en la crise ucrainsce.

A la comensa de la parada, presidente Vladimir Putin ia dise ce colaboras internasional ia deveni perilida en anios resente.

Rusia nega acusas par la Ueste ce lo enarma rebelores en Ucraina este. Plu ca 6000 persones es ja matada de pos la comensa de combate en april 2014 en la areas Donetsk e Luhansk.

La parada en Moscva ia comensa a 10:00 de ora local (07:00 de ora universal), pos un serie de praticas sur la stradas de la capital.

Unias militar de la intera de Rusia marxa. Alga porta uniformas de la eda de la Gera Mundal Du. Plu ca 100 aviones va vola supra la Plaza Roja.

On va presenta a la ves prima la tance de batalia T-14 Armata, cual ave un toreta-de-fusil telecomandada e un capsula refortida per la ecipo.

On va esibi ance la misiles balistical intercontinental, de cual cada es capas de porta tre ojivas nucleal.

Siniante relatas plu prosima entre Rusia e Xina, un colona de soldatos xines va marxa en Moscva a la ves prima.

Entre plu ca 20 xefes ci oserva la aveni es Xi Jinping, la presidente xines; Pranab Mukherjee, la presidente barati; e Ban Ki-moon, la secretor jeneral de la Nasiones Unida.

Ma la SUA, Australia, Canada, e la plu de la Uni European boicota la aveni supra la crise en Ucraina.

Ier, Polsca ia organiza un aveni alternativa en Gdansk per la xefes ci ia refusa vade a Moscva.

Ala, la presidente de Ucraina, Petro Poroshenko, ia comenta ce "on fa crimines oji en la sentenio 21 entre la atacas contra me pais Ucraina, an pos la lesones la plu cruel de la pasada". El ia descrive la aveni de oji en Moscva como "un parada de sinicisme".

2015-05-08

La conservistes gania la vota brites

La mapa political de la Rena Unida ia cambia vasta pos un vota jeneral ier, en un resulta cual ia surprende cuasi cadun.

La parlamento de London ave 650 sejas per parlamentores de tra England, Scotland, Cimri, e Er Norde. A la momento de publici esta article, on ia anunsia la resulta de la votas per 629 de estas.

Ante ier, tota sondas ia predise ce no partito va gania plu ca un dui de la sejas, per reseta automata la direto de governa la pais.

Tra la sinco anios pasada, la governa brites ia es un alia de la partito conserviste e la partito libriste-democrata. Los ia atenta recovre la economia pos la crise finansial de 2008 par redui la spende publica e par otra medios sever.

An tal, la conservistes ia gania ier un cuantia grande de sejas, e on predise ce los va ocupa final pico plu ca un dui de la sejas, tal ce los no va nesesa xerca un aliada.

La otra resulta notable ia es par la Partito Nasionaliste Scotes, cual ia gania 50 sejas nova e ocupa aora 56 de la 59 sejas scotes en la parlamento de London.

Esta es se vinse la plu susedosa de istoria. En alga sejas, los ia rompe la recordo per la "penduli" (pd: la cambia de proportio de votas), con moves favorente de asta 34% de votores.

La nasionalistes ia sutrae alga parlamentores de otra partitos ci ia ocupa sejas scotes tra desenios.

Ma car la conservistes ia susede ance, la nasionalistes no ia reali se espera de pote alia se con otra partitos oposante per deveni potiosa en parlamento.

Alga analistes sujesta ce la conservistes ia susede xef car la otra partes de la popla ia teme la susede de la nasionalistes scotes e la desuni ultima de la Rena Unida.

La otra oposores xef, la partito de labora e la libristes-democratas, ia perde multe sejas. Probable se gidores va resinia.

La libristes-democratas ia perde a la min 46 sejas, e ia redeveni un partito minor con sola 8 parlamentores. E en la partito de labora, la ministro oposante de finansia ia perde se seja.

UKIP, un partito destriste e relativa nova, e conoseda per se politica forte contra migras a la pais, ia perde un de se du sejas.

La partito verde ia susede reteni se seja solitar a la costa sude de England, resetante cuasi 42% de la votas, un crese de plu ca 10% pos la vota presedente a sinco anios ante aora.

La mapa de la Rena Unida sembla aora cuasi un bandera de tre colores: Scotland ia jali pos la vinse de la nasionalistes; la norde de England es jeneral ancora roja per la partito de labora; e la sude es conserviste blu.

2015-05-07

Legores canadian aproba la crese de potias de spia

En Canada, un projeta legal cual ta estende multe la potias de la ajenteria de spia ia pasa ultra un ostaculo major.

La Salon basa ia aproba ier la Ata Antiterorisme, speronida par un ataca contra parlamento en la anio pasada.

La lege ta permete ce la ajenteria de spia opera ance estra la pais e fa arestas preveninte. Dominada par la partito conserviste, on previde ce la Salon alta va aproba la lege ante junio.

La ministro xef, Stephen Harper, suporta forte la projeta, cual criminali la promove de terorisme, incluinte par interede.

Jason Kenney, la ministro canadian de defende, ia dise: "On ave un probablia alta de atacas jihadiste de interna. La menasa de terorisme ia es nunca plu grande."

La lege fasili ance ce la polisia aresta e teni persones sin acusa.

Oposores, ci opina ce la lege es tro jeneral e no sufisinte supravideda, ia atenta fa cambias a lo, ma sin susede.

Cuatro ministros xef pasada de la pais e sinco judores de la Corte Suprema Canadian ia scrive leteras publica per oposa la projeta.

Allan Weiss, profesor de siensas umana a la Universia de York, ia comenta: "Esta lege va gida cuasi serta a un redui de libria de espresa. Lo es plen de linguaje neblosa cual ta permete ce la governa eticeti cuasi cualce cosa con cual lo desacorda como mal per la interesa nasional de Canada."

En otobre 2014, un atacor ia fusili e mata un soldato a la monumento nasional de gera en la captial, Ottawa, e ia ataca alora la construidas de parlamento visina.

A du dias plu temprana, un om descriveda como inspirada par la grupo Stato Islamiste ia crase du soldatos en un parce de autos en Quebec, matante la un e ferinte la otra, ante cuando on ia mata el par fusil.

2015-05-06

Sceletos de persones contrabandada es trovada en Tai

Ofisiores en Tai dise ce los ia trova du sceletos cisa relatada a la contrabanda umana, a poca dias pos la descovre de 26 corpos en un tomba coletiva.

Ambos sceletos ia es trovada en campas abandonada en la provinse Phang Nga. Un de los ia es liada a un arbor.

Phang Nga es a distantia de alga sentos de cilometres de la loca en la provinse Songkhla do on ia trova la tomba coletiva en la semana pasada.

Tre tais e un miama ia es arestada en Tai, suspetada sur contrabanda umana.

La tomba con 26 corpos ia es descovreda en un campa abandonada en la jungla prosima a la frontera malaisian – un area comun usada par tal contrabandores.

Separada, on ia trova un campa du con a la min sinco plu tombas en Songkhla.

La area es situada sur un via frecuente usada par muslimes rohingia ci fuji de persegue en Miama.

Ofisiores crede ce contrabandores teni migrores posible en la campas, e esije rescates de se familias.

On ia critica forte Tai per no ata contra la redes de contrabandores ci teni tipal miles de persones de Miama e Bangladex per rescate en cada anio.

La polisia ia dise ce la tais arestada a lundi inclui un membro de la comite local de Songhkla e du ofisiores de vileta.

Grupos promovente diretos umana ia alega longa ce ofisiores e polisiores local es consensa de, o an aida, la contrabandas.

On ia nomi la person miama como Soe Naing, conoseda como Anwar. El es "un figur sentral ci dirije campas e esije rescates".

La polisia xerca cuatro otra suspetadas, ci es ance ofisiores local.

On crede ce multe de la vitimes trovada en la campa ia mori de maladia o famia. Un survivor ia informa jornalistes tai ce plu tombas coletiva esiste en la area.

En cada anio miles de persones es contrabandada tra Tai a Malaisia. Spesial, muslimes rohingia usa esta via per evade la persegue e violentia setal en Miama, la pais visina.

En 2012, plu ca 200 persones ia es matada e miles ia perde se casas cuando violentia ia eruta entre budistes e muslimes en Miama. Violentia antimuslim ia aveni a plu ca un ves a pos.

En desembre, la Nasiones Unida ia aseta un deside cual ia recomenda forte ce Miama permete naturali la rohingias, de ci multe es clasida como persones sin stato.

2015-05-05

Peru investiga un ataca par un tribu retirada

La governa peruan ia envia spesialistes de cultur nativa per aida un comunia en la foresta de la Amazon, pos cuando un om ia es matada par un membro de un tribu isolida.

La om ia es colpada par un flexa xutada cuando persones de la tribu Mashco Piro ia invade se vileta, Shipetiari, en la foresta.

Esta es la ves tre de esta anio cuando on ia vide la tribu.

Antropolojistes dise ce los ia xerca probable utiles o comeda. An tal, on no sabe perce los ia ataca.

On estima ce la grupo conteni sirca 600 persones, e los abita en grupos separada, constante movente tra la foresta.

De tempo a tempo, los construi campas tempora longo rivas, e los escava per ovos de tortuga.

La governa de Peru ia proibi la contata fisical con la Mashco Piro e sirca un desuple de otra tribus nativa "noncontatada", car los ave poca imunia o capas de resiste maladias portada par otra umanas.

Antropolojistes reporta ce en la area de jungla do on ia vide la tribu, prosima a la rio Madre de Dios en Peru sude, alga persones local ia atenta usa premios per tenta la Mashco Piro a sorti de la foresta, compatiante lo cual on regarda como un esiste primitiva.

La governa finansia ja un grupo de spesialistes tra alga tempo en la area, per trata contatas entre tribus isolida e comunias fisada.

2015-05-04

Un barcon de cimicales nosiva afonda en Costa Rica

En Costa Rica, un barcon conteninte cimicales nosiva ia provoca un crise a lado de la costa de Puntarenas, un vila turiste, cuando lo ia afonda en mar turbosa.

La governa ia institui un zona de crise longo sirca 100 cilometres de costa, e ia demanda ce on evita nada e pexa.

La barcon ia es transportante sirca 200 tones de nitrato de amonio, un sustantia usada en fertilintes e esplodentes.

Ma un portavose ia dise plu tarda ce on no ia trova plu ca trasas peti de la sustantia en la acua.

La Comision de Crise de la pais ia dise ce persones pote denova nada secur, ma ce lo va proibi la pexa per 72 plu oras.

Esta organiza ia descrive la situa como "preveninte" par causa de "la efeto posible de nitrato de amonio a la sania umana".

La cimical es multe disolvable, e la Comision de Crise espera ce lo ia disolve ja, portada a la mar profonda par la marea.

Ofisiores governal ia dise ce on va comensa la plu pronto un investiga sur ci es culpable per la afonda de la barcon e la malversa cimical.

Costa Rica ave la cuantia la plu grande de turistes stranjer en America Sentral, e es un loca popular per ecoturistes par causa de se plaias noncontaminada, se forestas tropical, e se parces grande de natur.

2015-05-03

Un tren de vapor reopera en Dimashq

Un tren de via streta ia recomensa opera en Dimashq, tal ce on recorda un eda plu bon en la capital de Suria, un pais cual sufri aora un gera interna sever.

En pasada, la tren de vapor de Rabwah ia es multe popular con abitores de la site. Lo ia transporta los a la campania a finis de semana. Ma la servi ia sesa a cuatro anios ante aora.

Car multe areas de Dimashq es aora ocupada par rebelores, la servi nova va es restrinjeda a partes mantenida par la governa.

La reveni de la tren, distinguida par se vagones jala e se sentas de cuoro, ia atrae desuples de persones, incluinte enfantes, a venerdi. Multe ia brandi banderas nasional suri.

Zuheir Khalil, un de la ofisiores de la reinisia de la tren, ia esplica: "Nos ia deside reopera esta tren per dona denova un espera a persones e per pone un surie sur la fases de los en Dimashq."

Un studiante ia comenta: "Lo es la tren de me enfantia. Me vole viaja denova en lo per recorda acel dias bela."

La tren pote conteni sento persones, e la custa de un bileta es sirca $0,25.

Ofisiores suri dise ce los espera ce la servi va ofre un metodo alternativa de transporta per abitores ci luta con la conjestas de trafica en la capital.

2015-05-02

Nepal perde la espera per plu survivores

La autoriosas en Nepal ia perde la espera de trova plu survivores su la detrito pos la trematera de la semana pasada.

6621 persones ia mori e plu ca 14 mil ia es ferida par la trema a un semana ante aora.

On ancora no sabe la fortuna de miles de persones en areas distante.

La cuantia de mores pote an crese, car laboras de xerca e salva continua ancora en alga distritos montanial.

An si la majoria grande de mores ia aveni en Nepal, on reporta ce sirca 100 persones ia mori en la paises visina: Bod, Barat, e Bangladex.

Nepal ia repete se clamas per plu aidas stranjer e umaniste, confesante ce lo no ia es bon preparada per la desastre.

Liscas de tera e mal climas ia impedi la atentas de furni aida a distritos isolida, e on dispone mera sirca 20 elicotores per la laboras de salva e aida.

La ministro nepali de finanisa, Ram Sharan Mahat, ia dise ce la contas de governa ancora no ia reseta desuples de miliones de dolares prometeda par donores stranjer. "A presente," el ia ajunta, "la opera intera de la governa es finansiada par la recursos interna propre de la governa."

UNICEF ia averti ce enfantes en la areas la plu sever afetada es "sin casa, en xoca profonda, e sin asede a cura fundal".

Ospitales supraflue, la acua manca, corpos es ancora trapida su la detrito, e persones dormi su sielo.

Plu, la saison de monsones va comensa pos poca semanas.

2015-05-01

Un mision a Mercurio fini con colpa

La mision Messenger ("Mesajor") par NASA a Mercurio ia fini esplodente, pos des anios en spasio e cuatro en orbita.

La veculo ia cade sur un area prosima a la polo norde de la planeta, nonvidable de la Tera, a sirca 20:00 de ora universal ier.

Siensistes ia confirma esta a alga minutos plu tarda, cuando los ia reseta mera un silentia en loca de la comunica seguente de la veculo.

Messenger ia ateni Mercurio en 2011 e ia suprapasa multe se intende fundal de orbita per un anio.

Ier, lo ia colpa la surfas de la planeta la plu peti de nos sistem solal a 14 mil cilometres per ora – la desduple de la rapidia de sona.

La xoca ia destrui completa la veculo, e lo ia aveni car Mercurio no ave un atmosfera densa cual ta arde ojetos entrante.

La veculo de tre metres ia pesa 513 cilogrames. Calculas indica ce lo ia formi un crater nova con grandia de un campo de tenis. Ma acel es multe tro peti per es vidable de asi.

Se furni de carburante, cual ia representa un dui de se pesa cuando lo ia es lansada en 2004, ia deveni intera spendeda a alga semanas ante aora.

Ma on ia susede fa cuatro manobras final per estende plu la vola, par relasa la elio normal usada per move carburante a la puxadores. La ultima de esta manobras ia aveni a 28 april.

En se mision, Messenger ia cambia multe nos comprende de la planeta Mercurio. Lo ia envia plu ca 270 mil imajes e 10 terabaites de mesuras siensal.

Lo ia deteta indicas de acua ascondente en la ombras de la crateres polal, e ia descovre ce la campo magnetal de Mercurio es bizara nonsentrida, deslocada longo la ase de la planeta par 10% de se diametre.

Tra cuatro anios e 4104 sirculos, Messenger ia segue un orbita estrema elise sirca Mercurio. Lo ia vaga frecuente a un distantia de cuasi la duple de la diametre de la planeta, ante reveni a min ca 96 cilometres a la plu prosima.

Per manteni esta ritmo an entre interfere par la Sol, la veculo ia nesesa usa se motor a un ves en cada pico de menses. La resulta nonevitable ia es ce la mision ia fronti un fini violente cuando la carburante ia deveni consumada.

Lo ia fa se pasa cuasi ultima a distantia de entre 300 e 600 metres – no multe plu ca la altia de la Tore Eiffel – a sirca 13:00 ier.

Car la colpa ia aveni a la lado de la planeta nonvidable de la Tera, la veculo no es ia comunicante en se momentos final. Donce probable lo ia porta plu ca mil imajes nonvideda a se loca de reposa.

La nom Messenger ia es un corti de "Mercury Surface, Space Environment, Geochemistry, Ranging" (surfas, ambiente spasial, jeocimica, jeometre).