2016-05-31

Ofisiores saisi tigres de un templo tai

En Tai, autoriosas sur viventes savaje ia comensa sutrae tigres de un templo budiste, pos acusas de contrabanda e maltrata de bestias.

On ia move tre de la 137 tigres a la templo en la provinse Kanchanaburi a lundi. La taxe emplea 1000 persones e va ocupa la semana intera.

La monces nega tota la alegas. Los ia resiste prima, ma ia sede cuando on ia presenta un comanda de corte a los.

On prende la tigres a refujerias per animales.

La Wat Pha Luang Ta Bua, o Templo de Tigres, es un destina popular per turistes. Tra anios lo resiste ja atentas ofisial de prende la bestias a via.

Visitores pote nuri la tigres e fa fotos pos un paia, an si on ia proibi la templo de esije mone per entra.

"Nos ave un comanda de corte a esta ves," Adisorn Nuchdamrong, la visdirijor jeneral de la Departe de Parces Nasional, ia dise. "Esta es diferente de veses presedente cuando nos ia demanda sola per la coopera de la templo, lo cual no ia susede."

On ia acusa la monces a la templo controversa de eleva tigres en modo nonlegal e de contrabanda animales.

Un invade ofisial en febrero de la anio pasada ia descovre ce on teni xacales, calaus, e ursos asian a la santeria sin la permete nesesada.

2016-05-30

La maraton la plu alta de mundo

Un soldato nepali ia vinse en la maraton la plu alta de mundo sur Monte Sagarmata (Everest).

Bed Bahadur Sunuwar ia es un de plu ca 150 corores local e stranjer en la corsa, cual ia comensa a la campa de base en Nepal.

La corsa aveni a cada anio a la aniversario de la asende prima de la monte par Tenzing Norgay e Edmund Hillary en 1953.

La ganior ia completi la corsa, cual ia fini a un punto plu basa par sirca 2000 metres, en cuatro oras e des secondos.

"La via es multe defiosa ma ance stonante," la om de 29 anios ia dise. "Me senti orgulosa de es la ganior."

Aprosima 30 corores local ia es acompaniada par sirca 130 de multe otra paises, incluinte Xina, Australia, la Rena Unida, e la Statos Unida.

Un om nepali ia vinse ance en 2015.

Esta es la saison prima de trepa sur Sagarmata pos du saisones desastrosa. Un avalanxa ia mata 16 gidores de montania en 2014, e un trematera matante ia aveni en la anio pasada.

Ma ance la saison de 2016 es ja no sin trajedia. Alga persones ia mori de maladia de altia en un periodo spesial ativa sur la monte.

A venerdi, ofisiores ia anunsia ce los ia trova la corpo de un trepor barati sur la inclinas alta, aumentante la cuantia de persones ci ia mori en esta saison asta cuatro.

2016-05-29

Colpas de lampo en Europa

En tempestas de estate, colpas de lampo en alga paises european ia mata un om e ia causa feris grave.

La om ia mori en Polsca sude. El ia es colpada par lampo cuando el ia es desendente un monte.

Tre persones ia es grave ferida a un max de futbal joven en Deutxland.

En Parc Monceau en Paris, un selebra de aniversario de nase ia es colpada, e 11 persones ia es ferida. Oto de los es enfantes de sirca nove anios, e ses es en un state grave.

Lampo ia colpa la parce cuando la grupo ia xerca refuja su un arbor.

Un pompor, Pascal Gremillot, ia es acaso prosima, e ia pote rapida dona aida prima e masajes de cor. Ofisiores ia dise ce la situa ta es multe plu mal si el no ta es presente.

A la max en Hoppstädten en la sude-ueste de Deutxland, la arbitror ia es un de tre adultes ci ia sufri feris grave. El ia es direta colpada par lampo, se cor ia para, e on ia move el a ospital par elicotor.

Un om du ia es ance transportada a ospital par aira, e un otra ia es ospitalida par ambulansia. Tota la tre es en se desenio sinco.

Reportas inisial ia indica ce 35 persones ia es ferida a la max, ma multe ia es prendeda a ospital mera como medio preveninte.

Atestores a la max ia dise ce on ia ave no nubes oscur. La sielo ia es azul cuando la lampo ia colpa corta pos la sibila final.

Un deluvia de pluve ia para la tenis a la Internasionales de Frans, cuando la campion defendente Serena Williams ia es a punto de comensa un max contra Kristina Mladenovic.

La tempestas ia developa car un masa de aira multe calda e umida ia covre Europa norde-ueste a la mesma tempo como la aira plu alta en la atmosfera ia deveni plu fria. Esta ia destabli la atmosfera, produinte tempestas con rapidia surprendente.

Tra multe de la rejion, la temperatur ia ateni 25°C, plu ca sufisinte per provoca la nubes tempestal.

Tal tempestas crea pluve forte, graniza, e multe colpas de lampo. Los es tipal la plu intensa en la temprana de la posmedia. Los no es noncomun en la estate en Europa continental, ma la avenis de ier ia afeta un area plu vasta ca normal.

En ajunta, la fato ce los ia aveni a fini de semana, en un clima jeneral bela e calda, ia aumenta la probablia de un mal efeto a persones.

On previde plu tempestas oji per la sude e este de Deutxland, per Txesco, e per la dui ueste de Polsca.

2016-05-28

Obama visita Hiroshima

Barack Obama ia deveni la presidente corente prima de la SUA ci ia visita Hiroshima de pos cuando lo ia es nucleal atacada en la Gera Mundal Du.

El ia dise ce la memoria de 6 agosto 1945 debe pali nunca, ma el no ia demanda es pardonada per la ataca par la SUA, cual ia es la bombi nucleal prima de mundo.

En un parla formal, Obama ia recomenda ce la nasiones xerca un mundo sin armas nucleal.

A la min 140 mil persones ia mori en Hiroshima, e 74 mil plu ia es matada pos tre dias par un bombi du a Nagasaki.

Obama ia comensa par visita la Museo Monumental de Pas de Hiroshima ante pasea a la Parce Monumental de Pas, acompaniada par la ministro xef Shinzō Abe. Ambos ia sta ante la flama eterna. Obama ia pone un garlanda, segueda par Abe.

"Moria ia cade de la sielo e la mundo ia es cambiada," Obama ia dise en se parla, notante ce la bombi ia mostra ce "umanas posese un medio per destrui se". El ia dise ce la memoria de la bombi "permete nos a combate autosasias, nuri nos imajina moral, e permete ce nos cambia".

Sur armas nucleal, el ia dise: "Nos debe ave la coraje per evade la lojica de teme, e xerca un mundo sin los."

Obama ia parla con du survivores, abrasante Shigeaki Mori, ci ave 79 anios. "La presidente ia jesti como si el intende abrasa me, donce nos ia abrasa," Mori ia dise a pos.

La presidente ia parla ance con Sunao Tsuboi, ci ave 91 anios.

El ia atera plu temprana a un base prosima de la Corpo SUA de Soldatos Marinal, pos parti de un confere de la G7, ance avenida en Japan.

A la empleadas de la base, Obama ia dise: "Esta es un momento per onora la memoria de tota ci ia es perdeda en la Gera Mundal Du."

El ia loda la alia SUA–Japan como "un de la plu fortes de mundo", e ia descrive se visita como "un atesta de como on pote ponti an la divides la plu dolosa – como nos du nasiones, enemis pasada, pote no sola deveni asosiores, ma deveni la plu bones de amis e la plu fortes de aliadas".

Alga persones en la SUA crede ce la usa de la bomba nucleal, an si tan destruinte, ia es coreta, car lo ia obliga Japan a sede, causante la fini de la gera.

La fia de un survivor, ci ia visita la monumento a venerdi, ia dise ce la sufri ia "continua tra la jeneras". Han Jeong-soon, ci ave 58 anios, ia dise: "Me vole ce Presidente Obama conose esta. Me vole ce el comprende nos sufris."

Seiki Sato, de ci se padre ia es orfanida par la bomba, ia dise: "Nos la japaneses ia fa cosas xocante, xocante, tra tota de Asia. Esta es vera. E nos la japaneses debe dise ce nos regrete car nos vergonia tan multe, e nos no ia espresa sinsera nos regrete a tota esta paises asian. Ma la cade de la bomba atomal ia es completa malvolente."

Xina ia responde a la visita par dise ce la ataca de ses semanas par Japan contra la site xines Nanjing, cual ia comensa en desembre 1937, merita plu ce la considera. Lo dise ce 300 mil persones ia es matada, ma otra fontes sujesta ce la cuantia ia es min alta.

"Vitimes merita compatia, ma faores debe evade nunca se culpablia," Wang Yi, la ministro xines de esternas, ia dise.

2016-05-27

Cenia ajusta se lege antidope per partisipa en la Olimpiales

La parlamento de Cenia ia aproba cambias a un lege antidope, esperante evita un proibi contra la partisipa de se atletas en la Juas Olimpial en Rio.

Medios nova contra drogas de dope ia es asetada en la lege en la mense pasada, ma la Ajenteria Mundal Antidope (WADA) ia dise ce estas no sasia la normas internasional.

On ia retira parlamentores a un consenta spesial ier per aseta la cambias.

Si Cenia ta es escluida de la Juas, alga de la atletas xef de mundo ta ave no posible de gania medalias.

A la Concursos Mundal de Atletisme Lejera en Beijing, la pais ia gania sete medalias de oro, fininte a la apico de la table de medalias.

Chris Wamalwa, un parlamentor nongovernante, ia dise a la parlamento: "Sporte es multe esensal a esta pais, e la atletas ia ajunta multe valua en esta pais en relata con mercatisme."

La lege nova debe es aprobada par la Senato ante cuando presidente Uhuru Kenyatta va suscrive lo.

WADA ia esije cambias pos un serie de scandales de dope envolvente atletas cenian. De pos 2011, plu ca 40 de se atletas ia fali en probas de droga.

De la comensa de esta anio, on ia suspende 18 atletas cenian per dope. La plu conoseda es Rita Jeptoo, ci ia gania la maratones de Boston e Chicago.

En novembre pasada, Dick Pound, un presidente pasada de WADA, ia comenta ce "lo es vera clar ce on usa multe drogas per alti la capasia" en Cenia.

Cenia ia introdui leges criminal nova en novembre, como parte de un projeta legal contra dope. Lo ia crea un autoriosa nasional per proba, e ia fa ce la dope es un ofende con puni de prison.

On ia suposa jeneral ce esta medios va sasia WADA, ma plu tarda, la ajenteria la indica "noncoeres" en la lege e ia declara ce Cenia es "nonseguente" a 12 maio.

2016-05-26

Laborores de potia nucleal junta se a greves en Frans

Laborores a sentros eletrical nucleal en Frans va greve oji entre protestas sur reformis controversa.

La sindicato CGT (Federa Jeneral de Labora) ia dise ce empleadas a des-ses de la sentros nucleal de la pais ia vota per un greve de un dia.

Ier, la governa ia dise ce lo comensa usa reservas statejial de petrolio en cuando grevores ia impedi refinerias.

Sindicatos vole ce la governa reversa la reformis laboral cual ia es forsada tra parlamento en la parte plu temprana de esta mense.

La compania nasional de potia, Électricité de France, ia refusa comenta sur esce la greve oji va afeta la furni de eletrica.

Sirca 75% de la eletrica usada en Frans veni de complesos nucleal.

Greves e blocis disturba ja ses de la oto refinerias de petrolio en la pais. A martedi, scaramuxas ia aveni a un de estas, cuando la polisia ia separa un bloci a Fos-sur-Mer en Marseille.

Laborores a un termina grande de petrolio en la porto de Le Havre ia intende ance greve oji per bloci emportas.

Alain Vidalies, la ministro de transporta, ia dise ce 40% de gasolinerias sirca Paris ave problemes en oteni carburante. Per evita la manca, motoristes ia fa compras de panica.

Presidente François Hollande ia informa ministros a mercurdi ce "tota va es fada per serti ce on furni la popla franses e la economia".

Analistes dise ce la pais posese cuasi cuatro menses de petrolio reservada.

La presa par sindicatos ia estende ier ance a la ferovias de Frans, cuando un greve par locomotivores ia cansela no sola alga servis TGV de rapidia alta, ma ance alga trenes rejional e de viaja dial. On previde ce la transporta va es denove disturbada oji.

La CGT ia demanda ance per asemblas protestante en sites tra Frans.

La governa ia provoca la coleria de la sindicato cuando lo ia usa un truco de la constitui per forsa se reformis debilida tra parlamento sin ce on vota sur los. Lo dise ce esta reformis, par cual la emplea e desemplea deveni plu fasil per companias, es nesesada per redui la cuantia de nonempleadas.

La problem cresente crea ansia per la concurso de futbal Euro 2016 cual va comensa en Frans pos pico plu ca du semanas.

2016-05-25

La SUA xerca la puni de mori per la fusilor de Charleston

La departe de justia de la SUA xerca la puni de mori en la caso de la fusilor ci ia mata nove persones en un eglesa en Charleston en la anio pasada.

Loretta Lynch, la avocato jeneral, ia dise ce "la natur de la crimin alegada e la dana resultante" ia es fatores en eleje la puni de mori.

On ia acusa Dylann Roof sur la omisides de nove adorores a un eglesa afroamerican en la site Charleston en la stato Carolina Sude.

La polisia ia dise ce el ia pasa un ora en senta con parocianes ante comensa fusili. La om de 22 anios ia es a un consenta de studia biblial a la Eglesa Bispal Metodiste African Emanuel cuando el ia ataca.

El fronti 33 acusas federal, incluinte crimines de odia, impedi de relijio, e atacas par fusil.

Seguente la polisia, el ave opinas de supremisme blanca e ia ataca la vitimes par causa de se raza.

Miles de persones ia es presente a la funera de un de la vitimes, la prete Clementa Pinckney. Presidente Barack Obama ia es entre los, e el ia fini se loda de la prete par canta la imno Amazing Grace ("Grasia stonante").

La trajedia ia reinisia debates sur relatas de razas e ia provoca un reata forte contra la bandera batalial de la Statos Federada, pos cuando un foto ia apare en cual la suspetada porta un tal.

2016-05-24

Brices de Lego deveni plu violente

Un studia nova dise ce la produidas de Lego deveni sempre plu violente en cuando la fabricores fa un "corsa de armas" per atrae la atende de enfantes en la eda dijital.

Rexercores de Zeland Nova dise ce brices con armas ia deveni plu comun e apare aora en 30% de pacos de Lego, refletante un tende plu jeneral en divertis per enfantes.

Lego dise ce lo usa armas sempre per un intende plu bon, como la salva de la mundo, e ce los es un parte de la developa de enfantes.

En un studia publicida par la jornal enlinia PLOS ONE, rexercores de la Universia de Canterbury ia conclui ce Lego "mostra creses major e esponente de violentia tra la tempo", con un proportio plu alta de armas aparente entre la pesos de construi e la pacos temida de Lego.

Lego ia apare se armas prima en 1978 cuando un paco de castel ia inclui spadas, axas, e lansias.

"La produidas de la compania Lego no es tan inosente como a un ves pasada," Christoph Bartneck, ia rexercor xef, ia comenta. "Lo pare ce la violentia en la produidas de Lego ia suprapasa mera la rici de juas."

Un analise de catalogos de Lego de 1973 asta 2015 ia trova ce la situas imajida ia deveni ance plu violente, tal ce 40% de tota pajes conteni aora alga spesie de violentia como fusili o condui menasante.

La studia ia dise: "Per catura la atende de se clientes, fabricores de juas es simil fisada en un corsa de armas metafor per produidas nova e stimulante."

Un portavose per Lego ia responde ce la produidas de la compania promove ativias diversa de jua, como construi, fantasia, e disputa. "Como en otra spesies de jua, la jua de disputa es un parte natural de la developa de un enfante. Nos atenta sempre usa comicia cuando posible, car esta aida diminui la grado de violentia."

En 2003–4, ego ia bancaroti cuasi, cuando juas eletronical ia menasa se futur.

La compania con base en Danmarc ia atenta reinventa se par abrasa la cultur popular, vendente pacos con temas liada a francisias major de sinema, como Star Wars, Batman, e Harry Potter.

La resulta ia es des-un anios de crese en segue. Plu temprana en esta anio, la compania ia anunsia ce se profita neta en 2015 ia alti par 31% a $1,4 mil milion.

2016-05-23

La eleje de la presidente osteraices va es postal desideda

Votas postal va deside la eleje presidental de Osteraic, pos cuando la resultas prendeda de voterias ier ia dona un vantaje peti a la aspiror estrema destriste.

La ministreria de internas ia dise ce Norbert Hofer de la Partito de Libria ia sta pico ante se oposor, Alexander Van der Bellen. Si el es elejeda, Hofer va es la xef prima de stato estrema destriste en la Uni European.

Un tema major de se campania ia es la crise de migrores en Europa, do la cuantia de refujadas ia crese rapida.

Sirca 90 mil persones ia reclama refuja en Osteraic en la anio pasada, corespondente a sirca 1% de la popla de la pais, e la Partito de Libria ia fa un campania antimigra.

Oji, on va conta sirca 750 mil votas postal de aprosima 12% de la 6,4 milion votores osteraices.

La eleje presente ia revela un divide profonda sur la dirije cual la nasion debe segue.

Suporta per la Partito de Libria ia crese en anios resente par causa de un frustra grande con la partitos instituida de la sentro sinistra e sentro destra. Temes sur la crise de migrores ia aida plu la destra estrema.

La presidentia es un posto xef ritual, ma un vinse per Hofer ta dona momento a partitos popliste e estrema destriste en otra paises european.

A la ves prima de pos la Gera Mundal Du, ambos partitos sentral ia es eliminada en la ronda prima.

La presidente de la Comision European, Jean-Claude Juncker, e de la Parlamento European, Martin Schulz, ia espresa se ansia sur la posible de un vinse par Hofer.

Pos la conta final de votas a voterias, Hofer ia ave 51,9% e Van der Bellen – un aspiror autonom ma suportada par la Partito Verde – ia ave 48,1%.

Hofer ia comenta ce la vinsor ultima va ave "la taxe de uni Osteraic". Van der Bellen ia dise ce el ia batalia per la Uni European en se campania.

En la ronda prima en april, Hofer ia gania 35% de la votas e Van der Bellen ia reseta 21%. La resulta ia provoca la canselor Werner Faymann a resinia cuando el ia perde la suporta de se colaborores en la Partito Sosial Democrata.

Acel partito e la Partito de la Popla ia governa Osteraic tra desenios, o solitar o aliada. A la eleje jeneral la plu resente en 2013, los en junta ia gania apena un cuantia sufisinte de votas per governa en un "alia grande".

La presidente presente, Heinz Fischer, ci ave 77 anios, no ia pote aspira denova pos se du periodos en la posto.

2016-05-22

La xef de la Taliban es probable matada

Ofisiores de la SUA dise ce Akhtar Mansur, la xef de la Taliban afgani, ia es probable matada en un ataca airal.

El e un otra combator mas ia es atacada cuando los ia viaja en un veculo en un area distante de Pacistan, prosima a la frontera de Afganistan.

La Pentagon ia confirma ce lo ia atenta ataca Mansur, ma ia dise ce on judi ancora la resultas.

Mansur ia deveni la xef de la Taliban en julio 2015, sustituinte per Mohammand Omar, la fundor e xef spirital.

La ataca ia aveni prosima a la vila Ahmad Wal a sirca 15:00 de ora local ier, e ia es autorida par Barack Obama, la presidente de la Statos Unida.

La Casa Blanca ia comenta ce e Pacistan e Afganistan ia es informada sur la ataca a un tempo corta pos se aveni.

Un comandor anonim de la Taliban ia dise: "Nos ia oia esta reportas nonfundida, ma esta no es la ves prima. Me ia vole sola comparti con vos me propre informa ce Mula Mansur no ia es matada."

Rumores falsa ia flota comun supra xefes de la Taliban. Omar ia mori en 2013, ma la Taliban no ia confirma esta asta pos la pasa de du anios. On ia reporta ce Mansur ia es matada en un batalia de fusil en la anio pasada, ma la governa afgani ia rejeta esta.

La asinia de Mansur como xef de la Taliban ia es disputada, e un grupo competente ia eleje se propre xef.

La declara par la Pentagon ia dise ce Mansur es ativa envolveda con la projeta de atacas "presentante un menasa a nonmilitares e fortes de securia afgani, nos empleadas, e aliadas".

La Taliban ia fa ganias pos cuando soldatos internasional ia retira se de un rol ativa combatente en 2014. La fortes de OTAN es sempre plu posada en zonas de batalia per suporta soldatos afgani ci combate la Taliban.

2016-05-21

Fuma en la avion cual ia cade a jovedi

On reporta ce fuma ia es detetada en la avion de EgyptAir ante cuando lo ia cade en la Mediteraneo a jovedi.

Sensadores ia persepi fuma en la saleta privata e en la sistemes eletrical de la avion, a mera minutos ante la perde de la sinial, seguente datos publicida par Aviation Herald (Eraldo de Avioni), un pajeria de la industria de aviones.

An tal, on no ia confirma ofisial esta informa.

La vola MS804 ia es viajante de Paris a Qahira con 66 persones.

La Eraldo de Avioni ia dise ce lo ia reseta datos de vola arcivida par ACARS (la Sistem de Adirije e Reporta per Comunicas Avional) tra tre canales nonrelatada.

La sistem ia mostra ce a 02:26 de ora local a jovedi, fuma ia es detetada en la saleta privata de la Airbus A320. Pos un plu minuto, un avisa de fuma en la alcova de avionica ia es transmeteda.

La mesaje final de ACARS ia a veni a 02:29, e on ia perde la contata con la avion a 02:33.

ACARS es costumal usada per envia datos de vola a la airocompanias.

La editor de Jornal Internasional de Securia de Avioni ia comenta ce lo es posible ce un fali tecnical ia aveni: "On ia reporta fuma en la saleta privata, e fuma en la alcova de avionica a pos, e tra un periodo de tre minutos la sistemes de la avion ia descomuta, donce, sabe, esta comensa indica ce lo ia es probable no un saisi, lo ia es probable no un luta en la piloteria – lo ia es plu probable un foco en la avion. Ma esce esta ia es un foco tecnical, un sircuito corta, o esce lo ia es car un bomba ia esplode en la avion, nos no sabe."

Elas ia dise plu temprana ce la radar ia mostra ce la Airbus A320 ia fa du verjes subita e ia desende tra plu ca 7600 metres ante cade en la mar.

Ier, ecipos xercante ia trova detrito, partes de corpo, sejas e bagaje a sirca 290 cilometres a norde de Alexandria.

2016-05-20

La dia la plu calda en Barat

Un site barati en la stato Rajasthan ia rompe la recordo de temperatur de la pais, rejistrante 51°C.

La recordo nova en Phalodi, en esta stato de deserto, ia apare a media de un onda de caldia tra la intera de Barat.

La recordo presedente per la temperatur la plu alta ia es 50,6°C, notada en 1956.

La caldia ia colpa multe de la norde de la pais, do la temperatur es ja plu ca 40°C tra alga semanas.

On esperia sempre semanas de sol forte e caldia cresente ante la saison de monson en Barat, ma lo es nonusual ce la temperatur esede 50°C e menasa la vive.

La ofisia de meteorolojia ia publici avertis de "onda de caldia sever" tra partes grande de la statos norde e ueste de Barat per la fini de semana.

Barat declara un onda de caldia cuando la temperatur masima ateni 45°C, o sinco grados plu alta ca la promedia per la area en anios presedente.

En esta estate, la caldia ia prende desuples de vives en Telangana e Andhra Pradesh, statos sude.

On previde un libri permanente de la caldia sola cuando la monson va ariva. Esta aveni normal en la media de junio.

2016-05-19

Un avion misre desapare en vola de Paris

Un avion de EgyptAir cual ia es portante 66 persones de Paris a Qahira (Cairo) ia desapare de radar.

La Airbus A320 ia asenti supra la este de la Mediteraneo, corta pos entra a la airospasio misri.

La airocompania dise ce lo ia reseta un sinial per aida ante cuando la avion ia sesa es detetable par radar.

En la vola MS804, on ia ave 56 pasajores – incluinte tre enfantes – sete ecipores, e tre securiores. La pasajores ia inclui 30 misris, 15 franseses, un brites, du iracis, e ance viajores de Canada, Beljia, Cuait, Arabia Saudi, Jazair, Sudan, Txad, e Portugal.

La avion ia parti de la airoporto Charles de Gaulle en Paris a 23:09 de ora local a la sera de ier, e la intende ia es ce lo va ariva en la capital de Misre oji, corta pos 3:00 local.

Lo ia vola a 11 300 metres supra la Mediteraneo cuando on ia perde la contata a 02:45 de ora de Qahira.

La autoriosas elinica ia acompania soldatos misri en la opera de xerca.

Plu temprana, un ofisior sitada par la jornal misri Al-Ahram ("La piramides") ia dise ce la contata final con la avion ia aveni a des minutos ante se desapare, e ce no sinial per aida ia es enviada. Ma EgyptAir ia tuita ce la aparatos de crise de la avion ia envia un tal sinial.

La avion ia vola de Asmara en Eritrea a Qahira, e de ala a Tunis (la capital de la pais con la mesma nom), ante vade tra Qahira a Paris.

Sherif Ismail, la ministro xef de Misre, es a la airoporto en Qahira con la familias de los ci ia es en la avion.

En marto, un avion de EgyptAir ia es saisida en viaja e diverjeda a Cipros. La atacor ia sede plu tarda e tota ostajes ia es librida.

En otobre pasada, un avion rusce de pasajor en vola de Sharm el-Sheikh ia cade a la penisola Sina, matante tota se 224 persones. Ofisiores en Rusia e Misre ia dise plu tarda ce lo ia es tirada a tera par un aparato esplodente, e ativistes de Daex ia dise ce los ia bombi lo.

2016-05-18

Mexico proposa legali sposis ge

La presidente de Mexico, Enrique Peña Nieto, ia proposa un reformi constitual per legali sposis omosesal tra la pais.

La deside segue un judi par la Corte Suprema cual ia abri la via per tal unis.

Sposis ge es legal sola en la capital – la Site Mexico – e en alga statos.

En otra partes de America Latina, sposis omosesal ia deveni ja legalida en Arjentina, Brasil, Uruguai e, la plu resente, Colombia.

La Corte Suprema de Mexico ia deside en la anio pasada ce lo es nonconstitual ce la statos de la pais proibi tal sposis.

Peña Nieto ia fa la anunsia a un aveni per onora la dia nasional de Mexico contra omofobia.

A Twitter, la presidente ia dise: "Per un Mexico incluinte cual reconose en diversia un de se fortes la plu grande." El ia ajunta la parola grilida "#SinHomofobia".

La imajes de el e la governa mexican en Twitter ia es miscada con la bandera de colores de arco de sielo cual representa la orgulo ge.

Arjentina ia es la pais prima de America Latina cual ia legali sposis omosesal en julio 2010.

En pasada, la partito cual governa Mexico – la Partito Revoluinte Institual – ia es sempre orgulosa ce lo ia suporta la valuas tradisional de la sosia mexican. Ma la move par la presidente es cisa un reconose par la governa ce la disposa sur diretos ge ia destensa en anios resente.

2016-05-17

Un xef de Xina visita Hongkong

En Hongkong, un securia forte es ativa per la visita de un ofisior major de Beijing.

Zhang Dejiang, la om encargada con cosas de Hongkong en Beijing, va ariva entre consernas sur la libria de la teritorio e sur interferes par Xina.

On ia posa plu ca 6000 polisiores, ia proibi avionetas, e ia erije paradores alta en areas sentral.

Grupos prodemocrata dise ce los va fa protestas en la visita, an tal.

Zhang, ci es ance la presidente de la Comite Permanente de la Congresa Poplal Nasional e donce la xef tre de Xina, va parla a un confere economial en se visita de tre dias, ma va encontra ance un grupo de legores prodemocrata.

Mera a oras ante se atera, ativistes ia desplia un bandera sur la colina Beacon Hill en Hongkong. Lo ia ave la testo: "Me desira la direto vera universal de vota." On ia sutrae la bandera a pos.

Zhang es la ofisior xines la plu major ci ia visita Hongkong de pos 2014, cuando miles de protestores ia ocupa partes grande de la site per esije un vota completa libre.

A pos, alga grupos localiste ia apare e ia mostra ce los es preparada per usa violentia per combate lo cual los vide como un dilui de la identia de la site, temente un influe cresente sosial e political de Xina continental.

En febrero, sentos de protestores, nurida par tal sentis localiste, ia escava e lansa brices en un scaramuxa violente con la polisia ci ia atenta clui un mercato noturna de comedas. La protestores ia regarda la mercato como un simbol de tradisiones local.

Plu temprana en esta mense, reportas ia dise ce on ia usa cola per reforti petras de pave sirca la legeria afin on no pote usa los como misiles.

E ier, un om de Hongkong ia es arestada en Shenzhen, pico a la otra lado de la frontera, per atenta compra un avioneta sur cual on ia alega ce el intende usa lo per disturba la visita.

La intensia de securia sirca la visita de Zhang es un indica de la nivel de ansia de la autoriosas. Ma ativistes prodemocrata es iritada ce on ia refusa ce los prosimi a la visitor, e ia promete defia la restrinje.

Hongkong ave librias cual on no trova en Xina continental. Estas ia es un parte de esensal de la acorda fada cuando Britan ia redona Hongkong a Xina en 1997.

Ma un ansia ce tal librias pote deveni debilida ia es asentuada par la desapare de sinco vendores de libros de Hongkong, conoseda per publici libros controversa sur xefes xines.

On ia descovre ce autoriosas de Xina continental ia deteni la omes en lo cual la departe de esternas de la Rena Unida ia descrive como "un nonsegue major" de protocol.

2016-05-16

Colombia saisi un cuantia recordo de cocaina

La polisia en Colombia dise ce los ia saisi un cuantia drogas nonlegal la plu grande de se istoria – cuasi oto tones de cocaina.

La drogas ia es ascondeda en un cultiveria de bananas prosima a Turbo, un vila costal en la norde-ueste de la pais.

La drogas ia parteni a Clan Usuga, un gang de criminores. On ia aresta tre suspetadas, ma tre otras ia evade.

Cuasi 1,5 tones ia es envolveda "e preparada per vade a la mercato esportal", seguente Luis Carlos Villegas, la ministro de defende.

Esta ia es la catura de cocaina la plu grande sur teritorio colombian, an si cisa saisis pico plu grande ia aveni a mar.

La ocupa xef de Clan Usuga es la contrabanda de drogas, ma on ia acusa lo ance de estorse, mina nonlegal, desapares forsada, e omiside.

La polisia colombian estima ce la gang ave sirca 2000 membros ativa. En la sinco anios pasada, la fortes de securia ia catura 6700 membros.

Plu temprana en esta mense, la governa de la pais ia dise ce lo va inisia atacas airal contra ganges ci contrabanda drogas o fa minas nonlegal.

La stratejia nova foca a tre ganges – Clan Usuga, Los Pelusos e Los Puntilleros.

2016-05-15

Ucraina gania la Concurso de Eurovision

La cantor Jamala de Ucraina ia vinse en la Concurso Cantal de Eurovision, cual ia aveni en Stockholm, la capital de Sveria.

La pais ia gania 534 puntos con se canta "1944", sur la deporta de tatares crimsce su Iosif Stalin.

Australia ia fini en la loca du con 511 puntos. Lo no es un pais european, ma on ia invita lo a partisipa denova pos la selebras de la aniversario 60 en la anio pasada.

Ante la concurso, on ia vide Rusia como la pais la plu probable de vinse, xef par causa de un saisioio en cual la cantor pare suportada par imajes projetada, ma esta ia es ultima la numero tre con 491 puntos.

Susana Jamaladinova es la tatar crimsce prima de istoria ci ia canta a la concurso, e la natur political de se canta ia causa controversia.

La canta refere a la anio en cual Stalin ia deporta cuasi tota la etnico de Crim, se rejion nativa, en lo cual ia es alora Rusia Soviet ma ia deveni un parte de Ucraina a pos. La cantor ia dedica la canta a se duava, ci ia es un de la cuatri de milion tatares obligada a parti como puni coletiva per los ci ia colabora en la ocupa nazi.

On ia previde ce la canta ucrainsce va fini en un de la tre locas la plu alta, ma en un resulta surprendente, lo ia vinse Rusia, cual ia prende Crim de Ucraina en 2014 e ia es colerida par la canta.

Coliente se premio, Jamala ia grasia emosiosa Europa per se votas, ajuntante: "Me desira vera pas e ama a cadun."

Parlante sur se vinse a pos, la cantor ia comenta: "Lo es stonante. Me ia es serta ce si on parla sur veria, on pote emosia multe la persones."

Un sistem nova de presenta la puntos ia es introduida en esta anio, separante la puntos donada par la juria e la popla de cada pais, en loca de combina los como a ante.

A la punto media pos la presenta de la votas de la jurias ofisial, Australia ia domina la table con se 320 puntos, en situa forte supra la 211 puntos de Ucraina. Ma "Sona de silentia" cantada par Dami Im no ia es tan susedosa en la votas publica, e ia fini la sera a numero cuatro.

La sistem nova de puntos ia asentua la nonegalia entre la preferes publica e los de la jurias. Polsca, cual ia sta a numero 25 entre la 26 paises competente pos reseta sola 7 puntos de la jurias, ia salta a la loca oto cuando on ia anunsia ce la televotas publica ia dona 222 puntos a se canta "Color de tu vive" par Michał Szpak.

La loca la plu basa ia es ocupada par la canta "Fantasma" par Jamie-Lee de Deutxland, con sola 11 puntos.

La concurso ia aveni en la stadion Ericcson Globe en Stockholm, e ia es presentada par la cantor vinsente de la anio pasada, Måns Zelmerlöw, e Petra Mede, un comediste e ator svensce.

2016-05-14

Cosovo e Jibraltar deveni membros de FIFA

Cosovo e Jibraltar va pote compete en la Copa Mundal de 2018 pos deveni asetada como membros de FIFA, la organiza governante de futbal de mundo.

Se asetas aumenta la cuantia de membros de FIFA a 211.

Fadil Vokrri, la presidente de la asosia de futbal cosovan, ia dise: "La juores e popla de Cosovo ia espeta tra tempo longa. Grasias."

Ambos teritorios ia reseta majorias grande en la vota – 86% favorente la inclui de Cosovo, e 93% per Jibraltar – an si se paises visina ia oposa la asetas.

Espania, cual ia sede Jibraltar a Britan a 300 anios ante aora, ma desira ce on redona lo a governa espaniol, oposa ja longa la progresa de Jibraltar a parteni en FIFA.

Serbia ia oposa forte la inclui de Cosovo, cual ia declara se autonomia de Serbia en 2008.

Par causa de la state complicada political de Cosovo, alga juores ala naseda jua presente per paises diversa. Estas inclui Xherdan Shaqiri e Valon Behrami ci jua per Suiz, Shefki Kuqi per Suomi, e Lorik Cana per Albania.

La entra par Cosovo leva la demanda esce on va permete un cambia de ecipo a juores naseda en la provinse pasada serbsce.

Jeneral, un juor con nasionalia duple ci ia jua ja per un ecipo nasional no pote cambia a se pais du. Ma per la caso de Cosovo, on previde ce FIFA va considera la juores a modo individua.

Sola en la semana pasada, on ia deside inclui Cosovo como un membro de UEFA, la organiza governante european. Ala, Cosovo ia reseta 28 votas favorente e 24 oposante.

Cosovo ia jua en un max amin internasional a la ves prima en 2014 pos reseta la permete de FIFA.

Jibraltar ave sirca 32 mil abitores. Lo ia deveni un membro completa de UEFA en 2013 e ia partisipa en maxes clasinte per Euro 2016, an si lo ia gania no puntos.

Michael Llamas, la xef de la asosia de futbal de Jibraltar, ia dise: "Nos es realosa sur nos capasia sur la campo, ma esta no es la foca. La foca es nos multe enfantes ci ama nos sporte e ci va es aora la jenera prima de jibraltarianes ci crese como membros de FIFA. Los va pote sonia."

2016-05-13

Apple investi a la competor xines de Uber

Apple ia investi $1000 milion en Didi Chuxing, un compania cual produi un ap de taxi cual domina plu de la mercato en Xina ca Uber, se competor de la SUA.

Tim Cook, dirijor xef, ia dise ce esta va aida Apple a comprende plu bon la mercato xines.

Didi Chuxing, conoseda a ante como Didi Kuaidi, ia indica ce esta es la investi la plu grande de se istoria.

La compania furni plu ca 11 milion viajas de taxi per dia, e declara ce lo ave 87% de la mercato en Xina. Lo es ance suportada par la jigantes de rede Tencent e Alibaba.

Uber ia luta per entra a la mercato xines, an pos gania Baidu, un compania xines de xerca de rede, como investor. En febrero, Uber ia confesa ce lo perde plu ca $1000 milion per anio en Xina, par spende cuantias vasta per suporta viajas descontada.

Cook ia dise ce el vide multe modos posible en cual Apple e Didi Chuxing va pote colabora en futur. El ia asentua ance ce la investi es un modo de aprende plu sur Xina como la mercato du de la plu grandes de Apple.

La aspiras de Apple en Xina ia es resente alga impedida, cuando regulores xines ia clui la servis enlinia de libro e filma de la compania per enforsa leges sever sur lo cual on pote publici en la rede.

Multe comentores ia regarda esta como un delude per Apple, cual desira forte serti ce se produidas es popular e bonvendeda en Xina.

En april, Apple ia reporta ce se revenu ia diminui a la ves prima de pos 2003, spesifante Xina como un punto spesial debil.

2016-05-12

Un debate longa ante la vota sur la prosede de Rousseff

La Senato de Brasil debate esce presidente Dilma Rousseff debe es judal prosededa per malcondui.

La majoria de la senatores ia dise ja ce los va vota contra la presidente. Si la vota plu tarda confirma esta, Rousseff va es automata suspendeda de se posto.

On acusa el de manipula finansias en modo nonlegal per asconde la difere cresente entre revenu e spende governal, ante se reeleje en 2014. El nega esta.

Rousseff ia fa un apela final a la Corte Suprema per para la ata, ma on ia refusa lo.

Un debate longa es aveninte ante la vota. La sesion de la Senato ia abri a cuasi 18 oras ante aora.

On ave 81 senatores en la Senato, la Salon alta. Setedes-un ia rejistra se per partisipa en la debate, e cadun reseta 15 minutos per se parla. On no va fa la vota eletronical asta cuando cadun ia parla, sirca 06:00 de ora local (09:00 global).

La sesion ia es multe min pasionosa ca lo en la Salon basa a 17 april, en cual un majoria forte de la 513 legores ia vota per la prosede judal.

La membros de la Salon basa ia sita razonas diversa per se desides. Multe ia dise ce los fa lo "per me familia", "per Dio", o simple "per la pais".

A 03:55 de ora local, 60 senatores ia parla. Un majoria de 42 de estas ia suporta la prosede e 18 ia rejeta lo. Min ca des senatores resta per parla.

En la Senato, la razonas donada per la prosede es xef economial. Multe ia culpa Rousseff per la situa estrema mal de la economia de la pais. Brasil sufri se retrosede la plu mal de 10 anios; la nonemplea ia ateni 9% en 2015; e la infla es la plu alta de 12 anios.

Los ci ia presenta razonas contra la prosede judal ia dise ce lo sembla un colpa de stato, e ce lo es un produida de odia e venja.

Fernando Collor de Mello, un presidente pasada ci mesma ia fronti un prosede judal en 1992, ia fa un parla longa sur lo cual el ia descrive como la nonjustia fada contra el, ma no ia indica clar como el intende vota sur Rousseff.

Si la vota oposa Rousseff, la vispresidente Michel Temer va sustitui per el tra la periodo de la prosede.

Rousseff ia promete batalia asta la fini. "Me no va resinia. Esta ia entra nunca a me mente," el ia dise en un parla a martedi.

2016-05-11

Un deteneria nijerian es "un loca de moria"

Amnestia Internasional dise ce en esta anio a la min 149 arestadas ia mori ja "en state xocante" a un deteneria militar en Nijeria norde-este.

En un reporta, Amnestia dise ce des-un de los ci ia mori a la caserna de Giwa ia es enfantes joven, incluinte cuatro bebes. Lo nomi la sentro "un loca de moria" e recomenda ce on clui lo.

Esta es la plu resente en un serie de reportas condenante la trata de suspetadas par la militaria nijerian. La armada no ia comenta sur esta reporta, ma lo ia dise en la pasada ce lo ia institui un departe de diretos umana per esamina alegas de maltrata.

La caserna de Giwa en Maiduguri, la capital de la stato Borno, es en un area do la autoriosas combate la grupo violente Boko Haram.

La reporta de Amnestia dise ce informas colieda par intervisas con arestadas pasada e atestores, e suportada par videos e fotos, pare mostra ce multe detenidas ia mori par causa de maladia, famia, desidrata, e feris de fusil.

Netsanet Belay, la dirijor de rexerca e promove per Africa a Amnestia Internasional, ia dise: "La descovre ce bebes e enfantes joven ia mori en state xocante en un deteneria militar es e angusante e asustante. Nos ia sona la alarma a multe veses sur la taso alta de mori de arestadas en la caserna de Giwa, ma esta trovas mostra ce, per e adultes e enfantes, lo resta un loca de moria."

La reporta recomenda ce on clui direta la caserna e libri tota arestadas, o move los a autoriosas nonmilitar.

Amnestia crede ce a Giwa on deteni sirca 1200 persones, de cual multe ia es coletiva arestada en modo acaso.

Lo dise: "Cuando los es en la caserna, on prisoni los sin posible de asede la mundo esterna e sin prosede judal. A la min 120 de la detenidas es enfantes."

A ante, Amnestia ia acusa la militaria de esecuta plu ca 640 detenidas pos un ataca par Boko Haram a la deteneria en marto 2014.

Lo ia dise ance ce, de pos 2011, plu ca 8000 omes e xicos joven es matada par fusil, famia, sofoca, o tortura pos se arestas par la militaria nijerian, ma ce on no ia judi la esecutores como culpable.

2016-05-10

La Pilipinas gania un presidente nonortodox

Rodrigo "Digong" Duterte, la aspiror nonortodox anticrimin, ia vinse en la eleje presidental en la Pilipinas, pos la retira de se oposores.

An si la resulta ofisial es ancora no declarada, se oposor xef, Mar Roxas, ia confesa se defeta cuando la sondas ia dona un vantaje nonatacable a Duterte.

Duterte ia dise ce el aseta la autoria con "umilia estrema".

La om de 71 anios ia tisa controversia con comentas ensendente en se campania.

El ia atribui se susede a se disposa forte sur lege e ordina. Se condui como la maior anticrimin de Davao, un vila sude cual ia es malfamosa a ves pasada per se criminosia, ia gania a el la nometa "La Punor" e ia resona bon con votores.

Otra temas propulsante de la campania ia es la froda permeante, como ance la povria e nonegalia esperiada par multe filipinos an con la crese economial su la presidente partinte Benigno "Noynoy" Aquino.

Ofisiores de la eleje ia nota un partisipa recordo a voterias, do plu ca 81% de la 54 milion votores rejistrada ia fa se vota. On eleje ance senatores e sirca 18 mil ofisiores, incluinte maiores.

La sonda par la Consilio Pastoral Parocial per Vota Fidable ia indica ce, pos conta 90% de la votas presidental, Duterte ia reseta plu ca 14,8 milion votas. La acel organiza es asiniada par la comision elejal per monitori la contas, ma se reportas no representa un resulta ofisial.

Roxas, un ministro pasada de internas e la oposor la plu prosima de Duterte, ia gania 8,6 milion votas.

Cuando la estende de se vinse ia deveni clar, Duterte ia dise: "Lo es con umilia, umilia estrema, ce me aseta esta, la aproba de la popla."

Roxas ia aseta la vinse de se oposor. "On ave multe larmas en la sala. Me ta dise a vos ce esta no es un tempo per larmas. Per nos pais, nos ia fa un move pasosa e susedosa de potia."

Un otra oposor major, senator Grace Poe, ia es la prima ci ia sede se defeta, prometente "colabora con la prosede de sani" pos un campania turbosa.

En la eleje per deveni vispresidente, Leni Robredo, un ativiste sosial, susede pico plu bon ca Ferdinand "Bongbong" Marcos, la fio de la tirano pasada Ferdinand Marcos.

Aquino retira se car la constitui restrinje presidentes a sola un periodo de ses anios. En cuando Duterte ia leva en sondas opinal ante la vota, Aquino ia atenta uni otra aspirores contra el, avertinte ce se eleje ta pote causa un revade a tirania per la Pilipinas.

Duterte ia fa multe declaras controversa en se campania, disente ce el va masacra criminores e usores de drogas, bromante sur la viole sesal de un misionor australian, e comentante ce el ta clui la Congresa si el no ta acorda con el.

El ia presenta ance opinas franca sur la disputa teritorial de la Pilipinas con Xina en la Mar Xines Sude, disente ce el va naviga a isolas disputada e planta ala la bandera pilipina.

La Pilipinas ia prende un de se reclamas a un corte arbitral en Den Haag en Nederland. Ier, Duterte ia dise ce el va xerca discutes multiladal sur la tema, incluinte la SUA e Japan.

2016-05-09

Un concurso de belia de boves

A la fini de semana, sentos de boves mas e fema ia partisipa en un concurso unica de belia en la site Rohtak en la norde de Barat.

La aveni ia es organizada par la governa local per promove la razas boval de la pais e per crese consensia sur diretos de bestias.

Plu ca 600 boves ia partisipa. La posesor de la bove vinsente ia reseta un premio de 250 mil rupis ($3600).

Cultivores ia veni de distritos diversa de la stato Haryana con se boves per la aveni, e la parada orgulosa se animales.

An si la plu de la boves ia condui refinada e ia pasea rapida longo la plataforma, on ia debe puieta otras a fini la taxe.

On ia judi la boves mas per se grandia, aspeta jeneral, e longia de cornos. La boves fema ia es judida per se aspeta e capasia de produi lete.

La Ministro de Cultiva de Haryana ia dona la premio a la posesor de la vinsente.

Sola razas nativa ia es permeteda a partisipa en la concurso, per populari los entre cultivores local.

La studiantes de la Instituida Internasional de Instrui e Rexerca Veterinar ia fotografi se con la bove vinsente.

2016-05-08

La foco savaje en Canada menasa un otra provinse

La foco savaje cual arde en la provinse canadian Alberta crese plu e va ateni cisa Sakatchewan, la provinse visina.

Un clima calda, seca, e ventosa impedi la laboras par sentos de pompores per batalia la focon.

La flamas ia causa ja la parti de 80 mil persones de Fort McMurray, un site de petrolio. Miles de otras es ancora locada a norde de la site, e on no va completi se parti ante la fini de oji.

Rachel Notley, la ministro xef de Alberta, ia dise: "Esta foco es controlada en no modo."

La foco covre aora un area de plu ca 200 mil ectares, incluinte partes ancora ardente e partes ja ardeda.

On espera ce la pluve prevideda per oji e doman va reali.

Plu temprana en esta semana, la plu de la persones sortida ia fuji a norde, refujante se en campas de labora ultra Fort McMurray. A pos, on ia naveti miles de persones a securia par via e aira. Convoias peti ia viaja ier tra la site ardeda.

Notley ia indica ce on intende completi la sortis ante la fini de ier, ma car on ave ancora persones en la campas norde, la labora de sorti los va continua oji.

La foco ia destrui visinerias intera, e on ia avisa abitores ce cisa un tempo longa va pasa ante cuando los va pote revade.

An con la comanda obligante de parti, la Polisia Reial de Canada ia dise ce los ia trova un om vea e un familia de sinco en Fort McMurray e ia prende los a securia.

Sirca 1600 casas e otra construidas es perdeda, ma on ia reporta no moris o feris.

Fort McMurray es locada en la sentro de la tereno de arena de petrolio en Canada, e la rejion ave la reserva tre de la plu grandes de petrolio en la mundo.

La focon ia para asta un cuatri de la produi de petrolio de la pais, creante un ansia sur se efeto a la economia canadian.

On ia averti ce la flamas risca ateni la borda de un compleso de petrolio manejada par Suncor Energy, ma ofisiores ia dise ce la compleso es estrema capas de resiste foco.

2016-05-07

On move maxes de basebal par causa de Zica

On ia move du maxes de la Concurso Major de Basebal cual on ia intende jua en Porto Rica, par causa de ansia de la juores sur la virus de Zica.

La maxes entre la Piratas de Pittsburgh e la Marlines de Miami va aveni en Miami en loca.

Juores ia dise ce los es ansiosa ce los va reseta la virus e dona lo a se sposas.

On suspeta ce Zica causa maladias conjenital en bebes de ci se madres ave la virus cuando los es ensinta.

Porto Rica ia esperia plu ca 600 casos de Zica, e la isola rejistra se mori prima par lo en la semana pasada.

En un anunsia, la Concurso Major de Basebal (Major League Baseball) e la Asosia de Juores de la Concurso Major de Basebal ia dise ce la comisionor de basebal "ia ave no otra eleje" ca reloca la maxes car tan multe juores ave un sposa ci es ensinta o ci atenta ensinti.

La anunsia ia dise ance ce on espera jua denova basebal en Porto Rica "en la futur prosima", e ce la persones pertinente "va continua suporta la crese de la jua en Porto Rica, do un tradision eselente de basebal ia fa ce la isola es ja longa un aveneria importante per la jua".

Plu ca dudes paises reporta casos de Zica, cual es sperdeda par moscitos.

La pais la plu grave afetada par la eruta es Brasil, do la Juas Olimpial va aveni en agosto de esta anio. La autoriosas ala ia dise en febrero ce on ave no posible ce on va cansela la Olimpiales par causa de la virus, e ce no risca esiste per juores o oservores estra femes ensinta.

En la tempo interveninte, la Organiza Mundal de Sania ia indica ce la transmete sesal de la virus es plu comun ca on ia crede a ante.

2016-05-06

Un conserta en la ruinas de Palmira

Un xef famosa de orcestra rusce ia gida un conserta en la ruinas de Palmira en Suria, cual ia es recaturada de la organiza Daex en marto.

Valery Gergiev, un suportor de la presidente rusce Vladimir Putin, ia gida la Orcestra Simfonial Mariinski, de San Petersburg, en la teatro roman en Palmira.

En julio pasada, Daex is posta videos cual ia mostra alga de se combatores matante persones en esta teatro antica.

Fortes suri, suportada par atacas airal par Rusia, ia recatura la loca.

Gergiev ia dirije la orcestra tra obras par Johann Sebastian Bach, Sergei Procofiev, e Rodion Xtxedrin, ante un fola de soldatos rusce, ministros governal, e jornalistes.

Imajes de la conserta, difusada en la televisa nasional rusce, ia es interompeda de tempo a tempo par videos de atas militar, mostrante la suporta militar rusce per la fortes governal suri en cuando los ia libri Palmira de la combatores de Daex.

Asta resente, Gergiev ia es la xef major de la Orcestra Simfonial de London, e es aora la dirijor musical de la Orcestra Filarmonial de München. En 2014, el ia suporta Putin sur la prende de Crim de Ucraina. En 2008, el ia gida un conserta en la ruinas de Tshinvali, la capital de Osetia Sude, cuando Rusia e Jorjia ia batalia sur acel teritorio.

La musiciste distinguida ia descrive se conserta como un protesta contra la barbaria e violentia mostrada par Daex ci ia usa la amfiteatro roman de Palmira per esecuta prisonidas.

Ance la presidente rusce ia parla a la conserta, par un lia video de se casa a la Mar Negra en Sotxi. El ia nomi la terorisme un maladia cual la mundo nesesa aboli, e ia dise ce an la fato ce la conserta aveni es "surprendente".

"La ata de oji ia envolve nonoportunes e periles grande per cadun, en un pais de gera, prosima a do la batalia continua ancora. Esta ia esije multe fortia e coraje personal de tota de vos," el ia dise.

An tal, la ministro de esternas de la Rena Unida, Philip Hammond, ia comenta ce la conserta es "un atenta nonconveninte per distrae atende de la sufri continuante de miliones de suris. Lo mostra ce on ave no profondas a cual la governa no va basi se."

Un de la solistes a la conserta ia es xeliste Sergei Roldugin, un ami de Putin, ci on ia nomi resente como la posesor de companias estrateritorial en la Paperes de Panama. El nega tota malconduis.

La organiza Daex ia destrui alga monumentos en se ocupa de des menses de Palmira e se loca asosiada de erita mundal de UNESCO. Du templos vea de 2000 anios, un arco, e tores funeral ia es lasada en ruinas. La grupo jihadiste, cual ia desconstrui ance alga locas premuslim en Irac, pais visina, crede ce tal strutures es idolinte.

An si alga monumentos amada ia es destruida, multe de la loca istorial ia es lasada sin dana.

Gergiev ia fa un conserta carital en Tokyo per vitimes de la desastre nucleal a Fukushima en 2012, e ia dirije un turi de consertas carital per recolie reservas per vitimes de la masacra a la scola de Beslan en Rusia en 2004.

2016-05-05

30 pasajores es ferida en un avion secutente

Plu ca tredes persones ia es ferida cuando un avion de Etihad Airways, volante a Indonesia, ia encontra "un turba grave e nonespetada".

La avion de Abu Dhabi ia es a sirca 45 minutos de Jakarta ier cuando lo ia comensa secute.

Video, parente de esta vola, mostra pasajores criante en cuando la avion es secuteda.

La Airbus A330-200 ia atera secur pos la aveni, ma on ia prende des persones a ospital.

La airocompania nasional de la Amirias Arabi Unida ia dise ce la armarios de bagaje ia es danada. Pasajores ia reporta ce mascas de osijen ia es librida en la secute.

Etihad Airways no ia furni detalias sur la gravia de la feris, ma on sabe ce la des persones ospitalida inclui nove pasajores e un ecipor. La otras ia es tratada par paramedicistes de airoporto.

La compania ia cansela la vola reveninte. Lo reserva sejas per pasajores en otra volas e furni salas de otel.

La airoporto dise ce se ofisiores e los de la Comite Nasional Indonesian de Securia Transportal esamina aora la avion.

2016-05-04

Un foco provoca un sorti coletiva en Canada

Un foco savaje enorme ia obliga la popla intera a sorti de la site Fort McMurray en Canada. 60 mil persones ia move.

La focon ia destrui alga casas, e ia cade sene sur la stradas.

Abitores fujinte ia conjesta completa la via xef de la site, cual es situada en un area de arena bitumosa a 380 cilometres a norde de Edmonton.

La esta sorti de Fort McFurray es la plu grande en la istoria de la provinse Alberta.

Un abitor ia dise: "Si on pasea mera a estra, on senti la sene cadente a sur. On vide lo flotante en la aira. Me pote prende un scopa e scopi lo de sur me teraza."

Casas en a la min du visinerias es ruinada, e la foco ia estende aora asta Autovia 63 – la via xef cual entra a Fort Murray de la sude.

Pompores continua batalia la arde, ma la autoriosas local ia demanda per refortis, incluinte un elicotor capas de cade acua.

Asta aora, on ia reporta no feris.

2016-05-03

Un scaramuxa entre parlamentores turces

En Turcia, membros de la partito governante e politicistes procurdi ia ataca fisical lunlotra en parlamento, sur tema de un projeta cual va sutrae de parlamentores se imunia contra prosedes judal.

La colpas ia comensa en cuando un comite ia es en consenta per discute esta cambias constitual, cual la governa suporta.

Alga parlamentores ia lansa se a la scaramuxa de un table. Otras ia lansa acua o ia fa colpas con se punios.

La partito oposante dise ce la intende de la cambia es sofoca la disenti.

La presidente, Recep Tayyip Erdoğan, ia demanda ce on prosede membros de la Partito Democrata de la Popla, acusante ce los es un estende de la Partito de Laborores de Curdistan, cual es proibida.

Alga parlamentores ia es ferida en la combate.

En la semana pasada, ance un otra sesion sur la cambias a la constitui ia dejenera a violentia.

2016-05-02

La CIA es criticada per tuita la mori de bin Laden

En la SUA, on ia critica la Ajenteria Sentral de Informas (conoseda como la CIA) per tuita en tempo real la mata de Osama bin Laden, cual ia aveni a sinco anios ante aora, como si lo aveni aora.

Lo ia comparti detalias de la mision e informas cual ia gida a la loca de la om la plu xercada de America.

Ma la reata ia es xef negativa. Un usor de Twitter ia descrive la tuitas como "fea e embarasante". Otras ia posta memes e imajes de persones ci leva frustrada se oios o pone se testa en se manos.

La tuitas par la CIA pertine usual a trivia e ojetos istorial.

La xef de al-Qa'ida, sur ci on crede ce el ia comanda la atacas de 11 setembre 2001 a New York e Washington, ia es matada par fusili a un compleso en Abottabad en Pacistan en maio 2011. El ia evita catura par la SUA e se aliadas tra cuasi un desenio.

Parlante a la aniversario sinco de se mori, la dirijor de la CIA, John Brennan, ia dise ce la SUA ia destrui un parte grande de al-Qa'ida.

El ia dise ce bin Laden ia ave un sinifia grande simbolin e stratejial, e ce lo ia es importante ce on ia sutrae la om culpable per la atacas de 11 setembre.

El ia ajunta ce sutrae Abu Bakr al-Baghdadi, la xef de la organiza Daex (cual nomi se la Stato Muslim de Irac e la Levante), ta pote ave ance un efeto grande, ma ce ajenterias contrateroriste fronti no mera un organiza ma un fenomeno, e ce la defia va continua tra multe anios.

"Me opina ce lo ave un resona, nonfortunosa," Brennan ia comenta, "cual ia atrae la cores e spiritos e mentes de individuas ci es malgidada par la presenta de lo como un bandera relijial."

2016-05-01

Leones salvada de sircos vola a Sudafrica

On ia vola plu ca tredes leones salvada de sircos en Colombia e Peru a Sudafrica afin los comensa un vive nova en un refujeria.

Los ia pare alga turbada ma sana pos se viaja longa.

Alga de los ia es sededa par un sirco, e otras ia es saisida.

La grupo Defendores Internasional de Animales, cual ia esecuta la ata, dise ce on ia estrae dentes o garas de cuasi tota la leones, e ce los no ta survive savaje.

On move aora la leones sur tera a la Refujeria Emoya de Gatos Grande, un conserveria de 5000 ectares en la norde de Sudafrica. Ala, la leones va ave stanges de bevi, plataformas, juetas, e cura veterinar.

Un portavose ia dise: "Esta es un mision de salva enorme importante car lo fa un anunsia tra la mundo sur la modo en cual persones trata bestias. Esta leones ia sufri vasta."

La grupo prima de nove leones ia es colieda en Bogota, la capital de Colombia, par un avion de carga cual ia vola a pos a Lima, la capital peruan, per prende 24 plu.

La leones ia es librida pos cuando on ia proibi la usa de animales savaje en Peru en 2011 e Colombia en 2013.

La refujeria es situada sur tera privata e conteni ja ses otra leones salvada e du tigres.

On intende estende gradal la abitadas de leones ala en la menses veninte, en cuando la leones comensa conose se vive nova e deveni presentada a lunlotra.