2015-11-30

La pape visita un mascita en Bangui

Pape Fransisco visita un mascita en la capital de la Republica de Africa Sentral (RAS), en lo cual on regarda como la parte la plu difisil de se turi de Africa.

El encontra muslimes ci ia xerca refuja en Bangui pos cuasi tre anios de violentia entre cristianes e muslimes. La plu de muslimes ia parti de la capital, ma 15 mil resta en un area nomida PK5 cual es ensircada par un militia cristian enarmada.

La pape va conclui se visita a Africa con un misa final en Bangui.

A soldi, el ia recomenda ce la partitos bataliante en la RAS pone se armas a lado. Selebrante la misa en Bangui, el ia dise ce los debe enarma se "con justia, ama, pardona, e pas vera" en loca.

Plu temprana, la pape ia dise ce el espera ce la vota en la mense veninte en la RAS va abri "un capitol nova" per la pais.

La Republica de Africa Sentral ia deveni ruinada par violentia entre rebelores muslim e militias cristian.

Esta es la visita prima par la pape a un zona de gera e la punto final en se turi major de tre nasiones african.

Catherine Samba-Panza, la presidente tempora de la RAS, ia demanda la pardona de la pape per la violentia relijial resente en se pais.

Sentos de persones ia espeta entre securia forte ma en ambiente calma, ante la visita par la pape a la mascita Koudoukou en Bangui oji. Pos encontra xefes muslim local, Fransisco va parla a la fola, do on previde ce el va continua se tema de reconsilia relijial.

A soldi, folas grande ia sta longo la via de la airoporto per bonveni la pape – e on ia aclama e canta cuando el ia ariva a un campa de refujadas.

En un parla a la palasio presidental, el ia recomenda unia e la evita de "la tenta de la teme de otras, de la nonconoseda, de lo cual no es un parte de nos etnico, nos opinas political, o nos confesa relijiosa".

Ante se visita, la pape ia dise ce el desira forte trae un mesaje de pas e espera a la pais.

Gera ia dana la RAS tra desenios, ma sola a du anios ante aora la combate ia adota un forma relijial. La presidente François Bozizé ia es desponeda en un colpa de stato en marto 2013, e un grupo de rebelores xef muslim de la norde – la "seleka" ("alia") – ia marxa contra Bangui e ia saisi la controla de la pais per un tempo corta.

En Uganda, la pape ia selebra la misa ante sentos de miles de persones, e ia parla a un santeria dedicada a cristianes martirida per se fida en la sentenio 19.

A venerdi, el ia parla a un asembla de jovenes en Nairobi, la capital de Cenia, forte recomendante ce los uni per oposa la efetos destruinte de tribalisme.

Se rebela ia promove un senti entre la persones norde ce los es escluida a nonrepresentada par la governa sentral. Los ia ataca eglesas e comunias cristian, provocante la crea de la militias antiviolentia e gidante a un spiral malinte de violentia venjante cual continua.

Vilas e viletas es divideda, con sentos de miles de persones deslocada a campas separada en modo relijial.

2015-11-29

Un acorda de clima deveni plu probable en Paris

Entre medios forte de securia, cuasi 150 xefes de mundo asembla oji en Paris per un consenta major de la Nasiones Unida sur la cambia de clima.

La confere, conoseda como COP21, va atenta prepara un acorda permanente per limita la emetes de carbono.

Oservores dise ce la atacas teroriste resente a la capital franses va aumenta la probablia de un acorda nova.

On previde ce sirca 40 mil persones va partisipa en la aveni, cual va continua asta 11 desembre.

La asembla de 147 xefes de stato o governa va es multe plu grande ca lo de 115 ci ia vade a København en 2009, a la ves la plu resente cuando la mundo ia prosimi a fa un acorda permanente sur cambia climal.

An si multe xefes, incluinte la presidentes Obama e Xi Jinping, ia intende sempre partisipa en esta confere, la atacas violente en Paris ia coraji otras a veni per espresa unia con la popla franses.

Diferente ca en København, la organizores franses introdui la xefes a la comensa de la confere, en loca de espeta se ariva a la fini – un tatica cual ia fali dramosa en la capital dansce.

La umor de la aveni es multe positiva, ma on trova ancora diferes notable entre la partitos. Un problem major es la forma de la acorda. Per esemplo, la SUA no va suscrive un acorda legal nonrompable, car on ta ave poca espera de aseta lo en la Senato dominada par republicistes.

En ajunta a la forma, multe problemes esiste ance sur la contenida. On ave un diversia grande de opinas sur la gol ultima de la acorda.

An si, parente, lo va es un caso de preveni ce la temperatur alti par plu ca 2°C supra la nivel preindustrial, la demanda de como on va representa esta en la testo es la tema de multe disputa.

Alga paises rejeta an la idea de 2°C e dise ce la norma debe es 1,5°C. Otras desira proposa la descarboni de la mundo ante la media o fini de esta sentenio. E produores major de petrolio odia la conseta.

2015-11-28

Un madre txilan e usor medical de mariuana no pote vide se bebeta

En Txile, un madre dise ce un ospital restrinje se asede a se bebe resente naseda car el ia dise ce el fumi mariuana.

Sindy Melany Ortiz ia dise ce el fumi la droga per razonas medical, per lejeri la dole en un de se brasos.

El dise ce on no permete ce el dona lete a se fia e pote vide el per sola du oras per dia.

Ofisiores a la ospital en la site sude Talcahuano ia esplica ce los segue se protocol e ce la bebeta es perilida.

"Los ia viole me diretos de madre," Ortiz ia dise. "Me usa esta droga sola per la dole en me brasos. Lo ia es recomendada a me par un profesal de medica, e me es asoluta no un consumor de drogas."

"Los ia comensa demanda esce me fumi o usa cualce droga, e me ia informa los. Cuando me fia ia nase, los ia dise ce el va resta alga con me, ma ce me no pote dona lete al el car me ia consuma mariuana cual es mal per la bebe."

La ospital ia avisa un corte local ce probas ia trova sustantias capas de dana la enfante. La corte ia comanda ce la bebe resta en la ospital Las Higueras ("La figos") asta jovedi, cuando lo va fa un deside.

En julio, la Congresa de Txile ia aproba con marjin grande un projeta legal cual intende descriminali la usa e cultiva personal de mariuana. Si asetada, la lege va permete la posese de asta 10 grames de canaba e la crese de asta ses plantas.

On regarda lo como un modo per para la persegue de usores medical e per permete ce los asede un medisin cual los pote crese en se jardines.

Plu temprana en esta anio, Santiago, la capital de la pais, ia es la loca de la cultiveria medical prima de mariuana en America Latina.

La projeta legal va move a la Salon basa ante pasa a la Senato, en un prosede cual pote ocupa alga anios.

2015-11-27

Lagos perilosa formi sur la glasia Khumbu

Lagos cual ia formi prosima a Monte Sagarmata (Qomolangma, Everest) risca menasa abitadas umana plu basa si los supraflue.

Stanges a la surfas de la glasia Khumbu en la Montes Himalaia ia crese e deveni unida per formi areas plu grande de acua. Montaniores nesesa traversa esta glasia, incluinte la cascade jelada e tradosa de Khumbu, per asende esta monte estrema.

La fonde aselerada de glasias en la area causa ansia, con fondo de la alti de temperatures global.

Siensistes dise ce la averti presente es la prima de se spesie per Khumbu, an si otra glasias en la Himalaias ia esperia ance un crese en la cuantia de lagos formida.

Tal lagos glasial pote supraflue e causa inondas, danante construidas e matante persones a su.

Esta ecipo de siensistes es la prima ci ia visita la area pos la trematera ruinante en april.

Los ia studia imajes satelital de la glasia Khumbu tra la 15 anios pasada, e ia jeometre ance la area a tre veses de pos 2009. Los ia descovre ce partes de la area plu basa de la glasia ia diminui car los perde se jelo a su, par causa de la temperatur levada. Esta ia permete la formi e crese de lagos.

La datos de la 15 anios pasada mostra ce la surfas de la glasis ia declina con rapidia de du metres per anio.

Nonsimil a glasias en otra locas, cual es usual fada de jelo lisa, multe en la area Himalaia es covreda con un strato de detrito de arena, calculos, e rocas.

La lago glasial Dig Tsho en la vale de Khumbu ia rompe en 1985, destruinte un compleso de enerjia idraulical e otra construidas de infrastrutur.

Como reportada par la Program de Ambiente de la Nasiones Unida, la paises Nepal, Pacistan, Butan, e Xina ia esperia a la min 35 avenis de rompes subita de lagos glasial en la sentenio pasada.

Arcivos indica ce stanges ia developa e drena sur la glasia Khumbu ance en la pasada, ma siensistes dise ce la temperatur levante e la fonde plu rapida de glasias en anios resente es un causa de ansia.

Esta ansia es sentida par alga membros de la comunia xerpa cual abita en la vale, ma otras dise ce los no teme.

"Nos oia tal reportas alarmante de tempo a tempo," Ang Kami Sherpa ia dise. El es la xef de un ecipo xerpa de "dotores de cascade" ci repara la via tra la cascade jelada de Khumbu per trepores a cada anio. "La stanges va veni e parti, ma si nos manteni la felisia de nos dios sur la montes, nos no ave un razona de teme."

2015-11-26

Un bilionor es arestada en scandal de Petrobras

On ia aresta un de la comersiores la plu rica de Brasil e un senator major como parte de un investiga profonda de froda en Petrobras, un compania multinasional de petrolio.

André Esteves ia es arestada a se casa en Rio de Janeiro. On ia saisi documentos de ala e de la banco cual el dirije en São Paulo.

A la mesma tempo, la gidor senatal de la partito governante, la Partito de Laborores, Delcídio do Amaral ia es arestada.

On acusa ambos omes de impedi la curso de la investiga.

Esteves es la om 13 de la plu ricas de Brasil, con $2,5 mil milion estimada. Amaral es la legor ativa prima ci on ia deteni en la scandal.

Pos se aresta en la temprana de mercurdi, la polisia ia publici un rejistra en cual Amaral pare sujesta ce la xef pasada e prisonida de la divide internasional de Petrobras debe revela no informas sur Amaral e Esteves. En intercambia, la dirijor de Petrobras, Nestor Cerveró, va es aidada a fuji de Brasil a Europa.

Esta banda ia es secreta rejistrada par la fio de Cerveró. El ia dise a jornalistes brasilera ce e el e se padre ia desacorda sur la scema de fuji.

Plu tarda ier, la Senato ia fa un consenta urjente cual ia suporta la deside par la Corte Suprema de aresta Amaral.

Aora, on ia aresta plu ca sento persones en la du anios de la investiga, incluinte politicistes e dirijores major pasada a Petrobras e alga de la companias la plu grande de construi en la pais.

La presidente de Brasil, Dilma Rousseff, ia es un presidente de Petrobras en la pasada, ma on no ia implica direta el en la scandal. An tal, el fronti un presa political sever en relata.

Rui Falcão, la presidente de la Partito de Laborores, ia publici un declara en cual el distanti se de la senator desonorada. El ia descrive se como "confondeda par la fatos" cual ia gida a la aresta.

"Zero de la atas atribuida a la senator es liada con se ativia per la partito. Per esta razona, la Partito de Laborores no senti obligada a ofre cualce unia a el."

2015-11-25

Turcia tira un avion rusce a tera

Rusia dise ce un de se pilotes ia mori e un otra manca pos cuando se jeto ia es tirada a tera par Turcia cuando lo ia vola supra Suria. Un soldato marinal, envolveda en atenta salva los, ia es ance matada.

Seguente la ministreria de defende rusce, on ia xuta a la pilotes en cuando los ia salta con paracade de la avion. La elicotor de la soldato marinal ia es fusilida a pos.

La cade de la avion ia alti la tensa entre Rusia e Turcia.

La xef de OTAN ia dise ce lo suporta se membro Turcia, ma el ia repete recomendas de calmia.

Turcia ia dise ce la jeto ia entra a se spasio airal, ma la presidente rusce Vladimir Putin ia insiste ce la SU-24 ia es volante supra teritorio suri en cuando lo ia es colpada par la misil de aira a aira.

Putin ia descrive la cade de la avion como "un cotel en la dorso".

Rompente se contatas militar con Turcia, la ministreria de defende rusce ia dise ce un cruser con sistem de defende airal va es enviada a la Mediteraneo per destrui "cualce blancos representante un peril posible" per soldatos rusce en Suria.

La militaria ia clari ce la bombadores rusce cual fa atacas airal supra Suria va es aora acompaniada par aviones xasante.

Un portavose per la ministreria rusce ia dise ce un ecipo de salva, usante du elicotores MI-8, ia atenta salva la du pilotes. "En la opera, un de la elicotores ia es fusilida par armas lejera, ia es danada, e ia atera urjente sur teritorio neutral. Un soldato marinal servinte par contrata ia es matada."

El ia ajunta ce la otra membros de la ecipo de salva ia es secur sortida de la area a la base airal rusce Humaymim, prosima a Latakia en Suria.

Rebelores suri ia dise ce los ia usa un misil antitance per esplode la elicotor, corta pos se atera, e ia publici un video de esta ataca.

On ia avisa rusces a no visita Turcia – un destina popular per turistes – con ce Sergei Lavrov, la ministro de esternas, ia descrive la menasa teroriste ala como no min ca en Misre, do un ataca par bomba ia cade un avion rusce de pasajores en la mense pasada.

La presidente turces ia dise ce se soldatos ia segue se regulas de engrana. "Cadun debe respeta la direto de Turcia de proteje se fronteras."

La SUA, la UE, e la NU ia apela per calmia.

Barack Obama, la prsidente SUA, ia telefoni se corespondente turces, Recep Tayyip Erdoğan, per serti el ce la SUA suporta la direto de se pais de defende se domina.

El ia dise ce lo es importante ce on descovre la natur esata de la aveni e ce on ata per "descoraji cualce spesie de aumenta".

Ma el ia dise ance ce la aveni indica "un problem continuante" con la condui rusce en Suria, con la comenta ce si Rusia ta ataca Daex en loca de soldatos "moderada" de la oposa suri, tal avenis ta es nonprobable.

Rusia e Turcia ia trova se a lados oposante en la gera de Suria, con ce Rusia suporta se aliada, la presidente Bashar al-Assad, e Turcia recomenda despone el.

2015-11-24

La Vatican prosede sur publici de secretas

Sinco persones va es prosededa en la Vatican, acusada de esposa e publici documentos secreta cual revela malmanejas en la Seja Santa.

Du jornalistes ci ia sita la documentos en du libros va fronti la judores, como ance du membros de un comision papal e un aidor.

Si on deside ce los es culpable, lo es posible ce los va es prisonida per asta oto anios. Grupos jornaliste ia condena la prosede.

La jornalistes, Emiliano Fittipaldi e Gianluigi Nuzzi, ia presenta alegas de la malusa de reservas carital en se libros Mercatores en la temple e Avaria. Se alegas ia inclui la renovi lusosa de apartes per cardinales e otras.

La tre ci on acusa de esposa la documentos es un prete espaniol, un esperta italian de relatas publica, e la secretor de la prete. La du primas ia partisipa en un comision conselante la Pape sur reforma economial. Pape Fransisco ia crea la comision per proposa maneras de boni la flue de mone a persones povre.

Grupos jornaliste ia recomenda forte ce la Vatican abandona la acusas.

Un portavose per la Comite per Proteje Jornalistes ia comenta: "Jornalistes debe es permeteda de fa se rol como gardor e investiga mal atas alegada, sin teme la resultas."

La jornalistes envolveda ia descrive la prosede como "Kafka-in", disente ce no los no se avocatos ia vide detalias de la acusas.

Fittipaldi ia dise: "Esta es un prosede contra la libria de jornalisme. En no otra parte de la mundo, a la min en la parte de la mundo cual regarda se como democrata, on ave un crimin de publici novas."

La rapidia con cual la Vatican ia move per acusa la sinco ave un contrasta forte con la lentia con cual lo ia prosede multe pretes acusada de maltrata sesal de enfantes.

Si lo dona punis longa a esta jornalistes, la Vatican va ave no compleso per prisoni los e va debe demanda ce Italia (do on proteje la libria de jornalisme) estradi los e prisoni los seguente un acusa cual no es ala un crimin.

2015-11-23

La polisia barati regrete deteni un artiste sur se obra de bove

En la stato barati Rajasthan, la polisia ia demanda es pardonada par artistes pos invade un esibi cual ia inclui un bove de polistiren pendente de un balon de elio.

Polisiores ia ariva a la Confere Alta de Arte de Jaipur a saturdi, pos cexas ce la bove de grandia natural flotante en la aira es ofendente per indus.

Los ia deteni du artistes per un pico de oras, en cuando ativistes indu ia desasembla la instalada.

Ativistes dise ce la invade es un indica de un crese de nontolera relijial en la pais.

Vasundhara Raje, la ministro xef de Rajasthan, ia tuita a soldi ce el es "tristida" par la aveni, e la comisionor polisial de Jaipur ia espresa ance se regrete.

Raje ia dise ce la xef de la ofisia de polisia ia es "sutraeda e me mesma ia parla a la artiste".

La artiste es Siddhartha Kararwal. El ia nomi se pupa flotante "Bove divin" e ia crea lo per lumina la mal situa de boves barati cual foraje e sofoca par causa de sacos plastica.

Ma alga persones ia cexa ce la bove aspeta como si on ia esecuta lo par pende lo, e ce la model insulta la animal cual indus adora como simbol de vive e susta.

La ativistes indu ci ia desasembla la obra ia garlandi e bondise la bove ante cuando la polisia ia saisi lo.

La polisia ia deteni corta du otra artistes, Chintan Upadhyay e Anish Ahluwalia, ci ia protesta contra esta, provocante coleria en redes sosial.

Pratap Sharma, la dirijor de la esibi, ia informa jornalistes ce on no intende reesibi la bove. "Nos no desira causa denova un ofende, donce nos no va instala denova la obra."

2015-11-22

Bruxelles clui en teme de un ataca nova teroriste

La sentro de Bruxelles, la capital de Beljia, ia es cuasi vacua a la sera de ier, pos un avisa de terorisme cual ia clui temprana restorantes e bares, en teme de un plu ataca de spesie de Paris.

Soldatos ia patrulia ia stradas en cuando un xerca intensa ia continua per la fujor Salah Abdeslam, ci on vole aresta en relata con acel atacas.

Amis de el, ci ia parla a el par Skype, ia dise ce el es ascondeda en la area de Bruxelles e atenta viaja a Suria.

La estremistes de Daex ci ia mata 130 persones en Paris ia usa Bruxelles como un base. La autoriosas beljes ia leva Bruxelles a se nivel la plu alta de vijila en la tarda de venerdi.

La ministro xef, Charles Michel, ia dise ce on ia ave "un informa vera esata" ce "alga individuas con armas e esplodentes pote esecuta un ataca… cisa an en plu ca un loca".

Un de la omes ci ia automobili Abdeslam a Beljia ia dise a se avocato ce Abdeslam ia es vestida en "un jaca grande" e ia porta cisa un sintur de bomba.

La avocato, Carine Couquelet, ia dise a la televisa beljes ce esta leva demandas, incluinte la posible ce Abdeslam ia intende esplode se en Paris ma ia reconsidera e ia cambia se deside.

La amis de Abdeslam ia dise ce el es trapida entre la autoriosas european ci xasa el e membros de Daex ci "oserva el" car el no ia detona se sintur de bomba.

On ia avisa ce la abitores de Bruxelles evita folas, on ia clui la metro e sinemas, e on ia demanda ce sentros comersial, caferias e restorantes clui a 18:00. Soldatos ia es enviada a la stradas.

Michel ia comenta ce la governa va rejudi la situa de securia en la site a la posmedia de oji.

2015-11-21

Un aseja teroriste en Mali fini

Un ataca par estremistes islamiste suspetada en la capital de Mali ia fini. La atacores ia prende 170 persones como ostajes en la otel Radisson Blu.

La Consilio de Securia Nasional ia condena la "ataca odiable" en Bamako.

La fusilores ave "no plu ostajes" e es xasada. Plu ca 20 persones ia mori, e on ia declara un state nasional de crise.

Al-Qaida en la Magrib Muslim e se parteninte al-Murabitoun ia dise ce los ia esecuta la ataca.

Parlante pos un conseta urjente de consilio en la tarda de ier, Ibrahim Boubacar Keita, la presidente malian ia anunsia un state de crise de medianote a venerdi per des dias, e ance tre dias de lamenta nasional.

El ia dise ce 21 persones ia es matada en la ataca, incluinte du fusilores.

Reportas plu temprana ia sujesta ce a la min 27 persones ia mori. Un ofisior de la Nasiones Unida, anonim parlante, ia revela ce on ia trova 12 corpos en la sutera e 15 sur la nivel du.

Un de la ostajes matada ia es Geoffrey Dieudonné, un membro de parlamento en la area Ualonia de Beljia. La ajenteria nasional de novas en Xina dise ce tre nasionales xines es entre la mores, e la departe de esternas de la SUA ia indica ce un sitadan SUA ia es matada.

Pitures mostra ce alga de la ostajes sortinte de la otel ia es ferida.

La presidente SUA, Barack Obama, ia dise ce la ataca es ancora un plu recorda ce "la tormenta de terorisme" menasa multe nasiones, e ia comenta ce la barbaria de la ataca "firmi sola nos determina per fronti esta defia".

La otel es poseseda par un compania de la SUA, e es popular entre companias stranjer e ecipos de avion.

Atestores ia dise ce asta 13 fusilores ia entra a la otel, xutante e criante "Dio es la plu alta" en arabi.

Ante cuando soldatos spesial ia invade la construida, un fonte ia indica ce la teroristes libri alga ostajes si los es capas de resita partes de la Curan.

La presidentia de Mali ia grasia la soldatos de securia e paises amin per se suporta en responde a la atacas. Soldatos SUA nonlaborante ia aida en la opera de salva ostajes, e soldatos spesial de Frans ia es ance envolveda.

On ia trova ancora no lia con la atacas en Paris cual ia mata 130 persones a un semana ante aora.

En agosto, fusilores islamiste suspetada ia mata 13 persones, incluinte sinco laborores de la NU, en un aseja con ostajes a un otel en la vila Sévaré en Mali sentral.

Frans, la potia colonial pasada en Mali, ia interveni en la pais en janero 2013, cuando estremistes liada a al-Qaida ia menasa marxa contra Bamako pos saisi controla de la norde de la pais.

La soldatos de la NU en Mali ia emprende la taxe de securia en la pais de soldatos franses e african en julio 2013, pos cuando on ia recatura la vilas xef en la norde de la estremistes.

2015-11-20

Un conjesta de 50 cilometres en Cenia

En Cenia, on ia envia la polisia per lejeri un conjesta de trafica cual estende tra 50 cilometres sur la autovia entre Mombasa e Nairobi.

La via es esensal per la economia de Africa este, car lo lia la porto Mombasa a paises sin costa, como Uganda, Sudan Sude, e Ruanda.

La area la plu sever afetada es sirca Taru, a aprosima 80 cilometres de Mombasa.

On reporta ce la conjesta es causada par reparas cual on fa a la via pos pluves intensa.

Conjestas de trafica es comun en Cenia e es comun causada par se rede de vias mal mantenida, ma on descrive la conjesta presente como la plu sever de alga anios.

Plu ca 1500 camiones ia deveni trapida, seguente Willingtone Kiberenge, la dirijor xef tempora de la Asosia de Transportores Cenian.

Alga motoristes es ja trapida en la campania, a multe cilometres de la boteca la plu prosima, de pos la comensa de la conjesta a la sera de martedi.

"Me no ia come pos la matina de ier, me no ia duxi e no ia cambia an me vestes," ia es la comenta de Nathaniel Chewya, un camionor ci transporta des autos a Kampala, la capital de Uganda.

Sola la trafica en dirije a Nairobi es afetada par la conjesta.

Alga camiones ia atenta diverje de la autovia a sur la tera de subosce a lado, ma los ia deveni fisada en fango.

Un ferovia esiste entre Mombasa e Nairobi, ma lo es vea e nonfidable e spende alga dias en se viaja de 500 cilometres. Los ci pote tolera la custa, e ci no ave cargas pesosa, tende vola entre la sites. Un avion parti a cada ora.

2015-11-19

La polisia franses invade un aparte de teroristes

Espertas franses labora per determina esce la gidor suspetada de la atacas en Paris ia es entre la persones matada en un invade polisial contra un aparte ier.

La polisia ia dise ce Abdelhamid Abaaoud es la blanco cuando ofisiores ia ataca la aparte en la suburbe Saint Denis. No el no Salah Abdeslam, un otra suspetada, ia es entre oto persones arestada, ma on ancora no ia identifia a la min du corpos.

Entretempo, parlamentores franses va vota sur estende la state presente de crise.

La grupo combatosa Daex* (Stato Islamiste), cual controla partes de Suria e Irac, ia dise ce lo ia esecuta la atacas a venerdi pasada, cuando fusilores e bombas umana ia mata 129 persones e ia feri sentos.

Un de la mores a la aparte es un fem sur ci on crede ce el ia detona un sintur esplodente en cuando la polisia ia entra. Un fonte prosima a la investiga ia indica ce lo es posible ce la fem ia es un cusin de Abaaoud.

François Molins, la avocato prosedente en Paris, ia dise ce lo ia pare ce "un ecipo nova de teroristes" ia prepara se per un plu ataca.

Un gidor de un de la unias spesial cual ia partisipa en la ataca a la aparte ia dise ce on ia usa avionetas e robotes con cameras per atenta vide la interna de la aparte, ma tro multe detrito ia es presente. La combatosas ia fusili un can de polisia.

Cuando la polisiores ia entra a la construida, los ia trova un corpo cual ia cade de la nivel tre a la nivel du. Los ia comenta: "La corpo ia es mutilada, probable par causa de granadas, e no ia es reconosable. Otra persones ia es en la poso de la scalera: du omes ascondeda su covreletos e otra cosas acaso trovada. Nos ia aresta los."

La identias de la oto arestadas es ancora no confirmada. Ma los no inclui Salah Abdeslam, la franses de 26 anios ci on ia reconose como un suspetada de la matas a venerdi, e sur ci on crede ce el es ancora libre.

La blanco de la invade polisial, Abaooud, es regardada como un figur multe importante en un selula de Daex cual departes de securia en la SUA ia investiga tra alga menses.

On ia crede ce Abaaoud ia fuji a Suria pos un opera par polisia en Beljia en janero, e el ia vanta en propaganda de Daex ce el es capas de move entre Suria e Europa sin deveni detetada.

Pos la atacas a venerdi contra un conserteria, caferias, e la stadion nasional, presidente François Hollande ia declara un state de crise per 12 dias.

Daex ia dise ce lo ia fa la atacas en responde a la campania airal par Frans contra se locas en Suria, e la grupo ia promete plu matas. En la tempo interveninte, Frans ia aumenta se atacas airal contra blancos de Daex en Suria.

Ambos Frans e Rusia – cual ataca ance combatosas en Suria – prepara proposas a la Consilio de Securia de la Nasiones Unida, per presenta un stratejia internasional per la defeta de Daex.

Hollande ia recomenda forte ce la consilio aproba rapida un deside sur combate la grupo.

* Esta blog prefere segue la disposa franses en nomi la teroristes "Daex", car la nom "Stato Islamiste" pare ofendente a la mil miliones de muslimes pasosa en la mundo. "Daex" es un corti de la nom ofisial arabi de la teroristes, ma lo difere ance par sola un letera de la parola daes, cual sinifia "crasor".

2015-11-18

Tables de picnica viaja nonlegal en Australia

La polisia australian vole identifia un grupo de omes ci on ia filma en cuando los ia viaja sur tables motorida de picnica, sur stradas publica en la site Perth.

Un video ia sperde virusin, mostrante como la nove omes ia rola casual tra un crusa en Scarborough, un suburbe costal, a soldi.

Atestores ia dise ce los ia es divertida par la spetaculo, ma la polisia ia averti ce lo ia envolve periles real.

Los ia esplica ce la omes pote fronti acusas diversa, incluinte de gida un veculo nonlisensada e nonsecur.

En un posta a Facebook, la polisia de Australia Ueste ia dise: "Nos es consernada per la securia de los ci ia viaja sur la tables sin vestes protejente, spesial cuando sur stradas a lado de otra veculos motorida."

On reporta ce la posesor de la table ia dise ce un ofisior ia parla ja a la grupo e ia relasa los con mera un averti.

La posesor ia comenta: "Ambos gidores ia es sobre. La polisia ia demanda ce nos move la tables a traversa denova la strada, a la plaia. Nos ia obedi tota demandas par la polisia a soldi."

En esta anio, on ia aresta alga australianes per bevi alcol en gida veculos simil, incluinte caxas frinte a cual on ia ajunta rotas e un motor.

En janero, un om sur la Penisola Mornington a sude-este de Melbourne ia es multada per $1476 per viaja sur un caxa frinte sur un via de paseores.

2015-11-17

Gine pare ave no plu pasientes de Ebola

En Gine, la ultima de la pasientes conoseda con la virus Ebola ia recovre e ia es relasada de un sentro medical en la capital, Conakry.

Un portavose per la unia ginean cual colabora sur la maladia ia dise ce du probas a la pasiente – un bebe – ia mostra resultas negativa.

La bebe ave 19 dias. El ia nase en la sentro medical Nongo Ebola, ma se madre infetada no ia survive.

On va declara ofisial ce Ginea es librida de Ebola si no casos nova es reportada en la ses semanas veninte.

La epidemica, cual ia comensa en Gine, ia mata plu ca 11 mil persones en Africa ueste.

Plu temprana en esta mense, la Organiza Mundal de Sania ia declara Siera Leon, un pais visina, como libre de Ebola pos 42 dias sin caso conoseda.

Liberia ia es simil declarada como libre de la maladia en setembre.

La aveni de la virus en Africa ueste ia es prima reportada en marte 2014.

2015-11-16

Un lisca de tera en Xina este

Plu ca 2000 salvores xerca survivores de un lisca de tera en Xina este cual ia mata a la min 25 persones.

Alga dias de pluve ia inisia un deluvia de fango e roca cual ia engoli casas en la vileta Lidong en la provinse Zhejiang.

La lisca ia aveni no longa ante 23:00 a la sera de venerdi, enterante cuasi 30 casas.

Partes de la vileta resta inondada, difisilinte la labora de salva. La lisca ia crea ance un parario cual impedi plu la taxe.

Reportas indica ce 12 persones manca ancora.

Ofisiores local ia dise ce asta aora on ia salva un person, e ce el es en un state stable.

En ajunta a salvores, canes detetante, e macinas, on ia envia ance psicolojistes a la area per aida membros de la familias de la vitimes.

La plu de la mancantes es enfantes e veas, seguente reportas local, cual ia dise ance ce on ia acorda un compensa per los ci ia perde se casas en la desastre.

2015-11-15

Democratas SUA disputa pos la atacas en Paris

En la SUA, la aspirores presidental de la partito Democrata ia disputa sur la modo de trata la grupo combatosa Stato Islamiste ("Daex"), pos la atacas teroriste en Paris.

Hillary Clinton, parlante a un debate en Iowa, ia dise ce "lo no pote es un batalia american" e ia recomenda ce Turcia e la statos de Golfo fa plu.

Ma se oposor Martin O'Malley ia desacorda, disente ce la SUA debe "fronti la malia" e gida de la fronte.

La atacas ia mata 129 persones e ia feri sentos en la capital franses a venerdi. A pos, CBS News ia promete move la foca de la debate presidental per asentua plu la politicas de contraterorisme e esternas.

On ia oserva un momento de silentia en Des Moines ante la comensa de la debate, e la tre aspirores ia espresa se compatia a la popla franses. Ma los ia disputa alora sur la crese de Daex, cual ia declara se como culpable per la atacas.

Clinton, un ministro pasada de internas, ia es defiada par Bernie Sanders, un senator de Vermont, per se suporta de la Gera de Irac, sur cual Sanders ia dise ce lo ia gida a la crese de la combatosas.

Clinton ia desacorda, disente ce la politica de esternas de la SUA no ave "la majoria de culpablia" per la nonstablia en la area, indicante en loca la presidente de Suria, Bashar al-Assad, e la gidor pasada de Irac, Nouri al-Malaki.

El ia dise ce on no pote conteni Daex – on debe vinse lo. Ma no el no la otra aspirores ia revela cuanto los ta vade en acel dirije.

La SUA ia es ja un parte de un alia de paises partisipante en atacas airal contra SI en Suria en Irac, ma alga de la aspirores presidental de la partito Republiciste ia proposa la envia de soldatos SUA a tera.

2015-11-14

Atacas en Paris mata a la min 120 persones

Frans ia declara un state nasional de crise e ia tensa se fronteras pos cuando 120 persones, cisa plu, ia es matada en un note de atacas par fusil e bomba en Paris.

Otodes persones ia es matada cuando fusilores ia entra violente a la salon de concerta Bataclan e ia prende desuples de ostajes. La aseja ia fini cuando fortes de securia ia recatura la construida.

A sinco otra locas en Paris, persones ia es matada par fusil a bares e restorantes. On reporta ce oto atacores ia es matada.

La polisia crede ce tota la fusilores ia mori ma lo no es clar esce alga aidores ia fuji pos la series de atacas cuasi simultan.

On ia demanda ce abitores de Paris resta en casa, e ia posa sirca 1500 militares tra la site.

La motivas de la fusilores no ia es direta confirmada, ma un atestor a la Bataclan ia oia un de la atacores ci ia pare espresa suporta per la grupo combatosa Stato Islamiste. La om ia cria "Hollande es culpable, el ta debe no interveni en Suria!", en refere a la deside par la presidente franses de partisipa en atacas airal contra la combatosas.

Paris ia esperia ance tre dias de atacas en la temprana de janero, cuando fusilores islamiste ia mata 18 persones pos ataca la jornal satira Charlie Hebdo, un supramercato iudi, e un polisior fema patruliante.

La ataca a la salon Bataclan ia es la plu sever de la atacas a la sera de venerdi. Fusilores ia xuta a visitores ci ia regarda un presenta par Eagles of Death Metal, un grupo roc de la SUA. Biletas per tota 1500 sejas en la salon ia es comprada.

La serie de atacas, prosima a la Place de la République e la Place de la Bastille, ia colpa la cor de la capital franses en cuando caferias, bares, e restorantes ia es la plu ocupada. Clientes ia es fusilida a locas incluinte un restorante de piza e un restorante camputxa.

La otra blanco ia es la Stadion de Frans, a la borda norde de Paris, do presidente Hollande e 80 mil otra persones ia regarda un max internasional amin entre Frans e Deutxland, con miliones de televidores.

On ia freta la presidente a via pos la prima de a la min du esplodes direta estra la stadion, per fa un consenta urjente de consilio. Tre atacores a la stadion ia es matada.

Cuando la estende de la matas ia deveni clar, Hollande ia apare en televide nasional per anunsia un state de crise a la ves prima en Frans de pos 2005. Esta permete ce la autoriosas clui locas publica e restrinje la moves de trafica e persones.

Pos min ca un ora, fortes de securia ia ataca la salon de conserta, e tota cuatro atacores ia es mor. Tre ia esplode se, e la otra ia es fusilida par la polisia. Un otra atacor ia es matada en un strada en Paris este.

Parlante pos ariva a la salon de conserta, presidente Hollande ia dise ce on va combate la atacores "sin pardona".

Ann Hidalgo, la maior de Paris, ia anunsia ce tota scolas, museos, bibliotecas, jinasios, pisinas, e mercatos va es cluida oji.

2015-11-13

Air France desemplea cuatro persones ci ia protesta violente

Cuatro empleadas de Air France ia deveni desempleada pos protestas violente a la xeferia de la compania en otobre. Un laboror sinco, acusada de malcondui grave per ataca manejores, segue un otra prosede car el es un representor de sindicato.

En cuando laborores ia protesta contra desempleas coletiva, los ia lasera la camisas de du manejores, de ci un ia es obligada a fuji par traversa un serca. Alga otra persones ia deveni ferida.

La protesta ia aveni entre un coleria jeneral sur reduis tra la economia franses.

Sentos de laborores ia protesta contra projetas de elimina 2900 postos, de longi la oras de labora de pilotes, e de redui la grandia de la flotila. La projetas intende redui custas par €1,8 mil milion tra du anios.

Du manejores ia es sever atacada – Xavier Broseta, un manejor de recursos umana, e Pierre Plissonnier, un ofisior major. Los ia partisipa en un consenta de consilio de labora sur la reduis proposada, cuando sentos de laborores ia intrui coler en la xeferia.

Sete persones ia es ferida, incluinte un gardor de securia ci ia deveni nonconsensa pos es colpada.

La sinco laborores, con un otra asosior, va apare en corte a 2 desembre per fronti acusas criminal en relata con la violentia. Air France ia dise ce lo ia suspende 11 otra empleadas per du semanas sin paia, per intrui violente en la xeferia.

Pos la protestas, la compania ia redui la cuantia de postos cual lo intende elimina a min ca mil.

La consenta veninte de la consilio de labora de Air France va aveni a 19 novembre. Sindicatos ia recomenda un greve a acel data per protesta contra la medios disiplinal.

A fini de otobre, Air France–KLM, la compania posesente, ia reporta un perde neta de €158 milion per la nove menses prima de esta anio, en contrasta con un perde de €533 milion per la periodo corespondente en la anio pasada.

2015-11-12

Espania judi contra la autonomia de Catalunia

Xefes proautonom en Catalunia, a norde-este de Espania, ia promete continua se projeta per separa de Espania, an pos un deside par la Corte Constitual per suspende la prosede.

Neus Munté, la vispresidente catalan, ia dise ce la vole political de la governa areal es ce on continua la projeta de autonomia pos 18 menses.

Plu temprana, la governa de Espania ia apela a la Corte Constitual per un interveni. La corte ia averti la gidores catalan ce los debe segue la comanda.

A lundi, la parlamento areal de Catalunia ia aseta un proposa per comensa la prosede se separa, declarante un gol de autonomia pos no plu ca 18 menses, e permetente 30 dias per comensa la prepara de un sistem catalan de constitui, reservas, e aida finansial.

La ministro xef, Mariano Rajoy, ia anunsia a mercurdi ce el ia prende la caso a la Corte Constitual. El ia descrive la proposa como "un iniora ofendente de la instituidas de la stato" e la acusa la separadistes de "atenta elimina la democratia".

"Lo es un caso de la defende de un pais intera," el ia dise. "Los atenta licuidi la unia de un nasion con plu ca sinco sentenios de istoria."

En un deside prevideda, la panel de 11 judores de la corte ia acorda oia la caso de la governa contra la promove catalan, con resulta ce la proposa es automata suspendeda per alga menses en cuando la escutas legal aveni.

La panel ia acorda ance con la solisita par Madrid ce la judores informa "personal" la presidente catalan Artur Mas, se consilio, e Carme Forcadell, la presidente de la asembla areal, sur lo cual ta resulta si los ta deside no segue la deside de la corte.

La partitos proautonom ia previde ce se proposa va es declarada como nonlegal, e como parte de lo, los ia espresa ce la corte ave no legalia.

Sondas sujesta ce un majoria de catalanes favore un referendo sur autonomia, ma es divideda en modo egal sur la demanda de separa.

Partitios catalan nasionaliste ia gania un majoria de sejas pos un eleje en setembre, ma no ia susede gania un dui de la votas. Los ia dise a ante ce los regarda la vota como un referendo par fato sur la separa de Espania.

Alga partitos oposa la autonomia de Catalunia, incluinte la Socialistes e Sitadanes Catalan, un partito sentral destriste cual ia nase en la area consernada ma ia deveni popular tra la intera de Espania.

Se xef, Albert Rivera, ia dise resente: "A acel catalanes ci desira autonomia: la solve no es divide la pais; lo es reformi lo."

2015-11-11

La partito de Suu Kyi pare vinse en Miama

La xef oposante de Miama, Aung San Suu Kyi, ia solisita consentas con la xefes militar en la semana veninte, per discute reconsilias nasional.

Se partito, la NLD (Alia Nasional per Democratia), ave un vantaje clar en la resultas de un eleje a soldi. Pos la declara de sirca 40% de sejas, la NLD ia gania cuasi 90% de la votas, lasante la partito USDP, militar suportada, con sirca 5%.

An tal, un cuatri de la sejas es reservada per la militaria.

Suu Kyi ia envia leteras a presidente Thein Sein, la comandor de la fortes enarmada, e la presidente de parlamento.

La resulta per la USDP, cual ia vinse en la eleje la plu resente a sinco anios ante aora, es un umili per la partito ganiante. La acel eleje ia es vasta criticada.

Lo es aora probable ce la NLD va trova se en un situa comandante en la parlamento seguente, oposada par sola la partito militar. Ma la constitui proibi Suu Kyi de deveni presidente.

Suu Kyi ancora no ia declara se vinse, e fa pasos lejera, demandante consentas con la tre figures la plu major en la governa corente per discute un pasa ordinada de potia.

En un responde a se paje de Facebook, Ye Htut, la ministro de informa, ia repete ce la governa va respeta la resultas de la eleje, ma ia dise ce la consenta solisitada va aveni sola pos cuando la comision de eleje ia fini se labora.

Plu temprana, Suu Kyi ia reteni se seja propre e va reveni como parlamentor per Kawhmu en Yangon. El ia dise ce la proibi constitual "no va para me de fa tota la desides".

La comision de eleje publici lenta la resultas. La USDP, en potia de 2011, ia prende 10 de la 491 sejas disponable en ambos salones parlamental, contrastada con 163 par la NLD.

Un cuatri de la 664 sejas parlamental es reservada per la armada. Afin la NLD va ave un majoria vinsente e pote eleje la presidente, lo nesesa gania a la min du tris de la sejas restante (329).

Sirca 30 milion persones ia ave la direto de vota en Miama a soldi. On ia estima la partisipa como sirca 80%. Ma la direto ia es refusada a sentos de miles de persones, incluinte la minioria rohingia muslim, ci no es reconoseda como sitadanes.

An tal, la esta eleje es regardada como la plu democrata en Miama, ance conoseda como Burma, en 25 anios.

2015-11-10

Ciroteros en covreletos

Un paje de Facebook deleta cores e cambia opinas con se fotos de ciroteras bebe orfan envolveda en covreletos. La paje comunial de "Batzilla" ia colie ja plu ca 155 mil gustas.

La paje ia es creada par Denise Wade, un coordinor de la grupo de Conserva e Salva Ciroteros en Queensland, Australia, per asentua la mal situa de ciroteros e volpes volante en la pais.

El ia esplica: "Lo funsiona xef como un util de instrui, un cosa cual me pote usa per lumina la veria sur ciroteros e per desapare malinformas sur se spesies. Me espera ce la veria va parla ance per se mesma: ce ciroteros es animales noncredable bela e intelijente."

Ciroteros e volpes volante es protejeda en Australia, ma poplas urban de ciroteros es un fonte de controversia. La developa de vilas intrui a se abitadas, e abitores ansiosa sur maladia, ruido, e odores ia atenta move colonias de ciroteros a via de se casas.

Wade espera converti plu persones a amores de ciroteros. "Plu ciroteros move a areas urban, e esta pote causa desacordas con umanas. Nos nesesa comprende plu los, e nos pote fa esta sola par cambia nos modo de condui afin tota de nos vive en armonia."

El ia dise ce la nom "Batzilla" no porta un sinifia spesial. "Lo ia es mera alga cosa divertinte cual me ia inventa."

Multe de la fanes de la paje visita per vide la pitures de ciroteras bebe, comun fotografida en covreletos spesa. "La problem cual esta petis fronti," dise Wade, "es ce cuando los sorti de la incubador, los fri multe rapida e pote deveni perilida, donce nos nesesa caldi se corpos."

Wade ia crese se impresa de pede en la mundo de redes sosial, con un conta de YouTube conteninte videos de se ciroteras e volpes volante.

El ia loda se "grupo merveliosa de seguores", comentante: "Me spende tan multe tempo como posible a la refrescis, car me opina ce medios sosial pote es un util multe importante de instrui."

2015-11-09

Un disturba major a un deteneria australian de refujadas

Detenidas ia ensende focones a un sentro per migrores sur la Isola Christmas de Australia, en un "disturba major" cual on ancora no ia solve. On ia retira la gardores "per razonas de securia".

Partes medical, instrual, e sportal de la compleso es danada.

La departe de migra ia nega ce "un tumulta grande" aveni, ma ia confesa ce la situa a la sentro es "tensada".

La sentro casi ance zelandeses ci va es deportada de Australia.

La turba ia comensa pos cuando un grupo de detenidas irani ia protesta sur la mori de un curdi irani, Fazel Chegeni, ci ia evade la compleso a saturdi. On ia trova ier la corpo de Chegeni a basa de un falesa.

En un declara, la departe ia dise: "Un grupo de detenidas, sur ci nos crede ce los es nonsitadanes de ci se visas ia es canselada en modo obligante, continua ajita e causa dana a la compleso. On ave no reportas a esta tempo de feris a detenidas o empleadas."

Un portavose per la grupo Alia Atante per Refujadas ia dise ce Chegeni "ia sufri la efetos de es acaso detenida tra tempo longo. El ia dise a otras ce el no pote plu tolera es detenida, e desira mera vade a estra."

Jornalistes ia sita ance Matej Cuperka, un detenida con 25 anios, ci ia dise ce el teme sur se securia propre. "Los ensende focos en tota partes. Los ia intrui en la caferia, en la area de proprias. Autos plen de ofisiores move sirca la compleso. Los regarda mera tra la fenetra, ma nun aida nos."

Sarah Hanson-Young, un senator per la partito verde, ia dise ce la sentro sur la isola es "en fonde": "La governa ia es avertida a multe veses sur la situa sempre plu nosiva sur Isola Christmas, ma regretable on ia iniora esta avertis."

Australia envia refujadas intersepida a acel isola, a 2650 cilometres a norde-ueste de Perth e 380 cilometres a sude de Java en Indonesia. Lo envia otras a Isola Manus en Papua Gine Nova e a Nauero en la sude de la Pasifica.

La governa dise ce la viaja maral par la refujadas per ateni Australia es perilosa e controlada par ganges criminal, e ce los es obligada a para lo. Criticores dise ce la oposa a refuja ave comun motivas razal e dana la reputa de Australia.

2015-11-08

On investiga ancora la cade de la avion rusce

La xef egipsian de la ecipo internasional ci investiga la cade de un avion rusce en Sina ia dise ce lo es tro temprana per identifia la causa. Ayman al-Muqaddam ia dise ce on considera ancora tota posibles.

A venerdi, ofisiores franses ia sujesta ce la asidente ia es causada par un esplode violente.

La Airbus 321 ia cade a la Penisola de Sina a 31 otobre, matante tota de la 224 persones portada, corta pos enaira de la vacanseria Sharm el-Sheikh.

Plu temprana a saturdi, la ministro egipsian de esternas, Sameh Shoukry, ia critica ce alga paises nonidentifiada ia fali comparti informas pertinente con Egipte. El ia comenta ce Egipte "ia previde ce la informas furnida a nivel tecnical va es furnida a nos, en loca de deveni publicida a jornalistes en esta manera abrida."

La SUA e la Rena Unida ia dise ce informas indica forte la posible ce la causa ia es un bomba. La Rena Unida ia para volas a Sharm el-Sheikh e retrae se sitadanes.

Shoukry ia critica ance un fali de colabora en combate terorisme, acusante alga paises de "consentra a se interesas propre" e suestimante la defias cual fronti Egipte. Ma John Casson, la ambasador de la Rena Unida a Egipte, ia responde ce el mesma ia es en contata prosima con la governa egipsian, revelante tota informas e esplicante la razonas per la desides.

Muqaddam ia confirma reportas ce on ia oia un ruido en la secondo final de la sona caturada par la rejistrador de voses de pilote, ma ia dise ce on debe ancora fa un analise spetral de la sona.

La plu de la vitimes de la asidente ia es rusce. Rusia ia dise a venerdi ce lo suspende volas a la intera de Egipte e recomenda ce se vacansores – en cuantia de 80 mil – reveni a Rusia. Arkady Dvorkovich, la ministro xef suordinada, ia dise ier ce des aviones portante rusces reveninte ia parti ja de Egipte.

Ativistes conoseda como Provinse Sina, e liada a la grupo Stato Islamiste, ia dise ce los ia cade la avion, ma no ia revela como. Stato Islamiste ia recomenda un gera contra ambos Rusia e la SUA par causa de se atacas airal en Suria.

Un compania difusante en la SUA ia dise a venerdi ce on ia intersepi comunicas entre ofisiores de Stato Islamiste en Suria en persones en Sina sur la cade de la avion. Lo ia sita un ofisior SUA, sin nomi el, ci ia dise: "Los ia selebra clar."

La envolve de Stato Islamiste en la cade ta cambia multe la nivel de menasa presentada par lo e se partenores.

2015-11-07

Un consenta sin presedente entre Xina e Taiuan

La xefes de Xina e Taiuan fa discutes a la ves prima de pos la fini de la Gera Interna Xines en 1949.

Discutes entre la presidente xines Xi Jinping e la presidente taiuan Ma Ying-jeou ia comensa en Singapor a 15:00 de ora local.

Xina regarda Taiuan como un provinse diverjente cual lo intende reuni con se pais xef en la futur, par fortia si nesesada.

La du xefes ia entra a la sala de consenta en junta e, suriente, ia saluta con mano un foleta de fotografistes.

En Taipei, on ia fa protestas contra la discutes, e un grupo ia atenta entra a la parlamenteria taiuan. Alga taiuanes senti ce Xina gania tro multe influe en la pais.

Relatas entre la du paises ia boni pos cuando Ma ia emprende se posto en 2009, con lias economial e turiste, e la suscrive de un acorda de comersia.

La du lados ia divide en 1949 cuando la Kuomintang ia perde contra la Partitio Comuniste Xines en la gera interna e ia institui un governa nova en Taiuan.

La consenta aveni a lado de un visita ofisial par Xi a Singapor. Como un indica de la sensosia political de la situa, la xefes va refere la un a la otra como "senior Xi" e "senior Ma", en loca de "presidente".

Ma ia dise ce la discutes intende promove la pas e trova modos de redui enemias, per esemplo par sutrae misiles xines puntada a Taiuan. "Nos espera ce la xefes de la paises va avansa per fa la paso prima en la normali de relatas," el ia comenta.

Un otra gol major, el ia dise, es normali consentas entre la du lados, e convinse Xina a permete un reconose plu grande de Taiuan en la comunia internasional.

On no previde la ateni de acordas major en esta consenta, e Ma ia ajunta ce on va fa no refere a la problem de la disputas de la Mar de Xina Sude, cual ia domina consernas resente en la area.

An tal, Xi ia leva la problem en un parla a la Universia Nasional de Singapor ante la consenta, disente ce Xina ia espera sempre solve pasosa la disputas.

2015-11-06

Un parario rompe en Brasil

En Brasil, on teme ce plu ca des persones ia mori pos la creve de un parario cual reteni acua de cloaca de un mineria de rocas de fero. Casas prosima ia deveni inondada.

Ofisiores en Minas Gerais, un stato sude-este, ia confirma ce un person ia mori, ma on reporta ce asta 16 ia mori e ce otras manca.

Rios de fango densa roja ia versa longo la vales de la area colinosa estra Mariana, un site vea colonial. Lo ia engoli autos e camiones, e ia destrui casas.

La parario ia rompe a la posmedia de ier, enviante un deluvia de fango e detrito a la vila peti Bento Rodrigues, a distantia de sirca sete cilometres.

La area afetada es abitada par sirca 500 persones.

La labora de salva es impedida par temes de liscas de tera, ma elicotores ia leva alga persones encaliada a securia.

On ia averti ce la acua es miscada con sustantias restante de operas de mina, e pote es nosiva.

Un portavose per Samarco, la compania de mina cual posese la parario, ia dise ce on ancora no sabe la causa de la creve.

2015-11-05

Un fabriceria colasa en Pacistan

On fa un opera major per salva desuples de persones sur ci on crede ce los es trapida en detrito pos la colasa de un fabriceria en Lahore, Pacistan.

A la min 17 persones ia mori cuando la fabriceria, cual ia deveni construida, ia colasa ier. Salvores usa grus e puxadetritos, e la armada aida en la labora.

La causa de la colasa es ancora nonconoseda, ma la securia de construi en Pacistan es comun sunormal.

Du niveles de la fabriceria, en la area industrial Sundar a la borda de la site, ia es funsionante en cuando on ia construi la nivel tre.

On crede ce sirca 200 laborores ia es en la construida a la tempo de la colasa, seguente un portavose per la servis de salva. Otra estimas par jornalistes pacistani sujesta un cuantia plu prosima a 150.

On ia estrae 98 persones vivente, de ci multe ia es alora ospitalida. Lo es difisil de sabe esata cuanto persones es ancora trapida, car la posesor e empleadas manejal ia es entre los en la construida.

La armada ia dise ce lo envia un ecipo de injeniores e espertas per partisipa en la salva.

En setembre de la anio pasada, a la min 24 persones ia mori en Lahore cuando la teto de un mascita ia colasa. E 17 persones, cisa plu, incluinte enfantes, ia es matada cuando un fabriceria ia colasa pos un esplode de gas en un area abital de la site en febrero 2012.

2015-11-04

La fonte Trevi es restorada

En Roma, acua cascade denova de la fonte Trevi, pos la fini de un renovi de 17 menses per la fonte famosa, a custa de 2,2 milion euros.

La fonte famosa en la capital de Italia ave cuasi 300 anios, e miliones de turistes visita lo en cada anio.

Ma la state povre de se strutur ia es revelada en 2012, cuando pesos de se cornisa detaliosa ia comensa cade pos un inverno noncomun sever.

La fonte ia deveni famosa en 1960 a la apare de la filma La dolce vita (La vive dulse). En la filma, la ator Anita Ekberg (ci ia mori plu temprana en esta anio) dansa en la acua con se costela Marcello Mastroianni, en lo cual reseniores ia descrive como un de la imajes sinematografial la plu durante de la sentenio 20.

Un ecipo de 26 restorores ia furni no sola un limpi completa a la fonte, ma los ia preveni ance ce lo desintegra. Los ia repara fesures e suportadores de aser, con intende de evita un reaveni de la momento en 2012 cuando pesos ia cade de lo.

Acua versa aora denova de la funda de se sena de dio maral, e un lumina nova esibi se fasada baroca e refletante.

La reparas ia es finansiada par Fendi, un compania italian de moda, fundida en Roma como un comersia de benes de cuoro en la desenio de 1920, e aora un parte de LVMH, un compania jigante franses de benes lusosa. Lo ia negosia un acorda cual permete ce lo pende un placa anunsiante prosima a la monumento per cuatro anios.

La compania ia spende ance 320 mil euros per refresci la Cuatro Fontes, un grupo de fontes min conoseda en la site.

2015-11-03

Un siclon prosimi a Iaman

Un siclon tropical rara prosimi a Iaman, traente ventas forte, pluve deluvial, e ondas potiosa.

Fotos e videos enlinia mostra acua versante longo la stradas de Mukalla, un site a la costa sude. La site es controlada par al-Qaida, e on reporta ce lo no es bon preparada per un tal desastre.

Plu temprana, la silcon Chapala ia colpa Socotra, un isola iamani distante, matante a la min un person. Multe abitores ala ia refuja se en scolas e cavas.

On crede ce Chapala es la tempesta la plu potiosa cual Iaman ia esperia en alga desenios.

La Organiza Meteorolojial Mundal de la Nasiones Unida ia descrive la siclon como "estrema sever", e ia dise ce la state de la mar sirca la sentro de la tempesta es "spetaculin".

A lundi, a 12:00 de ora global, la Sentro Juntada de Averti sur Siclones (un parte de la marina de la SUA) ia reporta ce Chapala jenera soflones de asta 240 cilometres per ora, corespondente a un siclon de categoria 4.

On predise ce la tempesta va ateni la tera a ueste de Mukalla entre 00:00 e 12:00 de ora global oji, e on previde soflones de asta 140 cilometres per ora.

La Sentro Juntada ia dise ce Chapala va comensa debili cuando aira seca emerjinte de Arabia erode la sistem de tempesta, e ce lo va diminui rapida pos ariva a la tera, xef par causa de interata con la tereno ru e seca de Iaman.

An tal, la siclon pote deluvia partes de la pais con asta 500 milimetres de pluve en du dias – la desuple de la promedia nasional.

Socotra es situada a 368 cilometres a sude de la costa iamani, en la Mar de Arabia, a este de Somalia.

Sirca 50 mil persones abita sur lo, parlante se lingua propre, e sentos de spesies esotica de planta esiste ala cual on trova en no otra loca sur tera, incluinte arbores de sangue de dragon.

La maior de la vila Hadibu sur la isola ia dise ce Chapala ia dana plu ca 80 casas, e ia lasa sentos de persones nesesante trata en ospital. On ia sorti plu ca mil familias, relocalinte los en scolas e campas a interna de la isola ante la colpa de la tempesta.

Entretempo, abitores de Mukalla – cual es controlada par un comite tribal e par jihadistes de al-Qaida de pos april – ia espresa ansia sur preparas local per la ariva de la tempesta.

Un abitor ia comenta: "La nivel de acua maral ia alti par nove metres e ia destrui la fronte de mar. Multe persones ia parti de se casas e xerca refuja en scolas. No la comite tribal no al-Qaida emprende laboras de aida, e la situa es vera mal."

2015-11-02

La mori de un om ci ia rapidi la destrui de la Mur de Berlin

Un ofisior major de Deutxland Este, de cual se anunsia improvisada a un confere jornaliste ia rapidi la destrui de la Mur de Berlin en 1989, ia mori a la eda de 86.

Günter Schabowski ia dise ce on va sutrae direta la restrinjes sur viaja de la sitadanes, e esta ia provoca desuples de miles de persones a traversa a la ueste.

Ofisiores ia intende introdui gradal la cambias, comensante a la dia seguente, ma la fola grande de persones ia aselera la cade rapida de la Mur.

La restrinjes ia es projetada per preveni un parti coletiva protestante a Magiar.

A min ca un anio plu tarda, Deutxland Este e Ueste ia es reunida a un sola pais, fininte 45 anios de divide.

Schabowski ia es un portavose per la rena este-deutx en 1989, cuando governas comuniste tra Europa este ia fronti un onda de protesta poplal.

La governa ia deside fasili la viaja de deutxes este a Europe ueste, en atenta para un deluvia de persones traversante a Magiar, cual ia abri mesma se fronteras ueste.

A 9 novembre, el ia fa un confere jornaliste per contorni la cambias, ma el ia ata tro temprana – la intende ia es no anunsia la cambias asta la temprana de la matina seguente.

Demandada cuando la cambias va reali, el ia responde: "Esta aveni, cuanto me sabe… direta… sin retarda."

En 1997, Schabowski ia es prisonida per tre anios per se rol en la politica este-deutx de fusili los ci atenta traversa a la ueste, ma on ia pardona el pos un anio.

El ia scrive un autobiografia en 2009, denunsiante la rena este-deutx como destinada a fali.

2015-11-01

Un avion rusce cade en Egipte

On investiga pos cuando un avion rusce ia cade en Egipte, matante tota 224 persones cual lo ia porta.

La ministro xef de Egipte, Sharif Ismail, ia dise ce un fali tecnical ia es la causa la plu probable, rejetante alegas par ativistes de Stato Islamiste ce los ia es culpable.

An tal, tre airocompanias – Emirates, Air France, e Lufthansa – ia deside no vola supra la Penisola Sina asta cuando on ave plu informas.

Rusia oserva un dia de lamenta pos esta, se desastre avional la plu mal.

On ia trova ja la rejistradores de la avion e ia envia los per analise.

La cade es un colpa major per la industria ja problemosa de turisme en Egipte, e la autoriosas egipsian labora multe per aselera la prosede de investiga.

La Airbus A-321 de la compania Kogalimavia ia cade en la temprana de ier, corta pos parti de la vacanseria Sharm el-Sheikh en dirije a San Peterburg en Rusia.

Hossam Kamal, la ministro egipsian de avioni publica, ia dise ce on ia vide no indica de problemes en la avion, contradisente lo cual un otra ofisior egipsian ia dise plu temprana: ce, ante perde contata con controlores de trafica airal, la pilote ia declara ce la avion esperia problemes tecnical e ia demanda urjente per  un atera a la airoporto la plu prosima.

En Rusia, la sposa de Sergei Trukhachev, la copilote de la avion, ia dise ce se sposo ia cexa sur la state tecnical de la avion.

Investigores rusce e franses ia junta se a la esplora gidada par Egiipte, con ance espertas de Airbus, cual ave se xeferia en Frans. Entretempo, un ecipo rusce ia ariva a la loca de cade per aida la labora de regania la corpos.

On ia abri un caso criminal contra Kogalimavia per "viole regulas de vola e de prepara per vola". La polisia ia xerca la ofisias de la compania.

Un portavose per Kogalimavia ia insiste ce la avion, cual ia ave 18 anios, ia es "intera secur per vola, a 100%", e ia ajunta ce la pilote ia ave 12 mil oras de esperia de vola.

En Sina mesma, do grupos jihadiste es ativa, combatosas aliada a Stato Islamiste ia declara en redes sosial ce la avion KGL9268 ia es cadeda par los. Ma Sharif Ismail ia rejeta esta, disente ce espertas ia confirma ce un misil de tera a aira no pote cade un avion cual vola a la altia (9450 metres) cual la Airbus ia ave.

Maksim Sokolov, la ministro rusce de transporta, ia dise ce "on no pote opina ce tal reportas es vera". On ia vide no atesta indicante ce la avion ia es un blanco.

La avion ia porta 217 pasajores, incluinte 25 enfantes, e sete ecipores. Egipte ia dise ce 213 de la pasajores ia es rusce e cuatro ia es ucrainsce, ma Rusia ia ajunta ce a la min un de la vitimes ia veni de Bielarus.

On ia retrae ja plu ca 140 corpos, prendente los a Qahira (Cairo). On previde ce la corpos prima rusce va es volada a San Peterburg oji.

Un ofisior ia descrive "un sena trajediosa" en cual la corpos de la vitimes ia es ancora bandida a se sejas. El ia ajunta ce la avion ia pare fende a du partes, pos cuando un parte ia arde e la otra ia colpa un roca.