2016-08-27

Un om norsce deveni trapida en un latrina

Pompores en Noria ia estrae un om de la interna de un vason. La om ia desende a la tance su la latrina per retrae la telefoneta de un ami, e ia deveni trapida.

Cato Berntsen Larsen, ci ave 20 anios, ia trepa a su con prima se pedes, pos cuando se ami urininte ia cade se telefoneta en la vason.

El ia dise ce el ia ofre entra a la tance, cual ave no lia a la cloacas e cual on vacui a sola cuatro veses per anio.

Stante con gamas sumerjida en la contenida, el ia comensa senti malada, ma ia debe spende un ora intera encluida en la loca peti.

"Me ia panica," el ia dise, "car me odia spasios restrinjeda. Txa, lo ia es repulsante – la plu mal cual me ia esperia. Animales ia es ala a su, ance."

El ia mali se situa par vomiti pronto pos entra.

Se esperia nonfortunosa ia comensa cuando se ami ia cria per aida reave se telefon.

"Me no ia esita," Berntsen Larsen ia dise sur se deside de entra a la tance. Ma la sumerjor acaso ia comprende rapida ce el ia deveni trapida.

Pos es salvada, el ia descrive se como "parente sufisinte magra per desende ma no sufisinte magra per asende denova".

El ia sufri feris a se brasos alta e ia dise ce el ia es mordeda a plu ca un ves. On ia prende el a ospital, do el ia reseta medisin antimicrobio.

La pompores ia debe destrui la vason, e la telefoneta resta en la tance.

Aora oji reposa aora per un semana, ma va recontinua a 5 setembre.

2016-08-26

Un atenta de desrestrinje un iPhone a distantia

On ia descovre defetos en la sistem de opera iOS de Apple, cual permete un criminal a instala programas de spia a un aparato si la usor segue un lia simple a un paje de rede.

Un avocato de diretos umana ia avisa rexercores de securia sur mesajetas nonsolisitada cual el ia reseta. La rexercores ia trova tre defetos nova en la codigo de Apple. Apple ia publici un refresci cual elimina la problem.

La du companias de securia, Citizen Lab e Lookout, ia dise ce los ia reteni detalias de la descovre asta pos la publici de la solve.

La avocato, Ahmed Mansoor, ia reseta la mesajetas a 10 e 11 agosto. Los ia promete revela "secretas" sur persones torturada en la prisones de la Amirias Arabi Unida si el ta toca la lias.

Si el ia ta fa esta, se iPhone 6 ia ta es "desrestrinjeda", e on ia ta pote instala programas nonpermeteda.

Citizen Lab ia comenta: "Infetada, la telefon de Mansoor ia ta deveni un spior dijital en se pox, capasa de usa la camera e microfon de se iPhone per monitori ativia en la visinia de la aparato, rejistra se usas de WhatsApp e Viber, nota mesajes enviada en programas de parleta, e trasa se moves. Nos conose no avenis presedente de usa un desrestrinje de iPhone a distantia como parte de un ataca dirijeda, tal ce esta es un trova rara."

La rexercores crede ce la spiador pertinente, Pegasus, ia es creada par NSO Group, un compania israeli de "sibergera".

"Lo esplota la integra de aparatos portable en nos vives e la combina de cualias disponable sola en telefonetas – un lia permanente a la interede, comunicas de vose, camera, eposta, mesaji, jeoloca par satelite, parolas secreta, e listas de contatas."

NSO ia publici un declara asetante ce lo crea tecnolojia usada per "combate teror e crimin", ma ia dise ce lo sabe no cosa sur avenis individua e no ia refere a la spiador descovreda en esta caso.

Apple ia comprende rapida la gravia de la defeto e ia publici la coreti en sola 10 dias.

2016-08-25

Miles de salvores aida pos la trematera italian

La cuantia de persones matada par la trematera italian ia crese a 247, cisa plu.

Plu ca 4300 salvores continua se labora per trova survivores, usante aparatos de leva cargas pesosa e ance se manos propre.

On crede ce desuples de persones es trapida en ruinas en Amatrice, Accumoli e Pescara del Tronto en la montania de Italia sentral.

La xerca ia continua tra la note, e un replica sismica forte ia secute construidas ja danada.

Multe de la vitimes ia es enfantes. A esta matina, on ia reporta 190 moris en la provinse Rieti e 57 en Ascoli Piceno.

Sinco corpos ia es tirada de la ruinas de la Otel Roma en la vila istorial Amatrice. Sirca 35 persones ia reposa a la otel, e la plu de los ia susede evade. Sirca 10 manca ancora.

En la tarda de ier, on ia oia aclamas en la vileta Pescara del Tronto cuando on ia tira un xica joven vivente de la detrito. El ia es trapida tra 17 oras. Cuasi tota la casas ala ia colasa.

La trema ia colpa vilas peti e viletas en la montania do la rejiones Umbria, Lazio e Marche encontra lunlotra. Persones ala ia spende la note su la sielo o en tendas furnida par la servis de crise.

Entre la vitimes ia es un enfante de 18 menses, de ci se madre ia survive la trematera de 2009 en L'Aquila e ia move a via de ala pos se esperia traumal. La madre es aora en ospital pos es estraeda de la detrito en la vileta Arquata del Tronto.

La replicas sismica ia inclui un trema de mesura 4,7 con episentro a sirca 7 cilometres a este de Norcia.

La maior de Amatrice ia dise ce tre cuatris de la vila ia es destruida e ce no construida resta secur per abita.

Multe de la afetadas ia es vacansente en la rejion. Alga ia es en Amatrice per un festa de selebra un spesiali local famosa – salsa de lardo e tomate.

Tremateras mediteraneo resulta de la colide grande entre la placas tetonical de Africa e Eurasia.

La Mar Tireno, situada a ueste de Italia entre la continente e Sardinia e Corse, abri lenta. Esta contribui a un tensa jeolojial longo la cadena de montes nomida la Apeninos. La tensa es plu aumentada par moves en la Mar Adriatico a la este.

La resulta es un falia major longo tota la cadena, e un serie de falias plu peti cual estende a la lados. La fundas de sites como Perugia e L'Aquila sta supra esta.

2016-08-24

Italia sentral sufri un trematera major

Un trematera de mesura 6,2 ia aveni en Italia sentral, matante a la min des persones mor e trapinte otras su detrito.

La maior de Amatrice, un de la areas la plu afetada, ia dise: "Un dui de la vila ia desapare."

On teme ce un familia de cuatro persones ia mori en la ruina de se casa en Accumoli, un vila visina.

La trema ia aveni a 03:36 de ora local, a 100 cilometres a norde-este de Roma, con sola 10 cilometres de profondia. Alga construidas en la capital ia secute tra 20 secondos.

Alga de la dana la plu grave es en la vila Amatrice, do alga persones ia mori e on labora per salva survivores. La strada xef tra la vila es ruinada, e on labora per atenta ateni ses persones en un construida colasada.

Du persones ia mori ance en la vileta Pescara del Tronto.

Un fem de Ceselli en Umbria ia comenta: "Lo ia es tan forte. Lo ia pare ce la leto traversa la sala par se mesma con nos sur lo."

Inisial, on ia reporta la mesura de la trema como 6,4. Alga replicas sismica cuasi tan forte ia segue lo.

La trema ia colpa prosima a Norcia, un vila umbrian de cual se sentro istorial e depintin es un loca cual multe turistes visita. Ma la maior de Norcia ia dise ce on ia reporta ala no moris. "La strutures antisismica de la vila ia resiste. La erita e construidas istorial es danada, ma nos ave no feris grave."

En 2009, un trema de mesura 6,3 en la rejion L'Aquila, e ance esperiada en Roma, ia mata plu ca 300 persones.

2016-08-23

Un granada mata un xico en Sveria

Un xico de oto anios ia es matada pos cuando un granada ia es lansada a en un aparte en la site svensce Göteborg.

Yuusuf Warsame, ci veni de la Rena Unida, ia es dorminte en la salon de la aparte en la area Biskopsgården, do el ia visita relatadas.

La polisia ia dise ce la ataca "odiable" ia es cisa liada con un disputa criminal.

A la min sinco enfantes e alga adultes ia es en la aparte cuando la granada ia es lansada a en.

Warsame ia mori par causa de se feris, sur via a ospital. El no ia es un membro de la familia rejistrada a la adirije.

La madre, sore, e frate de la xico ia es en la mesma sala cuando la ataca ia aveni, ma ia sufri sola feris minor.

Un abitor rejistrada de la adirije ia es un om condenada sur un xuta matante en la mesma area en marto 2015. Acel ia es un parte de un vendeta en la comunia somali de Göteborg. Omes con armas automata ia invade un bar de Biskopsgården, fusilinte un om conoseda a la polisia e un otra person acaso presente.

On ia condena oto persones en la plu temprana de esta mense, prisoninte los per entre sete anios e la vive intera.

Un jornal local ia reporta ce la fusili en la bar ia es la culmina de avenis violente entre ganges de drogas.

Sveria ave jeneral un proportio basa de crimin, ma la polisia ia esperia difisilia en maneja violentia en visinerias povre en Stockholm, Göteborg, e Malmö.

Tra esta estate, autos ia es ensendeda a cuasi cada note en alga partes.

2016-08-22

La Juas Olimpial fini spetaculin

La Juas Olimpial de Rio ia fini con un spetaculo carnavalin e la pasa ofisial a Tocio, la site ospitante de 2020.

La rituo colorosa, cual ia dura tra cuasi tre oras, ia selebra la artes de Brasil. Lo ia aveni en pluve.

Entre la puntos xef ia es un presenta impresante par Japan e un parada vibrante de carnaval.

"Estas ia es Olimpiales merveliosa, en un site merveliosa," Thoma Bach, la xef de la Comite Internasional Olimpial, ia dise. "Tra la 16 dias presedente, un Brasil unida ia inspira la mundo, a tempo difisil per tota de nos, con se joia nonresistable per vive."

Bach ia clui ofisial la Juas de la Olimpiada 31 pos 16 dias de compete. 11 303 atletas ia partisipa, de 206 nasiones e un ecipo de refujadas.

Un de la aclamas la plu grande de la note ia aveni cuando Shinzō Abe, la ministro xef de Japan, ia apare, vestida como la carater de jua video Super Mario, asendente de en un tubo verde jigante en la stadion Maracaña.

La spetaculo, regardada par miles de miliones de persones en la mundo, ia inclui un parada de atletas e un estingui dramosa de la flama olimpial.

2016-08-21

La presidente pilipina menasa abandona la NU

Rodrigo Duterte, la presidente de Pilipinas, ia menasa separa de la Nasiones Unida car esta organiza ia critica se gera contra drogas como un crimin.

Duterte ia dise ce el va demanda cisa ce Xina e nasiones african formi un organiza alternativa. El ia acusa ance la NU de fali contra terorisme, famia, e geras.

Per atenta elimina la comersia de drogas, Duterte ia permete ofisial la mata de contrabandores par la polisia e la popla. La NU ia condena repeteda esta politica como un viole de diretos umana.

De pos la eleje de Duterte en maio, sirca 900 contrabandores suspetada ia es matada.

En la semana pasada, du espertas NU de diretos umana ia dise ce la politica de Duterte es egal a "provoca a viole e mata, un crimin su lege internasional".

En un arenga, plen de parolas basa, contra la NU a soldi, Duterte ia descrive la espertas como "stupida", disente ce los debe conta la cuantia de vives inosente cual es perdeda par causa de drogas.

"Me no vole insulta vos," el ia dise. "Ma cisa nos va debe simple separa de la Nasiones Unida. Si vos es tan noncortes, nos ta vade egal bon par parti. Donce sutrae nos de vos organiza. Vos ia fa no cosa. Cuando vos ia es asi a ves resente? Nunca. Estra per critica."

Duterte ia dise ce la NU debe repaia se contribui "afin nos pote sorti".

El ia ajunta ce la NU ia es noncapas de combate famia e terorisme, e ia fali fini la mata de persones nonmilitar en Irac e Suria.

"Aora vos, Nasiones Unida, si vos pote dise un mal cosa sur me, me pote dona des a vos. Me dise, vos es nonusosa. Car si vos ta es vera fidosa a vos autoria, vos ia ta pote para tota esta geras e matas."

La secretor jeneral de la NU, Ban Ki-moon, e la Ofisia NU sur Drogas e Crimin ia condena esta "aproba parente de matas estra la lege, cual es nonlegal e un rompe de diretos e librias fundal".

Duterte ia es induida como presidente en junio, pos un vinse inondante en la vota. A ante, el ia es la maior de Davao, la site tre de la plu grandes de la pais, tra 22 anios. Se disposa dur e comentas controversa ala ia gania per el la nometa "La Punor".

2016-08-20

Un focon a un refineria nicaraguan

Pompores en Nicaragua atenta control un focon enorme a la sola refineria de petrolio de la pais.

La arde ia comensa a du dias ante aora cuando un de cuatro tances grande de combustable ia esplode, a la compleso de Puma Energy en Puerto Sandino, un porto pasifica.

Un tance du ia ensende a jovedi.

On ia reporta no moris, ma la autoriosas ia averti persones local contra la nubes de fuma plen de gases nosiva cual estende a supra tra plu ca un cilometre.

Refujerias es preparada per la caso ce la venta verje a via de la osean e en dirije a la tera.

Espertas de la SUA e Canada es en la pais per consela ofisiores sur modos de controla la focon.

La compania Puma Energy ia dise ce lo labora per maneja la situa, asentuante ce securia per abitores local es un conserna prima.

2016-08-19

Usain Bolt gania un truple de duples

A la Olimpiales de Rio, Usain Bolt ia gana se medalia du de oro par vinse en la corsa mas de 200 metres.

El ia vinse en esta corsa ance en la Olimpiales de 2008 and 2012. Plu, el ia vinse ja en la 100 metres de Rio, repetente se susedes de 2008 e 2012, anios cuando el ia gania la oro ance en la corsa de 4 × 100 metres.

El espera oji vinse en la 4 × 100 de Rio, tal ganiante un truple de truples sin presedente.

La atleta jamaican ia core tra 200 metres en 19,78 secondos, fininte ante Andre De Grasse de Canada e Christophe Lemaitre de Frans.

Adam Gemili de la Rena Unida ia core en la mesma tempo como Lemaitre, seguente la cronometre, ma la foto de fini ia preveni el de gania se medalia olimpial prima.

Bolt, ci ave 29 anios, ia gania tota oto de la finales olimpiales en cual el ia partisipa. En febrero, el ia anunsia se intende de retira se de compete pos la Torneos Mundal de Atletisme Lejera en 2017.

Sola Carl Lewis, sprintor e saltor de longia de la SUA, e Paavo Nurmi, coror de distantia longa de Suomi, ia gania plu medalias oro per atletisme lejera a la Juas Olimpial. Lewis ia gania nove entre 1984 e 1996, e Nurmi ia gania la mesma cuantia entre 1920 e 1928.

Bolt ia crede ce, en la Stadio Olimpial de Rio, el pote rompe se recordo mundal de 19,19 secondos.

Ma cuando la jamaican ia traversa la linia a plu ca du desis de secondo ante De Grasse, el ia opina ce el ia core en tempo lenta – a la min par se normas – e el reata con jestis coler. Ma pos un momento, el ia surie larga e ia selebra en se posa famosa de raio de lampo con miles de fanes cantante se nom.

2016-08-18

Bolivia abri un scola antiimperaliste

Evo Morales, presidente de Bolivia, ia abri un academia nova de defende militar. El dise ce lo va ofre cursos per oposa la influe de la Statos Unida en la mundo developante.

La intendes inclui la studia de imperalisme e se segues.

Morales ia comenta ce la academia va funsiona contra la Scola de la Americas en la stato Georgia, cual ia instrui aliadas de la SUA en la Gera Fria. Alga de se graduadas ia fa maltratas major de diretos umana.

La academia nova es situada en la site Santa Cruz en la este de la pais, e va comensa par aseta 100 enscrivedas.

Parlante a la rituo inisiante, Reymi Ferreira, ministro de defende, ia dise: "La Scola de Antiimperalisme es un scola cual desira conserva la vive, no como la Scola de la Americas, cual ia lava la serebros de ofisiores militar afin los crede ce la enemi es nos popla."

El ia dise ce la sentro va aida soldatos a identifia menasas major a la autoria nasional de la pais.

De pos se indui en 2005, la relata de Morales con la SUA ia es multe tensada a veses.

En 2008, el ia esclui la ambasador SUA e la ajenteria SUA contra drogas. Plu resente, el ia acusa la SUA de coraji "colpas congresal de stato", como la prosede prosiminte de Dilma Rousseff, la presidente suspendeda, en Brasil.

El ia acusa ance la SUA de promove terorisme global par intervenis militar, sitante la crese de la grupo Daex como esemplo.

En America Latina, alga ofisiores instruida a la Scola de la Americas ia fa plu tarda alga de la violes la plu grave de diretos umana en la rejion.

Estas inclui du de la ofisiores militar arjentina ci ia gida la junta en la tarda de la desenio de 1970. Organizas per diretos umana dise ce acel governa ia mata sirca 30 mil oposores sinistriste.

Ance Jeneral Efraín Ríos Montt, presidente pasada de Guatemala, ia es instruida a la Scola de la Americas en la desenio de 1950. Du Comisiones de Veria ia documenti crimines vasta contra diretos umana par se governa, incluinte violes sesal, torturas, esecutas, e atas jenosidal contra la popla, incluinte la popla nativa, par un campania de tera ardeda.

En 2000, on ia dona un nom formal nova a la academia a Fort Benning en Georgia: la Instituida de la Emisfera Ueste per Coopera sur Securia.

2016-08-17

Un tance taiuan cade de un ponte

En Taiuwan, un veculo blindada ia cade tra tre metres de un ponte en pluve forte pos un eserse militar. Tre soldatos ia es matada.

La tance CM11, portante sinco soldatos, ia es revadente a se base cuando lo ia cade de sur la ponte a en la rio Wangsha, en la contia Pingtung en la sude de la pais.

La gidor e capitan de la veculo ia survive.

La eserse ia es un parte de preparas per Han Kuang, la eserse militar anial, en la semana veninte.

Presidente Tsai Ing-wen ia envia se compatia.

La veculo ia es viajante de un proba de xuta a sirca 10:30 de ora local cuando lo pare ce un fali macinal en un de la bandas erugin ia preveni la gidor de fa la verje nesesada a sinistra.

La gidor ia sorti con feris minor.

On ia tira la cuatro otras de la veculo en state nonrespondente. La capitan ia es reviveda e prendeda a un ospital mililtar en Kaohsiung, un site visina.

Reportas indica ce la soldatos ia parteni a la Comanda de la Armada Oto.

Presidente Tsai ia esije un investiga rapida sur la causa de la aveni. El va preside la eserses militar, cual simula atacas posible par Xina.

2016-08-16

Un elefante mori pos viaja longa en inondas

Un elefante savaje, cual on ia salva de acua en la semana pasada pos cuando lo ia viaja tra sentos de cilometres, ia mori.

Lo ia es puxada a via par corentes forte en inondas en Barat norde-este. On ia retrova lo en Bangladex, un pais visina.

Ala, on ia dona a lo la nom Bangabahadur, cual sinifia "eroe de Bengala".

Lo es posible ce la elefante ia viaja tra 1700 cilometres. Lo ia es debilida par se viaja e par atentas per calmi lo, e on crede ce lo ia sufri un ataca de cor. Stress, desidrata e nonecuilibra de eletrolito ia es fatores.

On ia comanda un autopsia.

Pos cuando lo ia colasa, salvores ia dona a lo 12 litres de disolve salin, ma no ia susede revive la bestia.

Con pesa de sirca cuatro tones, la elefante ia deveni sempre plu debil pos spende semanas en acuas de inonda, car lo no ia pote nuri bon se.

Ofisiores zoolojial ia atenta transporta lo a un parce de safari – calminte lo a multe veses – ma ia fali, car la animal no ia es domable.

Ashit Ranjan Paul, la conservor xef de viventes savaje per la governa bangla ia comenta: "Nos ia dona nos atenta la plu alta per salva la animal. A la min des gardaforestas, veterinares, e polisiores ia segue constante lo tra la 48 dias pasada. Ma nos fortuna es mal."

La salva de la elefante ia es dramosa. Cuando lo ia es calmida, lo ia cade a en un lageta, do viletanes ia preveni ce lo afoca e ia aida estrae lo. Un om ia es ferida cuando la elefante ia pedi el.

A cada anio, inondas obliga miles de bestias a move a tera plu alta en la areas fronteral entre la du paises. Car la abitada natural de bestias savaje diminui, los encontra sempre plu difisilia en move a locas plu secur a la tempo de monson.

2016-08-15

Un combate violente sur un plaia corsu

Un combate de "violentia grande" sur un plaia sur la isola franses Corse, entre jovenes local e tre familias de desende norde african, ia lasa sinco persones ferida e tre autos ardeda.

La combate a saturdi ia comensa cuando la familias ia oposa ce on fa fotos de los. Los ia es baninte a un rieta prosima a la vileta Sisco en Corse Alta.

Petras e botelas ia es lansada, e alga de la combatores ia es armada con axetas e arpones.

La turba ia continua ier a un protesta en la capital rejional. La xef de la governa rejional, Gilles Simeoni, ia apela per calmia.

En esta estate, la tensa ia crese en la sude de Frans entre comunias local e muslimes de orijin norde african, spesial pos la masacra de 85 persones par un camionor en la site Nice a 14 julio.

A la fini de la mense pasada, un grupo corsu paramilitar e nonlegal ia averti ativistes islamiste contra ataca la isola.

E plu temprana en esta semana, la site Cannes ia crea un controversa en proibi la usa de la burcini, un veste de nada per femes muslim.

La turba ia comensa a sirca 18:15 cuando turistes ia fa fotos de femes baninte en tal vestes.

On reporta ce alga de la omes plu vea en la grupo baninte ia ataca un grupo de adolesentes local sur la plaia con axetas. Cuando la jenitores de la adolesentes ia ariva de la vileta, on reporta ce du de los ia es ferida con arpones. On alega ce viletanes ia ensende autos parteninte a la baniores.

On reporta ance ce un om ia es ferida a du veses par un arpon pos cuando se fio ia es bateda. Du padres de la grupo baninte ia es ance ferida en la combate.

On ia libri aora tre de la persones ferida de ospital en la vila Bastia, e la otra du va es desospitalida pos tempo corta.

Bernard Cazeneuve, la ministro franses de internas, ia condena la violentia e ia apela ance per calmia.

Sentos de persones ia fa un protesta en Bastia, vadente en dirije a un compleso de casas do alga de los envolveda en la combate abita. Polisiores ia forsa los a retro e on ia xuta gas lacrimojen a la lansa de petras.

2016-08-14

Un inonda major en Louisiana

En la SUA, a la min tre persones ia mori e miles ia es salvada pos un inonda "sin presedente" cual ia deluvia la stato Louisiana.

La Garda Nasional e ecipos de crise ia usa elicotores per salva persones trapida en se casas o autos. Xercas continua per persones mancante, car on previde ce la pluve va continua tra la fini de semana.

La pluve forte ia comensa a venerdi cuando alga areas ia reseta plu ca 43 sentimetres de acua.

Ance Alabama e Mississippi, statos visinia, esperia clima estrema.

John Bel Edwards, la governor de Louisiana, ia declara un stato de crise a venerdi. El e se familia ia es relocada pos cuando acua ia inonda se sutera.

J R Shelton, la maior de la site Central ia dise: "Cuando nos va parla sur inondas aora, nos va parla sur la inonda grande de 2016. Tota otras es pal en compara."

Alga rios en Louisiana e Mississippi supraflue. On previde ce alga de los va leva a 1,2 metres supra la nivel recordo presedente.

Baton Rouge, la capital de Louisiana, es un de la rejiones la plu colpada – on reporta tan multe como 28 sentimetres de pluve. New Orleans ia reporta 6 sentimetres.

Lo pare ce la plu de la pluve ia pasa, ma on predise ce la depresa climal va move oji a norde, a Louisiana sentral e norde.

La stato es propensada a estremas subita de clima. On ia inonda partes vasta de lo en 2011 per diverje acua de la Rio Mississippi suprafluente, e per salva sites, incluinte Baton Rouge e New Orleans, situada a vale.

En 2005, New Orleans ia sufri un de la desastres natural la plu grave en la istoria de la pais, cuando Siclon Katrina ia colpa la site. La tempesta ia mata cuasi 2000 persones e ia desloca milion. Miles de casas ia es inondada e destruida en Louisiana e longo la costa de la Golfo Mexican.

2016-08-13

Rebelores suri libri Manbij de Daex

Soldatos curdi e arabi dise ce los ia libri la vila Manbij en Suria norde de la organiza Daex ("Stato Islamiste"), blocinte la via de esta a Europa.

La alia de militias ia combate per 73 dias per esclui Daex. A la dia final, los ia libri 2000 persones ci ia es usada como scermos umana.

Daex ia catura Manbij, prosima a la frontera turces, a du anios ante aora. Vias a Aleppo, la site du de Suria, a media de batalia, e a Raqqah, la capital de Daex, pasa tra la vila.

La alia de Fortias Democrata Suri inclui YPG (Unias de Proteje Poplal), la militia potiosa curdi. Los ia es suportada en se campania contra Daex par atacas airal, gidada par la SUA, contra locas de Daex.

Respondente a reportas de la scermos umana, Federica Mogherini, la coordinor xef de la Uni European sur politica de esternas e securia, ia dise ce Daex continua "presenta un menasa a la persones de Suria, Irac, la rejion, e ance a Europa e a ultra."

El ia ajunta: "La avansas militar resente contra Daex par la Alia Global, juntada con la Fortias Democrata Suri en Suria norde-ueste, es bonvenida, e la UE va continua dedica se laboras, como parte de la Alia, a se campos nonmilitar de ativia."

La vias tra Manbij ia deveni esensal per la capasia de Daex de move combatores, armas, e furnis a en e a estra Suria.

Seguente la Oserveria Suri per Diretos Umana, cual monitori la gera de distante, sirca 500 autos ia parti de Manbij, portante membros de Daex e nonmilitares. Los ia vade a norde-este en diije a Jarabulus, un vila controlada par Daex a la frontera turces.

2016-08-12

Atacas de bomba en vilas de turiste en Tai

En Tai, un serie de esplodes coordinada ia ataca vilas de turiste. Reportas ariva ancora, ma a la min cuatro persones es mor e multe otras es ferida.

Cuatro bombas ia esplode en la 24 oras pasada en la via Hua Hin. Alga esplodes ia aveni ance sur la isola Phuket oji.

No grupo ia dise ce lo ia esecuta la atacas, ma on va suspeta probable rebelores separadiste.

La esta fini de semana en Tai es longa, per onora la aniversario de nase de la rea.

La polisia ia elimina la idea de terorisme internasional, e ia dise ce lias con la rebela sude no es clar.

Ma si on trova ce rebelores ia fa esta atacas, esta ta es un cambia major de tatica. La rebela ia dura tra 12 anios e ia mata plu ca 6000 persones, ma ia blanci nunca turistes a ante.

Hua Hin es a sirca 200 cilometres a norde de Bangkok, e la provinse Phuket es en la sude estrema de la pais. Ambos areas es multe popular con turistes.

La eleje de ataca Hua Hin pare simbolin, car la site es conoseda como reial e como la abitada favoreda de la re estra Bangkok.

Du esplodes en la sera pasada ia colpa un area de bares popular con turistes, e stranjeres ia es entre la feridas. Du plu esplodes a esta matina ia colpa la tore de orolojo en la sentro de vila.

Atacas peti e improvisada con bombas ia aveni comun en Tai a tempos de turba political, ma tal atacas ia deveni estrema rara pos cuando la militaria ia prende la potia par colpa de stato en maio 2014.

La ministro xef, Prayut Chan-o-cha, ia dise: "La bombas es un atenta de crea caos e confusa. Nos no ta debe fa ce persones panica plu."

Esta ia aveni a mera un pico de dias ante la aniversario prima de la bomba a la santeria Erawan en Bangkok cual ia mata 20 persones.

En la semana pasada, tais ia vota en un referendo cual ia aproba un constitui nova per forti la influe political de la militaria per multe anios.

2016-08-11

Elejes political en Zambia

En Zambia, on ia comensa vota en elejes presidental e parlamental, pos campanias manxada par violentia entre suportores oposante.

On previde un corsa difisil ganiada entre la partito governante Fronte Patriota (FP) de presidente Edgar Lungu e la Partito Unida per Developa Nasional (PUDN) gidada par Hakainde Hichilema.

A la ves prima, un aspiror presidental nesesa gania plu ca 50% de votas per evita un ronda desidente. Lungu ia gania apena la eleje la plu resente, con 48% de votas.

Oservores dise ce la economia debil de la pais es un conserna major. Custas desendente per cupre, se esporta xef, ia clui minerias e ia lasa miles de persones nonempleada.

Pos un dui aprosima de se crese economial, la pais ia demanda per aida de la Reserva Monal Internasional en la plu temprana de esta anio.

Plu, Zambia, como otra partes de Africa sude, ia sufri un secia cual la NU ia descrive como la plu grave de 35 anios.

La PUDN ia acusa Lungu de preside la colasa de la economia. Ma la FP dise ce lo ave un projeta per diversi la economia.

Ier, on ia averti ce probable alga persones va resta a via de la voterias pos la scaramuxas violente entre grupos political oposada cual ia aveni en semanas resente.

A martedi, Esau Chulu, la xef de la comision elejal, ia avisa la du partitos major sur la nesesa de evita crea turba. El ia dise: "Me no crede ce la un o la otra de vos va desira es rejistrada como la du partitos political ci ia contribui a rompe la istoria de elejes pasosa en Zambia."

On ia suspende la campanias per des dias en la capital Lusaka en la mense pasada, pos cuando un suportor de la PUDN ia es matada par fusil a un protesta.

Zambianes vota ance en un referendo sur cambias a la declara de diretos.

La vota va fini a 18:00 de ora local, e on previde sabe la resultas en la tarda de doman.

2016-08-10

Un ataca enlinia a la conta nasional australian

La pajeria per la conta de abitores australian ia es cluida par lo cual on ia descrive como un serie de atacas intendeda, par piratas de rede stranjer.

Miliones de australianes ia es prevenida de partisipa en la sonda nasional a la sera de ier. La Departe Australian de Statistica ia vanta, a poca oras a ante, ce se servador no va rompe.

La ministro xef, Malcolm Turnbull, ia serti a la popla ce se informas personal no ia es furada.

A un ves en sinco anios, cadun en Australia debe completi formularios, cual on compila per ave un comprende de la pais. On ia previde ce en esta anio du tris de australianes va responde enlinia, en loca de par paper.

On ia ave ja consernas sur privatia, an pos sertis par la governa ce la securia no es perilida.

Turnbull ia dise: "La cosa cual es intera clar es ce no penetra de la pajeria ia aveni. Lo cual vos ia vide ia es un ataca de descapasi la servi, cual, como vos sabe, es desiniada par preveni asedes a un pajeria, e no pertine a entras a la servador fondal. Franca, alga de acel defendes ia fali."

La partito oposante ia recomenda la resinia de Michael McCormack, la tesoror suordinada, ci ia es encargada con supravide la conta.

La Departe de Statistica labora con autoriosas per descovre la fonte de la atacas.

Pos multe semanas de avisas sur partisipa enlinia a 9 agosto, miliones de australianes ia es frustrada par trova ce los no pote completi la sonda. En redes sosial, on ia burla la situa con referes a asurdas simil en comedias televisada.

2016-08-09

Un turiste rejistra se como migror par era

Un turiste xines ia spende cuasi du semanas en un otel deutx per migrores, pos demanda nonintendente per refuja cuando el ia vole mera reporta un fura.

La bolsonor de 31 anios, ci no parla deutx e no parla engles, ia reseta un esamina medical, e on ia arcivi se trasas de dito.

Plu tarda, un laboror de la Crus Roja ia trova ce la portamone de la om ia es furada en Stuttgart. Ma en loca de vade a la polisia, la om ia rejistra se como migror.

Un parlor de putong ia solve la rompetesta. Un traduor ia es trovada a un restorante xines prosima a la otel casinte la turiste, en Dülmen, prosima a la site Dortmund en la ueste de Deutxland.

La turiste ia ariva a la otel en la temprana de julio, en un bus con migrores, de Dortmund.

Christoph Schlütermann, un laboror per la Crus Roja, ia descrive el como "tan diferente de la otras – multe noncapas de ata sin aida".

Un ap traduinte ia confirma se suspeta ce la turiste ia deveni maraniada en la sistem de refuja par era. "Lo ia emete frases como «me vole vade en viaja estra pais»," el ia dise.

La turiste, de Xina norde, ia intende visita Italia e Frans. El ia permete calma ce la autoriosas prende a via se pasaporto e visa, e rejistra se ditos.

On ia dona a el un esamina medical e la documentos normal cual migrores reseta pos ariva en Deutxland. El ia come a la otel de migrores e ia reseta alga mone per spende.

Schlütermann ia clari ce empleadas de la otel ia telefoni futil a consulerias diversa, esperante identifia la turiste. Un era sur la visa de la om ia causa un plu retarda.

Final, on ia cansela se solisita de refuja, e el ia pote continua se turi european.

Seguente la difusor Westdeutscher Rundfunk, la om no ia parti coler, ma con mera la comenta ce el ia imajina ce Europa es intera diferente.

2016-08-08

Akihito indiceta ce el desira renunsia la imperoria

Imperor Akihito de Japan ia dise ce el teme ce, par causa de se eda e sania dejenerante, el trova difisilia en continua en se rol.

La comentas de la imperor adorada, ci ave 82 anios, ia es presentada en un parla televisada – un modo de comunica cual el ia usa a sola un ves a ante.

El no ia usa la parola "renunsia", ma el ia indica forte ce el desira dona se taxes a un otra person.

Shinzō Abe, la ministro xef, ia dise ce la governa va discute "seria" la cambias legal cual ta es nesesada per un renunsia de la imperoria.

En se mesaje prerejistrada de des minutos, Akihito ia dise ce el espera ce la debes de la imperor pote continua constante sin interompes.

El ia dise: "Me es ansiosa ce lo va deveni difisil ce me reali me debes como la simbol de la stato con me esense intera, como me ia fa asta aora."

Akihito, ci ia reseta sirurjia de cor e un trata per canser de prostata, ocupa ja la Trono de Crisantemo de pos la mori de se padre, Hirohito, en 1989.

Se fio la plu vea, Prinse Erital Naruhito, ci ave 56 anios, es la prima en la ordina de pasa de rena, segueda par se frate Prinse Akishino. On no permete ce femes erita la trono, e donce Prinsesa Aiko, la fia de Naruhito, no pote segue.

Akihito ia dise ce un posible, cuando un imperor no pote reali se taxes par causa de eda o maladia, es ce on ta institui un rejente. Ma el ia sujesta ce esta no ta es la resulta ideal: "Me crede ce on no pote continua eterna redui la atas de la imperor en cosas de stato, e se debes como la simbol de la stato."

La leges esistente dise no cosa sur renunsia, donce on ta nesesa cambia los afin la imperor pote resinia. La cambias va nesesa es aprobada par parlamento, ance.

La constitui proibi la imperor de fa declaras political, e on ta pote opina ce un desira de renunsia es political.

La popla pare suporta la desira de la imperor. Spesial la jenera plu joven dise ce on debe permete ce el reposa en se eda matur.

Un sonda resente ia trova ce plu ca 85% de persones japanes opina ce on debe legali la renunsia de imperoria. Ma la idea es oposada par alga partes plu tradisional de la sosia.

En 2006, cuando la imperor ia ave no netos, on ia proposa un debate sur esce un fem ta pote ocupa la trono. On ia pospone lo cuando un fio ia nase.

En 2011, Prinse Akishino ia recomenda un debate sur esce on debe defini un eda de jubila per la imperor, ma no cambia de lege ia resulta.

2016-08-07

Modi oposa protejores estralegal de boves

Narendra Modi, la ministro xef de Barat, ia critica patruliores estralegal ci presenta se como protejores de boves – bestias cual indus regarda como santa.

Modi, un nasionaliste indu, ia dise ce tal persones "coleri" el, e ce on debe investiga tota tal atacas.

On ia critica el car el no ia comenta sur un flajeli publica de omes de casta basa par patruliores en la mense pasada.

La defendores de boves ia acusa ce la cuatro omes de la casta Dalit ia feri bestias. La vitimes ia insiste ce los prende la corpo mor de un bove per despeli, seguente se tradision.

Ance en julio, du femes muslim ia es bateda par patruliores pos acusas ce los porta carne de bove.

Parlante ier en la capital Delhi, Modi ia dise ce el va demanda ce governas de tota statos de Barata a investiga cualcun liada con tal atacas par patruliores.

El ia declara ce el crede ce "70–80% de los va es mostrada como persones ci partisipa en ativias antisosial e desembla se como protejores per salva se."

Asta aora, alga comentores ia opina ce Modi resta silente sur la tema de patruliores estralegal afin el manteni se atrae a votores nasionaliste indu.

On ia critica el en modo simil en la anio pasada, cuando du semanas ia pasa ante cuando el ia condena la linxa de un om muslim sur rumores ce el ia conserva e consuma carne de bove.

Mata boves es proibida en alga statos barati. Ma indus sever ia presa la governa de la Partito de Popla Barati a fa plu per proteje boves.

La majoria de la sirca 1,2 mil milion abitores de Barat es indu. An tal, la pais casi ance minorias grande muslim, cristian, e budiste.

2016-08-06

La rituo inisiante de la Olimpiales de Rio

La Olimpiales de 2016 ia comensa ofisial con un presenta colorosa e pulsante a la stadion Maracanã en Rio. Televisada a un cuantia estimada de tre mil milion persones, lo ia selebra la istoria, cultur, e belia natural de Brasil.

En la periodo ante Rio 2016, on ia esperia un retrosede profonda e protestas political en la pais. La Juas, la primas cual ia aveni en America Sude, ia es ance turbada par ansia sur la scandal de drogi rusce, la virus de Zica, e problemes con la securia, infrastrutur, e avenerias de la site.

Ma con la abri formal de la Juas de la Olimpiada 31, organizores espera ce la foca va move aora a la ativia par 207 ecipos en 28 sportes.

La calderon ia es ensendeda par Vanderlei de Lima, ci ia gania la medalia de bronze per Brasil en la maraton de la Juas de 2004, pos cuando un vidor ia ataca el cuando el ia es a fronte de la corsa. Pelé, stela lejendin de futbal, ia elimina se de la rol, disente ce se state fisical no conveni.

An con la problemes economial de Brasil, la fola en la Maracanã ia es regalada par un spetaculo miscada de lus, pirotecnicales, dansa, e musica.

Pos un presenta simple ma emosiosa de la imno nasional brasilera, cantada e juada a gitar acustical par cantor-composor Paulinho da Viola, projetas video sur la solo de la stadion ia esplora la istoria de la pais.

Comensante con imajes dividente e scultas jigante de microbios, representante la inisia de vive, la rituo ia mostra la contribuis fada a la istoria e cultur de Brasil par poplas nativa, esplorores portuges, sclavos african, e migrores nion.

Atores ia salta a traversa de projetas de construidas simbolinte la sites de Brasil.

Un recreada de un biplana 14-bis, inventada par Alberto Santos-Dumont e prima enairada en 1906, ia atrae un de la aclamas la plu grande de la sera cuando lo ia pare sorti volante de la arena.

La fola no ia reata negativa a la ecipo rusce, reduida a 271 atletas de la 389 inisial, pos acusas de drogi en un reporta per la Asosia Mundal Antidrogi.

Ma lo ia doni un bonveni spesial amin a un ecipo composada de atletas refujada – la ecipo anteultima ci ia entra a la stadion. Thomas Bach, la presidente de la Comite Internasional Olimpial, ia dise ce la atletas refujada envia "un mesaje de espera a la miliones de refujadas sirca la globo".

La fola de 60 mil persones ia esplode con ruido, cantante "Brasil, Brasil, Brasil", cuando la ecipo brasilera ia apare en la stadion. La bandera de la nasion ia es portada par la pentatlonor Yane Marques, medaliste de bronze en 2012.

2016-08-05

Protestores inonda un vila franses con vino

Un grupo protestante ia abri tances de vino en un vila de Frans sude, enviante miles de litres a sur la stradas.

La servis de crise ia debe aida controla la inonda e preveni ce lo entra a en parces suteran de autos.

La faores ia dise ce los parteni a la Comite Rejional de Ata par Vinores (CRAV), un organiza violente.

CRAV es turbada par emportas barata e ia fa otra atacas a ante.

"Perce la esta ata? Car nos es nunca escutada," un portavose de CRAV ia informa jornalistes.

La ataca ia aveni en Sète, un vila de porto en Languedoc-Roussillon, un de la plu importantes de la rejiones de Frans cual produi vino.

Alga suteras e casas prosima ia deveni inondada.

Plu temprana en esta anio, Espania ia clama la ambasador de Frans pos cuando cultivores franses ia saisi camiones espaniol e ia drena se carga de vino, prosima a Le Boulou en Frans sude.

Frédéric Rouanet, un xef de sindicato local per vinores, ia condena la ata la plu resente, ma ia dise ce ance el es consernada par la cuantia cresente de emportas barata cual apare en botecas franses.

2016-08-04

Divides apare en la campania de Trump

En la SUA, Donald Trump, la nominada republiciste per presidente, ia insiste ce se campania es unida, an entre reportas de divides profonda pos un serie de mal pasos.

El ia refusa suporta du otra membros de la partito republiciste, Paul Ryan e John McCain, en se elejes veninte.

Mike Pence, la nominada republiciste per la vispresidentia, ia abandona Trump per suporta Ryan en loca.

Trump ia continua se batalia controversa de parolas contra Khizr e Ghazala Khan – la jenitores de un capitan SUA ci ia mori en la Gera de Irac – an pos recomendas repeteda par se aliadas ce el debe sesa.

Bizara, se portavose xef ia dise ce politicas inisiada en 2009 par Barack Obama ia causa la mori de Capitan Khan en 2004.

Trump ia averti se suportores ce la eleje veninte va es cisa un caso de froda.

El ia descrive se oposor, Hillary Clinton, como "la diablo".

A un campania en Virginia, algun ia dona a el un Cor Purpur – un medalia per membros ferida de la militaria SUA. Grupos de veteranes ia critica el per se responde: "Me ia desira sempre reseta la Cor Purpur. Esta ia es multe plu fasil."

E el ia broma ce on debe ejeta un madre e se bebe plorante de la mesma asembla en Virginia. "Tu pote sutrae la bebe de asi," el ia dise sur la stadio.

Alga empleadas de se campania ia espresa la senti ce los peri se tempo.

Ma Trump ia declara ce "la campania progresa multe bon. Lo ia es nunca tan bon unida."

Plu temprana, la manejor de se campania ia culpa Hillary Clinton per la reportas de nonunia. "Esta es un plu nara par Clinton cual el ia pone a la mundo e cual la jornalistes regarda. Senior Trump ia apare en esta semana ante folas suprafluente a sur la strada."

La clave de la calcula political es en la sondas de opina e la reata publica. Si lo pare ancora posible a Trump ce el pote gania la vota en novembre, el va persiste, como el ia fa ja tra la anio intera.

Ma si se sondas cade e politicistes republiciste deveni plu ansiosa sur la risca de perde se propre elejes en novembre ca de aliena la funda de se partito, la vagon de Trump ta pote salta de la via ondante.

Oposa Trump es ancora un aposta riscosa, e politicistes tende minimi riscas per reteni se postos.

On ia reporta ce alga republicistes major intende fa un "interveni" per restabli la campania, asentuante tal temas como la emplea e acordas per comersia. La intervenores inclui Newt Gingrich, presidente pasada de la Salon basa, e Rudy Giuliani, maior pasada de New York.

Gingrich ia comenta ier: "Me opina ce alga de lo cual Trump ia fa es multe autodestruinte."

En esta semana, tre republicistes major ia dise ce los intende vota per Clinton, la nominada de la partito democrata, descrivente Trump como nonconveninte per la posto de presidente. Multe otra republicistes ci oposa Trump ia asteni de espresa suporta per Clinton, disente ce los va vota per un aspiror tre en loca.

2016-08-03

Un ponte de autovia colasa en Barat

En Barat ueste, a la min 22 persones manca pos la colasa de un ponte de autovia entre la site Mumbai e la stato Goa.

Du buses portante pasajores ia cade a en un rio inondada.

La colasa ia aveni en la parte temprana de oji. Salvores ia trova no veculos e no survivores.

Pluves forte impedi la laboras de salva. On ia diverje la trafica a un ponte nova en la rejion.

OP Singh, xef de la Forte Respondente a Desastres Nasional cual es manejada par la governa, ia dise ce on ia envia rapida 80 salvores, incluinte sumerjores.

El ia clari ce la reportas temprana indica ce du buses, e cisa plu, cual ia viaja sur la ponte vea, ia cade a la rio Savitri. La rio ia es inondada par la pluves de monson.

Un otra portavose per la salvores ia dise: "La buses no es detetable en un cilometre de la ponte. Par causa de la corente a vale, lo es posible ce la buses ia es puxada a un distantia plu grande."

En marto, un viaduto a media de deveni construida en la site Kolkata ia colasa, matante 20 persones e ferinte cuasi 100.

E en 2011, 32 persones ia mori e 132 ia es ferida cuando un ponte ia colasa a un aveni political en Darjeeling en la ueste de Bengala.

2016-08-02

Redores xines critica la Olimpiales de Rio

Jornalistes e usores de redes sosial xines ia comenta amarga sur la state mal de la abitadas per atletas en Rio de Janeiro.

On mostra ansia sur la securia de la ecipos xines. Atletas ia cexa ce la situa impedi se eserses.

Multe redores nomi ja la juas en Brasil "la Olimpiales la plu mal de istoria".

416 olimpianes xines es en Rio.

La ajenterias nasional xines de novas ia vosi se ansia sur securia de pos april, cuando competes inisial ia aveni. On ia reconose un problem de securia pos cuando scrimores fema ia es rubada e membros de la ecipo de xuta ia trova "paias nonpermeteda" en se cartas de credito.

En esta semana, la ministreria de esternas ia avisa visitores xines sur evita partes "perilosa" de Rio, e ia promete aumenta la proteje per atletas xines pos cuando un corsor de ostaculos ia deveni un vitim de un engana.

La bagaje de Shi Dongpeng, incluinte se computador, ia es furada en un rus complicada en cual algun ia distrae el par pare vomita sur el.

Jornalistes ia usa plataformas de lingua engles per informa lejores internasional sur la situa cual se atletas fronti.

Un conta profesal a Twitter alega ce la abitadas per la atletas es mal construida e nonsecur a veses. Lo mostra un foto de la sala de un juor de tenis de table cual ave un buco baliante en la sofito.

Otra postas dise ce alga salas ave no eletrica o an no acua. On critica ance la eleje de comedas ueste a la vileta olimpian.

Feng Zhe, un campion de baras paralel, ajunta ce "tota la vasones en la eserseria es blocida, e donce tota es cluida", e ce "ecipores fema pote fa no otra ca revade a la vileta".

Ning Zetao, un nador olimpian, ia fa no comentas negativa, ma desuples de miles de persones ia visita se paje de Weibo per comenta sarcasmosa ce el debe "garda contra acua nosiva".

La plu de postas usante la parola #RioOlympics veni de redores ci critica la riscas parente de securia. Un ia descrive la aveni como "un broma grande".

Un otra dise ce la taxe major per la atletas de esta anio es "reveni vivente".

Xina ia es orgulosa sur la Juas Olimpial de 2008 en Beijing, cual ia atrae 4,7 mil milion vidores de tra la mundo. Los ia es la juas la plu televideda de istoria.

2016-08-01

La taliban ataca un compleso stranjer en Kabul

En Kabul, la capital de Afganistan, un otel casinte contratores stranjer ia es atacada par combatores taliban.

On ia oia un esplode grande tra la site a sirca 01:25 de ora local a esta matina. Un bomba de camion ia esplode a la porton de la compleso, e du fusilores ia entra.

En un batalia de fusil, un polisior e ambos atacores ia es matada. Tre polisiores ia es ferida en la batalia cual ia dura tra alga oras.

Nun de la persones abitante la compleso ia es ferida. La ataca ia fini aora.

North Gate es un compleso forte gardada, e ia es atacada par combatores a tre anios ante aora.

La eletrica en partes de Kabul ia rompe per un tempo corta pos la esplode.

Inamullah Khan, un abitor local, ia dise: "Me ia es a punto de adormi cuando la esplode ia aveni. La eletrica ia descomuta. Lo ia es un esplode multe grande. Lo ia es multe grande."

"Me ia spende oto anios en Afganistan, e lo ia es la esplode la plu forte cual me ia esperia a cualce ves," Andreas Wilmers ia dise. El es la xef de un compania de televisa en la pais.

El ia ajunta: "La controla par la polisia afgani, conoseda como la anelo de aser, per dise puntos diversa de controla en esta compleso – fundal, acel puntos funsiona en la dia, ma en la note los no es vera operante."

En la semana pasada, du bombas umana, con lias a la organiza Daex, ia mata 80 persones e ia feri 230 plu en Kabul.