2016-06-30

Fuma confirmada en la avion MS804

Investigores misri ia afirma ce un rejistra de la caxa negra de la vola MS804 de EgyptAir indica la presentia de fuma en la avion.

La avion de Paris a Qahira ia cade en la Mar Mediteraneo a 19 maio, matante tota la 66 persones cual lo ia porta.

Lo ia envia mesajes eletronical automatida cual ia mostra ce detetadores de fumas ia es ativida en un saleta privata e en la alcova avionical su la piloteria, a minutos ante la desapare de la avion.

La datos rejistrada es coerente con acel mesajes.

On ia retrae la rejistradores de vose e datos de vola, conoseda como "caxas negra", de un profondia de sirca 3000m en la mar.

La caxa du, la rejistrador de de piloteria, deveni ancora reparada en Paris.

La comite misri investigante ia dise ance ce un parte de la sesion fronte de la ruina de la avion "ia mostra un indica de dana par temperatur alta" e suje.

No clama per aida ia es fada de la avion ante se cade. La causa resta nonconoseda.

2016-06-29

Un ataca matante a un airoporto de Istanbul

Un ataca de fusil e bomba a la airoporto internasional Atatürk de Istanbul ia mata 36 persones e ia feri plu ca 140.

Tre atacores ia comensa fusili prosima a un punto de entra a la termina en la tarda de ier. Cuando polisiores ia xuta a los, los ia detona se.

Binali Yıldırım, la ministro xef de Turcia, ia dise ce la indicas prima sujesta ce la ataca ia es fada par Daex. Bombis resente es liada o a Daex o a separadistes curdi.

La airoporto ave radiografes a se entreria, ma la controlas securial per autos es limitada.

Imajes de la termina ia mostra corpos covreda su telones, e vitro e bagaje abandonada sperdeda tra la construida.

Presidente Recep Tayyip Erdoğan ia dise ce la ataca debe deveni un momento desidente en la batalia global contra grupos combatosa: "La bombas cual ia esplode oji en Istanbul ia ta pote esplode en cualce airoporto en cualce site de la mundo."

La Statos Unida ia descrive la ataca como "odiable", ajuntante ce la SUA resta "firma en nos suporta per Turcia". La ministro de esternas deutx, Frank-Walter Steinmeier, ia dise: "Nos lamenta la vitimes. Nos suporta Turcia."

Parlante a alga oras pos la ataca de ier, Yıldırım ia dise ce lo es probable ce la vitimes inclui persones stranjer, e ce la atacores ia ariva a la airoporto en un taxi.

Video en redes sosial mostra un atacor corente en la salon de parti, con ce persones fuji sirca el. La polisia fusili el, e el resta sur la tera tra sirca 20 secondos ante detona se.

On ia usa taxis per transporta rapida la persones ferida a ospital a pos. Relatadas desperante de persones mancada ia asembla estra un de la ospitales local a cual on ia prende multe de la vitimes. Alga ia espresa se coleria sur la manca de informas.

Volas a e de la airoporto ia es suspendeda pos la ataca, ma aora on ia recomensa alga volas.

Charles Michel, la ministro xef de Beljia, de cual bombores ia ataca se site capital en marto, ia tuita de la confere alta de la UE en Bruxelles: "Nos pensas es con la vitimes de la atacas a la airoporto de Istanbul. Nos condena esta atas repulsante de violentia."

La eticeta #PrayForTurkey ("prea per Turcia") ia deveni comun en Twitter pos la ataca.

En desembre, un esplode a un otra airporto de Istanbul ia mata un limpor. La acel ataca ia es reclamada par un grupo curdi, la Falcones de Libria de Curdistan.

Plu ca 61 milion pasajores ia viaja tra la airoporto Atatürk en 2015. Ma en esta anio, la turisme en Turcia es ja danada par ansia sur securia e par un boicota rusce causada par la tira a tera de un jeto militar rusce a la frontera de Turcia e Suria en la anio pasada.

2016-06-28

Britan en Bruxelles pos Brexit

La ministro xef de la Rena Unida, David Cameron, va consenta oji con otra xefes de la Uni European a la ves prima pos la deside par la pais per sorti.

A un confere alta de la UE en Bruxelles, el va discute la implicas de la vota per Brexit.

La xefes deutx, franses, e italian ia dise ier ce no discutes "formal o nonformal" pote aveni sur la parti de Britan a esta paso.

Entretempo, la ministro de finansia, George Osborne, ia esclui se de deveni la ministro xef nova de la Rena Unida.

Ma la ministro de sania, Jeremy Hunt, ci considera aspira la posto, ia dise ce la pais debe resta en la mercato comun de la Uni. El ia proposa la idea ce la RU ta pote reteni se asede completa a la mercato, con la beneficas comersial de esta, ma ta pote negosia un compromete sur la regulas de la move libre de persones.

En cuando Europa atenta comprende la deside par Britan, Cameron va es presente con otra xefes UE a un come laborante de sera, pos consentas con Donald Tusk, la presidente de la Consilio European, e Jean-Claude Juncker, la presidente de la Comision European.

El no va es presente a discutes entre la xefes de la otra 27 statos membros de la Uni a la come de matina de mercurdi.

Cameron ia anunsia se resinia pos cuando la referendo de la semana pasada ia oposa el. El ia campania afin la pais resta en la Uni, ma ia insiste ce on debe aseta la resulta de la vota.

Parlante ier, el ia dise ce on institui aora un departe spesial de governa per fa la preparas inisial per sorti de la Uni European.

An tal, el ia dise ance ce sola se seguor – ci on va eleje ante la comensa de setembre – va deside la modo de continua e la tempo esata de la avisa formal de la intende de sorti. La avisa va invoca Article 50 de la Trata de Lisbon.

Su la regulas de la UE, cuando esta aveni, la Rena Unida va ave du anios per negosia la constrinjes de se divorsa, estra si tota la 27 membros restante ta acorda estende la tempo. La pais va nesesa ance negosia se relata futur de comersia con la UE.

Angela Merkel, la canselor de Deutxland, ia dise ce on debe permete alga tempo per la prepara de un governa nova de la RU, ma el e du otra xefes UE ia indica ance ce on no va pote pospone la prosede sin fini.

François Hollande, la presidente de Frans, e Matteo Renzi, la ministro xef de Italia, ia asentua ce on debe trata la parti de la Rena Unida con rapidia masima per consentra sur la otra defias a la Uni, como la batalia contra terorisme e la forti de fronteras.

Ance la Parlamento European va fa oji un consenta de crise per debate la situa pos la vota per Brexit, incluinte un proposa nonobligante cual recomenda la "ativi pronto" de Article 50.

Membros de la parlamento, ci va debe validi la acorda final con la Rena Unida, ia dise ce los desira es "completa envolveda" en la prosede, e ce la retira nesesa es "rapida e coerente" per proteje la interesas de la projeta european plu vasta.

Pos du dias de cades subita de la paund en asionerias e un tumulta political en Britan, la nonsertia crese sur la implicas de Brexit e la natur esata de la autoria cual la seguor de Cameron va reseta.

2016-06-27

Un esplode a un stadion malagasi

Un esplode de granada ia mata a la min du persones a la selebras de la dia nasional de Madagasicara, en la capital Antananarivo.

Sirca 80 persones ia es ferida en la esplode a un stadion.

Presidente Hery Rajaonarimampianina ia descrive lo como "un ata teroriste" e ia culpa "diverjes political" per lo.

La situa en la pais resta frajil, con ce suportores e oposores de la presidente desacorda forte.

La esplode ia aveni en un conserta sin custa a la Stadion Munisipal de Mahamasina. Plu temprana, on ia fa un parade militar ala.

On no sabe clar ci o cual ia causa la esplode.

En un declara difusada a televisa nasional, la presidente ia dise: "Diverjes en punto de vista pote esiste entre nos. [Ma] si la xef no conveni, on no pote mata la popla. Nos va tolera nunca la destabli, spesial car esta es no sola un destabli ma un ata de terorisme."

La eleje de Rajaonarimampianina como presidente en 2013 ia trae un espera fresca pos anios de nonstablia political en Madagasicara.

Ma pos sola 18 menses de se presidentia, la Asembla Nasional de la pais ia vota per acusa el de malcondui car el ia fali reali la prometes per cual on ia eleje el.

La acusa no ia susede, ma se suportores e oposores continua batalia lunlotra.

En 2014, un esplode de granada ia mata un enfante peti e ia feri alga otra persones estra la mesma stadion. On ia aresta no person en relata a acel ataca, e no organiza ia reclama la culpablia.

2016-06-26

Island eleje se presidente nova

Guðni Jóhannesson, un istoriste e un politiciste nova, ia vinse en la eleje presidental de Island.

Pos la conta de 32% de votas, el ia gania 37,8% de los, plu ca la 29,9% ganiada par se oposor, la comersior Halla Tómasdóttir.

Jóhannesson ia comenta: "On no ia conta tota la votas, ma me crede ce nos ia vinse." El ia informa se suportores ce el va labora multe per es la fortia uninte cual islances desira e merita.

Multe persones ia predise ce el va sustitui per Ólafur Ragnar Grímsson, ci ia ocupa la posto de 1996.

On crede ce sirca 10% de la popla de la isola es aora en Frans, regardante se futbalores en la torneo Euro 2016. Jóhannesson ia dise ce se taxe prima de presidente va es visita Frans per aclama la ecipo islansce en se max de ronda du contra England a lundi.

La ambasada de Island en Frans ia envia paperes de vota a la otel de la ecipo en Annecy, afin la juores pote vota a saturdi. Ma on ia organiza no tal sistem per la fanes islansce ci es en Frans, e esta pote produi un partisipa multe basa de min ca 65%.

La presidentia de Island es un posto xef ritual.

La eleje ia aveni a un tempo cuando la popla es desencantada con se clase political. En la investiga sur evitas de imposta pos la esposa de la Paperes Panaman, on ia alega ce alga politicistes islansce posese contas estrateritorial.

Acel scandal ia obliga Sigmundur Gunnlaugsson, la ministro xef, a resinia.

Jóhannesson ave 47 anios. El es un esperta sur istoria political, diplomatia, e la constitui, e no ia declara cual partito political el suporta.

El descrive se como un padre normal ci gusta leje, core lenta, e jua futbal. El ia tradui ance a la lingua islance cuatro novelas par Stephen King, un autor famosa de trileres.

2016-06-25

La pape refere a un jenoside istorial par Turcia

Pape Fransisco ia descrive la mata coletiva de armenianes su la rena osmanian turces en la Gera Mundal Prima como "jenoside", repetente un parola cual ia provoca coleria turces en la anio pasada.

El ia fa la comenta en un visita a Erevan, la capital de Armenia, per onora la memoria de la masacra.

Armenia e multe istoristes dise ce asta 1,5 milion cristianes armenian ia es matada par fortes osmanian en 1915.

Turcia ia desacorda sempre con esta statistica e rejeta la usa de la terma "jenoside". Lo dise ce la moris ia es un parte de un gera interna inisiada par la Gera Mundal.

La disputa sur la modo de descrive la matas ia continua asidi la relatas entre Armenia e Turcia, e ia atrae ance otra paises como Deutxland, do la parlamento ia declara resente ce la matas ia es un jenoside.

En un parla a la presidente armenian Serj Sargsian e la corpo de diplomatas, lo ia pare ce la Pape ia ajunta la parola "jenoside" a se testo preparada.

"Esta trajedia, esta jenoside, ia marca regretable la comensa de un serie triste de desastres grande de la sentenio pasada," el ia dise. El ia ajunta ce la matas ia es "posiblida par intendes contorseda de raza, ideolojia, o relijio cual ia oscuri la mentes de la tormentores an asta la punto de scemi la elimina de poplas intera".

La escutores ia sta se per aplaudi la comentas.

Sargsian ia dise: "On no pote fa otra ca fida la vinse de justia cuando, pos 100 anios, la mesaje de justia es espresada a umanas de la cor de la mundo catolica."

Turcia ia fa no reata direta. En la anio pasada, lo ia retira se ambasador vatican per 10 menses cuando la Pape ia refere a jenoside.

En 2014, a la ves prima, Recep Tayyip Erdoğan, la ministro xef de Turcia, ia ofre compatia a la netas e netos de tota la armenianes ci ia perde se vives. Ma el ia dise ance ce lo es nonpermetable ce Armenia cambia la desacorda "a un tema de disputa political".

Armenia dise ce asta 1,5 milion persones ia mori en 1915–16 cuando la Impero Osmanian ia es desintegrante. Turcia ia dise ce la cuantia de moris ia es multe min grande.

Multe de la vitimes ia es persones nonmilitar ci ia es deportada a desertos steril do los ia mori de famia e sidia. Miles ia mori ance en masacras.

La plu de eruditas nonturces sur la avenis regarda los como jenoside. Entre la otra statos cual reconose formal los como jenoside es Arjentina, Beljia, Canada, Frans, Italia, Rusia, e Uruguai.

Turcia insiste ce multe de la mores ia es matada en scaramuxas de la Gera Mundal Prima, e ce turceses etnical ia sufri ance.

2016-06-24

La Rena Unida eleje sorti de la Uni European

En un referendo sin presedente, la Rena Unida ia vota per sorti de la Uni European pos 43 anios.

David Cameron, la ministro xef ci ia inisia la referendo e ci ia campania pasionosa per la lado Resta, ia anunsia ce el va resinia per permete ce un otra "capitan" maneja la negosias de sorti. Ma el va resta en se posto per tre menses per "stabli la barcon".

La lado Sorti ia gania cuasi 52% de votas. Cimri e England, estra London, ia vota forte per Brexit, ma Scotland, Er Norde e London ia suporta resta en la UE.

Nigel Farage, la xef de UKIP (la Partito per la Autonomia de la Rena Unida), ia descrive la resulta como la "dia de autonomia" per Britan, ma la lado Resta ia nomi lo "un desastre".

La paund ia cade asta se valua la plu basa pos 1985 contra la dolar cuando asionerias ia reata a la resultas.

Plu ca 30 milion persones ia vota, 71,8% de los ci ia pote partisipa. Esta proportio es la plu alta en la Rena Unida pos 1992.

John McDonnell, la ministro ombral de finansia per la Partito Laboriste, ia dise ce la Banco de England va debe cisa interveni per reforti la paund, cual ia perde 3% de se valua a la anunsia de la resulta local prima per sorti. Contra la euro, lo ia perde asta 6,5% de se valua.

Farage, ci ia campania tra 20 anios afin Britan sorti de la UE, ia dise a suportores aclamante: "Esta va es un vinse per persones comun, per persones bon." A la comensa de la note, el ia predise an un vinse per Resta, credente la sondas.

Keith Vaz, un ministro pasada de Europa per la Partito Laboriste, ia dise ce la popla brites ia vota con "se emosias" e ia rejeta la consela de espertas ci ia averti sur la efeto economial de sorti de la Uni. El ia ajunta ce la UE debe fa un confere alta per discute la resulta, cual el ia descrive como "desastrosa per nos pais, per la resta de Europa, e per la resta de la mundo".

La ministro de esternas deutx, Frank-Walter Steinmeier, ia descrive la resulta como "un dia triste per Europa e Britan Grande".

Ma Liam Fox, un parlamentor conserviste ci vole sorti, ia dise ce la votores ia mostra multe "coraje" par deside "cambia la curso de istoria" per la Rena Unida e, el ia espera, la resta de Europa. El ia recomenda "un periodo de calmia, un periodo de refleta, per permete ce on comprende la situa e esplora la detalias real".

Nicola Sturgeon, la ministro xef de Scotland, ia dise ce la vota "clari ce la popla de Scotland vide se futur como un parte de la Uni European", car tota 32 areas de autoria scotes ia declara majorias per Resta.

Britan va es la pais prima cual sorti pos la formi de la Uni European, ma lo no va sesa direta es un membro de la alia de 28 nasiones. La prosede de se parti pote ocupa a la min du anios, e no va comensa asta pos la resinia de Cameron.

La prosede va comensa con la ativi de la Article 50 de la Trata de Uni European. A pos, Britan no va pote rejunta se a la UE sin la acorda de tota statos-membros.

2016-06-23

Democratas SUA protesta sur noncontrola de fusiles

En la Salon basa de la Congresa de la SUA, membros de la Partito Democrata protesta par senta sur la solo per esije plu controlas sur fusiles, pos matas a un discoteca ge en Florida.

Congresor John Lewis ia recomenda ce se colaborores sede nunca.

Paul Ryan, la presidente republiciste de la Salon, ia desvalua la protesta como un truco per atrae atende.

Senatores esije un compromete, e Harry Reid, la senator democrata major, suporta un lege nova proposada par Susan Collins, un senator republiciste, per proibi la vende de fusiles a un cuantia restrinjeda de persones ci on trova en alga listas de oserva de terorisme.

On ia intende pasa oji la projeta ante la Senato. "An si lo es cisa un paso peti a ante, a la min lo es un paso a ante," Reid ia dise.

A 12 junio, Omar Mateen, un om ci ia declara se fida a la organiza Daex, ia mata 49 persones a Pulse, un loca de note en Orlando, en la fusili la plu matante de la istoria moderna de la SUA.

La Partito Republiciste, ci controla la Congresa, ia anunsia un suspende, ma cuasi 100 democratas ia veni a la fronte de la salon, ia senta se, e ia canta lenta "no lege, no suspende".

Esta ia es un de la avenis la plu estracomun videda a cualce ves en la Congresa.

La xefes republiciste ia descomuta la cameras de la Salon, ma la protestores ia vade enlinia con se mesaje, tuitante fotos e fluente videos direta en redes sosial.

A alga oras pos la comensa de la protesta, Ryan ia atenta recomensa la ativia normal, ma se vose ia es perdeda su la crias de la protestores. La solo de la Salon ia deveni caososa, con ce republicistes e democratas ia cria a lunlotra sur la tema.

La protesta es gidada par Lewis, un veteran de la promove per diretos sivil en la desenio de 1960.

"Cual cosa esta organiza ia fa [per responde a la violentia]?" Lewis ia demanda, referente a alga atentas nonsusedosa en la semana pasada per aseta un lege de controla de fusiles. "No cosa. Nos ia ofre oreas sorda a la sangue de inosentes. Nos sta sieca ante un crise. Cuanto plu madres e padres debe plora larmas de lamenta?"

En Twitter, presidente Barack Obama ia grasia Lewis per se "gida sur la violentia de fusil do nos nesesa masima lo".

La protestores desira ce on fa un vota ante la suspende ajendida a la fini de esta semana. La suspende va fini a 5 julio.

Ma Ryan ia insiste ce el no va permete un vota sur controla de fusiles en la Salon basa: "Los sabe ce nos no va trata un proposa cual sutrae la diretos constitual garantiada de un person, sin la prosedes nesesada."

2016-06-22

Un jaguar olimpial es matada

Un jaguar es matada par fusil, corta pos cuando on ia usa lo en un rele de torxa olimpial a un zo en Manaus, un site en Brasil.

La jaguar fema ia evade se manejores pos la rituo a lundi e ia ataca un soldato.

Cuatro dardos calminte ia fali para lo, e un soldato ia fusili lo con pistol.

Organizores de la juas olimpial ia dise ce los ia era en esibi la torxa olimpial a lado de un bestia savaje cadenida.

Grupos per diretos animal ia condena la mata. Alga ia demanda perce la jaguar ia es an envolveda en la rituo.

En un declara, la dirijor de enforsa de lege sur animales caturada a la organiza Persones per la Trata Etical de Animales ia dise: "Cuando nos va aprende? Bestias savaje, ci on teni caturada e ci on obliga a fa cosas asustante, dolosa a veses, e sempre nonatural, es bombas-orolojos tictacante."

La animal ia es nomida Juma. On ia eleva el, con ses conasedas, en la zo en la Amazon de cuando lo ia es un jaguareta.

La torxa olimpial viaja en rele tra Brasil ante la rituo abrinte de la juas en agosto.

2016-06-21

Barain desitadani un eglesor xia

La xef de la Gardores Revolual de Iran ia sujesta ce un resiste armada ta pote aveni en Barain, un pais governada par muslimes suni, pos cuando on ia sutrae la sitadania de la eglesor xia major.

Generalo Qasem Soleimani ia dise ce la ata par Bahrain contra xec Isa Qassim ta pote "ensende la rejion".

Barain ia acusa la eglesor de usa se autoria per "servi interesas stranjer", promovente "setalisme e violentia".

Miles de protestores ia asembla prosima a se casa. Los ia canta sloganes denunsiante Re Hamad bin Isa al-Khalifa e la governa. La ministreria de internas ia avisa contra protestas.

En un declara publicida par Fars, un ajenteria semiofisial de novas, Soleimani ia dise: "La al-Khalifas [la renores de Barain] sabe serta ce se ataca conta xec Isa Qassim es un linia roja, e ce traversa lo ta ensende Barain e la rejion intera, e lo ta lasa a persones no otra posible ca fa un resiste armada."

Plu temprana, la ministreria de esternas irani ia critica ance la ata.

La eglesor ave la titulo relijial aiatola. El ia suporta protestas gidada par la comunia xia, la majoria, per plu diretos sivil e political.

En anunsia la deside de sutrae la sitadania baraini de Qassim, la ministreria de internas ia dise ce la eglesor "ia adota teocratia e ia asentua la fida asoluta a la eglesa".

Lo ia acusa el de es en contata continuante con "organizas e partitos cual es enemis de la rena".

La departe de esternas de la SUA ia descrive se como "alarmada" par la deside, ajuntante ce lo es "nonconsensa de atestas credable" per suporta la sutrae la sitadania.

La developa aveni a mera dias pos la suspende par la governa baraini de la grupo xef de oposores xia, la Sosia Muslim Nasional al-Wefaq, cluinte se ofisias e comandante ce on jela se ativas finansial.

La xef political de al-Wefaq, xec Ali Salman, un eglesor xia, es en prison. El ia es condenada en 2015, e on ia estende resente se periodo de prisoni a nove anios.

Un mesaje diplomata de la SUA, publicida par WikiLeaks, ia descrive xec Isa Qassim como la xef spirital de al-Wefaq. On regarda el ance como la xef spirital de la comunia xia plu vasta de Barain.

La mesaje ia dise ce la eglesor ia studia en Qom, un site irani, en la desenio de 1990, e ce el ia spende ance tempo en la site Najaf, un sentro de eruditia xia en Iran.

2016-06-20

La cuantia de deslocadas es la plu grande de istoria

La ajenteria de refujadas de la Nasiones Unida dise ce la cuantia de persones deslocada par gera es la plu alta de istoria rejistrada.

Lo estima ce, a la fini de 2015, 65,3 milion persones ia es o ja refujada o xercante refuja o interna deslocada. La cuantia ia crese par 5 milion persones en un anio.

La cuantia coresponde a un person en cada grupo de 113 sur la planeta.

Entretempo, la xef NU sur refujadas dise ce un clima disturbante de xenofobia ia saisi Europa en cuando lo luta per maneja la crise de migrores.

La enflue de persones, la plu grande de pos la Gera Mundal Du, ia aumenta la suporta per grupos estrema destriste e politicas controversa contra la migra.

En se reporta anial oji, a la Dia Mundal de Refujadas, la NU ia dise ce esta es la ves prima cuando la cuantia de refujadas en la mundo ia esede 60 milion.

Plu ca un dui de los veni de sola tre paises: Suria, Afganistan, e Somalia.

An con la foca intensa sur la crise de migrores a Europa, la NU ia dise ce 86% de la refujadas de mundo es refujada en paises de revenu basa e media.

Turcia es la pais cual reseta la plu multe refujadas, con 2,5 milion persones, segueda par Pacistan e Lubnan.

Plu ca milion migrores ia ariva en Europa par mar en la anio pasada, seguente la Organiza Internasional per Migra (OIM), ma otra ajenterias estima un cuantia multe plu grande. La OIM ia dise ce sirca 35 mil ia ariva par tera.

La destinas prefereda per la plu multe persones es paises norde e plu rica, como Deutxland e Sveria. Esta es refletada en la statistica NU per solisitas nova de refuja en 2015, cual indica Deutxland como la resetante major, segueda par la Statos Unida e Sveria.

La plu de refujadas suri en Turcia pertine a la scema tempora de proteje de la governa turces, e donce on no conta los como refujadas.

La crise european de migra ia causa divides political major en la Uni European. Alga statos en la zona Schengen, en cual on ia aboli fronteras nasional, erije sercas e reinstitui un sistem de frontera.

La bloco european ia ateni un acorda con Turcia en un atenta de limita la move coletiva de persones a la UE. Grupos de diretos umana ia critica forte esta acorda.

En comentas separada, Filippo Grandi – la xef NU sur refujadas – ia dise ce xefes de statos european debe ata plu per coordina se politicas e per combate stereotipos negativa sur refujadas. "Los ci fa la reversada, ci tisa la opina publica contra refujadas e migrores, es culpable de crea un clima de xenofobia cual es multe disturbante en la Europa de oji."

El ia ajunta ce lo es nonfortunosa ce alga desides fada par la UE per maneja la crise "no ia es realida", e ia descrive esta como "un posible cual on ia perde".

2016-06-19

Romanes va eleje cisa se maior fema prima

Lo pare probable ce Roma va eleje se maior fema prima en un ronda desidente de vota munisipal.

On regarda Virginia Raggi, de la Promove Sinco Stelas antisistem, como la favoreda contra Roberto Giachetti de la Partito Democrata sentral destriste.

Un vinse par Raggi ta es un colpa contra Matteo Renzi, la ministro xef de Italia. La Partito Democrata de Renzi risca perde ance en Milano, la capital finansial de la pais, e va esperia batalias difisil en Torino e Bologna.

Raggi es un avocato de 37 anios. El ia gania 35% de votas en la ronda prima a du semanas ante aora, contra 24% per Giachetti.

Analistes dise ce un vinse en Roma va dona a Sinco Stelas e se mesaje antiglobaliste un plataforma forte per la elejes parlamental en 2018.

La maior seguente de Roma va trova un site afondante en detas de plu ca €13 mil milion ($15 mil milion), la duple de se spende presuposada anial.

Romanes es frustrada par dolinetas, montones de dejetada, e problemes seria de transporta publica e de casas.

La Promove Sinco Stelas ia es fundida par Beppe Grillo, un comediste, en 2009, e lo campania contra la froda cual domina ja la politica italian tra anios.

Ignazio Marino de la Partito Democrata ia resinia como maior de Roma en otobre, pos un scandal de spende. La site es sin maior en la tempo interveninte.

Un scandal multe plu grande, envolvente la influe alegada de la mafia en la governa local de Roma, ia nuri la asende de Sinco Stelas. La partito desira institui se per deveni la oposor xef en la vota jeneral de 2018.

Renzi ia aposta se futur political sur un referendo en otobre en cual el vole ce italianes suporta reformis constitual profonda. La intende es fini la tradision de governas "porda caruselin" e ajunta stablia pos anios de disputas en partitos e de nonprogresas en legi.

2016-06-18

Putin protesta contra la proibi de atletisme rusce

Vladimir Putin, la presidente de Rusia, ia dise ce lo es nonjusta ce la ecipo rusce de atletisme lejera es ancora proibida de concursos internasional, incluinte la Juas Olimpial de esta anio en Brasil.

La Asosia Internasional de Federas Atletal (IAAF) ia deside no sutrae la suspende, ajuntada pos acusas de drogis sponsorida par la governa.

Atletas individua pote compete en modo neutral si los demostra ce los es limpa, sin drogas.

Putin ia recomenda un interveni par la Comite Internasional Olimpial (CIO). La dirijores de la CIO ia dise ce los va fa oji un confere telefonal per discute la tema, ante un consenta completa de la CIO en Lausanne a martedi.

"On ave prinsipes universal reconoseda de lege, e un de los es ce la culpablia debe sempre es personida," Putin ia comenta. "Perce la persones ci ave no relata a violes ta sufri per los ci ia fa la violes? Me suposa ce nos va fa un discute con nos colaborores en la strutur mundal antidrogi, e me espera un reata conveninte de la Comite Internasional Olimpial."

La pais ia es suspendeda par la IAAF en novembre 2015, pos un reporta autonom par la Asosia Mundal Antidrogi (WADA) cual ia descrive un cultur de usa vasta de drogas, con la envolve an de ajenterias secreta.

A pos, Rusia ia fa reformis incluinte un revisa completa de la regulas, la introdui de probas autonom, e lesones antidrogi en scolas.

Un ecipo ia studia esta reformis, ma un reporta nova par WADA, publicida a martedi, ia conteni plu alegas danante. An si on ia fa progresas notable per sasia la criterios de la IAAF, lo ia dise, plu laboras resta.

Spesial, lo pare ce la cultur profonda de tolera drogis no ia cambia. La atletas e se instruor xef pare no vole reconose la estende de la problem; on ancora no ia crea un infrastrutur forte e produosa contra lo, capas de deteta e preveni; e on ave alegas detaliosa ce la ministreria de sporte ia dirije un sistem de drogi e asconde.

WADA ia dise ce ofisiores en Rusia es impedida de proba atletas, e es menasada par ajenterias de securia.

Rune Andersen de la IAAF ia dise ce la atletisme rusce es "contaminada par drogi, an a la nivel la plu alta". El ia comenta: "La drogi sistemosa cual ia aveni en Rusia – distingui la atletas limpa es difisil."

John Coates, la vispresidente de la CIO, ia dise ce on debe continua proibi atletas rusce e no permete ce los partisipa en la Olimpiales cual va comensa en Rio de Janeiro a 5 agosto. El ia sujesta ance ce en Rusia la ajenteria antidrogi e la organiza atletal es "putrida asta la cor".

Entretempo, Yelena Isinbayeva, un saltor con palo ci ave 34 anios e medalias de oro ganiada en la Olimpiales de 2004 e 2008, ia dise ce el va defia la deside de la IAAF en corte legal, declarante ce lo es "un viole de diretos umana".

El ia ajunta: "Me es deludeda e coler. Me es ofendeda. Nun ia batalia per nos diretos, e on ave un ansia enorme sur la IAAF mesma e se disposa a defende la diretos de atletas limpa. On culpa nos per un cosa cual nos no ia fa. Me no va resta silente, me va ata. Me va apela a la corte de diretos umana."

En un declara, la ministreria de sporte de Rusia ia descrive se como "estrema deludeda" par la deside de la IAAF, ajuntante ce lo crede ce "la sonias de atletas limpa deveni destruida par causa de la condui odiable de otra atletas e ofisiores".

Sebastian Coe, la presidente de la IAAF, ia dise ce "no politica" es envolveda en la deside sur proibi Rusce. El ia asentua la natur unida de la deside e la diversia internasional de la membros de la consilio.

2016-06-10

Kuczynski gania la presidentia de Peru

Pos la conta de tota votas, lo pare ce la economiste Pedro Pablo Kuczynski ia gania apena la eleje presidental de Peru.

La comision elejal ia dise ce el ia reseta 50,12% de la votas, contra 49,88% per se oposor, Keiko Fujimori.

Ante cuando on pote declara ofisial la ganior, sirca 50 mil votas resta per es judida par un corte elejal.

Fujimori ancora no ia aseta se defeta, ma Kuczynski ia tuita se grasias a la popla peruan. "Lo es la momento per labora en junta per la futur de nos pais," el ia dise a se seguores en Twitter.

Esta ia es la eleje la plu difisil ganiada en Peru en sinco desenios.

An en cuando on ia es contante la votas final, la aspirores ia resta cuasi egal, con mera un vantaje pico per Kuczynski.

La resulta ia surprende multe persones, car sondas en la periodo ante la eleje ia sujesta ce Fujimori ave un vantaje grande.

Analistes ia dise ce scandales de froda en la partito de Fujimori, Fortia Popular, ia redui cisa se cuantia de suportores pos april, cuando el ia gania fasil la ronda prima de votas.

El es la fia de Alberto Fujimori, un presidente pasada de Peru, ci es en prison per crimines contra diretos umana.

Kuczynski es un finansior pasada de Wall Street. El ia dise ce el va usa se esperia de finansia internasional per promove un crese de economia.

El ave la suporta de persones importante como Mario Vargas Llosa, un novelor ci ia gania la Premio Nobel de Leteratur, e la aspiror sinistriste Verónika Mendoza, ci ia fini la ronda prima de votas como la numero tre.

Ma on ia esamina Kuczynski sur se relata prosima a la persones potiosa ci influe la comersia de la pais.

[Aora oji va recomensa a 18 junio.]

2016-06-09

Bernie Sanders continua se campania presidental

En la SUA, la presa crese contra Bernie Sanders, senator de Vermont, afin el ta abandona se aspira per deveni la nominada presidental de la Partito Democrata.

On regarda aora Hillary Clinton como la nominada nondeclarada, pos cuando el ia gania cuatro de ses preelejes a martedi.

Sanders ave aora cuasi no posible de deveni la nominada, ma el ia promete continua se campania. El va encontra oji presidente Obama.

Democratas ia recomenda forte ce el junta se a la campania de Clinton per aida vinse Donald Trump, la nominada nondeclarada de la Partito Republiciste.

La consenta con Obama a la Casa Blanca ia es solisitada par Sanders. El va fa ance oji un asembla en Washington, ante la preeleje par la capital a 14 junio.

Sanders ia gania 22 preelejes de stato e asemblas "caucus", ma ia fali afeta multe la vantaje de Clinton, an si Sanders ia fa un campania impresante cual ia influe la debate Democrata e ia interesa multe votores joven.

En cuando on ia conta la votas en California, Sanders ia dise: "Me es alga bon a aritmetica, e me sabe ce la batalia ante nos es un batalia multe multe presipe, ma nos va continua batalia per cada vota e cada delegada cual nos pote oteni."

A la comensa de la preeleje de California, Sanders ia dise ce el espera atrae la supradelegadas, ci no nesesa dise ci los suporta asta la confere de la partito en julio. Ma multe comentores political ia duta ce esta va aveni.

Se campania redui se cuantia de empleadas par sirca un dui ante la preeleje en la stato capital.

2016-06-08

Cenia perde se eletrica par causa de un simia

Un simia ia causa un rompe de eletrica tra la intera de Cenia cuando lo ia cade a sur un aparato esensal.

La simia ia cade ier sur un mutador en la sentro idroeletrical de la compania KenGen.

La mutador ia descomuta, con resulta ce 180 megavates de enerjia ia es perdeda e ce la pais intera ia es privada de se furni de eletrica.

On ia restora la furni a cuasi cuatro oras plu tarda.

La simia ia survive se aventura, e lo es aora curada par la Servi de la Vive Savaje de Cenia.

En un declara, la compania ia esplica: "La complesos de KenGen es securida par sercas eletricida cual impedi animales sacante. Nos regrete esta aveni isolida, e la compania investiga modos de aumenta plu la securia a tota nos complesos de eletrica."

La pajeria de la jornal Business Daily Africa ("Comersia Dial de Africa") ia reporta ce companias ia sufri la plu par esta perde de eletrica. Multe ia instala ja jeneradores como resulta de rompes presedente.

2016-06-07

Laboras per restora la tomba de Jesus

Un ecipo de espertas ia comensa restora la tomba antica en Ieruxalim sur cual cristianes crede ce Jesus ia es ala enterada. Esta es la labora prima a la tomba en 200 anios.

La renovi en la Eglesa de la Tomba Santa intende reforti e conserva la strutur.

Disputas entre la tre ramos cual maneja la eglesa ia retarda la labora. Ma eglesores de la eglesas elinica ortodox, roman catolica, e armenian ia pone se disputas a lado, reconosente la nesesa de comensa la repara.

La labora va consentra sur la santeria antica conteninte la tomba de Jesus, sur cual cristianes dise ce lo sta supra la loca do on ia unje, envolve, e entera la corpo de Jesus.

La restora la plu resente ala ia aveni en 1810 pos un focon.

La autoriosas de la tre ramos eglesal es encargada con maneja partes diversa de la eglesa, ma los comparti la encarga de la santeria.

La relatas entre la ramos es tensada a veses. En 2008, un disputa entre monces elinica ortodox e armenian ia aumenta a un scaramuxa. Ma los ia deside ata juntada pos cuando la autoriosa de anticas israeli ia dise en la anio pasada ce la eglesa es nonsecur. La polisia ia clui lo per un tempo corta.

La coordinor siensal de la reparas, Antonia Moropoulou, ia dise ce la tomba es stable ma desformida, e ce lo nesesa ce on atende lo pos multe anios de esposa a acua, umidia, e fuma de candelas. El ia ajunta ce la strutur nesesa ance deveni protejeda de la risca de dana par tremateras.

On previde ce la labora va ocupa entre oto e des-du menses. En acel periodo, peregrinores va pote ancora visita la santeria.

Cada ramo contribui mone a la projeta de $3,3 milion. En ajunta, Re Abdullah de Jordan ia fa personal un dona finansial.

Jordan ia controla la Site Vea de Ieruxalim, do la eglesa sta, asta la gera arabi-israeli de 1967. Lo continua ave un rol en proteje locas santa muslim e cristian ala.

2016-06-06

Tempestas matante en Australia

Tre persones es mor e plu es mancante pos tempestas enorme cual ia inonda rios, desradisi arbores, e bate plaias longo la costa este de Australia.

Tempestas colpa ancora la sude de New South Wales, Victoria, e Tasmania.

En Sydney, erode a la plaia Collaroy ia obliga ce on abandona casas multe rica cual risca aora colasa.

On teme ce du persones vea ia afoca sur la isola Tasmania, do avertis major de inonda afeta sete rios.

On reporta ce un om ia es puxada a en la Rio Ouse de se jardin retro, e un fem ia desapare pos cuando acua ia inonda se casa en la norde-ueste de la isola.

Salvores xerca ance un om ci la mar ia puxa de sur rocas prosima a la plaia Bondi en Sydney.

A esta matina, on ia trova la corpo de un om en la Rio Cotter prosima a Canberra en la Teritorio Capital Australian. La polisia ia dise ce la om ia ave 37 anios e ia deveni caturada en un inonda a un vado de rio.

Sumerjores polisial ia retrae ance la corpos de du omes de ci la acua ia puxa se autos de sur la via en du avenis separada en New South Wales.

Un om de 65 anios ia es trapida en se veculo en atenta traversa un inonda a Bowral, e un otra om ia mori cuando se camioneta ia es puxada de sur la via a la borda sude-ueste de Sydney.

Tasmania norde fronti oji un inonda la plu grave de desenios, con partes de Launceston, Latrobe, e Railton sumerjida.

La Consilio Asecural de Australia ia dise ce companias de asecura ia reseta ja 11 150 reclamas tra Queensland e New South Wales, per la soma estimada de 38 milion dolares australian.

2016-06-05

Suiz fa un referendo sur la revenu fundal

Suiz vota sur un proposa de introdui un revenu fundal garantiada per cada sitadan. Lo deveni la pais prima cual fa un tal referendo.

On proposa paia a adultes un revenu nonrestrinjeda de 2500 frances suiz ($2555) per mense, o si los labora o si no.

Suportores de la idea dise ce la labora en la sentenio 21 es sempre plu automatida, e ce min postos es disponable per laborores. Ma sondas sujestas ce sola un cuatri de votores suiz aproba la idea.

Su la defini de la revenu fundal, laborores ci gania ja plu ca 2500 frances no ta reseta plu mone.

On vide poca suporta per la idea entre la politicistes de Suiz, e an no un partito parlamental ia declara se como favorente lo.

La oposores razona ce un deslia de la mone ganiada de la labora fada ta es un mal paso per la sosia.

Ma Che Wagner de la grupo campaniante Revenu Fundal Suiz dise ce lo no ta es un paia per no cosa. "En Suiz, plu ca 50% de tota la laboras fada es nonpaiada. Los es laboras de cura, los es a casa, los es en comunias diversa, tal ce la laboras ta es plu valuada con un revenu fundal."

Luzi Stamm, un parlamentor destriste per la Partito de la Popla Suiz, oposa la idea. "Teorial, si Suiz ta es un isola, la responde ta es «si». Ma con fronteras abrida, lo es completa nonposible, spesial per Suiz, con un norma alta de vive. Si on ta ofre a cada individua un cuantia de mone suiz, on ta ave biliones de persones ci ta atenta move a Suiz."

On esplora la idea ance en otra paises. En Finland, la governa considera un periodo probante de dona un revenu fundal a sirca 8000 persones de grupos de revenu basa.

E en la site nederlandes Utrecht, on developa ance un projeta esperimental cual va comensa en janero 2017.

La revenu fundal es oji un de sinco temas sur la paper de vota suiz. On vota ance sur la finansia de servis publica e sur un simpli de la metodo per xerca refuja.

2016-06-04

Muhammad Ali mori

La boxor Muhammad Ali ia mori a la eda de 74.

La campion mundal pasada de boxe pesosa, e un de la sportores la plu conoseda de mundo, ia mori en la site Phoenix, Arizona en la SUA, pos es ospitalida a jovedi.

El ia sufri de un maladia respiral, un state complicada par la maladia de Parkinson.

La funera va aveni en se site de nase: Louisville, Kentucky.

Naseda con la nom Cassius Marcellus Clay, Ali ia deveni subita famosa cuando el ia gania la medalia de oro de boxe semipesosa a la Olimpiales de 1960 en Roma.

El ia vinse Sonny Liston en 1964 per gania se titulo prima de mundo, deveninte la person prima ci ia reseta un titulo mundal de boxe pesosa a tre veses separada. El ia reseta la nometa "The Greatest" (La plu grande).

Coronida como "Sportor de la Sentenio" par la jornal Sports Illustrated e como "Person Sportal de la Sentenio" par la BBC, Ali ia es notada no sola per se capasia en la boxeria ma ance per se comentas ante e pos maxes e per se predises corajosa.

El ia es ance un campanior per diretos sivil e un poesiste ci ia transende la fronteras de sporte, raza, e nasionalia.

El ia jubila final en 1981, pos gania 56 de se 61 maxes.

Corta a pos, rumores ia comensa sur la state de se sania. Se parla ia deveni nonclar, el ia tira se pedes, e el ia es frecuente dormosa. Ultima, on ia diagnose la sindrom de Parkinson, ma Ali ia continua apare publica, resetante un bonveni zelosa sempre do el ia viaja.

El ia ensende la caldera olimpial a la juas de 1996 en Atlanta, Georgia, e ia porta la bandera olimpial a la rituo cual ia abri la juas de 2012 en London.

El ia dise: "Me desira ce on recorda me como un om ci ia gania la titulo pesosa a tre veses, ci ia es bonumorosa, e ci ia trata bon cadun. Como un om ci ia senti nunca superior a los ci ia respeta el… ci ia defende se credes… ci ia atenta uni tota umanas par fida e ama.

"E si tota esta es tro multe, alora me suposa ce me ta aseta ce on recorda me sola como un boxor eselente ci ia deveni un gidor e un campion de se popla. E me no va es an ofendeda si on oblida ce me ia es tan bela."

2016-06-03

Inondas en Frans e Deutxland

On previde ce la acua inondante Paris va ateni oji se culmina, con la Rio Seine a un altia de ses metres supra se nivel normal.

La Louvre e la museo de Orsay es cluida afin se empleadas pote move obras major de arte a locas plu secur.

La inondas tra Frans e Deutxland ia mata a la min 11 persones e ia obliga miles a abandona se casas.

Plu deluvias es prevideda per la fini intera de semana tra un banda de Europa sentral, de Frans a Ucraina. On predise ce asta 50 milimetres de pluve va cade en alga partes en sola un pico de oras.

Alga vilas en Deutxland sude ia deveni forte danada, e Beljia e Polsca es ance afetada.

François Hollande, la presidente franses, ia dise ce la pluve es un fenomeno seria climal e un defia global. El va declara un state de desastre natural en la partes la plu colpada, tal librinte reservas finansial de crise.

En Paris, on ia erije paradeluvias tempora longo la Seine, cual ia supraflue en alga locas. La compania ferovial SNCF ia clui un linia cual vade longo la rio en la sentro de Paris.

Sirca 25 mil persones ave no eletrica en Paris e Frans sentral.

En Nemours, on ia sorti 3000 persones de la sentro de vila. La rio Loing, un afluente de la Seine, ave aora un altia no videda de pos la inondas ruinante de 1910.

Ses semanas de pluve ia cade en tre dias en la departe Loiret, sumerjinte ruas e obligante motoristes a abandona se autos.

En Deutxland en dias resente, a la min nove persones ia mori par causa de la inondas, e la loca presente de alga persones es nonsabeda.

Angela Merkel, la canselor, ia dise ce la pais lamenta per los ci ia perde se vives.

La aveni la plu mal ia es Simbach am Inn en Bayern en Deutxland sude, do on ia trova ce un fem de 78 anios, se fia de 56, e se neta de 28 anios ia mori en la sutera de se casa.

Plu temprana en la semana, cuatro persones ia mori en inondas en la sude-ueste de Deuxtland.

En otra partes de la pais, on ia declara un state de crise en Passau, un vila istorial. En Pfarrkirchen a martedi, plu ca 35 milimetres de pluve ia cade en ses oras. E en la distrito Wesel en la stato Nordrhein-Westfalen, on ave ansia sur un parario cual pare a punto de rompe.

Ance Beljia ia esperia pluves forte. On reporta inondas en multe partes, incluinte sirca Antwerpen, Limburg, e Liège.

2016-06-02

La move de un torneo de golf coleri Trump

Donald Trump, aspiror republiciste per la presidentia de la SUA, ia reata coler pos la move de un torneo major de golf de un de se golferias a Mexico.

El ia dise ce la PGA (Asosia de Golfores Profesal) "ia pone se profita ante miles de empleas american". En se campania, Trump representa Mexico como suminante la economia SUA.

La organiza PGA Tour ia dise ce lo no pote trova sponsores per la Torneo Mundal de Golf 2017 a la campo de Trump en Doral en Miami.

Timothy Finchem, un comisionor per PGA Tour ia esplica ce la profil presente de Trump ia crea difisiles en atrea sponsores.

On reporta ce Cadillac, fabricor de autos lusosa, no ia renovi se acorda de sponsori.

"Donald Trump es un marca comersial, un marca grande," Finchem ia comenta, "e cuando on demanda ce un compania investi miliones de dolares per marca un torneo e lo va comparti acel marca con la ospitor, on ave un deside difisil."

An tal, la organiza ia insiste ce se deside per move la concurso de Florida a la Site Mexico, do lo ia aveni tra la 55 anios pasada, no es political.

"De la punto de vista de golf, nos ave no problemes con Donald Trump. De un punto de vista political, nos es neutra. PGA Tour es nunca envolveda e desira nunca es envolveda en politica presidental."

PGA Tour ia suscrive un acorda nova de sponsori per sete anios con Grupo Salinas, un grupo de companias mexican, e la Torneo WGC-Mexico prima va aveni en marto 2017.

Trump ia dise ce la deside indica "un dia triste per Miami, la SUA, e la jua golf". El ia ajunta: "La esta deside fa no plu ca corpi plu la razona mesma perce me aspira la presidentia de la Statos Unida."

On no ia afirma ofisial la aveneria per la torneo, ma jornalistes reporta ja ce lo va aveni a la Club de Golf Chapultepec prosima a la Site Mexico.

"Me espera ce los ave asecura contra fura de persones," Trump ia comenta.

Finchem ia responde ce un de se empleadas ia confirma ja ce esta es organizada. "Me no ia demanda sur la detalias," el ia dise, "ma me ia espresa la opina ce cisa esta es un cualia cual nos no vole asentua."

2016-06-01

La tunel ferovial la plu longa e profonda de mundo

En Suiz oji, on va abri ofisial la tunel ferovial la plu longa e profonda de mundo, pos cuasi du desenios de construi lo.

La du foras de la Tunel Basa de Gotthard ave un longia de 57 cilometres. Los va furni un lia rapida de ferovia su la Alpes entre Europa norde e sude.

Suiz dise ce esta va revolui la transporta de carga en Europa.

Benes portada sur esta via par milion camiones en cada anio va es transportada par tren en loca.

La longia de la tunel suprapasa la tunel Seikan de Japan, cual ave 53,9 cilometres. La Eurotunel es longa de 50,5 cilometres e deveni aora la numero tre de mundo.

La canselor deutx Angela Merkel, la presidente franses François Hollande, e la ministro xef italian Matteo Renzi va acompania ofisiores de Suiz a la abri formal.

La construi ia custa plu ca $12 mil milion. Votores suiz ia aproba lo en un referendo en 1992, e, a du anios plu tarda, los ia suporta un proposa de grupos ambientiste per move tota carga viajante tra Suiz de autovia a ferovia.

La tunel completida pasa a 2,3 cilometres su la surfas de la montania e tra roca con temperatur de 46°C.

Injeniores ia escava e esplode 73 spesies diferente de roca, de cual alga ia es tan dur como granito e otras ia es tan mol como zucar. Plu ca 28m tones de roca ia es escavada.

Nove laborores ia mori en la labora.

La tunel ia es finida a la tempo e custa prediseda. Aora on ave un lia de ferovia arterin entre Rotterdam en Nederland e Genova en Italia.

Cuando la servi plen comensa en desembre, la tempo de viaja per pasajores entre Zürich e Milano va es reduida par un ora, asta du oras e 40 minutos.

La curso de la tunel nova es plana e reta. Lo no asende curvinte tra la montania como la tunel vea de ferovia, e como la tunel de rua cual on ia abri en 1980.

On previde ce sirca 260 trenes de carga e 65 de pasajor va pasa tra la tunel en mera 17 minutos.

La tunel es finansiada par impostas de valua ajuntada e de carburante, par fa ce veculos pesosa paia per viaja sur autovias, e par prestas governal cual on debe repaia ante la fini de des anios.