2015-09-30

Un batalia contra la Taliban en Kunduz

En Afganistan, on continua combate forte en la site Kunduz, a la dia pos un contrataca par soldatos governal per reclama lo de la Taliban.

Ier, du atacas airal par la SUA ia para un atenta par rebelores de saisi la airoporto, cual la armada usa como un fortres.

La departa afgani de spia dise ce la atacas ia mata la xef de la Taliban en la provinse e se suordinada, ma la Taliban ia nega esta.

La SUA ia reconose la saisi de Kunduz como problem, ma ia dise ance ce lo resta serta ce soldatos afgani pote recatura lo.

Combates ia aveni en esta site norde tra la note, ma lo es ancora nonclar cuanto de lo resta su controla governal.

Un portavose per la xef de polisia en la site ia dise: "Sentos de la Taliban es matada e se corpos mor es sur stradas."

La ministreria afgani de defende afgani ia declara ce on ia recatura la xeferia de polisia e la prison, pos ce la rebelores ia relasa sentos de prisonidas cuando los ia saisi la site a lundi.

Ma videos publicida par la Taliban mostra rebelores en la vila ci ostenta tances, veculos blindada, autos de polisia, e furgones de la Crus Roja, cual los ia saisi.

Lo pare ce soldatos refortinte de Taliban ia ariva ance, con la situa aora tan perilosa ce abitores local no pote parti. La abitores resta xef en casa, ansiosa sur la Taliban e sur la posible de combates sur strada en la batalia per la site.

La xef nova de la Taliban, Akhtar Mansur, ia dise ce la governa debe anunsia se defeta propre.

La presidente Ashraf Ghani, ci ia completi ier se anio prima de posto, ia comenta en un parla televisada ce on fa "progresa" per recatura Kunduz, ma ce fortes de securia ia es impedida par la usa par la Taliban de persones nonmilitar como scermos umana.

La ataca a lundi ia es rapida e ia surprende soldatos afgani. A noti, soldatos forte enarmada ia traversa campos per ataca la site de multe dirijes. Los ia inonda rapida alga de la puntos de controla do la polisia defende la perimetre de la vila.

A pos, los ia catura construidas major, ia libri sirca 500 prisonidas de la prison de la site, e la forsa ofisiores e soldatos a retira se a la airoporto.

La provinse Kunduz ia esperia atacas diversa de pos april, con la Taliban juntante se a otra rebelores.

En desembre, OTAN ia fini se mision de combate en Afganistan, retirante la plu de se soldatos, estra un armada restante de 13 mil persones usada per operas de instrui e antiterorisme.

Violentia par rebelores ia crese tra la pais pos la parti de la plu de la soldatos ueste.

2015-09-29

Zeland Nova va crea un conserveria vasta de vive maral

Zeland Nova ia revela ce lo intende converti un parte de la Pasifica sude, con sirca la grandia de Frans, a un conserveria per vive maral.

La Refuja Maral de Kermadec es situada a norde de la pais, e conteni un cadena de isolas e volcanes suacuan.

John Key, la ministro xef, la fa la anunsia a la Asembla Jeneral de la Nasiones Unida en New York.

La pexa e mina va es proibida en lo cual Key ia descrive como "un de la areas la plu jeografial e jeolojial variosa de mundo".

El ia dise: "Zelandeses valua nos costas e mares, cual es un parte importante de nos cultur, economia, e ambiente, e nos es dedicada a maneja los en modo sustenable."

La governa intende aseta leges per crea la conserveria en la anio veninte.

La area per proteje es un estende vasta de la Pasifica sude, a sirca mil cilometres a norde-este de la Isola Norde de Zeland Nova. Lo ave un area de 620 mil cilometres cuadrida.

Lo conteni la Foso de Kermadec, cual es profonda de 10 cilometres e donce un de la fosos maral la plu profonda de mundo. La foso es rica con vive maral incluinte balenas, delfines, tortugas perilida, e avias de mar.

Ambientistes ia bonveni la deside. Alga grupos ia promove la crea de la conserveria, cual va estende la proteje de la ambiente maral de Zeland Nova de 0,5% a 15,5% en mesura spasial.

La anunsia ia surprende companias de pexa e mina. La presidente de Seafood New Zealand ia dise ce on ia reseta "no preaverti de la governa" e ce la industria "nesesa tempo per considera tota la resultas implicada".

2015-09-28

Un supraluna coaveni con un eclis lunal

Tra la mundo, on ia regarda la sielo per oserva un aveni astronomial rara, cuando un eclis lunal ia coaveni con un "supraluna" – cuando la Luna pare plu grande car lo es la plu prosima a la Tera en se orbita.

La eclis ia dona un aspeta roja a la Luna. Lo ia es vidable en America Sude, America Norde, e la ueste de Africa e Europa.

On ia oserva la plu resente esta fenomeno en 1982, e lo no va reaveni asta 2033.

En un eclis lunal completa, la Tera, la Sol, e la Luna es cuasi esata aliniada, e la Luna es situada a la otra lado de la Tera ca la Sol. En esta posa, on vide un luna plen.

Cuando la Luna entra a la ombra de nos planeta, lo deveni multe oscur ma resta usual vidable, luminada par lus de sol cual pasa tra la atmosfera de la Tera.

En cuando esta lus viaja tra la gas ensircante nos planeta, la partes entre verde e violeta deveni plu filtrida ca la parte roja, e la resulta es ce la lus cual ateni la surfas lunal pare xef roja.

Oservores sur la Tera pote vide un luna con color de brice, osidi, o sangue, dependente de la state de la atmosfera. A veses, la luna pare mera oscur gris.

Un supraluna aveni cuando un luna plen o oscur prosimi a se perijeo – se distantia minima de la Tera.

La Luna segue un orbita elise sirca nos planeta. Tal, se distantia promedia varia entre 405 mil cilometres e 363 mil cilometres.

La coaveni entre la du fenomenos causa ce la Luna aspeta plu grande par 7–8%.

Ma la conseta "supraluna" no ave un defini esata en astronomia: lo no relata clar a un momento spesifada en tempo. Donce on pote disputa la raria de se coaveni con otra fenomenos.

La eclis ia comensa a 00:11 de ora universal, cuando la Luna ia entra a la penombra – la parte inisial de la ombra de la Tera – e ia deveni jala. A esata du oras plu tarda, lo ia entra completa a la ombra interna.

La momento de eclis la plu profonda ia aveni a 02:47, cuando la Luna ia es la plu prosima a la sentro de la ombra. A 05:22, la eclis ia fini.

2015-09-27

Xina promete mone a la mundo developante

Xi Jinping, la presidente de Xina, ia promete institui un reserva de $2 mil milion per aida paises developante e per aumenta investis.

Parlante a un confere de la Nasiones Unida sur goles de developa, Xi ia dise ce investis va ateni $12 mil milion en la 15 anios veninte.

El ia dise ance ce Xina va cansela detas de la nasiones la min developada de mundo, incluinte nasiones peti sur isolas. En la sinco anios veninte, Beijing va aida en 600 projetas en paises stranjer e va ofre plu donadas per studia.

A la confere en New York, la xef xines ia dise: "Si on regarda tra la mundo, la pas e la developa resta la du temas major de la eda. Per solve defias global diversa, incluinte la crise resente de refujadas en Europa, la solves fundal es en la xerca de pas e la reali de developa. Frontinte defias e difisiles variosa, nos debe reteni la clave de la developa. Sola la developa pote elimina la causas de la disputas."

Se prometes de aida dona un aumenta grande a un inisia nova de la Nasiones Unida – la Goles Global per Developa Sustable.

Esta program multe aspirante ia es inisiada a la dia presedente, e tota membros statos ia promete se a lo. La projeta intende elimina la povria e la famia ante 2030.

Su la goles presedente de Developa Milenial, la redui global de povria ia es notable par causa de la susedes de Xina en leva tan multe familias de povria.

Ma acel susedes ia es multe isolida e noncoerente. Xina ofre aora aida otra paises – spesial en Africa – a fa la mesma cambias.

La inisia nova sujesta ance ce Xina desira emprende plu de la encargas cual acompania se state como un suprapotia emerjinte.

2015-09-26

La reserva de adirijes vea de rede es vacua en America Norde

America Norde ia consuma se reserva intera de adirijes vea de interede.

A esta semana, la departe cual supravide adirijes en la area ia distribui la bloco final de estas. Lo ia recomenda ce companias en America Norde aselera aora se move a la sistem nova de adirije.

Africa es aora la sola parte de mundo cual dispone ancora cualce blocos de adirijes vea.

La sistem vea, aora nomida IPv4, ia es creada cuando on ia inisia la interede en la desenio de 1970. Lo es capas de distingui asta 4,3 mil milion adirijes diferente, ma la crese enorme de la mundo enlinia ia consuma rapida estas.

La sistem nova, IPv6, es capas de trata un cuantia vasta de adirijes e va es probable nunca consumada. IPv6 es ja disponable de 1999, ma sola aora cuantias grande de companias comensa usa lo.

La move a IPv6 pote es difisil per alga furnores de servis interedal car los debe suporta ambos scemas a la mesma tempo. La nesesa de tradui adirijes entre la du sistemes pote rompe alga servis e introdui retardas iritante.

La organiza AFRINIC, cual distribui adirijes de rede en Africa, ave ancora sirca 2,3 milion adirijes IPv4. La statistica sujesta ce estas va deveni consumada en la temprana de 2019. Adirijes IPv4 ia es ja consumada en otra areas a alga anios ante aora.

La redui de la reserva IPv4 ia inisia un mercato de compra e vende blocos de adirijes no plu usada par companias grande o cluida. La informa ce la reserva es vacua va provoca cisa un aumenta major de custas en acel mercato.

2015-09-25

Deutxland finansia plu se statos per aida refujadas

La governa federal de Deutxland ia promete €4 mil milion ($4,5 mil milion) a se statos areal, duplinte la cuantia esistente de finansia, per aida los a maneja un influe recordo de refujadas.

Berlin ia dise ance ce lo va paia €670 per mense per cada refujada ci on aseta.

Canselor Angela Merkel ia parla pos discutes con 16 governores de stato. El ia dise ce Albania, Cosovo e Montenegro va es declarada como "paises de orijin secur" per redui la flue de persones ci veni de ala a Deutxland.

Sirca un dui de milion migrores – de ci la plu veni de paises gerosa en Asia sude-ueste e Africa norde – ia ariva en Europa en esta anio, esposante divides profonda en la Uni European.

En esta semana, la UE ia acorda relocali sirca 120 mil refujadas tra Europa.

En la discutes ier en Berlin, on ia acorda ce la governa federal va aumenta se aida finansial a statos, de €2 mil milion en esta anio a €4 mil milion en 2016.

Ofisiores ia dise ce la mone va aida casi e cura refujadas joven e nonacompaniada.

Merkel ia promete ance rapidi la prosedes per refujadas en Deutxland, en cuando la pais luta per aseta sentos de miles de arivores nova.

El ia averti ce la crise de migrores ave no solve en la futur prosima, e ce la modo de maneja lo va formi Europa per tempo longa.

Referente a la acorda per relocali refujadas, ci ariva prima xef en Elas o Italia, el ia dise: "Me es profonda convinseda ce lo cual Europa nesesa es no sola relocalis distinguinte, ma un prosede permanente per distribui justa refujadas entre statos membros. Un paso prima es fada, ma nos es ancora a distantia grande de do nos debe es."

Merkel ia dise ce la UE nesesa aida de estra la bloco, solisitante la suporta "de nos asosiores transatlantica, la SUA, e ance Rusia e la statos de la area de Asia sude-ueste."

La flue ia continua sin sesa, e a mercurdi Ungaria ia rejistra un cuantia recordo: 9939 persones ia entra de Corvatsca e 102 de Serbia.

La introdui par Ungaria de leges nova a se frontera con Serbia en la semana pasada ia causa la diverje de miles de migrores a Corvatsca. Esta ia aumenta la tensa entre Serbia e Corvatsca.

Serbia ia proibi la trafica de carga corvatsce, e Corvatsca ia responde par proibi veculos con rejistras serbsce.

Corvatsca ia dise ce reportas no es coreta ce on ia proibi ance sitadanes serbsce individua de entra. Lo ia clari ce sola "un problem con pasaportes" ia aveni.

Ma Serbia ia condena Corvatsca, disente ce se restrinjes de frontera es "comprable sola a los de la governa faxiste en la Gera Mundal Du".

Ungaria ia erije un serca de filo lamosa longo se frontera con Serbia, e construi aora du plu tales longo se fronteras con Corvatsca e Slovenia.

2015-09-24

Rusia desentera la osos de tsar Nicolai

Investigores rusce ia desentera la restas de la tsar final e se sposa, como un parte de reesamina se matas en 1918.

Los ia prende samples de tsar Nicolai 2, se sposa Alecsandra, e de la uniforma sanguida de Alecsandr 2, la avo de Nicolai ci ia es matada en 1881.

La membros de la familia Romanov ia es omisideda par bolxevices revoluiste, e es tombida a un catedral en San Peterburg.

La Eglesa Ortodox desira ce on reesamina la restas per confirma lias a otra relatadas de ci se restas reposa en otra locas.

On ia clui la caso longa de omiside en 1998, pos cuando probas de adn ia confirma la identia de alga restas Romanov trovada en un tomba coletiva en la Montes Ural en 1991.

Nicolai 2, Alecsandra, se cuatro fias (duxesas grande Anastasia, Maria, Olga e Tatiana), se fio Alecsei, e cuatro empleadas de la casa reial ia es omisideda en 1918 en la sutera de un casa en Iecaterinburg.

A un note, seguente atestores, un ecipo de fusilores bolxevic ia alinia los como per un foto de familia, e ia mata los. On ia baioneti los ci no ia mori direta.

La probas adn no ia convinse alga membros de la Eglesa Ortodox Rusce, car la restas de du – Alecsei e Maria – no ia es trovada asta 2007, a un loca diferente en la Urales.

La Comite Investigal, un parte de la governa, dise ce on nesesa esaminas nova per serti la identia de la restas de acel du.

Rusia intende reentera Alecsei e Maria a lado de la otra membros de la familia en la Catedral de Pedro e Paulo en San Peterburg. Ma ante cuando on fa acel, la Eglesa vole deveni serta sur la restas.

La duple reial e tre fias ia es formal reenterada a 17 julio 1998, la aniversario 80 de se mata. La Eglesa Ortodox ia santi los en 2000.

Lo es probable ce Alecsei e Maria va es ance santida ante la aniversario 100 en 2018. A la tempo presente, on conserva se restas a la Arcivos de la Stato Rusce.

La investiga nova envolve ance prende samples de la duxesa grande Elizabeta Fiodorovna, la sore de Alecsandra, ci es tombida en Ieruxalim. La investigores pote asede sola aora acel restas.

La familia Romanov ia es desponeda de pota e escluida en 1917, no longa ante cuando la bolxevices comuniste ia suverti la governa tempora.

On va studia ance documentos de la investiga "Gardores Blanca" sur la omiside en 1918. Estas ia apare en la cuatro anios pasada.

Tsar Alecsandr 2 ia es matada par un bomba lansada par un revoluor de la "Desira Poplal" en 1881, e ia es tombida en se uniforma militar en la catedral.

Un avocato per duxesa grande Maria Vladimirovna, un desendente de la matadas, ia dise ce el suporta la investiga nova.

2015-09-23

"Aniversario felis" no nesesa plu es lisensada

On ia deside ce la compania cual colie paias lisensal per la canta Happy Birthday To You – conoseda tra la mundo como Cumpleaños feliz, Joyeux anniversaire, Tanti auguri a te, Parabéns a Você, Zum Geburtstag viel Glück, e multe otras – no posese un direto valida de autor.

En 1988, la compania Warner/Chappell Music ia oteni la diretos de autor, orijinal rejistrada en 1935 par la compania Summy.

Ma un judor federal en la SUA ia deside ce la diretos orijinal ia es donada sola per ordinas spesifada de la musica, e no per la canta mesma.

La melodia ia es composada par du sores de la stato Kentucky en 1893. Mildred e Patty Hill ia nomi lo Good Morning To All ("Bon matina a tota"), e lo ia evolui plu tarda a la varia popular en selebras de aniversario tra la mundo.

La caso contra Warner/Chappell ia es inisiada en 2013 par Rupa Marya e Robert Siegel, ci prepara un filma sur la canta. La compania ia esije $1500 per permete usa la canta mesma en la filma.

Marya e Siegel ia oposa ce la canta es en la domina publica e no debe incore custas lisensal.

Judor George King ia deside ce Summy ia reseta no diretos de autor en relata con la testo de la canta. El ia esplica: "La sores Hill ia dona a Summy la diretos de la melodia, e la diretos de ordinas per piano fundida sur la melodia, ma nunca cualce diretos de la testo."

La diretos ia es ultima comprada par Warner/Chappell per $25 milion cuando los ia compra un compania desendente de Summy en la desenio de 1980.

Warner/Chappell ia gania sirca $2 milion per anio, de la paias lisensal fada sempre cuando on ia usa la canta en un filma, un episodio televisada, un anunsia comersial, o un otra presenta publica.

Pos la revela de la deside, la compania ia dise: "Nos regarda la opina longa de la corte e considera nos posibles."

2015-09-22

Pacistan pospone la pende de un om descapasida

En Pacistan, on ia pospone la pende intendeda de un prisonida paraplejica.

En comanda la puni, un judor ia dise ce Abdul Basit no pote es pendeda seguente la manual prisonal, car el es en un seja rolante. La regulas de prison en Pacistan esije ce un prisonida sta sur la pendador.

Organizas per diretos dise ce la pende de un person descapasida ta es un condui cruel e degradante, e ce un risca esiste ce la pende va malfunsiona.

Abdul Basit, ci ave 43 anios, es paraliseda su se taie e usa un seja rolante pos deveni malada en prison.

Pacistan ia reintrodui la puni de mori en desembre 2014 e ia pende 239 persones pos alora.

A acel tempo, la governa ia descrive lo como un medio per combate terorisme, pos cuando la taliban ia masacra plu ca 150 persones, xef enfantes, en un scola en Peshawar.

On ia condena Basit de omiside a ses anios ante aora, e ia intende pende el en Lahor en la mense pasada, ma acel ia es posponeda.

Un corte ia comanda alora ce la autoriosas de prison fa la pende an tal, an cuando se apela per pardona, rejistrada a 22 julio, es ancora no tratada.

Ambos la Corte Suprema e la Corte Alta de Lahor ia dona se acorda sur la esecuta.

Lo no es clar esce cualce limita de tempo aplica a la pospone la plu resente.

Campaniores dise ce lo es posible ce la pende va malfunsiona e fini par dana la dinia de la prisonida, cual es protejeda par leges pacistani.

2015-09-21

La pape encontra Castro

Pape Fransisco ia encontra Fidel Castro, la presidente pasada de Cuba, pos fa un misa ante desuples de miles de persones en Havana.

La du omes ia discute consernas de mundo e relijio en lo cual la Vatican ia descrive como un encontra "nonformal e amin".

Ante la encontra, la pape ia dise un sermon en cual el ia recomenda ce cubanes servi la un la otra en loca de ideolojia.

Esta es la visita prima par la pape a la isola comuniste governada, en un viaja cual va trae el a la SUA. Ambos se predesores, pape Joan Paulo 2 e Benedito 16, ia visita la isola en se papias.

Castro e la pape ia intercambia libros: la pape ia dona tre, incluinte un libro de sermones par un ensenior pasada de Castro, e ia reseta Fidel e Relijio, un colie de intervisas con un prete brasilera.

Plu temprana en la dia, miles de persones ia vade a la Plaza de Revolui per escuta la pape.

Securiores ia aresta a la min tre persones ci ia cria e atenta distribui folias avisante a borda de la plaza a la comensa de la misa.

2015-09-20

Nepal adota un constitui nova

Nepal va adota formal se constitui nova, preparada pos anios de disputas political.

Su la constitui nova, la nasion en la Montes Himalaia va es un republica secular e federal con sete statos.

An tal, alga grupos oposa lo, preferente ce Nepal es un nasion indu. Minorias etnical teme ance ce lo va crea prejudis.

Protestas organizada par la tarus e madesis (du grupos etnical) en la sude ia disturba partes de la pais tra alga semanas. A la min 40 persones ia es matada en la disturbas.

La autoriosas ia enforsa proibis de sorti e ia envia soldatos, ma la protestas ia retarda la transporta stradal a la capital, Kathmandu.

Un portavose per Sushil Koirala, la ministro xef, ia dise: "La constitui cual on va proclama es la resulta de multe anios de luta par la popla nepali. Lo dirije se a la aspiras e esijes de tota partes de la sosia nepali en un manera incluinte e representante."

Un constitui nova ia esijeda par rebelores maoiste, de ci se gera interna de 10 anios ia fini con un acorda de pas en 2006.

En 2008, la maoistes ia es elejeda a un asembla composante, e ia causa tal la aboli de la monarcia de 240 anios. Ma entre se disputas, la asembla no ia susede prepara un constitui nova.

Nepal ave 28 milion abitores. Lo recovre ancora de un trematera sever en april cual ia mata miles.

2015-09-19

On puni Volkswagen per asconde niveles de contamina

En la SUA, regulores ia comanda ce Volkswagen retira un dui de milion autos cual conteni un aparato per desembla niveles de contamina airal.

La "aparato vinsente" permete ce autos susede en probas siensal an si los emete vera la cuatrodesuple de la cuantia permeteda de sustantias contaminante.

La Departe de Proteje Ambiental ia adota un disposa plu atacante contra contamina par autos e contra violes de la Ata per Aira Limpa de la pais.

La retira pote custa asta 18 mil milion dolares a la compania fabricante de autos. Lo afeta Jettas, Beetles, Audi A3s e Golfes de entre 2009 e 2014, e ance Passates de pos 2014.

Un portavose per la Ofisia de Enforsa e Serti de Obedi ia comenta: "La usa de un aparato vinsente en autos per evade normas de aira limpa es nonlegal e lo menasa la sania publica."

La sistem nonlegal ia permete ce autos deteta cuando los esperia un proba de emetes, e ia basi la cuantia de contaminantes emeteda. Esta ia es alora descomutada en la usa comun.

La stato California cual ia aida la investiga ia envia ance un avisa de viole a Volkswagen.

En 2014, la Departe de Proteje Ambiental ia multa du fabricores de autos corean (Hyundai e Kia) per malrepresenta la consuma de carburante en 1,2 milion de se autos. Acel multa es la plu alta asta aora.

2015-09-18

Un camion esplodente mata pllu ca 170 en Sudan Sude

A la min 176 persones ia es matada pos cuando un tancador de petrolio ia esplode en Sudan Sude, ofisiores dise.

La camion ia diverje ja de la via en Maridi, en la stato Ecuatoria Ueste, e abitores ia es sifoninte la carburante cuando la veculo ia esplode.

On reporta ce 50 persones ia es ferida. La cuantia vera de feridas es probable plu grande, car multe ia fuji pos la aveni.

Ospitales local es inondada e ofisiores nasional ia solisita aida de la Crus Roja e la Nasiones Unida. Dotores e empleadas medical vola a la loca de tra la pais per aida con la situa urjente.

La tancador ia viaja tra sirca 250 cilometres de la capital Juba e ia es prosiminte a Maridi cuando lo ia sorti de la via e ia cade.

En cuando la camionor ia pasea a la vila la plu prosima per es aidada, abitores local ia asembla a la camion per colie alga de se gasolina.

La causa de la esplode es ancora nonclar.

Un dotor local, Chandi Savior, ia dise a Radio Tamazuj ce on ave un manca de furnis fundal como osijen e paradoles. El ia descrive ce multe persones ia ariva scaldada e ce on "no es vera capas de calmi esta dole".

Sudan Sude ia deveni un pais autonom en 2011, pos un acorda de pas con Sudan cual ia fini la gera interna la plu longa de istoria african.

Ma la pais es entre la plu povres de Africa, e plu ca 2,2 milion persones ia es obligada a fuji de se casas par un gera entre soldatos governal e rebelores.

On ia suscrive esitosa un acorda de pas internasional arbitrada, ma la sesafusili es ja iniorada.

2015-09-17

Ungaria usa gas lacrimojen contra refujadas

Ban Ki-moon, la secretor jeneral de la Nasiones Unida, ia dise ce el es "xocada" pos cuando la polisia ungarian ia xuta gas lacrimojen e canones de acua per forsa migrores a retira se de la frontera.

El ia dise ce un tal trata de refujadas es "nonasetable".

Ier, sentos de migrores ia es envolveda en la scaramuxas a la frontera entre Ungaria e Serbia, en atenta rompe un serca de filo lamosa. Multe de los vole ateni Deutxland, ma la Uni European es divideda sur la manera de maneja la crise.

Ungaria ia defende se atas, reportante ce 20 polisiores ia es ferida cuando refujadas ia atenta rompe un porteta, e un portavose ia acusa migrores de usa enfantes como "scermos umana". A la min du migrores ia es ance ferida.

Ungaria ia clui se frontera intera con Serbia a martedi, pos deslegali ce on entra a la pais o dana la serca fronteral. La cortes de la paises ia comensa ja prosede rapida migrores arestada.

Plu ca 200 000 ia traversa ja a en Ungaria per entra a la zona Schengen, cual permete normal ce on viaja entre paises membros sin restrinje.

Multe vade aora a la frontera corvatsce, do jornalistes ia reporta ce alga miles ia entra ja a la pais.

Ranko Ostojic, la ministro de internas, ia dise ce la polisia controla presente la situa, ma si refujadas continua ariva en cuantias grande, la autoriosas va debe considera un disposa diferente.

Ier, ofisiores ia dise ce Corvatsca va permete ce migrores viaja a Europa norde.

Ance ier, un sena caososa ia aveni prosima a la vila Horgoš en Ungaria, con focos ardente, ambulansias e veculos de polisia arivante a la lado serbsce de la frontera, e linias densa de polisiores a la otra lado.

Alga refujadas ia lansa misiles, incluinte petras e botelas de acua. La xuta de gas lacrimojen e canones de acua ia panica la migrores, puxante los a via de la frontera.

Alga persones, sufrinte la efetos de gas lacrimojen, ia es tratada par la servi ambulansial serbsce.

Amir Hassan de Irac ia comenta: "Nos ia fuji de geras e violentia, e no ia previde un tal savajia e trata noncompatiosa en Europa."

Serbia ia dise ce lo va envia plu polisiores a se frontera con Ungaria.

António Guterres, la comisionor alta de la NU per refujadas, ia recomenda forte ce la autoriosas ungarian serti "un asede nonimpedida" per los ci fuji de geras e persegue.

En un declara, el ia dise ce se departe "ia es spesial xocada e tristida par vide refujadas suri, incluinte familias con enfantes ci ia sufri ja tan multe, prevenida de entra a la UE con canones de acua e gas lacrimojen".

Seguente la organiza carital Save the Children, un de la motivas xef cual atrae suris a Europa es la posible de trova un vive e instrui plu bon per se enfantes. Lo reporta ce plu ca du milion enfantes en Suria no pote vade a scola.

2015-09-16

Migrores proba un via nova tra Corvatsca

La grupo prima de migrores ia ariva a la frontera de Serbia e Corvatsca, xercante un via nova per entra a la Uni European.

Buses ia porta la migrores a la vila Šid, pos cuando Ungaria ia clui se frontera con Serbia, trapinte miles de persones ci ia atenta ateni Deutxland.

Corvatsca ia dise ce lo "no va permete ce persones traversa", e ce la migrores va es parada e reenviada cuando los ateni la fronteras slovensce e ungarian, an tal.

Restrinjes nova de frontera e un disputa sur asinia migrores ia revela divides amarga en Europa sur la crise.

Sentos de migrores trapida ia pasa la note su la sielo o en tendas tempora, prosima a la frontera serbsce con Ungaria. Alga ia colie lenio per focos.

Ier, Ungaria ia ativi leges nova. La polisia ia clui un traverseria de ferovia cual desuples de miles de migrores ia usa ja per entra a la zona Schengen sin fronteras.

On ave un state de crise, con sentos de soldatos e polisiores posada.

A medianote, Austria ia deveni la pais la plu resente cual ia introdui regulas plu sever de frontera. Los pertine a la frontera con Ungaria ma ta pote es estendeda.

Ma Austrai ia insiste ce on va reenvia a Ungaria nun ci fuji de persegue.

La polisia austrian ia dise ce la du stasiones xef de la capital, Wien, es estrema plen de migrores e ce lo es posible ce la stasion xef en Salzburg va debe clui.

La Uni European, un bloco de 28 membros, fronti un influe vasta de migrores, de ci multe fuji de gera e povria en paises incluinte Suria, do un gera interna es bataliada de 2011.

La departe fronteral de la UE dise ce plu ca 500 mil migrores ia ariva a la fronteras de la Uni en esta anio, comparable con 280 mil en 2014.

La grupo de sirca 40 migrores ia ariva a Šid, un vila fronteral serbsce, en la temprana de oji. Los ia viaja par bus de Preševo, un vila serbsce prosima a la frontera macedonsce en la sude.

Ungaria ia dise ance ce lo considera estende se serca asta la frontera con Romania. Romania ia dise ce esta ta viole la "spirito european" de colabora.

2015-09-15

Tsipras rejeta un alia con se oposor

En Elas, la gidor de la partito sinistra, Alexis Tsipras, ia deside contra formi un alia con se oposor xef si el vinse en un vota cual ia aveni ier.

Parlante en un debate con Vangelis Meimarakis, la gidor de Democratia Nova, un partito sentral destriste, Tsipras ia dise ce un tal governa aliada ta es "nonatural".

Sondas sujesta ce no la un no la otra va gania probable un majoria parlamental.

Tsipras ia anunsia la eleje subita pos reali un projeta de salva finansial con la Uni European en la mense pasada.

En la debate, ospitada par la difusor nasional ERT, Meimarakis ia dise ce elinicas desira la stablia cual sola un alia grande pote ofre. "Nos pote ave un ecipo nasional no sola per governa la pais, ma ance un ecipo nasional de negosia finansial," el ia dise.

Ma Tsipras ia responde ce "diferes fundal" esiste entre la du, tal ce un governa aliada no ta es posible.

On ia presenta la debate como un modo posible de gania votores ci ancora no ia fa se deside. Seguente un sonda resente, ambos partitos ia reseta 31,6% de la votas.

Un debate prima ia inclui sinco otra partitos, ma esta nova ia permete ce la du omes fa demandas la un a la otra e comenta sur la respondes.

Plu temprana en esta anio, Tsipras ia deveni la ministro xef con promete de fini la medios finansial sever. Ma en loca, el ia es obligada a aseta un projeta de salva cual ia inclui plu reduis de spende.

El ia dise ce el vole continua batalia contra povria e froda, ma Meimarakis ia acusa el de ruina la economia.

2015-09-14

Turistes mexican es matada par soldatos egipsian

Fortes de securia en Egipte ia mata 12 persones par era, incluinte turistes mexican, en un opera antiterorisme.

La turistes ia viaja en cuatro veculos cual ia entra a un zona restrinjeda en la area Wahat de la Deserto Ueste.

Des mexicanes e egipsianes ia es ance ferida. On trata los en un ospital local.

La ministreria de internas dise ce lo ia formi un ecipo per investiga la aveni.

Enrique Peña Nieto, la presidente de Mexico, ia condena la aveni, disente ce el "ia esije un investiga completa par la governa egipsian".

La ministreria mexican de esternas ia confirma ce a la min du de persones mexican ia es matada, e ia dise ce lo labora per confirma la identias de la otra vitimes.

2015-09-13

Premios a la festa sinematografial de Venezia

Un filma venezuelan, locada entre la caos e violentia de la capital Caracas, ia gania la Leon de Oro, la premio xef a la festa sinematografial de Venezia.

En Desde allá (De Ala), la dirijor Lorenzo Vigas nara sur un om rica ci deveni sesal envolveda con un om joven de un de la ganges de la site.

Venezuela esperia un crise economial sever, cual ia provoca menses de protestas sur strada en la anio pasada a la manca de multe benes. A jovedi, Leopoldo López, un gidor major oposante, ia es condenada a 13 anios e 9 menses en prison per tisa violentia en acel protestas.

Vigas ia dise ce filmas debe aida la paises latina a "aprende de la eras de la pasada".

Entretempo, La clan, un triler arjentina de crimin dirijeda par Pablo Trapero, ia gania la Leon de Arjento per la dirijor la plu bon.

La filma, cual ia es estrema susedosa en Arjentina, presenta la raconta vera de un familia comun de Buenos Aires ci ia saisi persones rica per rescate e ia asconde los en se casa ante mata los.

La dirijor mexican Alfonso Cuarón ia es la presidente de la juria de la festa sinematografial de Venezia en esta anio. El ia dise ce el ia es plaseda ce un filma latina ia gania la premio xef, ma ia dise ce lo es "mera un coaveni" ce la juria ia es gidada par un mexican.

La premio sucampion de Juria Grande ia es donada a Anomalisa, un fantasia comedial SUA cual ia es dirijeda par Duke Johnson e Charlie Kaufman.

Fabrice Luchini, ci ia jua la rol de un judor en la filma La ermino par Christian Vincent, ia reseta la premio per la ator la plu bon.

2015-09-12

Un gru colasa en Mecca

Arabia Saudi ia comensa un investiga pos la colasa ier de un gru en la site santa muslim Mecca, matante a la min 107 persones e ferinte a la min 230 otras.

La gru roja e enorme ia cade sur un parte de la Mascita Grande, cual ia es plen de adorores a acel tempo. On no sabe serta cuanto vitimes ia es matada par la colasa e cuanto par la panica seguente.

Criticas crese aora sur la nivel de securia a la site santa, cual prepara se per la hadj, la peregrina anial muslim. On previde ce, plu tarda en esta mense, miles de persones va ariva de tra la mundo.

La xef de la departe de defende sivil de Arabia Saudia ia dise ce la gru ia colasa par causa de ventas e pluves forte. Corta ante la cade, la site ia es colpada par un cuantia noncomun alta de pluve e par ventas de asta 83 cilometres per ora.

Videos postada a la rede mostra la momento cuando la strutur ia colasa, con un pum forte segueda par un panica con crias. Corpos e sangue ia es vidable sur la solo de la mascita.

On investiga per evalua la dana e la grado de securia de la loca.

La Mascita Grande es presente ensircada par des-sinco grus grande cual fa laboras major de redevelopa. A la tempo de la asidente, sirca 800 mil persones ia es en la area.

La hadj va comensa pos sirca 10 dias, e Mecca prepara se per bonveni sirca du milion muslimes de la mundo intera. Islam esije ce cada muslim peregrina a la site santa a minima un ves en se vive, si el es capas de fa lo.

En la anio pasada, on ia comensa un labora major a la loca santa per grandi la area de la mascita par 400 mil metres cuadrida, afin lo pote conteni asta 2,2 milion persones a la mesma tempo.

Plu ca tre milion persones ia emprende la peregrina a Mecca en 2012. De 2013, la autoriosas saudi ia limita la cuantia de partisipores, car cuantias grande de peregrinores ia causa plu ca un trajedia en anios pasada.

2015-09-11

Multe curdis turces mori en violentia en Cizre

La ministreria interna de Turcia dise ce a la min 30 persones ia mori en scaramuxas en la site Cizre pos la comensa de un opera militar ala en la semana pasada.

La plu de la mores ia es ativistes curdi, ma la Partito Democrata de la Popla, cual es procurdi, dise ce 20 siviles ia es matada en la violentia.

Abitores local dise ce la site es aora "asejada" pos cuando la militaria ia defini un proibi de move.

Ier, la polisia ia para un delega de gidores de la Partitio Democrata ci ia atenta ateni la site sude-este par pede.

La grupo inclui la gidor de la partito Selahattin Demirtaş e 30 membros de parlamento ci dise ce los vole atrae atende a lo cual aveni en la area xef curdi.

Los ia es intersepida par polisiores prosima a İdil, a 28 cilometres de Cizre.

Combates matante entre fortes turces e PKK, la organiza de combatosas curdi, ia intensi pos la colasa de un sesafusili en julio.

Jetos turces ia bombi bases de PKK en Irac norde, e la armada ia aumenta securia e proibi moves tra la sude-este.

Demirtaş ia dise ce la situa umaniste en Cizre mali: on no pote compra pan o asede acua.

La corpo de un xico de 10 anios ci ia es matada en la violentia es tenida en un friador par membros de se familia, car, par causa de la restrinjes, los no pote prende el a la moreria.

Fortes de securia turces no ia aseja sola la site ma opera ance a interna de lo, blocinte la asedes entre visinerias diversa.

Un atestor ia descrive vide un fola portante un xico ferida de 14 anios a un loca do on ia espera ce un ambulansia va prende el.

Selami Altınok, la ministro de internas, ia dise ce la proibi de moves va continua asta la completi de la opera militar, e ce on no ia permete ce la delega de la Partito Democrata entra a Cizre par causa de consernas de securia.

Ma Saruhan Oluç, un de la legores de la Partito Democrata ci atenta asede la site, ia comenta ce tal declaras es sin funda.

"Nos no crede ce nos es menasada par la popla de la site," el ia dise. "La sola menasa ante nos es par la soldatos ci impedi nos via e no permete ce nos entra."

2015-09-10

Japan esperia inondas sever

En Japan norde-este, inondas e liscas de tera ia forsa plu ca 90 mil persones a abandona se casas.

La site Joso, a norde de la capital, Tokyo, ia es colpada par un mur de acua pos un supraflue de la rio Kinugawa. Ecipos de salva en elicotores ia leva persones de la tetos.

On ia reporta ce un person en la area ia desapare, e a la min 12 persones es ferida.

La pluves ia aveni a la dia pos cuando la siclon Etau ia trae ventas de asta 125 cilometres per ora a la provinse Aichi.

La areas la plu colpada es la provinses Ibaraki e Tochigi. La departe meteorolojial de Japan ia dona un averti de peril la plu sever a ambos areas.

Autos e casas intera ia es portada a via par la deluvia cuando la rio Kinugawa ia supraflue pos du dias de pluve forte.

En Tochigi, plu ca 500 milimetres de pluve ia cade en 24 oras en alga locas: sirca la duple de la cuantia cual cade ala tra tota de un setembre normal.

Partes de Tochigi ia reseta cuasi 60 sentimetres de pluve pos la sera de lundi, creante un recordo nova.

On ia dona avertis climal a multe otra areas de Japan este e norde-este, incluinte la provinse Fukushima cual conteni la compleso nucleal ancora danada cual ia es colpada par la trematera e tsunami de 2011.

La deluvia ia inonda la pompas de drena a la compleso. On teni ala cuantias enorme de acua per fri la reatadores rompeda.

Tra Japan, 15 persones ia es ferida par la clima. Du ia es femes vea ci ia es grave ferida pos es cadeda par ventas forte.

Alga areas ia esperia rompes de eletrica e disturbas a transporta: multe servis de avion e tren ia es canselada o posponeda, e on ia clui ance alga stradas.

La ministro xef, Shinzo Abe, ia dise: "La governa va sta unida e fa la plu bon cual lo pote per maneja la desastre, par trata vives umana como la cosa la plu importante."

2015-09-09

Un avion ensende en Las Vegas

Un avion con destina de London ia ensende a la airoporto de Las Vegas, obligante la sorti de 172 persones par toboganes de crise.

A la min 13 persones ia es prendeda a ospital con feris minor, de cual la plu ia es sufrida en lisca longo la toboganes inflable.

Un portavose per la Dirije Federal SUA de Avioni ia dise ce la motor sinistra de la Boeing 777-200 ia ensende ante la enaira. On ia vide la avion a media de flamas e fuma. La focon ia es estinguida a pos.

La avion 2276 de British Airways ia intende vola a la airoporto Gatwick en London. Lo ia conteni 159 pasajores e 13 ecipores.

Jacob Steinberg, un jornaliste entre la pasajores, ia tuita: "Dorminte per la enaira de la avion. Veni a un para xocante. Odor de fuma. Inisial on recomenda resta sentante, alora cria per sorti."

El ia ajunta plu tarda: "Me ia pote ole e vide fuma ma ia es a otra lado de avion. Algun ia dise ce la focon ia fonde du fenetras."

Alga de la persones en la avion ia vide fuma en la cabana cuando on ia abri un sorti e ia declara direta ce lo es nonsecur.

Un atestor espetante en la construida ia vide "esplodes de flamas veninte de la media de la avion".

On investiga aora la focon pos lo cual ia es clar un evita fortunosa. Ofisiores ia dise ce los ia clui un de la atererias, ma ce tre otras continua opera.

La airoporto McCarran es un major en la SUA. Lo ia maneja plu ca 40 milion pasajores en la anio pasada.

2015-09-08

Un manca de contravenena per mordes de serpente

La mundo ia consuma cuasi tota se reservas de un de la remedias la plu bon contra mordes par serpente, riscante desuples de miles de vives.

La organiza Médicins Sans Frontières (Medicistes Sin Fronteras) dise ce on nesesa forte ave eservas nova de Fav-Afrique, cual neutri des mordes diversa cual pote aveni en Africa susaharan.

La reserva final va desvalidi en junio 2016, ma no sustitua comparable esiste. Alternativas es disponable, ma MSF dise ce los no opera tan bon.

Fav-Afrique es la sola contravenena cual ia mostra se como secur e capas de trata venenis de spesies variosa de serpentes tra Africa susaharan.

La compania Sanofi Pasteur, cual ia produi lo, dise ce la mercato ia deveni tro custosa. Ma lo va comparti la reseta con otras. Sanofi ia para produi la sero en la anio pasada e ia cambia se ativia a produi un remedia de rabia en loca.

On crede ce lo negosia afin un otra compania produi Fav-Afrique, ma on no previde ce esta discutes va conclui ante la tarda de 2016. Per esta razona, un produida sustitua no va apare en la mercato asta la pasa de du plu anios.

MSF dise ce la manca de un contravenena jeneral, secur e capas en acel periodo va causa moris ultra conta.

Polly Markandya de la organiza ia esplica: "La plu de persones ci es mordeda par un serpente no sabe esata la spesie de serpente, e donce lo es vera importante ce on ave un contravenena cual susede contra un diversia de spesies diferente. Nos es ansiosa ce sin dispone acel contravenena, persones va mori nonesesada."

Alain Bernal, un portavose de Sanofi Pasteur, ia dise ce la compania ia ofre move la tecnolojia de contravenena a otras, ajuntante: "No cosa ia reali asta aora."

La Organiza Mundal de Sania dise ce mordes par serpente es un tema iniorada cual nesesa plu atendes e investis.

On estima ce, en cada anio, serpentes morde sinco milion persones, de ci 100 000 mori e 400 000 deveni permanente descapasida o malformida.

Mera en Africa susaharan, 30 000 persones mori par esta causa en cada anio, e sirca 8 000 sufri amputas.

2015-09-07

Lampo en Barat mata plu ca 30 persones

A la min 32 persones ia mori pos colpas de lampo en Barat.

Dudes-tre ia mori en sete distritos de la stato Andhra Pradesh, e nove ia es matada en Orissa, un stato este.

La plu de los ci ia mori ia es laborante sur cultiverias en pluve deluviante ier.

Colpas de lampo aveni comun en Barat en pluves forte de monson.

A la min ses femes ia es entre la mores.

Du ecipos de cricetores fema ia evita apena cuando lampo ia colpa un palma prosima a la campo do los ia jua un max en la distrito Guntur. On ia abandona la jua a pos.

Un ofisior major de criceta ia comenta: "Lo ia es un evita miraclosa per nos juores e ance per la empleadas."

En Orissa, nove persones ia es matada, e a la min oto ia es ferida, en colpas separada de lampo.

Barat reseta 80% de se pluve anial en la saison monsonal, cual estende entre junio e setembre.

2015-09-06

Japan reabri un vila prosima a Fukushima

Japan invita abitores a reveni a un vila vacuida en 2011 pos la desastre a la compleso nucleal de Fukushima.

Naraha es la vila prima cual permete persones a reveni permanente, seguente alga anios de labora descontaminante.

Ma multe dise ce los no es preparada per reveni, e sola un cuantia peti de persones ia reveni per reposas corta de pos la comensa de un periodo esperimental en april.

La compleso Fukushima Daiichi ia sufri un serie de fondes nucleal pos un teratrema e tsunami enorme. A pos, tota la 7400 abitores de Naraha ia move a via.

On regarda la vila, a sirca 20 cilometres a sude de la compleso nucleal, como un caso probante per la reveni de abitores. Sirca sento mil persones en la area ancora no pote revade a se casas.

Autoriosas en Naraha furni aparatos con cual persones pote mesura la grado de radia, e reconstrui ja servis local, incluinte botecas e clinicas.

Yukiei Matsumoto, la maior de Naraha, ia descrive la cansela de la comanda de vacui como "sola un comensa", ajuntante: "La orolojo cual on ia para ia comensa aora tictaca."

Abitores pasada ia vijila per onora la renase de la vila. Ma seguente un sonda resente, no plu ca 46% de abitores ia dise ce los espera reveni.

Un de la teratremas la plu potiosa rejistrada de istoria ia colpa prosima a la costa de Japan en marto 2011, inisiante un tsunami vasta. Cuasi 16 mil persones ia mori, e plu ca 2500 es ancora listada como asente.

An tal, on ia lia zero de la moris a la desastre nucleal, an si alga persones ia mori en la sorti cual ia segue lo.

2015-09-05

Kentucky lisensa sposis ge pos prisoni un notario

En la SUA, un contia en la stato Kentucky ia comensa dona lisensas de sposi a duples ge, pos cuando on ia prisoni la notario per refusa fa esta.

Kim Davis, un ofisior elejeda en Rowan County, ia dise ce la deside par la Corte Suprema desacorda con se credes como un cristian renaseda.

Alga de se suordinadas ia comensa trata la lisensas a venerdi, furninte un a un duple a ci on ia nega lo a ante.

La Corte Suprema de la SUA ia declara ce la sposi ge es legal en junio.

A jovedi, Davis ia rejeta la posible de es librida de prison cuando el ia refusa la demanda par un judor ce el permete ce se suordinadas dona lisensas. El pote resta en prison per asta un semana.

Sinco notarios suordinada ia informa plu tarda la judor ce los va obedi la comanda de la corte, e ia comensa dona lisensas a la matina de ier. Ma la fio de Davis, ci es la notario suordinada ses, ia refusa.

La duple prima ci ia emerji de la ofisia de contia con un lisensa de sposi ge ia es William Smith Jr e James Yates. Esta ia es la ves ses a cual los ia atenta oteni un lisensa. Duples de suportores ia canta "la ama ia vinse" cuando los ia sorti de la construida.

Ma un disputa esiste sur esce la lisensas es valida, car los no es suscriveda par la notario elejeda. Avocatos per la duples crede ce los es valida, ma la avocato de Davis ia dise ce los ave "an no la valua de la paper sur cual los es scriveda".

Entretempo, la sposo de Davis, ci ia es estra la corte ier, ia dise ce se sposa no va resinia ma va resta en prison "per tan longa como nesesada".

Joe Davis ia dise ce se sposa es en bon umor pos se note prima en prison.

El ia para dona lisensas de sposi a tota duples en junio, en loca de segue la deside par la Corte Suprema de la SUA per legali sposis ge tra la pais. El ia envia duples a via a multe veses.

A lundi, la Corte Suprema ia rejeta la razona ce se crede preveni el de esecuta se debes.

Car el es un ofisior elejeda, on pote despone el de se posto sola si la legeria de Kentucky acusa el.

Aspirores presidental republiciste diversa ia declara se suporta per la disposa de Davis, incluinte Mike Huckabee e Ted Cruz. Huckabee ia dise ier ce el intende encontra la notario prisonida e organiza un asembla publica suportante el.

Otra aspirores, como Lindsey Graham e John Kasich ia dise ce la notario debe fa se taxe e segue la lege.

2015-09-04

On ia repara la danas a la santeria tai bombida

Artistes en Bangkok ia repara danas causada a la sculta a la Santeria Erawan par un ataca matante de bomba en agosto.

La ojeto sentral de la santeria es un sculta de la dio indu Brahma con cuatro fases. Lo ia es danada en 12 locas a la min, la plu evidente a la mento de un de la fases.

La santeria es ance regardada como santa par budistes tai, e lo atrae multe visitores stranjer.

Adorores e soldatos tai ia es presente a la desveli de la sculta reparada ier.

La reparas ia es esecutada par la departe de artes bela de la ministreria cultural.

A la rituo de desveli, Vira Rojpojchanarat, la ministro de cultur, ia dise ce la sculta va aida "crea fida e leva la bonstate de la popla e turistes en Tai".

Persones ia continua visita la santeria de cuando lo ia reabri a un tempo corta pos la esplode de bomba a 17 agosto.

On teni du persones en relata con la esplode. Ambos es stranjer. On ia comanda ance la aresta de alga persones. Ma no individua o grupo ia declara ja se como culpable.

2015-09-03

Budapest reabri se stasion xef pos un crise de migrores

La stasion xef de ferovia en Budapest, la capital de Ungaria, ia abri se portes a sentos de migrores pos un nonprogresa de du dias.

Un fola de persones ia asende la grados en dirije a la plataformas pos la abri de la portes, ma un anunsia publica ia dise ce trenes internasional a Europa ueste es suspendeda per la futur previdable.

Esta ia aveni cuando Viktor Orbán, la ministro xef e antimigror de Ungaria, ia es espetada en Bruxelles per discute la crise.

La migrores trapida a la stasion Keleti ia es prevenida de embarca trenes a martedi e mercurdi. Alga ia es envolveda en scaramuxas con polisiores.

Los ia compra biletas pos cuando Ungaria ia pare abandona per tempo corta se atentas de rejistra migrores, permetente ce un cuantia grande de los embarca trenes a Wien e Deutxland sude.

Lo no ia es direta clar esce on va permete ce los embarca trenes local oji.

La cuantia de migrores ci entra e Europa ia ateni un nivel recordo, con 107 500 arivores sola en julio. Deutxland previde aseta sirca 800 mil migrores en esta anio – la cuatruple de la soma en 2014.

La aumenta de la cuantia ia crea tensas e desacordas sur la politica de migra en la Uni European. Ier, Deutxland, Italia e Frans ia recomenda "un distribui justa" de refujadas tra la UE intera, ma David Cameron, la ministro xef de la Rena Unida, ia dise ce la aseta de "sempre plu" refujadas no va solve la problem.

Italia e Elas ia cexa ce los es inondada par la cuantia de persones ci ariva a se costas. E an si paises como Deutxland es preparada per aseta cuantias grande de refujadas, otras no es.

Ministros de internas e de justia de la UE va consenta en Bruxelles a 14 setembre per dirije se a la crise.

La custa umana de la crise ia deveni clar ier, cuando sinco enfantes ia es entre 12 migrores ci ia afoca en acuas turces en atenta ateni Elas. Imajes de la corpo encaliada de un enfante de tre anios, ci ia mori a lado de se madre e frate de sinco anios, ia sirculi vasta en redes sosial.

2015-09-02

Google revela un logo nova

Google ia desveli un logo nova per se servis sentral de xerca. La cambia lisi alga de la cualias de la leteras de se nom cual composa la insinia colorosa e bon conoseda.

La compania ia dise ce la cambia es nesesada car on usa aora la servis en multe aparatos portable, no sola en computadores de table.

La cambia segue pos cuando Google ia pone se multe divides su un supracompania nomida Alphabet.

Lo ia dise ce la logo, e se multe varias, va vade plu bon en la scermos de grandias diversa tra cual persones usa o encontra oji Google e se servis. En ajunta a la insinia plen de la nom de la compania, lo intende ance representa se con cuatro puntos en se colores identifiante (azul, roja, jala, e verde) e con un G major de esta colores.

Google ia anunsia la cambia en se blog ofisial, e ia ilustra lo cual es nova con un serie de imajes animada. Lo ia descrive la logo nova como "simple, nonfolida, colorosa, amin" e ce lo representa la cualias la plu bon de la compania.

Lo ia furni ance un esplica plu detaliosa de la razonas per cambia la insinia. Un defia major per la desiniores, lo ia dise, ia es la refina de "lo cual fa ce nos es Google-in".

La plu resente, Google ia refresci se logo en setembre 2013.

Un comentor ia dise ce la cambia es importante car, ante aora, Google ia resiste fa simil a otra companias informatical, de cual multe ia adota un aspeta plu simple e frecuente plu blanda en refresci se insinias ofisial.

2015-09-01

On identifia un enfante arjentina furada en 1978

Campaniores en Arjentina ia identifia un plu enfante furada de prisonidas political sinistriste en la rena militar entre 1976 e 1983.

La grupo Avas de la Plaza de Maio dise ce esaminas de ADN confirma ce la fem, aora en se desenio cuatro, es la fia de ativistes comuniste saisida en 1977.

Se madre ia pari el en prison, e ambos se jenitores biolojial ia es nunca revideda.

La organiza dise ce plu ca 400 otras resta ancora per trova.

Grupos de diretos umana dise ce la saisi de bebes ia es un parte de un scema sistemosa par la governa. La intende ia es dona la enfantes de persones regardada par la governa como rebelores a familias militar e aliadas, per evita eleva un plu jenera de – en la opina de la renores militar – estremistes sinistriste.

En esta caso, la fem es la enfante de Walter Dominguez e Gladys Castro, ci ia abita en Mendoza, un site norde. Ambos ia es membros de la partito comuniste-marxiste-leniniste de Arjentina.

Los ia es arestada en se casa e prendeda a via par persones sur ci la visinas ia crede ce los es polisiores.

Gladys Castro ia es ensinta de ses menses a la tempo de se saisi. El ia pari en 1978.

La Avas de la Plaza de Maio ia es fundida en 1977 con gol de trova tal enfantes furada e nonlegal adotada.