2016-01-31

Italianes protesta contra reconose de duples ge

En Roma, miles de persones ia asembla per protesta contra un projeta de reconose legal duples ge e dona a los la direto de adota.

Protestores ia veni de tra Italia per es presente a la "Dia de Familia", cual ia inclui pretes catolica en un dansa de conga.

La parlamento ia comensa considera esta legi en la semana pasada, e va vota sur lo en febrero.

Italia es la sola de la nasiones ueste major cual no ia reconose ja legal la duples omosesal.

Multe de los a la asembla a la Sirco Masima, un loca antica de corsa de caros, ia teni banderas con la testo "Mal es mal an si lo deveni legal".

"Esta duples es multe fasil per formi ma ance fasil per colasa," un protestor ia dise. "En loca, nos opina ce la familia ave un valua grande e ce esta lege pote destrui lo."

Spesial controversa es un parte de la projeta cual va permete persones ge a adota la enfantes biolojial de se asosior.

Un otra protestor ia dise: "La familia tradisional es escluinte fundida sur un om e un fem. Nos no vole priva enfantes de la direto de ave un padre e un madre."

Organizores ia dise ce du milion persones ia asembla, ma esta es multe plu ca la loca pote conteni. Jornalistes presente ia estima la cuantia a sirca 300 mil.

En se intende de legali la projeta, la ministro xef Matteo Renzi es oposada par otra membros de se governa aliada. Se ministro de ambiente ia es a la asembla, e se ministro de internas ia tuita se suporta per lo.

Ma en la semana pasada, on ia asembla en sites major tra la pais, esijente un reconose legal per duples ge.

Italia ia reseta ja cexas de la Corte European de Diretos Umana sur se disposa a la sposi omosesal.

2016-01-30

Miama fini se parlamento militar en modo joiosa

Politicistes en Miama ia conclui la consenta final de se parlamento – e ance desenios de rena sola militar – con caraoce e dansas.

Un ambiente joiosa ia pleni la construida sever cuando politicistes, normal multe seria, ia pasa la oras final en canta e rie.

La plu de los no va reveni. De lundi los va es sustituida par parlamentores elejeda par un vota sin presedente en novembre.

Aung San Suu Kyi ia grasia se oposores per "abri la via" per se partito.

"Me crede ce tota de nos pote colabora per nos pais e popla, e estra e en la parlamento," la xef prodemocratia ia dise en se adirije a parlamento.

Usual, on no asosia la conseta de diverti con la parlamento en la capital Nay Pyi Taw, cual ia es dominada asta aora par omes sever de pasadas militar. Ma la oras final de esta periodo parlamental de sinco anios ia aspeta como la dia final de scola.

Parlamentores ia presenta cantas de adio. Shwe Mann, la presidente parlamental partinte, ia demanda ce tota acompania el en cuando el ia canta "Sonias pote deveni real".

De lundi, la Alia Nasional per Democratia de Suu Kyi va controla la parlamento, an si un cuatri de la sejas va resta en la manos de la militaria. Ance alga ministrerias major va resta tal.

Un de la taxes prima de la parlamento nova va es eleje un presidente per recambia Thein Sein, ci va sesa en esta posto a la fini de marto.

Suu Kyi, ci tra 15 anios ia es prisonida en se casa par la armada, es constitual proibida de presenta se per la posto car se fios es brites, no miama.

Ma on ave un rumor ce un acorda es ja cisa fada con la militara per permete ce el emprende la posto.

2016-01-29

La bebe prima de 28 anios en un vila italian

Un vila peti en Italia norde selebra la ariva de se bebe prima de pos la desenio de 1980.

La maior de Ostana, cual es situada en la montania de la rejion Piemonte, dise ce la bebe es "un sonia realida" per la comunia pico, cual ia esperia un diminui de se popla en la sento anios pasada.

La bebe Pablo, naseda en un ospital de Torino en la semana pasada, leva la cuantia de abitores a 85, an si sola sirca un dui abita permanente ala.

Giacomo Lombardo, la maior, dise ce an si mil persones ia abita en Ostana en la temprana de la sentenio 20, un cade constante en la taso de nase ia comensa pos la Gera Mundal Du. "La declina vera ia comensa en 1975, con sola 17 bebes entre 1976 e 1987, cuando la xico final ia nase – asta la peti Pablo."

Ostana atenta reversa la tende despoplinte, xef par crea empleas nova. La jenitores mesma de Pablo, Silvia e José, ia intende move a estra la pais a sinco anios ante aora, ma ia resta cuando on ia ofre a los la posible de maneja un refujeria sur un monte prosima.

Alga persones senti ce la esperia de acel familia premostra bon per otra comunias montanial.

Marco Bussone de la Uni Nasional de Vilas e Comunias de Monte ia dise: "Los es elejes individua, ma los multipli." El desira regulas nova como esentas de imposta de companias, per aida la rejenera de comunias.

Vilas peti tra Italia batalia la despopli car persones joven parti per xerca labora. Alga ia atenta reversa la situa par ofre casas vacua sin custa, e un maior ia foca an se ativia a para la declina de la popla esistente par "proibi" abitores de deveni malada.

En Ostana, on joia la ariva de Pablo con un selebra e – a la entra de la vila – un siconia artifis con paco peti azul a se beco.

2016-01-28

On descovre un sistem solal la plu grande

Astronomistes ia descovre un sistem solal la plu grande conoseda. Lo es composada de un planeta grande per cual un orbita de se stela ocupa cuasi milion anios.

Esta jigante de gas es a distantia de milion milion cilometres de se stela, e se orbita es plu larga a 140 veses ca la via de Pluto sirca nos sol.

On ia trova sola un cuantia pico de tal duples estrema larga, en anios resente.

La detalias apare en la jornal Notas Mensal de la Sosia Astronomial Reial.

La planeta, nomida 2MASS J2126-8140, ave entre des-du e des-sinco veses de la masa de Jupiter.

Dr Simon Murphy de la Universia Nasional Australian ia comenta: "Nos ia es multe surprendeda en trova un ojeto de masa tal basa a distantia tan grande de se stela relatada. Serta, los no ia formi en la mesma modo como nos sistem solal, de un disco grande de polvo e gas."

La sistem ave cuasi la truple de la grandia de la stela-con-planeta la plu larga conoseda a ante.

La duple ia es trovada par un esplora de stelas joven e nanas brun en la visina de la Tera.

Cuando rexercores ia descovre ce la du ave un distantia simil de nos – sirca 100 anios de lus – los ia compara la move de la du tra spasio e ia persepi ce los acompania la un la otra.

"Nos pote ipotese ce los ia formi entre 10 e 45 milion anios ante aora, de un filo de gas cual ia junta ambos en la mesma dirije," Murphy ia esplica. "La situa no pote es ce los ia pasa se vives en un ambiente multe densa. Los es liada en modo tan debil ce cualce stela prosima ia ta disturba completa se orbita."

2016-01-27

Senegal deteni 900 persones per razonas de securia

En Senegal, la polisia ia deteni 900 persones como parte de un opera de securia pos atacas par combatosas en Burcina Faso e Mali.

La arestas, cual no es relatada con terorisme, ia aveni a la fini de semana en la capital Dakar e en la site Thiès.

Temes sur securia en la rejion ia es levada par la atacas contra un otel e Mali e un otel e restorante en Burcina Faso. Ambos atacas ia es reclamada par islamistes combatosa.

Senegal ia es relativa secur asta aora, ma lo es un destina popular de turistes.

En la semana pasada, la governa senegales ia comanda ce oteles debe boni se securia, menasante clui los si los no obedi.

La ministro de internas ia dise ce la soldatos de securia senegales va aumenta se patrulias.

On senti ja esta presentia de securiores. On vide cuantias plu grande de polisiores, e multe xercas de veculos aveni.

La persones detenida a la fini de semana es suspetada no de terorisme, ma como parte de esta vijila de securia plu larga. Se ofendes varia de posese drogas a ave documentos noncoreta per se veculos.

Un portavose per la ministreria de justia ia dise: "La securia es refortida a tota niveles."

La organiza al-Qaida en la Magrib Muslim (AQMM) ia dise ce lo ia esecuta un ataca en Ouagadougou, la capital de Burcina Faso, cual ia mata 30 persones, a 15 janero.

Acel mesma grupo ia reclama ance la aseja de un otel en Bamako, la capital malian, en novembre de la anio pasada, en cual 20 persones ia mori.

AQMM ave se base en la deserto Sahara e vaga entre Mali, Nijer, e Jazair. Asta aora, Senegal ia evita un ataca major par combatosas islamiste, an si lo ave un frontera con Mali.

2016-01-26

On desculpa la ministro xef de Malaisia de froda

La avocato prosedente xef de Malaisia ia desculpa Najib Razak, la ministro xef, de froda en un scandal finansial.

La ofisia de la avocato jeneral ia dise ce la 681 milion dolares cual Najib ia reseta en se conta de banco ia es un donada de la familia reial de Arabia Saudi.

Criticistes ia alega ce la mone ia veni de 1Malaysia Development Berhad, un compania de investi nasional.

Najib ia nega sempre esta acusas, ma ia fronti presa a resinia par causa de los.

En pasada, ofisiores antifroda ia dise ce el ia reseta mone como un donada de un finansior stranjer.

En un anunsia a jornalistes a esta matina, Mohamed Apandi Ali, la avocato jeneral, ia declara ce la mone ia es "un donada personal" de la familia reial saudi, enviada entre la fini de marto e la temprana de april 2013.

El ia ajunta ce ofisiores antifroda ia confirma esta par intervisa atestores, incluinte la person ci los ia identifia como la donor.

"Me es sasiada ce no atesta esiste per mostra ce la donada ia es un forma de regala donada en modo frodante," el ia dise, clarinte ce la atestas no mostra ce la donada ia es usada como "un indui o recompensa" per dirije la atas de Najib en se rol como ministro xef.

Malaisia ia fa se vota jeneral la plu resente en maio 2013. Alora, la partito de Najib ia gania denova, ma con un de se resultas la plu debil de istoria.

La avocato jeneral ia dise ance ce Najib ia fa no crimin en relata con tre otra investigas liada, e ce tota esta investigas va sesa.

2016-01-25

Daex publici un video de la atacores de Paris

La grupo Daex ia posta un video cual pare mostra nove de la fusilores suspetada ante cuando los ia esecuta se atacas en Paris a 13 novembre.

La filma mostra alga de la omes destestinte prisonidas e esente militar instruida en Asia sude-ueste.

Lo mostra ance locas cual ia es atacada en la capital de Frans, lasante 130 persones mor.

La video ia es publicida a la canal comunical de Daex, e lo fini con imajes de parlamentores de la Rena Unida ci suporta bombardas contra Daex en Suria.

La presidente franses, François Hollande, ia dise ce la video no va preveni se pais de resiste terorisme. En un visita ofisial a Barat, el ia dise a reportores en Delhi: "No cosa va impedi nos; no menasa va fa ce Frans vasila en la batalia."

El ia ajunta ce la atacas ia es projetada en Suria ma preparada e organizada en Beljia.

La grupo SITE, cual segue la trasas de ativia enlinia de organizas jihadiste e blanca supremiste, ia dise ce la video ia es filmada en Raqqa, la capital par fato de Daex, ante la atacas en Paris.

Un de la imajes mostra un om ci sembla multe Abdelhamid Abaaoud, la xef de la atacores suspetada. El ia es de nasionalia beljes, e ia mori cuando la polisia ia ataca un aparte en Saint-Denis, prosima a Paris, a alga dias pos la atacas.

Nove atacores suspetada ia mori a 13 novembre o en la dias seguente, e du otras es ancora fujores.

La video descrive la atacores como "leones" ci ia "fa ce Frans ajena". Lo no es clar perce lo es publicida a plu ca du menses pos la atacas.

2016-01-24

On va prosede empleadas de museo sur la barba de Tutancamon

En Misre (Egipte), oto empleadas de museo va es prosededa sur se reafisa malfada de la barba a la masca de tomba de la faraon Tutancamon.

A un anio ante aora, ofisiores ia comensa investiga como la barba blu, con decoras de oro, ia deveni desfisada e alora rapida recolida.

La empleadas es acusada de descura e de viole normas profesal.

La ojeto de 3000 anios es un de la atraes la plu grande per turistes en Qahira (Cairo).

Conservores a la Museo Misri ia dona esplicas diferente de la manera en cual la barba ia deveni desfisada. Un sujesta ia es ce algun ia colpa asidental lo; un otra ia es ce on ia move lo car lo ia sesa ja es secur fisada.

Avocatos prosedente ia dise ce la laborores ia atenta "fretosa" asconde se era, usante cuantias grande de cola nonconveninte en atenta repara la ojeto.

Intera, los ia fa cuatro atentas de refisa la barba. A la tre veses plu tarda, los ia atenta ance sutrae la indicas de se atentas falida plu temprana.

La avocatos ia dise: "Iniorante tota metodos siensal de restora, la suspetadas ia atenta asconde se crimin par usa utiles agu de metal per sutrae partes de la cola cual ia deveni vidable, tal danante la obra de 3000 anios con an no un momento de consiensa.

Los ci va es prosededa inclui un dirijor pasada de la museo e un dirijor pasada de restora.

En otobre 2015, un ecipo de conservores gidada par espertas deutx ia comensa labora per sutrae la dana e refisa la barba en modo profesal. Pos un restora susedosa, la masca ia es denova publica esibida en desembre.

2016-01-23

Un nevon recordo en la SUA este

Un tempesta jigante de neva avansa longo la costa este de la SUA, traente plu ca 60 sentimetres de neva e ventas multe forte.

On ia recomenda ce plu ca 50 milion persones en plu ca des statos resta en se casas en cuando la tempesta move a norde.

Cisa la site capital, Washington, va trova se su un cuantia recordo de 76 sentimetres de neva cuando la tempesta pasa a via a soldi.

Ja oto persones ia mori, ses statos ia anunsia un state de crise, e on ia cansela miles de volas.

Esta depresa climal afeta un estende vasta de la pais, de Arkansas en la sude a Massachusetts en la norde-este.

Supramercatos ia deveni vacua de comedas entre un freta per compra furnis ante la cade de la flocos prima ier.

La servi meteorolojial nasional ia avisa ce la neva la plu sever va cade en la area de Washington entre la oras temprana de saturdi e la dui prima de la posmedia. La venta va es probable plu rapida ca 80 cilometres per ora.

En un tuita a 02:17 oji, la servi ia informa ce "un banda intensa de neva" move tra la area.

Un camera de ueb de la parce National Mall ia mostra la "state cuasi intera blanca" sur cual la meteorolojistes ia averti.

Abitores de la capital e suburbes ambiente en Virginia e Maryland ia es informada ce la neva ala va suprapasa cisa la recordo de 71 sentimetres cual ia cade en du dias en acel distrito 1922.

Con esta depresa climal prosiminte a la site la plu poplida de la pais, la maior de New York ia recomenda forte ce cadun prepara se.

En Washington, Baltimore e Delaware, catolicas ia es informada par ofisiores de la arcibispia ce un nonpartisipa de misa a esta soldi es permetable, par causa de la clima estrema mal.

2016-01-22

Un norsce para la furor de se auto par viaja sur la teto

En Noria sude, en temperatur de -17°C, un om vestida sola en se pantaleta ia preveni un furor de prende se auto, par viaja sur la teto de la auto.

La polisia dise ce la om ia deveni "multe sanguosa" pos cuando la auto ia colide con un parador de securia sur un ponto.

La furor suspetada ia es arestada par la polisia.

La posesor, ci ave 25 anios, ia velia a un ora temprana de la matina de mercurdi en Kristiansand cuando el ia oia la inisia de la motor de se Volkswagen Passat. El ia core a estra, ia saisi un de la manicos de la auto, e ia refusa desteni.

La furor ia atenta lansa el a via par move la auto contra la neva, ma la posesor ia trepa alora sur la teto e ia teni forte la baras cuando la auto ia aselera.

Jan Nesland, la xef de polisia local, ia dise ce la om ia susede viaja sur la teto de la auto tra alga cilometres, en modo simil a un sena tipal de la filmas enerjiosa de Hollywood.

La furor ia gida la auto a asta 90 cilometres per ora, ma la posesor ia susede rompe la fenetra retro con se jeno, e ia luta alora con la furor ante cuando la auto ia colpa la parador.

"An Bruce Willis no ia ta susede acel," Nesland ia comenta. "Lo no es un ata cual nos recomenda, ma aora, cuando el ia reali lo – bon, lo es un raconta stonante."

El ia ajunta ce an si on pote fasil rompe un fenetra de auto cuando on es normal vestida, lo es completa fol ce on viaja sur la teto a rapidia alta en pantaleta en temperatur su zero.

2016-01-21

La virus de Zica causa microsefalia en bebes brasilera

La statistica la plu resente de Brasil indica un plu crese en la cuantia de bebes parida con testas nonormal peti par madres infetada con la virus de Zica.

On ia trova aora 3893 casos de microsefalia de pos otobre, cuando la autoriosas ia persepi prima un aumenta. En la reporta corespondente de la semana pasada, la cuantia ia es 3500.

Zica es transmeteda par la morde de la moscito Aedes aegypti, cual sperde ance la maladias denge e xicungunia.

Brasil esperia se aveni la plu grande conoseda de Zica. La virus ia mata ja sinco bebes en la pais, e on investiga 44 otra casos.

En la semana pasada, Marcelo Castro, la ministro de sania, ia dise ce on developa un paceta de proba per identifia rapida la presentia de cualce de la tre viruses.

El ia anunsia ance un ajunta de finansia per aselera la developa de un vasin per Zica "en tempo recordo". A presente, la sola modo de combate la virus es par sutrae acua staniante do moscitos reprodui.

On ia vide un crese subita en la cuantia de casos de Zica en alga otra paises de America latina.

En Colombia, on ia reporta plu ca 13 500 casos. Alejandro Gaviria, la ministro de sania, ia dise: "Nos es la pais du [en America latina] pos Brasil par cuantia de casos reportada."

En Bolivia, la autoriosas ia reporta la caso prima de un fem ensinta con diagnose de Zica.

"El no ia viaja estra la pais. Esta es un caso interna," Joaquín Monasterio, la dirijor de servis de sania per Santa Cruz, un departe este.

A venerdi pasada, la Sentros SUA per Controla e Preveni Maladia ia avisa ce femes ensinta debe evita viaja a Brasil e otra paises de America latina e la Caribe do on ia rejistra avenis de Zica.

La avisa pertine a Aiti, Brasil, Colombia, Guatemala, Guian Franses, Martinic, Mexico, Onduras, Panama, Paraguai, Porto Rica, Salvador, Suriname, e Venezuela.

2016-01-20

Noria deporta migrores a Rusia

Noria ia reenvia 13 migrores a Rusia par bus su regulas nova, su cual on previde ce miles de otras va es deportada.

Sirca 5500 persones va es moveda de Noria a Rusia. Multe ia traversa la frontera artica par bisicle como parte de la enflue de migrores a Europa en la anio pasada.

En novembre, Noria ia anunsia ce lo va deporta direta cualcun ci ia ariva de un pais regardada como secur.

La bus prima ia parti de un refujeria en la vila Kirkenes.

A ante, Noria ia intende reenvia la migrores a Rusia par bisicle, par causa de regulas cual proibi veculos de porta persones a traversa de la frontera si los no ave la documentos nesesada. On ia proibi ance traversas par pede.

Miles de migrores ia traversa la frontera sur bisicles en 2015, pos descovre un fesur en la leges. La plu de los ia fuji de la gera en Suria.

Grupos de diretos umana ia condena la move a deporta la migrores. La temperatur a la frontera en la dia es sirca -30°C.

Rusia ia acorda ce Noria pote reenvia migrores con visa rusce par bus en loca de bisicle.

Un bus con 13 pasajores ia vade a la airoporto en Murmansk, un site de porto rusce, en la note pasada.

Un portavose per la servi migral de la polisia norsce ia dise ce tota la pasajores ave o un visa rusce valida o un otra permete de abita. El ia ajunta ce la deportas va continua e ce "lo cual va segue es un deside per la rusces".

A la fini de semana pasada, sirca 70 persones ia es traeda de otra sentros de refuja en Norsce a la reseteria en Kirkenes, a sirca 8 cilometres de la frontera rusce.

Sirca 40 persones ia fuji de un sentro en Vadsø con teme de es reenviada a Rusia. On ia reporta ance ce un grupo de migrores en Kirkenes ia comensa un juna per protesta contra se deporta prevideda.

La polisia norsce dise ce, en la dui du de 2015, 5500 persones ia ariva de Rusia tra la pasaje de frontera en Kirkenes.

Tota de los ia ave visas o otra documentos permetente ce los resta tempora o permanente en Rusia.

Grupos de diretos umana ia scrive a la ajenteria sur migrores de la Nasiones Unida, cexante ce on debe no regarda Rusia como un loca secur per refujadas.

Un cuantia cresente de migrores ia comensa traversa la frontera de Rusia a Noria par bisicle en la anio pasada, en atenta evita la viaja perilosa a Europa sur la Mediteraneo.

An si Noria no es un membro de la Uni European, lo es un parte de la Acorda de Schengen, cual on ia desinia per permete viajas sin fronteras.

2016-01-19

Un bomba umana en Peshawar

En Pacistan norde-ueste, a la min 10 persones ia es matada par un bomba umana sur un motosicle prosima a un punto de controla de polisia.

Sirca 20 persones ia es ance ferida en la esplode, cual ia aveni en la Areas Tribal Federal Manejada a la anteurbe de Peshawar.

Asta aora, no grupo ia nomi se como la atacor.

La bomba ia esplode prosima a la mercato Karkhano. Imajes televisada ia mostra veculos parcida en la visinia en flamas a pos.

A la min sinco polisiores es entre la mores. Se veculo ia es la gol de la bombor, seguente ofisiores.

Alga siviles ia mori ance, incluinte un enfante.

Batalias ferose ia aveni ja en la area entre soldatos de securia e talibanes pacistani.

En la mense pasada, un otra ataca en cual on suspeta un bomba umana en Pacistan norde-ueste ia mata 26 persones.

Lo ia esplode estra la ofisia de la Autoriosa Nasional de Datos e Enscrive en la vila Mardan, e ia es un de la atacas la plu matante pos la masacra de 150 scolores e enseniores par talibanes en desembre 2014.

2016-01-18

La 1% la plu alta es tan rica como la otra 99% combinada

La asosia Oxfam dise ce la 1% la plu rica de la mundo ave aora tan multe mone como la resta de la mundo combinada.

Lo usa datos de otobre de la compania Credit Suisse per se reporta, cual recomenda ce la xefes consentante en Davos en Suiz en esta semana ata contra la nonegalia.

Oxfam ia calcula ance ce la 62 persones la plu rica de mundo ave combinada tan multe mone como la dui la plu povre de la popla global.

Lo ia critica la labora de los ci promove per comersia e la cuantia de mone cual es tenida en paradisos finansial.

Oxfam ia predise ja ce la 1% va suprapasa la resta de mundo a esta tempo en la anio pasada.

Per trova se en la 10% la plu alta, on nesesa ave mone fisical e ativas con valua de $68 mil; e per es en la 1%, on nesesa $760 mil.

La statistica es acompaniada par avisas diversa, per esemplo ce informas sur la mone de persones suprarica es difisil per oteni. Credit Suisse dise ce se estimas de la proportio de ricia tenida par la 10% e la 1% "era probable en dirije tro basa".

Car lo es global, la reporta nesesa inclui ance alga estimas de niveles de ricia en paises per cual no statistica esata es disponable.

Sur la fato ce la 62 persones la plu rica ave la mesma como la 50% la plu povre, Oxfam ia comenta ce esta indica un consentra notable nova de ricia, car en 2010, la 50% ia es egalida par 388 individuas.

La reporta dise: "En loca de un economia cual labora per la ricia de tota, per jeneras futur, e per la planeta, nos ia crea un economia per la 1%."

Tra la periodo en cual Credit Suisse ia fa esta rexerca, la tende ia es ce la proportio de ricia tenida par la 1% la plu alta ia cade gradal entre 2000 e 2009, ma ia crese a cada anio a pos.

Vera, sola en la statistica de 2015, la proportio de la 1% suprapasa se proportio en la reporta prima en 2000.

Oxfam recomenda a governas ce los ata per reversa esta tende. Lo vole ce on paia un salario capas de susta a laborores, e ce on redui la difere creada par premios a dirijores.

Lo recomenda ance un fini de diferes de paia par jenero, compensas per curores nonpaiada, e la promove de diretos egal de imobila e erita per femes.

E lo vole ce governas ata contra la promoves per comersia, basi la premio de medisines, imposta la ricia e no la consuma, e fronti la nonegalia par se modo de spende publica.

2016-01-17

Iran abri un capitol nova

Iran ia "abri un capitol nova" en se relatas con la mundo, diseda par presidente Hassan Rouhani, corta pos la sutrae de punis economial contra la pais.

Ier, la AIEA (Ajenteria Internasional de Enerjia Atomal) – la gardor nucleal internasional – ia confirma ce Iran ia obedi un acorda desiniada per preveni lo de developa armas nucleal.

La plu de governas ueste ia bonveni la progresa, ma la ministro xef de Israel insiste ancora ce Tehran vole construi un bomba nucleal.

Benjamin Netanyahu ia dise: "Sin un reata conveninte a cada viole, Iran va descovre ce lo pote continua developa armas nucleal, destabli la rejion, e estende teror."

Ante la acorda, Iran ia ta pote rici un cuantia sufisinte de uranio per crea un bomba nucleal en mera un pico de semanas. Aora, esta ta ocupa plu ca un anio, e ta es vidable a esaminores internasional.

Rouhani ia dise ce la acorda dana no nasion, e ce tota es felis, estra los ci el ia descrive como provocores de gera en la rejion – Israel e alga membros de la Congresa SUA con politica fisada.

En un declara a se nasion a esta matina, el ia dise: "Nos, la iranis, ia estende nos mano a la mundo como sinia de aminia, e, lasante pos nos la enemias, suspetas, e conspiras, ia abri un capitol nova en la relatas de Iran con la mundo."

El ia ajunta ce la sutrae de punis ia es "un momento monumental" per la economia de Iran, disente ce la pais nesesa depende min de revenu de petrolio.

Federica Mogherini, la xef de politica esterna de la Uni European, ia dise ce la acorda par Iran e la sutrae de punis va contribui a un boni de pas e securia rejional e internasional.

Oji, Yukiya Amano, la xef de la AIEA, va visita Tehran per discute como continua monitori la program nucleal de Iran. "Multe de labora es ja fada afin nos ateni esta punto, e la reali de esta acorda va esije un labora simil," el ia dise.

Como parte de la acorda, Iran ia debe redui vasta se cuantia de sentrifugas e desasembla un reatador de acua pesosa, prosima a la vila Arak, car ambos ia es usable per aida crea armas nucleal. On ia pleni la reatador con beton.

Seguente estimas, la acorda va relasa cuasi $100 mil milion de ativas irani.

A mera oras ante la sutrae de punis, reportores ia sita la ministro de transporta irani disente ce on ia fa un acorda con la asosia Airbus en Europa per compra 114 avions nova de pasajor. E en novembre, Iran ia dise ce lo previde dupli se esporta dial de 1,1 milion bariles de petrolio, direta cuando la punis va es levada.

Iran ia manteni sempre ce se program nucleal es pasosa, ma oposores de la acorda – como alga republicistes de la SUA – dise ce lo no sufisi per preveni serta ce la pais pote developa un bomba nucleal.

A saturdi, la AIEA ia dise ce se oservores ia serti ce Tehran ia completi la pasos esijeda. Como resulta, John Kerry, la ministro de esternas de la SUA, ia comanda ce on sutrae la punis economial nucleal de se pais contra Iran.

Parlante en Wien, la capital de Osteraic, do el ia fa discutes con se corespondente irani, Kerry ia dise ce Iran "ia embarca pasos importante" sur cual multe persones "ia duta ce los va aveni a cualce tempo".

La AIEA ia dise ce lo ia instala un aparato a la compleso de Natanz per monitori la rici uranial de Iran en tempo real, per serti ce on manteni la cuantia a o su 3,67% como acordada con la potias global.

Plu temprana ier, on ia descovre ce Iran ia libri cuatro prisonidas irani-american, parente en un intercambia de prisonidas con la Statos Unida.

Un de los, Jason Rezaian, un jornaliste, ia es acusada de spia e prisonida en novembre pasada. La SUA ia dise ce lo ofre un pardona a sete iranis tenida per viole de punis economial.

2016-01-16

La polisia de Hongkong xasa un senglar

En Hongkong, la polisia ia catura un senglar pos un xasa de tre oras en un parce de site.

La animal ia inisia la xasa cuando on ia persepi lo en la Parce Hongkong en la distrito sentral, do on ia adormi lo con un fusil de medisin calminte.

Simil, a mercurdi, un senglar videda ante un otel prosima ia susede evita la polisia tra du oras.

E en maio, on ia catura un senglar cual ia deveni trapida en un boteca de vestes de enfante, ance en Hongkong.

Senglares no es noncomun en la areas campanial de Hongkong. Los pote deveni atacosa cuando on fronti los.

On no ia confirma ce la senglar ier caturada es la mesma como la animal cual ia evita la polisia en la media de la semana. Ma lo pare probable, car senglares vagante no entra frecuente a locas multe poplida.

La animal es un mas preadulte con longia de sirca un metre.

Se aventura ia saisi la atende de Hongkong, e multe usores de redes sosial ia tuita sur lo tra cuando la aveni ia developa.

La polisiores ia es destensada e ia fa fotos de la animal. Un atestor ia comenta: "Los ia tende forsa la senglar a un area, e lo ia tende evade. Los ia ave un disposa de 'denova la mesma'."

Jornalistes local reporta ce la senglar ave bon sania e ce on ia libri lo en un area de campania. Lo ia es adormida par un controlor governal de animales en cuando on ia nuri lo con pomas.

2016-01-15

Un siclon atlantica rara en janero

Un siclon rara ia formi en la media de la Atlantica, la prima en janero de pos 1938.

On ia averti la Asores, car Siclon Alex move en acel dirije con venta de rapidia de 140 cilometres per ora.

La Sentro Nasional SUA de Siclones ia dise ce proable lo va ateni oji la isolas.

Abitores previde ondas de altia de asta 18 metres e soflones de venta de asta 160 cilometres per ora.

De la sistemes tropical cual ia formi en la Atlantica de pos la comensa de arcivos ofisial, esta es un de la plu tempranas en la anio calendarial.

Entretempo, un otra tempesta tropical, Pali, ia formi supra la Pasifica, do un tal aveni es simil rara a esta tempo de anio.

Siensistes ia relata la siclones con ventas potiosa e temperatures alta de la surfas de mar, resultante de la fenomeno El Niño cual es nonusual forte en esta anio.

La Organiza Meteorolojial Mundal ia dise ce la aveni de El Niño en 2015 es entre la tre plu fortes de los notada de pos 1950.

A esta fenomeno, cual aveni a un ves en cada du a sete anios, on atribui la secia grave en multe partes de la mundo, e ance la inondas sever en multe otras.

Lo es un aveni natural de clima en cual la acuas calda de la sentro de la Pasifica estende a este en dirije a America Norde e Sude.

2016-01-14

Un ataca con bombas en Jakarta

Un serie de bombas ia esplode en Jakarta, la capital de Indonesia, segueda par batalias con fusiles en la stradas.

La esplodes ia aveni sirca la strada Thamrin, un distrito major de botecas e comersia, prosima a ambasadas e la ofisias de la Nasiones Unida.

La polisia dise ce cuatro atacores suspetada es entre a la min ses persones ci ia mori.

On ancora no sabe cual grupo ia esecuta la ataca.

Presidente Joko Widodo ia recomenda un responde calma, disente: "Tota de nos lamenta la vitimes mor de esta aveni, ma nos condena ance la ata cual ia disturba la securia e la pas e ia sperde teror entre nos popla."

Imajes de Jakarta mostra corpos sur la strada estra un caferia, e ance la porta a via de alga persones grave ferida.

Detalias resta nonclar, ma a la min un de la esplodes ia colpa un caferia de Starbucks estra Sarinah, un colie de botecas prosima a un punto de securia de polisia.

Atestores dise ce alga atacores ia entra a la caferia e ia detona esplodentes.

On ia comensa fusili cuando la polisia ia ariva, e otra esplodes ia aveni. On reporta ance ce la polisia ia xasa suspetadas.

Polisiores enarmada, xutores, e veculos blindada ia es enviada a la stradas de la capital, e la polisia ia proibi la asede jeneral a la area sirca la botecas.

Gen Budi Gunawan, la viscomandor xef de la polisia nasional, ia dise ce du persones ia es matada en un fusili estra un teatro, e ce du otras ia esplode se a la punto de polisia ante Starbucks.

Indonesia es ja atacada par grupos combatosa islamiste en la pasada, e ia es forte vijilante en la periodo de la anio nova, pos menasas de la grupo Daex.

Un portavose per la polisia nasional ia dise ce, an si on ancora no sabe clar ci ia fa la ataca, Daex ia averti sur "un conserta en Indonesia" cual va apare en novas internasional.

2016-01-13

La parlamento nijerian perde se documentos finansial

Sentos de copias de un proposa finansial ia desapare a la parlamento de Nijeria. Como resulta, la senato no ia pote comensa considera la proposa.

La pospone risca mali la crise economial de la pais, en cual lo reata a la custa cadente de petrolio.

Presidente Muhammadu Buhari ia furni la copias sur paper de se proposa finansial prima a ambos salones a la fini de la mense pasada. Lo ia detalia se projeta per estende la spende par 20% par plu emprestas.

La presidente ia entra a se posto en maio 2015. El ia promete ance boni la recolie de impostos e investi en otra industrias, incluinte la escava e la cultiva, per crea plu empleas.

Bukola Saraki, la presidente de la senato, ia fa un consenta privata con Buhari en la tarda de ier, ma on no sabe esce los ia discute la problem de la documentos mancante.

Copias de la documento per la salon basa no manca, e va distribuida oji.

La parlamentores es ja criticada per refusa redui se salarios e spendes cuando la economia la plu grande de Africa luta en se crise la plu grave de anios resente.

Alga senatores oposante ia reata coler a la informa ce la documentos manca, acusante la governa de asconde los. Ma un portavose per Buhari ia nega la alega, disente: "Cuando la proposa es enviada, lo sesa parteni a nos."

On previde ce la du salones va pasa sirca du menses en considera la proposa, con valua de $31 mil miliones.

2016-01-12

Trata medical es nesesada en vilas suri asejada

Sirca 400 persones en Madaya, un vila asejada en Suria, nesesa es rapida sortida per trata medical, seguente Stephen O'Brien, la xef umaniste de la Nasiones Unida.

El ia parla pos un consenta urjente de la Consilio NU de Securia per discute la crise en la vila ocupada per rebelores prosima a Dimashq.

La NU dise ce lo ia reseta reportas credable ce persones mori de famia.

Plu temprana ier, un convoia aidante ia trae comedas a 40 mil abitores de la vila cual es asejada par la governa tra menses.

Acel furni de aida ia es la prima cual on ia permete a Madaya de pos la media de otobre, cuando la Program Mundal de Comeda de la NU ia trae comedas per un mense per 20 mil persones.

Simultan, camiones aidante ia entra a du vilas asejada par soldatos-rebelores en Idlib, un provinse norde, pos un acorda entre la partitos bataliante. On dise ce la situa ala en Foah a Kefraya es ance grave, con un cuantia estimada de 20 mil persones trapida ala de pos marto.

O'Brien ia dise: "Nos debe atenta fa esta e organiza la trata medical tan pronto como posible, o los va es en peril grave de perde se vives e mori par causa de malnuri o complicas de otra razonas medical."

Un pico de abitores de la vila ia es permeteda a sorti, e on ia vide los espetante con se posesedas.

44 camiones ia ateni Madaya de Dimashq ier, operada par la NU, la Comite Internasional de la Crus Roja, la Cresente Roja Suri, e la Program Mundal de Comeda. La convoia ia trae comedas e medisines, covreletos, materias refujante, e sapon, e on ia previde ce la distribui va continua tra la note.

Pawel Krzysiek de la Crus Roja ia comenta: "La persones ia veni a cada minuto sinco con la demanda: 'Escuta, vos ia trae comedas? Vos ia trae medisin?' Alga persones surie e saluta nos con mano, ma multe es simple tro debil, con espresa multe sombre, tro fatigada."

Un abitor, Hiba Abdel Rahman, ci ave 17 anios, ia dise: "Me ia vide un om joven ci ia mata gatos e ia presenta la carne como coneo a se familia. Alga persones ia esplora baldones de dejetadas. Otras ia come erba. Nos ia solisita comedas de la combatores, ma los ia refusa dona a nos."

Madaya es situada a sirca 25 cilometres a norde-ueste de Dimashq e a 11 cilometres de la frontera con Lubnan. Lo es asejada de pos la temprana de julio par soldatos de la governa e se aliadas en la promove Hizbullah islamiste xia de Lubnan.

Entretempo, 21 camiones ia entra a Foah e Kefraya a lundi. Los ia porta comedas fundal – incluinte ris, olio vejetal, farina, zucar, e sal – e ance acua, lete artifis per bebes, covreletos, medisines, e furnis medical.

A solid, la asosia carital Dotores Sin Fronteras ia dise ce 28 persones ia mori de famia en Madaya de pos 1 desembre. Esta cuantia inclui ses enfantes con min ca un anio.

An tal, ofisiores suri e Hizbullah ia nega ce moris ia aveni en la vila. La ambasador NU de Suria, Bashar Jaafari, ia dise: "La governa suri no obliga e no va obliga cualce politica de famia contra se popla propre."

On ia acusa ce la xefes de la rebelores ia vende comedas a la abitores de Madaya a custas estrema inflada.

Asejas es un cualia comun de la gera interna en Suria. Asta 4,5 milion persones abita en areas difisil per asede, incluinte cuasi 400 mil en 15 locas asejada ci no pote reseta aida cual ta salva vives.

2016-01-11

David Bowie mori

La cantor engles David Bowie ia mori a la eda de 69 anios, pos sufri de canser.

Se fio, la dirijor Duncan Jones, ia confirma la novas, e on ia publici un declara a se contas ofisial de redes sosial:

"David Bowie ia mori pasosa oji, ensircada par se familia, pos un batalia corajosa de 18 menses con canser. An si multe de vos va comparti esta perde, nos solisita ce vos respeta la privatia de la familia en se tempo de lamenta."

La cantor ia publici se album la plu resente, Blackstar (Stela negra), a venerdi, se aniversario. Lo inclui sola sete cantas, ma reseniores ia aclama lo.

Rumores ia esiste sur la sania de Bowie tra anios. Se presenta direta final ia es a un conserta carital en New York en 2006.

Se avansa grande ia aveni con la album The Rise and Fall of Ziggy Stardust and the Spiders from Mars (La alti e cade de Ziggy Stardust e la Aranias de Marte) en 1972.

Se cantas susedosa inclui "Let's Dance" (Ta ce nos dansa), "Space Oddity" (Strana de spasio), "Heroes" (Eroes), "Under Pressure" (Su presa), "Rebel Rebel" (Rebelor rebelor), "Life on Mars" (La vive sur Marte), e "Suffragette City" (Site de sufrajetas).

El ia es ance bon conoseda per se crea de Ziggy Stardust, se personalia alternativa.

Plu, el ia forja un carera de ator, incluinte se rol como un estrateran xercante aida per se planeta morinte en The Man Who Fell to Earth (La om ci ia cade a la Tera) par Nicolas Roeg en 1976.

Bowie ia fa un periodo de tre menses como la Om-Elefante en un teatro de Broadway en New York en la desenio de 1980.

El ia es la stela ance de la filma final de Marlene Dietrich, Schöner Gigolo, armer Gigolo (Jigolo bela, jigolo povre) de 1978, e ia fa la rol de Pontio Pilato en The Last Temptation of Christ (La tenta ultima de Crist) par Martin Scorsese en 1988.

Bowie ia nase con la nom David Jones en London a 8 janero 1947, ma ia cambia se nom en 1966 pos la fama enorme de Davy Jones de la bande The Monkees.

El ia partisipa en bandes diversa ante suscrive un acorda con la compania Mercury Records, cual ia publici se album Man of Words, Man of Music (Om de parolas, om de musica) en 1969, incluinte "Space Oddity", la canta prima par el cual ia ateni la numero un en la parada de susedes en la Rena Unida.

2016-01-10

Casa abrida en mascitas franses

Mascitas franses ia invita nonmuslimes a entra, per atenta boni la comprende de islam en Frans.

En esta fini de semana de "casa abrida", on ofre a visitores bevidas calda, pastas dulse, mostras de caligrafia, e discutes.

La corpo muslim xef de la pais, la Consilio Franses de la Fida Muslim (CFFM), vole crea un distantia entre la varia normal de islam e la atacas jihadiste resente.

La stratejia segue a un anio pos la matas a Charlie Hebdo en Paris. Fusilores jihadiste ia mata 17 persones a locas diversa en la capital, incluinte la ofisias de la jornal satira Charlie Hebdo e un supramercato caxer.

Onorante la aniversario de la matas, presidente François Hollande ia desveli ier un placa de tribui a un de los ci ia mori, la polisior Clarissa Jean-Philippe.

Frans ia recorda ance la cuatro ostajes iudi ci ia mori a la supramercato.

La pais es ancora en un state de crise pos la atacas en Paris en novembre, fada par fusilores liada con la grupo Daex, cual ia mata 130 persones.

Sentos de mascitas franses partisipa en esta abri de casa, cual on descrive como "un tas de te fratin".

Anouar Kbibech, la presidente de la CFFM ia dise: "La intende es crea un spasio do persones pote asembla e encontra adorores muslim normal e tota de nos otra sitadanes."

El ia clari ce la CFFM desira usa la aniversario de la atacas a Charlie Hebdo per "asentua la valuas real de islam, per coreti la clixes sur relatas con violentia e terorisme".

2016-01-09

Un video arenga Putin sur un salva tro tarde de nevon

Un survivor de un venton de neva ia envia un mesaje video coler a Vladimir Putin, la presidente rusce, pos cuando sirca 80 persones ia spende 15 oras en espeta salvores en la area Orenburg de Rusia.

Un motoriste ia mori jelada e multe otras ia sufri ulseras jelal cuando se veculos ia deveni trapida sur un via major en la sude de la Montes Ural.

Pavel Gusev ia dise ce Rusia envia aida a los estra la pais ma "nos no pote salva nos popla propre".

Cuais un dui de milion persones ia regarda se video a YouTube.

La mesaje dise: "Me apela a tu, Vladimir Vladimirovitx – me demanda ce tu maneja tota de esta, aida los ci ia sufri ulseras jelal sever… e ordina nos ministreria de servis de crise."

Como diseda par Gusev, a alga telefonis per aida, la empleadas de la servi de salva ia responde: "Vos ia debe resta a casa. Vos ia ata mal en vade a estra."

Avocatos prosedente en la Comite Investigal de la pais esamina aora la responde crisal a la note de 3 janero, cuando autos ia deveni perdeda su neva sur la via de Orenburg a Orsk. Survivores dise ce la nevon ia es tan forte ce on ia pote vide cuasi no cosa.

On reporta ce un polisior, ci, en la ativia de salva, ia dona se jacon de laboror a un fem jelante e se gantos a un om, va reseta un medalia de la ministeria per internas areal.

La aida par Dabil Mascudov es regardada como un ata eroin. El mesma es aora ance en ospital, con ulseras sever a se ditos.

Patriarca Cirill, la xef de la Eglesa Ortodox Rusce, ia dise ce adorores debe prea ce otra persones condui tan nobil como acel polisior.

2016-01-08

Refujadas maladi en la fria

Con la ariva de temperatures jelante, medicistes laborante a campas aidante refujadas en la Balcanes dise ce los nota un alti de la cuantia de migrores maladinte.

La area esperia temperatures tan basa como -11°C.

La asosias carital Corpop Medical Internasional e Medicistes Sin Fronteras dise ce la plu de pasientes sufri de problems respiral, per esemplo la broncite e la gripe.

Un ansia esiste ance sur los ci refusa o no xerca trata.

A la puntos xef de refujadas a la fronteras serbsce con Macedonia a la sude e con Corvatsca a la norde, on ofre aida medical, vestes caldinte, e comedas.

Corpo Medical Internasional opera un clinica tempora a la stasion ferovial en Sid, un vila pico en Serbia norde.

La xef de acel ecipo, Sanja Djurica, ia dise: "En la semana pasada, cuando temperatures ia es min sever, nos ia vide sirca 50 o 60 persones per dia. Aora en esta semana, cuando la temperatur ia basi, la cuantia es aprosima 100 per dia en loca. Cuasi tota de los sufri de maladias respiral causada par la fria."

Medicistes ia asentua ance la efeto psicolojial grande a los ci fa esta viajas migrante.

En Sid, on dispone psicolojistes, e an si la refujadas tende resta ala per mera un pico de oras, medicistes e aidores ave alga tempo per furni "aida prima psicolojial" a los.

Djurica ia comenta: "Lo es un caso de comforta emosial, escuta empatica, e coraji tecnicas de maneja. Los es grasiosa per encontra algun ci vole escuta los."

2016-01-07

La comersia de asiones xines es denova pausada

La comersia en mercatos xines continental ia pausa per la dia, pos cuando asiones ia cade par plu ca 7% a la ves du de esta semana.

La regula "rompesircuito", introduida per redui volatilia, ia es ativida en la tredes minutos prima de comersia.

Investores ia deveni ansiosa cuando la banco sentral ia ata per debili la iuan. Esta ia indica ce Beijing desira aumenta se esportas, car cisa la economia de la pais lenti plu ca prevideda.

La indise CSI 300, cual ia causa la para de comersia, ia cade par 7,2% a 3284,74. La indise es un colie de asiones major de Xanghai e Xenjen, e lo ia comensa par ativi un pausa de 15 minutos cuando lo ia cade par 5%.

La indise Xanghai Composada, un mesurador de comersia en Xina, ia cade ance, par 7,3% a 3115,89, e la Xenjen Composada, cual conteni multe asiones tecnolojial, ia perde 8,3% ante la sesa completa de comersia per oji.

Esta ia es la dia la plu corta de comersia en la istoria de 25 anios de la asioneria de Xina.

Pos la para, la Comision Regulante de Titulos Finansial de Xina ia anunsia ce asionores major no pote vende plu ca 1% de la asiones de un compania en la tre menses comensante a 9 janero.

Un regula de ses menses cual ia proibi ce asionores major vende se asiones va fini a venerdi.

2016-01-06

Corea Norde proba un bomba de idrojen

Corea Norde dise ce lo ia susede proba un bomba miniaturida de idrogen. Si esta es vera, lo es se proba nucleal cuatro de pos 2006.

La anunsia ia es fada pos cuando on ia deteta un trematera de grandia 5,1 en la visinia de se loca de probas nucleal a Punggye-ri.

Esta es la ves prima a cual Corea Norde ia declara ce lo ia proba un bomba de idrojen, plu potiosa ca un bomba atomal.

Espertas internasional ia espresa duta sur la capasia nucleal de la pais.

On ia comensa suspeta ce un proba suteran ia aveni cuando la Jeometre Jeolojial SUA ia dise ce la episentro de la trema, detetada a 01:30 de ora global, ia es situada en la norde-este de la pais, a sirca 50 cilometres de la site Kilju, prosima a Punggye-ri.

Alora, en un anunsia surprendente, un presentor de novas en la televisa nasional de Corea Norde ia dise: "La proba prima de bomba de idrojen en la republica ia es esecutada con susede a 10:00 a 6 janero 2016."

Cisa dias o semanas va pasa ante cuando esaminas autonom pote confirma la declara.

En la mense pasada, Kim Jong-un, la xef de la pais, ia dise ce Pyongyang ia developa un bomba de idrojen, an si multe espertas ia es setica.

Si on confirma esta, on va conclui ce Pyongyang intende continua se program nucleal con poca ansia sur la custas political e diplomata grande cual va acompania lo.

A alga oras ante la ativia sismica, jornales en Corea Sude ia reporta ce Pyongyang ia proba xuta un misil balistical de un sumarina en la tarda de desembre. Lo no es clar esce acel proba ia susede, ma en maio 2015, Corea Norde ia declara un lansa susedosa de un misil de un sumarina.

2016-01-05

Porto Rica luta per paia se detas

Porto Rica, un teritorio de la Statos Unida de America, ia fali paia se detas a la ves du de sinco menses. La isola luta contra un deta enorme e un economia debil.

En la semana pasada, la governor de la isola ia dise ce lo va paia la plu, ma no tota, de la cuasi mil milion dolares cual lo debe, par usa de medios finansial estracomun.

Governor Alejandro Padilla ia proposa ce on dona a la isola diretos de bancarotia como los a la continente. La Congresa SUA va debate esta en la semanas veninte.

En tota, la isola debe sirca 70 mil milion dolares, sur cual Padilla ia dise ce lo no pote paia lo.

La paia la plu grande ier, de 328,7 milion dolares, ia es contra la deta de obliga jeneral.

Plu ca un dui de esta paia ia es fada par prende mone de reservas per otra ajenterias governal, en un move spesial con intende de serti la paia de la deta de obliga jeneral, como garantiada par la constitui.

Como resulta de la manobra, la isola ia fali paia sirca 37 milion dolares de obligas finansial liada a infrastrutur e instituis de developa.

Padilla ia dise ce la isola prepara se per reseta prosedes legal, avertinte ce "cada dolar usada per paia a avocatos va es un dolar nondisponable per paia a creditores".

En menses resente, el ia averti repetente sur un crise umaniste cual risca emerji, e ia recomenda ce la Congresa SUA estende protejes de bancarotia a la teritorio.

Su leges federal, statos e teritorios de la SUA no pote declara se como bancarota, ma sites e emprendes publica sur la continente pote. La emprendes publica de Porto Rica porta detas pesosa, ma no ave la mesma direto de bancarotia.

Republicistes oposa estende esta direto a la isola. La Casa Blanca, an suportante la posible de bancarotia, ia defini ce on no pote ofre un suporta finansial.

La laboras par la partito democrata per aida la isola ia es impedida en debates finansial en desembre.

En cuando la crise de deta sur la isola ia apare, se economia ia bambola, e comentores ia descrive lo como "la Elas de la Caribe".

12,5% de la persones capas de labora sur la isola es nonempleada – sirca la duple de la cuantia en la SUA – e sirca 45% de persones es povre.

La isola fronti un fatura de sirca 400 milion dolares en febrero e un otra, multe plu grande, de 1,9 mil milion dolares en julio.

Padilla ia dise: "Esta no es retorica political; esta es matematica. Lo es multe simple: nos no ave la mone per paia."

2016-01-04

Sveria ajunta controlas de identia a se frontera

Sveria ia comensa esamina la identia de viajores de Danmarc, per atenta redui la cuantia de migrores ci ariva en la pais.

On va refusa entra a cualce viajor ci vole traversa la ponte Öresund par tren o bus, o ci vole usa la naveta de mar, si el no ave la documentos nesesada.

Viajores dial a Sveria va debe aora cambia se tren a la airoporto de København e pasa tra puntos de identia.

Miles de tal viajores traversa la ponte a cada dia. Lo lia la sites svensce Malmö e Lund con la capital dansce, København.

Per obedi la regulas nova forsada par Sveria, on ia erije un serca sirca un de la plataformas a la stasion ferovial de la airoporto Kastrup en København.

Viajas direta de la stasion xef de ferovia de København, traversante la ponte Öresund a Sveria, va es no plu disponable. Companias ferovial ia redui la cuantia de trenes a Sveria, avertinte sur un posible de retardas major.

On previde ce la cambias va ajunta sirca 30 minutos a la viaja presente de 40 minutos.

Per aplica la controlas nova, la governa svensce ia oteni un esenta tempora de la acorda Schengen sur fronteras abrida en la Uni European.

En la mense pasada, SJ, la compania nasional de ferovia en Sveria, ia anunsia ce lo va sesa se servis a e de Danmarc car lo no pote fa la esaminas de identia cual la lege svensce nova esije.

Su la lege, companias transportante va es multada si viajores a Sveria no ave un fotoidentia valida. SJ ia dise ce lo no va ave la tempo nesesada per controla los ci viaja entre København e Malmö par la ponte Öresund.

Milion migrores ia ariva en Europa par tera e mar en 2015, seguente la Organiza Internasional de Migra. Como Deutxland, Sveria es un de la destinas xef per migrores. Sveria ia reseta plu ca 150 mil solisitas de refuja en la anio pasada; contrastada, Danmarc previde reseta sola 20 mil refujadas en esta anio.

2016-01-03

Coleria a la esecuta de un eglesor xia

La esecuta par Arabia Saudi de un eglesor xia major, xec Nimr al-Nimr, ia provoca coleria e protestas en comunias xia tra acel area.

La condena ia es gidada par Iran, xia renada, e la oposor local xef de Arabia Saudi, suni renada.

Protestas ia aveni en la Provinse Este de Arabia Saudi, en Barain, e en alga otra paises.

Nimr mesma ia suporta protestas coletiva en la provinse en 2011.

El ia es un eglesor franca ci ia espresa la sentis de los en la minoria xia de Arabia Saudi ci senti marjinida e prejudida. El ia es entre 47 persones esecutada ier, pos cuando on ia judi el como culpable sur ofendes teroriste.

Ofisiores irani ia es forte en se condena. La ministreria de esternas ia dise ce la rena suni va paia un preso alta per se ata, e lo ia clama la visambasador saudi en Tehran en protesta.

A se turno, Arabia Saudi ia clama la ambasador irani e "ia dona a el un nota de protesta con parolas forte sur la declaras atacosa par Iran".

La pajeria de la gidor suprema irani, aiatola Khamenei, ia posta un imaje comparante la esecuta a la atas de la grupo Daex.

Como la potia xia de la area, Iran ave un interesa grande en la relatas de minorias xia en Asia sude-ueste, tal ce lo ia es nonevitable ce la du paises va desacorda sur la trata de xec Nimr.

Ma un de la consernas xef de la saudis es lo cual los regarda como la influe cresente de Iran en locas como Suria e Irac.

2016-01-02

Soldatos franses es atacada estra un mascita

Soldatos ia fusili un om estra un mascita en la sude-este de Frans cuando el ia gida un auto contra los.

Como reportada par la polisia, la gidor ia feri un de la cuatro soldatos gardante la mascita en Valence.

El ia es fusilida a se braso a gama, ma se feris no menasa se vive, e el es aora en ospital.

La fortes de securia franses es ancora estrema vijilosa pos la atacas en Paris a 13 novembre.

On no sabe la motiva per la ataca, cual ia aveni entre sesiones de prea, cuando multe persones ia es estra la construida.

La polisia dise ce la om ia dirije se auto a la soldatos a du veses. Los ia xuta a el cuando el ia reversa ja se auto e ia es reveninte en dirije a los pos se atenta prima.

On dise ce el ave 29 anios e veni de Lyon, un site a distantia de un ora de Valence.

Un baleta deviante ia colpa la sura de un person vea en la visinia.

La ministro de defende, Jean-Yves Le Drian, e la ministro de internas, Bernard Cazeneuve, ia declara ce la soldatos ia fusili per defende se.

La maior local, Nicolas Daragon, ia loda se autorestrinje "notable". El ia dise ance a jornalistes local ce la mascita es "nonestremiste".

Sirca des mil securiores es ancora posada sirca la pais per proteje locas delicata.

2016-01-01

Un focon de otel a la selebra de anio nova en Dubai

Un focon enorme ia engoli un otel alta en la sentro de Dubai ante un presenta de focos artal per selebra la anio nova.

Detrito ardente ia cade de la construida, cual ave 300 metres de altia, en cuando pompores ia batalia la flamas.

Cuando la medianote ia ariva en la Amirias Arabi Unida, la pirotecnical ia comensa como intendeda, a la rascasielo la plu alta de mundo, la Burj Khalifa, prosima a la focon.

On ia susede controla la arde pos sirca du oras, e 16 persones ia es ferida.

Autoriosas ia previde la ariva de asta du milion persones en la sentro de la site per la selebra. On ia demanda ce folas parti de la area direta sirca la otel ardente, nomida Address Downtown, de cual on ia sorti tota persones.

Flamas ia pare consuma multe de la construida en min ca des minutos. La construida ave 63 niveles, e conteni no sola la otel de sinco stelas ma ance un compleso de apartes.

La governa de Dubai ia tuita ce 14 persones ia es  minor ferida, un person ia sufri feris moderada, e un otra ia esperia un ataca de cor par causa de "suprafoli e fuma a la loca de arde".

On reporta ce la focon ia comensa a la nivel 20, cisa cuando un cortina ia comensa arde, ma on ancora no sabe serta la causa.

Esta pirotecnical es un aveni de prestijia grande per Dubai, e la autoriosas vole ce la imajes cual on va recorda es la focos de arte, no la focon de arde.

Aora Oji desira un bon anio nova a tota se lejores.