2018-05-23

Jenitores litiga sua fio ci refusa parti de casa

En la SUA, la jenitores de un om de 30 anios ia adota un modo estrema de obliga sua fio a move a via: los litiga el.

Documentos de corte indica ce Michael Rotondo no paia un custa de lua, no aida con taxes de casa, e ia iniora ofres de mone par sua jenitores.

An pos presenta sinco leteras de descasii, Christina e Mark Rotondo dise ce sua fio refusa parti de la casa. Michael dise ce, legal, on no ia dona a el sufisinte temprana la avisa de descasi.

La jenitores ia rejistra sua caso con la Corte Suprema de la Contia Onondaga, prosima a Syracuse, New York, a 7 maio, pos menses de recomenda nonsusedosa a sua fio ce el parti.

"Nos ia deside ce tu debe parti direta de esta casa," la letera prima ia dise a 2 febrero. Cuando la fio ia iniora esta, sua madre e padre ia scrive un avisa formal de descasi, aidada par sua avocato, ci ia dise ce los ia conose no otra modo de descasi la om.

Un avisa de 13 febrero, suscriveda par Sra Rotondo, dise: "Par esta, tu es descasida. Un prosede de enforsa legal va es direta instituida si tu no parti ante 15 marto 2018."

La jenitores ia ofre $1100 a sua fio, con ance alga comentas sever sur sua condui. "Postos es disponable an per los con mal istoria de labora como tu. Trova un – tu debe labora!"

Ma a 30 marto, lo ia deveni clar ce sua fio ancora no intende parti. En april, la Rotondos ia vade a sua corte de vila per descovre esce los pote descasi sua fio. Ma car el es un familian, los ia nesesa un judor de corte suprema per obliga ofisial sua parti.

La fio ia descrive la litiga como "venjante" e ia demanda ce la corte refusa la caso. La familia va vade a la Corte Suprema en la plu tarda de esta mense, a sola un pico de semanas ante la aniversario 31 de la nase de la fio.

2018-05-22

Un arcibispo culpable de asconde maltrata de enfantes

Un corte australian ia judi ce un arcibispo catolica es culpable de asconde la maltrata sesal de enfantes en la desenio de 1970.

Philip Wilson, arcibispo de Adelaide, deveni la catolica la plu major de mundo ci on ia acusa e condena per esta crimin.

On ia trova ce el ia asconde la maltrata de xicos de misa par un prete pedofilica en New South Wales. En sua litiga, el ia nega ce alga de la vitimes ia informa el sur la maltrata.

En un declara publicida par la Eglesa, Wilson ia dise ce el es "evidente deludeda" par la judi e va esplora sua posibles legal.

En la mense pasada, el ia dise a la corte ce el ia sabe no cosa sur la atas de prete James Fletcher, cual ia aveni cuando el ia es un prete aidante en Maitland, a 130 cilometres a norde de Sydney.

A pos, Fletcher ia es condenada sur nove acusas de maltrata sesal de enfantes en 2004. El ia mori en prison en 2006.

Un de sua vitimes, Peter Creigh, ci ia es un xico de misa, ia informa la corte ce el ia descrive la detalias de la maltrata a Wilson en 1976, a sinco anios pos cuando lo ia aveni.

La judor Robert Stone ia rejeta la reclama de Wilson ce el no recorda la conversa, e ia dise ce el crede ce Creigh es un atestor fidable. La prete ia sabe ce "lo cual el oia es un alega credable, e la acusada ia vole proteje la Eglesa e la reputa de lo," Stone ia dise.

Un plu vitim, nonomable, ia informa la corte ce el ia revela la maltrata en la confeseria cuando el ia ave 11 anios. El ia dise ce Wilson ia responde ce el menti, puninte el par comanda a resita la prea "Ave Maria" a des veses.

Pos la deside, survivores de la maltrata ia loda la judi en un sena emosiosa estra la corte. Creigh ia comenta: "Esperable la deside va desmarania la ipocritia, la engana, e la maltrata de potia e fida cual la Eglesa ia mostra."

La avocatos de Wilson ia atenta fa ce on refusa la caso a cuatro veses, pos la diagnose ce la prete de 67 anios ave la maladia de Alzheimer. El risca un prisoni de masima du anios. On va anunsia sua condena en junio.

2018-05-21

La bebe prima en 12 anios sur un isola

Un isola brasilera distante, do pari es proibida, selebra an tal la bebe prima cual ia nase ala en 12 anios.

La isola Fernando de Noronha es situada a 370 cilometres de la site Natal. Lo ave sirca 3000 abitores ma no ospital madral. On espeta ce madres espetante ta viaja a la tera xef.

Un fem ci no desira es nomida ia pari ier un xica sur la isola. El dise ce el no ia sabe an sua ensintia, e es aora "stonada". On crede ce el ave 22 anios.

La bebe, parida en la sala de banio de la fem, ia es prendeda a la ospital local. La autoriosas ia confirma la nase.

Per selebra, persones local aida aora la familia, e alga dona vestes per la xica.

Fernando de Noronha ave alga de la plaias la plu bon de mundo, e es famosa per sua conserveria de animales en la parce maral nasional de Brasil. On vide comun tortugas de mar, delfines e avias rara ala.

Par causa de la conserveria, la isola controla forte sua cuantia de popla.

2018-05-20

La sposi de la Duxe e Duxesa de Sussex

Ier, en la Rena Unida, Prinse Harry e Meghan Markle ia sposi en un rituo a la Castel de Windsor, a ueste de London. La duple ia intercambia prometes e anelos ante Rea Elizabeth 2 e 600 invitadas en la Eglesa de San Jorj. La duple es aora nomida la Duxe e Duxesa de Sussex.

Vestida en un roba par Clare Waight Keller, desinior brites, Markle ia pasea solitar longo la parte prima de la eglesa, ante cuando Prinse Charles, la padre de Harry, ia acompania el asta la altar.

Sra Markle ia es ance acompaniada par des damas e pajos, de ci tota ia es enfantes joven, incluinte Prinse George e Prinsesa Charlotte, la fies de William, frate de Harry.

El ia porta la coroneta de diamante de Rea Mary (sposa de Re George 5) de 1932, prestada a el par la rea presente. Sua roba blanca ia es desiniada per Givenchy, un compania franses de moda, e sua aspeta ia es completida par un velo longa de sinco metres e brodeda con flores de cada pais en la Comunia de Nasiones.

Persones famosa entre la invitadas ia inclui Oprah Winfrey, George e Amal Clooney, David e Victoria Beckham, e Elton John, ci ia canta a la reseta pos la rituo.

La Prinse de Cimri ia acompania Markle longo la eglesa car la sania de sua padre, Thomas, ia preveni esta de partisipa. El ia televide la rituo en California, en loca.

En sua prometes, Markle no ia dise ce el va "obedi" sua sposo, e la prinse ia rompe un tradision real par eleje porta un anelo de sposia. La sua es de platino tramada, e lo de sua sposa es de oro cimrica.

Bispo Michael Curry, presidente de la Eglesa Bispal de America, ia fa un parla animada e felisinte sur la potia de ama. Dama Jane Fellowes, sore de la madre mor de Harry, Prinsesa Diana de Cimri, ia leje de la Biblia, e Karen Gibson e la Coro Kingdom ia presenta la canta sol Stand By Me ("Resta con me").

Cuando la sposes nova ia es suscrivente la rejistra ofisial, un xeliste de 19 anios, Sheku Kanneh-Mason, ia presenta tre pesos par Gabriel Fauré, Franz Schubert e Maria Theresia von Paradis, acompaniada par un orcestra.

La coro ia presenta un varia joiosa de la canta This Little Light of Mine ("Esta lus peti de me") en cuando la Dux e Duxesa de Sussex ia sorti de la eglesa per viaja en caro tra la sentro de Windsor entre folas grande de bondesirores.

La vila ia ave ier plu ca 100 mil visitores, e 1200 persones – incluinte multe ci ia es reconoseda per sua labora carital – ia es bonvenida a en la ensirca de la Castel per la aveni.

A pos, la congrega en la eglesa ia vade a un come media ospitada par la rea, do la duxesa nova ia fa un parla, como ance sua sposo e padre par sposi. En la sera, la familia ia selebra plu privata con 200 amis prosima.

La custa de la sposi, aprosima un dui de milion paundes, ia es paiada par la familia real.

2018-05-19

Un jeto cade en Cuba

Plu ca sento persones ia mori pos la cade de un avion Boeing 737, prosima a la airoporto xef de Cuba en Havana. Esta es la desatre avional la plu mal de desenios en la pais.

On ia estrae tre femes vivente de la ruina, ma los es en un state estrema grave.

La avion, cual ia ave cuasi 40 anios, ia porta 104 pasajores e ses ecipores. Autoriosas cuban ia inisia un investiga, e on ia declara du dias de lamenta nasional.

La avion ia cade a 12:08 de ora local ier, no longa pos enaira de Havana en vola interna a Holguín en la este de la isola. Tota ses ecipores ia es mexican; la plu de la pasajores ia es cuban, con sinco stranjeres reportada entre los.

Lo es tro temprana per sabe la causa de la desastre, ma atestores sur la tera ia vide la jeto esplode en flamas ante cade sur un campo prosima a un bosce.

La avion ia es construida en 1979 e ia es susedosa esaminada en novembre de la anio pasada.

Longo rexercas en la industria, 2017 ia es la plu secur en la istoria intera de volas comersial, con zero cades de jetos de pasajor. Ma en esta febrero, un avion ia cade prosima a Moscva, matante 71 persones; en marto, un cade ia aveni en Catmandu, matante 51; e en april, un avion militar ia cade en Jazair, causante la moris de plu ca 250 persones.

En 1989, un jeto soviet ia cade prosima a Havana, matante 126 persones en la avion e 24 otras sur la tera.

2018-05-18

Polsca aborta grupos rusce de gera ibride

Polsca ia aresta un fem rusce sur ci on suspeta ce el ia labora con aidores per provoca tensa con Ucraina.

La ABW, la ajenteria de securia interna polsce, ia dise ce "Yekaterina C" va es pronto escluida. Cuatro otra persones es aora proibida de entra a Polsca.

Un portavose per la ABW ia dise ce la ajenteria ia "neutri" du "redes rusce de gera ibride" cual ia ataca Polsca. La terma "gera ibride" inclui la sperde de novas falsa per cambia disposas publica.

Polsca es ja vijilosa contra atentas par la Cremlin de influe opinas polsce pos cuando Rusia ia propri la rejion Crim de Ucraina en marto 2014.

Polsca, un membro de la Uni European e OTAN, es un de la oposores la plu forte de la politica stranjer rusce, e spesial de la interveni militar par Rusia en Ucraina. Ma manxas resta ance pos un enemia istorial entre Polsca e Ucraina de la periodo soviet e la Gera Mundal Du.

La portavose ia dise ce sua ajenteria es informada ce Rusia "no mera inspira sitadanes polsce a fa atas spesifada contra Polsca e favorente Rusia, ma ance finansia sua ativia".

El no ia furni detalias sur la ativia de la redes alegada, ma ia comenta ce los es engranada a "nuri odia polsce-ucrainsce en la sfera sosial e political e a sumina la interprete de la istoria polsce, sustituinte un nara rusce per lo".

Governas ueste acusa Rusia de sperde novas falsa sur la gera ucrainsce e otra temas delicata, per debili la suporta publica per politicas de OTAN e la UE.

2018-05-17

La Pape consela sobria de monces en redes sosial

La Pape ia dona instruis conselante ce monces fema debe usa apes de redes sosial "con sobria e cautia".

La documento, titulida Cor orans ("Cor preante"), clari regulas sur la vive moncal cual ia apare en 2016. Lo esplica ce sua conselas es intendeda per proteje silentia e recorda. La testo refere a "comunicas sosial" en loca de nomi apes, ma la jornal catolica La Tableta ia indica ce esta refere a Facebook e Twitter entre otra servis.

En la documento, on dise ce on debe aplica cautia a "la cuantia de la informa e la tipo de comunica", en ajunta a la contenida vera de la mesaje.

Un ordina de monces fema en Espania norde ia usa redes sosial en la mense pasada per comenta sur un caso controversa en Pamplona, en cual un grupo de omes acusada de viole coletiva ia reseta condenas cual multe ia regarda como tro pardonosa.

En sua paje de Facebook, la Monces Carmelal de Hondarribia ia defende la vitim par refere a sua propre eleje de vive en un monceria, sin alcol e sin sosiali de sera: "Car lo es un deside libre, nos va defende con tota medias disponable a nos (e esta es un) la direto de tota femes de fa libre la oposada sin ce on judi, viole, menasa o vergonia los per lo."

On no crede ce la consela nova de la Pape resulta de acel caso. Plu, esta no es la ves prima cuando la Eglesa Catolica ia furni conselas a monces fema sur la usa de redes sosial.

La constitui orijinal sur la vive fema moncal, Sponsa Christi ("Sposa de Cristo"), ia es publicida en 1950 par Pape Pio 12, ma Pape Fransisco ia estende lo en 2016 per averti contra la "influe desidente" de la cultur dijital a la sosia. El ia recomenda ce monces no permete ce comunicas dijital "deveni veses per perde tempo".

La Vatican mesma es un tuitor major. Lo ia envia cuasi 15 mil mesajes par sua conta de novas, e plu ca 1500 par la paje engles ofisial de la Pape. Lo opera ance contas de Facebook, Google+, Instagram e YouTube.

2018-05-16

Corea Norde menasa cansela sua consenta con Trump

Corea Norde ia dise ce lo va cisa retira se de un confere con Donald Trump, presidente de la SUA, si la SUA insiste ce lo abandona sua armas nucleal.

On ia espeta ce la consenta entre Trump e Kim Jong-un va aveni a 12 junio. Ma en un declara coler, la visministro txoson de esternas ia acusa la SUA de parla fretosa e de ave intendes malvolente. Kim Kye-gwan acusa direta John Bolton, la conselor SUA de securia nasional, disente: "Nos no asconde nosa senti de repulsa par el."

La acorda monumental per un encontra entre Kim e Trump ia reali cuando Corea Norde ia dise ce lo intende desnucleali la penisola corean. La implicas esata de esta resta nonclar, ma la pais ia invita jornalistes stranjer a oserva la desasembla de sua proberia nucleal xef en la parte du de esta mense.

La anunsia par Kim, nasional difusada, dise ce si la SUA "trapi nos e esije uniladal ce nos abandona armas nucleal, nos va es no plu interesada par discutes" e "va debe reconsidera" sua partisipa en la consenta a 12 junio.

El ia dise ce Corea Norde ave "esperas alta" ma ce lo es "multe nonfortunosa ce la SUA provoca nos ante la confere par sputa dises asurda".

On sabe ce Kim Kye-gwan es forte respetada entre la gidores de Corea Norde. El ia partisipa en negosias presedente con la SUA. Lo es multe nonprobable ce sua comentas no ia es personal aprobada par Kim Jong-un.

Bolton, political conservaliste, es un defendor dedicada de la potia de la SUA e de usa lo a stranjer. En la pasada, el ia dise ce un ataca preveninte contra Corea Norde ta es "perfeta legal". En intervisas en la fini de semana, el ia comenta ce Corea Norde pote segue la model libi de desnucleali: Libia ia abandona sua armas ante prende aida economial.

A oras ante la anunsia, en un indica de problemes cresente, Corea Norde ia retira se ance de un consenta ajendida per ier con Corea Sude. Acel ia es un reata a la comensa de eserses militar juntada par la SUA e Corea Sude. Corea Norde ia dise ce lo va permete la eserses, ma plu tarda lo ia descrive los como "un disturba militar provocante" cual sumina sua atentas diplomata.

2018-05-15

Bisicles nondocida inonda la mundo

La nederlandeses ia populari la idea de bisicli en sites, ma par un modo nova tecnolojial de lua veculos, on espera revolui la usa de bisicles en sites tra la mundo.

La inova xef es la lua de bisicles nondocida. On trova e libri los par un pico de tapes a un telefoneta, e pos lua los per un ora, un dia, un semana, etc, on reclavi los e lasa los a cualce loca do sua viaja fini, e no en un doca definida.

Tal veculos composa aora la majoria de la 18 milion bisicles de autoservi publica en la mundo, en 1608 sites. La cuantia ia grandi ja de sola du milion a la fini de 2016.

La plu de la crese ia aveni en Xina, do du companias nova, rica con finansia de jigantes comersial competente, batalia per domina la stradas. Como resulta, 1,5 milion bisicles ia inonda la stradas de sola Shanghai.

Ma la combate mercatal ia lasa ance montones de bisicles dejetada en la campos ensircante. En setembre, la sites la plu grande de Xina ia proibi companias de introdui plu bisicles a la vias, e la montones ia comensa aora desapare.

Estra la oportunia de pote lasa un sicle en cualce loca, scemas de bisicles nondocida es multe plu barata per opera ca la sistemes vea, car on no nesesa instala e manteni un doca.

Par move la tecnolojia de clavi e paia de la doca a la bisicle, operores pote ajunta sicles en modo vera rapida. Sensadores de jeolocali aida siclistes a trova bisicles par un ap de telefoneta, e on fa la lua e desclavi par scane un codigo QR o par usa identifiadores radiofrecuential.

La tecnolojia es enerjida par un pila cual deveni cargada par un dinamo tra cuando la sicliste pedali.

La susede de la bisicles en Xina ia atrae investores: la capital riscosa cual on investi a companias de bisicles nondocida tra la mundo ia alti de $290 milion en 2016 asta $2,6 mil milion en 2017.

Siclistes no lasa sempre la bisicles en locas ideal per otra usores, donce la operores de la scemas debe redistibui los a veses. En Oslo, un compania usa computadores per descovre la modo la plu nonperosa de distribui la sicles, atentante masimi la cuantia de viajas par cada veculo ante cuando on nesesa reloca lo.

2018-05-14

Marvel ave supraeroes xines a la ves prima

La supraeroes prima xines ia entra ofisial a la universo de Marvel Comics.

Aero e Lin Lie es sola du de un grupo de carateres xines ci debua en novelas grafica en esta semana. Cocreada par Marvel e NetEase, un plataforma enlinia major en Xina, los es un atenta par Marvel de atrae plu fanes en la mercato profitosa xines.

Lin Lie es la carater xef en un de la publicidas nova, de cual on pote tradui sua titulo como "Gerores de tre monarcas". La nara foca a esta xico de des-oto anios ci prende un spada antica per batalia contra Chiyou – un vil reincarneda ci vole destrui umanas.

La novela du, traduable como "Siclon", presenta Aero, ance conoseda como Lei Ling, un fem ci labora como arcitetor ma es capas de controla corentes de aira. En la notes, el usa sua suprapotia per salva sua site de viles diversa.

On ancora no ia fa un confirma ofisial, ma en la numero prima de "Gerores de tre monarcas", un imaje de la masca de Iron Man es vidable en la sala de Lin Lie.

En la anio pasada, Marvel Comics ia anunsia ce lo va labora con NetEase – un de la companias la plu grande de juas video e tecnolojia en Xina – per crea sua supraeroes xines prima. Alora, la editor xef de Marvel ia dise ce la supraeroes nova va es "forte fundida sur cultur e mitolojia xines, ma locada en la mundo moderna".

Artistes e scrivores de Xina ia es multe envolveda en la crea.

Economial, la colabora es nonsurprendente, car Marvel ave un cuantia grande de fanes en Xina. En Weibo, la rede sosial la plu grande de Xina, la paje de Marvel ave plu ca 3,5 milion suportores.

"Gerores de tre monarcas" es ja lejeda a plu ca du milion veses pos sua publici, e "Siclon" a pico su 750 mil.

Un comentor en NetEase ia dise: "Final, nos ave supraeroes xines. Nos ia ariva." Un otra ia ajunta: "Cisa a alga dia, los va pote combate a lado de la Venjores."

2018-05-13

Un atacor coteli pasores en Paris

Un ataca matante de cotel ia aveni en la sentro de Paris a la sera de ier. La suspetada ia nase en 1997 en la republica rusce Txetxnia.

La atacor ia mata un om de 29 anios e ia feri cuatro otras en la distrito de la Plaza de l'Opera ante cuando la polisia ia mata el par fusil. La organiza Daex ia dise a pos ce un de sua "soldatos" ia fa la ataca. On interoga la jenitores de la suspetada.

Emmanuel Macron, la presidente de Frans, ia tuita: "Frans ia paia denova con sangue, ma no va sede par un diton a la enemis de libria." La maior de Paris, Anne Hidalgo, ia tuita: "A esta sera, nosa site ia es contusada."

La atacor ia comensa coteli pasores a sirca 21:00 de ora local. Atestores descrive el como un om joven con capeles brun e un barba, portante un pantalon negra de sporte. El ia atenta entra a alga bares e restorantes ma ia es forsada a via par persones a la interna.

Polisiores ia ariva pos sinco minutos. Prima, los ia atenta para la atacor par pistol eletrical, ma ultima los ia mata el, ante nove minutos pos la comensa de la ataca. Du de la persones ferida es en state grave, ma sua vives no es menasada.

La unia antiteroriste de la departe litigal franses ia inisia un investiga.

Frans ia es ja vijilosa pos un serie de atacas. Plu ca 230 persones ia es matada par djihadistes inspirada par Daex en la tre anios pasada. La violentia la plu matante ia aveni a 13 novembre 2015, cuando fusilores e bombas umana ia ataca locas publica diversa en Paris a cuasi la mesma momento, e ia mata 130 persones.

Pos gania la eleje de la anio pasada, Macron ia promete ce la combate de terorisme islamiste va es sua conserna xef de politica esterna. El ia dise ce la vinse de Daex en Irac e Suria debe acompania medias antiteroriste en Africa.

2018-05-12

Un cabana motorida atenta la recordo de rapidia

Sur un plaia en Cimri a esta fini de semana, on va atenta crea recordos mundal nova de rapidia – usante un cabana multe aumentada e un motosicle.

La veculo prima va atenta rompe sua propre recordo – 129 km/h – per la cabana la plu rapida viajante. E sur sua motosicle supracargada, Zef Eisenberg va atenta crea un recordo nova de rapidia sur arena.

Kevin Nicks, proprior de la cabana, ci ave 53 anios e labora como jardinor, ia dise ce lo es la sola cabana motorida en la mundo cual es legal usable sur vias publica. El ia spende miles de paundes en crea sua cabana movente, cual conteni aora un motor de 400 cavalos frenal, plu potiosa ca multe autos de sporte.

El ia ave prima la idea de crea un cabana sur rotas en 2015 cuando sua Volkswagen Passat vea ia reposa rompeda ante sua casa. Alora el ia pensa: "Ta ce nos vide esce me pote fa pico diferente."

La padre ia spende inisial £5000 e des-du menses en aumenta sua cabana, cual el mesma ia construi, per pote prende sua fia a scola e visita la botecas. A pos, el ia demanda a se sur la rapidia masima. En concursos el ia susede rompe la recordo Guinness. Ma la cabana ia desintegra, nesesante reparas major.

Aora, pos du anios e 30 000 cilometres de viaja, Nicks ia usa plu £8000 per renovi la cabana con un motor RS4 de Audi, cual el ia ajusta multe. El ia comenta: "Me ia spende tota la inverno en boni lo e ajunta un motor e suspende nova. Lo inisia tan rapida. Ma nun sabe a cuanto rapidia lo va vade."

El va comensa sua atenta de recordo oji a Pendine, un plaia cual ia deveni asosiada con rapidia teral cuando Sir Malcolm Campbell ia rompe ala la recordo en la desenio de 1920. Ance sur la plaia on va trova multe supracaros, autos de tre rotas, e motosicles de potia alta, con sua gidores ci espera rompe recordos.

"Arenas Pendine es un corseria malfamosa difisil," Eisenberg ia dise. "Concursores ave no idea sur la natur de la surfas asta la esflue de la marea. Car Pendine es un loca ofisial de proba de artileria, on encontra comun armas nonesplodeda a lado de medusas jigante encaliada."

Eisenberg, ci veni de Gernsi, ia mori cuasi pos rompe la recordo teral per un turbosicle a 18 menses ante aora, cuando el ia colide a 370 km/h e ia es en ospital tra tre menses.

"Nun en istoria, con auto o motosicle, ia esede 200 milias per ora (322 km/h) sur la arena a Pendine," el ia ajunta. Lo es la calix santa de rapidia, do la corsores la plu rapida de mundo ia fa la atenta."

2018-05-11

Un canal xines es proibida de difusa Eurovision

La Uni European de Radio-Televisa (UER) ia proibi un de la canales tv la plu popular en Xina de difusa la concurso Eurovision de canta, car lo ia sensura elementos LGBT de la presenta.

Mango TV ia es criticada en redes sosial cuando lo ia pare ce lo ia nebli banderas con colores de arco de sielo e ia sensura tatuas en la semifinal prima a martedi. Lo ia deside ance no difusa la presentas de Er e Albania.

La UER ia dise ce la sensura no acorda con sua valuas de diversia. En un declara, lo ia afirma: "Lo es con regrete ce donce nos va fini direta nosa asosia con la difusor, e los no va es permeteda a difusa la semifinal du o la final grande."

Un conta, La Vose de Omosesalia, ia dise ce la deside par la difusor de elimina referes a omosesalia es "un retropaso major". Otra usores de Weibo ia recomenda ce on "boicota Mango TV", e un usor ia dise ce el "serta no va regarda Mango TV en la mense veninte".

La entrada eres, Ryan O'Shaughnessy, ia comenta ce el bonveni la deside par la UER: "De la comensa mesma, nos ia dise ce la ama es la ama – si lo es entre du xicos, du xicas, o un xico e un xica – donce me crede ce esta es un deside vera importante. On no ia reata pardonosa, e me crede ce lo es un move en la bon dirije, donce me es felis sur lo."

El va canta en la ronda final en Lisbon doman con un canta sur la fini de un relata. El ia es acompaniada par du dansores mas en la presenta cual Mango TV ia pare sensura.

Otra paises cual ia susede ateni la final inclui Australia, Danmarc e Magiar.

2018-05-10

Malaisa eleje un ministro xef la plu vea de mundo

Mahathir Mohamad va deveni la plu vea de la xefes elejeda en la mundo, pos un vinse surprendente en Malaisia. El ave 92 anios. La ministro xef pasada ia pausa sua jubila, ia junta se a la partito oposante, e ia batalia contra Najib Razak, orijinal sua disiplo, ma aora atacada par alegas de froda.

La vinse monumental de Mahathir despone la alia Barisan Nasional (BN), cual ia rena sempre pos la autonomi de la pais en 1957. Sua suportores joiosa ia pleni la stradas cuando la vinse ia deveni clar.

Najib ia dise ce el va "aseta la deside de la popla", ma un move fasil de potia no es serta pos un cambia political tan grande. No partito en la alia ia gania un majoria, donce la deside resta tecnical con la re de Malaisia.

En la oras temprana de esta matina, Mahathir ia esplica ce sua alia no desira venja ma va "restora la rena de lege". El ia anunsia ance – aclamada par suportores – un festa de du dias, ajuntante: "Ma la vinsores no va reposa."

La resultas ofisial ia mostra ce la partito oposante, Pakatan Harapan o la Alia de Espera, ia gania 113 de la 222 sejas, incluinte alga cual ia es sempre ocupada par la governa en la pasada. Barisan Nasional ia gania 79 sejas. La custa altinte de vive e alegas durante de froda ia convinse multe votores, tirante los a via de Najib e sua alia de fortia pasada.

Mahathir ia es la ministro xef, gidante la alia BN, tra 22 anios, de 1981 asta sua resinia en 2003. Su sua governa, Malaisia ia deveni un de la "tigres asian" – la paises de cual sua economias ia crese rapida en la desenio de 1990.

Ma el ia es un figur autoritar ci ia usa leges controversa de securia per prisoni sua oposores. La plu malfamosa, sua ministro visxef, Anwar Ibrahim, ia es desempleada e acusada de froda e sodomia – e, plu tarda, prisonida par la acusa du – cuando el ia recomenda reformis economial e political.

Mahathir ia es ance un conselor a Najib, ci ia deveni la ministro xef en 2008. Ma Najib es xasada par alegas de froda. On ia acusa el de poxi $700 milion de un reserva nasional de investi cual el ia institui. Najib ia nega forte tota la alegas, e autoriosas malaisian ia remete el, ma alga otra paises investiga ancora la reserva. On ia acusa Najib ance de sofoca investigas malaisian par despone ofisiores major de sua postos.

En 2016, acel alegas ia gida a la traversa surprendente de Mahathir de Barisan Nasional a Pakatan Harapan, descrivente se como "embarasada" de asosia "con un partito cual on regarda como suportante froda". A pos, en esta janero, el ia anunsia ce el aspira denova la posto xef.

Ma an pos sua vinse presente, sua periodo de ofisia es nonclar. Ante la vinse, el ia intende governa per du anios ante resenia. El ia promete ce el va organiza un pardona per Anwar, abrinte la via per la reeleje de esta, ci ta deveni ultima la ministro xef.

On ia ave alegas ante la eleje ce la vota no va es justa. La governa ia aseta resente un lege cual ia cambia la distritos elejal, provocante acusas ce lo ia malmanipula los per serti ce los es plenida par muslimes melaiu, ci es tradisional suportores de Barisan Nasional.

Resente, on ia introdui ance un lege controversa sur novas falsa, sur cual oposores dise ce la autoriosas ta pote usa lo per mudi disentis. Mahathir mesma es investigada su acel lege pos alega ce on ia sabota sua avion.

E en la dias ante la vota, un grupo campaniante per reformis ia acusa la Comite de Eleje sur multe "crimines elejal", incluinte cualias nonlegal en la prosede de vota postal e un fali de sutrae persones mor de la lista de votores. La governa ia insiste ce la eleje va es libre e justa, e Najib ia dise ce la Comite de Eleje ata "per la benefica de cadun".

2018-05-09

La virus ebola reapare en DR Congo

On ia declara un eruta de la virus ebola en la norde-ueste de la Republica Democrata de Congo, con du casos confirmada e 17 moris.

La aveni en la vila Bikoro segue a plu ca un anio pos la mata par la maladia de cuatro persones en la pais. E en 2014, la virus ia mata plu ca 11 mil persones en Gine, Siera Leon e Liberia.

La anunsia ia es fada pos cuando resultas de laboreria ia confirma du casos de ebola en un sample de sinco pasientes suspetada.

Un portavose per la Organiza Mundal de Sania ia dise: "Nosa conserna xef es vade a Bikoro per labora a lado de la governa. Laboras con asosiores e respondes temprana e coordinada va es esensal per conteni esta maladia matante."

La organiza ia relasa $1 milion de un reserva de crise e ia envia plu ca 50 espertas per labora con ofisiores en la pais.

Esta es la ves nove de un eruta rejistrada de ebola en la Republica Democrata de Congo. On ia fa ala la descovre prima de la virus en 1976 (cuando la pais ia es conoseda como Zair) – la virus prende sua nom de la rio Ebola.

On crede ce la virus es sperdeda tra distantia longa par ciroteros de fruta, e es comun transmeteda a umanas tra carne contaminada de animales xasada.

2018-05-08

Un volcan destrui casas hawaian

La eruta de la volcan Kilauea en Hawaii ia destrui 35 construidas, xef casas, e menasa sentos de plu.

On ia evacua cuasi 2000 persones asta aora. Alga abitores ia es permeteda a visita sua casas per salva animales, ma ofisiores ia dise ce resta no es secur.

Fesures e bocas nova ia abri en la rejion Leilani Estates, do lava ia es lansada en la aira a asta 70 metres de altia.

La isola ia es colpada par un trematera de potia 6,9 a venerdi. Kilauea es un de la volcanes la plu ativa de mundo e es ja en eruta constante tra 35 anios.

On ia recolie plu ca $35 mil per un ensenior de scola prima ci ia perde tota en la flue de lava. Un fesur ia abri direta su sua casa de nove anios.

La ensenior, Amber Makuakane, ia responde: "Franca me no sabe como me debe comensa o cual me debe dise, otra ca… MAHALO! MAHALO MAHALO!", usante un parola hawaian cual sinifia "grasias".

2018-05-07

La tomba de Tutancamon ave no cambra secreta

Ofisiores en Misre ia fini sua xerca per un cambra secreta en la tomba de Tutancamon, concluinte ce lo no esiste. Presedente, los ia es cuasi serta ce un plu sala es ascondeda pos la mur de la tomba famosa de la re-xico ci ia vive a 3000 anios ante aora.

Un teoria ia sujesta ce la sala es cisa la tomba de Rea Nefertiti, sur ci alga pensa ce el ia es la madre de Tuntancamon. Ma rexercas nova ia trova simple ce la cambra no esiste.

La xerca per la loca ascondeda ia comensa cuando Nicholas Reeves, un arceolojiste engles, ia esamina scanes detaliosa de la tomba xef, e ia descovre lo cual ia pare como trasas apena persepable de portes su la jeso. En sua esajo "La entera de Nefertiti", el ia razona ce la tomba relativa peti ia es orijinal desiniada per la rea, e ce lo es posible ce sua restas reposa en un tomba plu profonda.

On ia trova nunca la restas de Nefertiti, ma on ia fa multe divinas. Par causa de un sculta de el, con 3000 anios ma perfeta conservada, Nefertiti es probable la fem la plu reconosable de Egipte antica. On crede ance ce cisa el mesma ia rena Egipte entre la mori de sua sposo e la troni de Tutancamon.

Pos la publici dramosa par Reeves, un serie de scanes de radar ia pare suporta sua teoria tan multe ce autoriosas major en Misre ia declara ce los ave "un sertia de 90%" sur la esiste de un plu cambra. Un plu scane ia pare ance suporta la idea, cual ia ta es la descovre la plu importante en desenios per la studia de Egipte antica.

An tal, spesialistes italian de la Universia de Torino ia usa scanes nova de radar penetrante per ateni sua conclui, declarante ce los fida la resultas.

Dr Francesco Porcelli, xef de la rexercores, ia comenta: "Lo es cisa pico deludente ce no cosa esiste pos la mures de la tomba de Tutancamon – ma a la otra lado me crede ce esta es bon siensa." El ia esplica ce los ia analise tre colies diversa de datos de radar, e ia contracompara la resultas per elimina "complicas en la datos" cual ia afeta la resultas de scanes pasada.

La ministro misri de anticas, Khaled al-Anani, ia dise ce la autoriosas en la pais aseta la conclui.

2018-05-06

Lubnanis eleje un parlamento nova

En Lubnan, on ia comensa vota en la elejes parlamental prima de cuasi un desenio. La ves la plu resente ia es en 2009, per lo cual on ia intende como un periodo de cuatro anios.

Ma la parlamento ia estende sua periodo a du veses par causa de nonstablia en Suria visina, e per reformi la leges elejal de la pais. Lo ia cambia la sistem de vota, ia redui la cuantia de distritos, e ia permete votas par sitadanes a stranjer a la ves prima.

Hezbollah, un grupo armada cual la Statos Unida e otras regarda como un organiza teroriste, desira aumenta sua representa en parlamento.

La prosede de vota per tota 128 sejas continua asta 19:00 de ora local. On no previde la apare de resultas ofisial asta lundi o martedi, ma analistes espeta ce detalias temprana va emerji a esta note.

Deses de miles de sitadanes lubnani ci abita estra la pais ia fa ja sua votas en la parte plu temprana de esta semana.

La sistem nova usa un sistem proportial, con sejas distribuida entre la grupos diversa cristian e muslim. Tra multe tempo, Lubnan ave ja un sistem political de comparti potia entre la relijios. La cuantia de sejas es divideda entre muslimes e cristianes, e cada de la presidente, ministro xef e ofisior autoriosa de la parlamento debe veni de un fondo relijial spesifada.

Saad Hariri, la ministro xef presente, ia causa un crise major en novembre cuando el ia fuji de la pais a Arabia Saudi, anunsiante sua resinia en un parla televisada en cual el ia dise ce el teme un atenta de asasina. Pos du semanas, el ia suspende sua resinia pos parla con presidente Michel Aoun en Lubnan, e ia retira completa sua deside en desembre.

La Uni European ia dise ce lo ia envia oservores elejal a tota de la distritos de vota lubnani.

Temas major cual la parlamento nova va fronti inclui la destina de un cuantia grande de refujadas ci ia entra a la pais pos la eruta de la gera interna suri, e problemes continuante de economia.

2018-05-05

Un futbalor mori pos un colpa de lampo

Un futbalor sudafrican, colpada par lampo en un max, ia mori en ospital.

Luyanda Ntshangase, atacor per la ecipo Maritzburg Unida, ia es en un coma induida pos deveni ferida en la jua amin a 1 marto. El ia ave 21 anios.

En un declara en Facebook, la club ia descrive el como un de sua stelas joven e asendente, e ia dise ce la ecipo es lamentosa.

Ntsangase ia asende tra sua club pos sua apare prima contra Kaizer Chiefs a du anios ante aora. El ia es un de tre juores colpada par la flax de lampo en la max en la provinse KwaZulu-Natal. La du otras ia es mera pico ferida, ma Ntshangase ia sufri un peto ardeda.

Sua mori es la trajedia tre per Maritzburg Unida en anios resente. La sentrores prometosa Mondli Cele, con 27 anios, e Mlondi Dlamini, con 20, ia mori en asidentes separada de auto en 2016 e 2017.

A presente, la club ave la numero 4 en la Liga Prima de Sudafrica.

2018-05-04

Pexores guianan es matada par piratas

Presidente David Granger de Guiana ia dise ce un ataca par piratas en la semana pasada ia es "un masacra, un trajedia grande". On teme ce lo ia mata a la min des-du pexores.

Cuatro barcos, portante 20 persones, ia es atacada a lado de la costa de Suriname, visina en America Sude, a venerdi pasada. On ia trova la corpos de tre omes, e cuatro otras ia evade.

Alga de la pexores ci es ancora asente ia es puxada a en la mar con pesas liada a sua gamas, longo reportas par la survivores. La om, de ci la plu ia es guianan, ia es bateda e rubada.

Ier, Granger ia informa reportores ce Guiana ia es multe susedosa en restrinje piratia en la rejion, ma ce la atacas la plu resente ia "veni como un reversa grande". "Nos estende compatia a la familias privada," el ia ajunta.

La familias de la vitimes ia es informada ce la governa va suporta los. Ecipos de salvores continua opera en la rejion, con colabora entre autoriosas sranan e guianan.

Piratia es ja longa un problem en la mar prosima a Suriname e Guiana, an si la cuantia de avenis reportada ia redui en anios resente.

2018-05-03

Trump es contradiseda sur un compra de silentia

En la SUA, Rudy Giuliani, aidor legal de presidente Donald Trump, ia dise ce Trump ia repaia personal a sua avocato $130 000 usada per compra la silentia de un ator de filmas adulte sur un adultera alegada.

Esta pare contradise Trump, ci ia insiste ce el no ia sabe sur esta paia, fada par avocato Michael Cohen a Stormy Daniels ante la eleje de 2016. Trump ia nega ance la alega par Sra Daniels sur la relata de ama en 2006.

Giuliani ia dise ce no finansia campaniante ia es usada – un cualia major en la situa, car acel ia ta es nonlegal.

La maior pasada de la Site York Nova, ci ia deveni resente un membro de la ecipo legal de Trump, ia comenta: "Los ia embuti lo tra un compania de avocatos e la presidente ia repaia lo." El ia ajunta ce la repaia ia es fada "tra un periodo de alga menses".

La avocato de Daniels, Michael Avenatti, ia dise ce americanes "debe es scandalida" par la revela de Giuliani. El ia tuita: "Nos ia predise a menses ante aora ce on va demostra ce on ia menti a la popla american sur la paia de $130 mil e lo cual Trump ia sabe."

Pos nega inisial la paia, Cohen ia confesa ultima ce el ia fa la paia privata a Stormy Daniels – de ci sua nom vera es Stephanie Clifford – en otobre de 2016, usante sua propre finansia, per compra sua silentia. El ia dise ance ce la campania de Trump e la organiza de Trump ia ave no sabe sur la paia, e ce el mesma no ia reseta un repaia de la mone.

La presidente ia aseta resente ce on ia fa un "acorda". La paia relata a alegas par Daniels ce el ia fa la seso con Trump en 2006, negada par Trump.

En marto de esta anio, Daniels ia inisia un litiga contra la presidente, alegante ce la acorda de nonrevela ia es nonvalida car Trump no ia suscrive lo. A pos, Daniels ia perde un proposa de corte ce Trump ta atesta jurada sur sua reclama ce los ia fa un relata de ama.

An si Trump ia nega la reclama, sua avocatos xerca $20 milion de compensa de Daniels, razonante ce el ia rompe la acorda de nonrevela.

Daniels litiga la presidente ance sur un tuita "malacusante" cual el ia envia pos cuando Daniels ia dise ce un om ia menasa el en un parce de autos en Las Vegas a abandona sua alegas. Trump ia dise ce la reclamas es "un caso completa de froda".

2018-05-02

La color contaminada de la Taj Mahal

En Barat, la Corte Suprema ia comanda la governa a xerca aidas stranjer per repara lo cual lo descrive como un cambia ansinte de la color de la Taj Mahal.

Lo dise ce la tomba famosa, construida en la sentenio 17 de marmo blanca e otra materias, ia jali e deveni aora brun e verde. La causas inclui contamina airal, construis, e la fece de insetos.

La judores ia esamina fotos de la palasio furnida par ambientistes e ia comanda ce la governa trova espertas en e estra la pais.

En la pasada, la governa ia covre la fenetras de miles de fabricerias prosima a la Taj Mahal, ma ativistes dise ce la marmo perde ancora sua brilieta. Cloacales en la Rio Yamuna, a lado de la palasio, atrae insetos cual escrete sur la mures, manxante los.

La Taj Mahal ia es construida en la site Agra par la Imperor Mugul Shah Jahan, e es aora un de la atraes major de turisme global, con asta 70 mil visitores per dia.

La problem de susia no es nova, ma on teme ce lo deveni plu sever. A veses diversa en la du desenios pasada, on ia covre la marmo su un trata de fango: cuando on lava la fango a via, lo desprende ance alga de la susia. La plu resente de esta tratas ia comensa en janero.

2018-05-01

La secretas jenetical de la rosa

A la ves prima, rexercores ia desifri la "testo" jenetical intera de la rosa. Sua istoria revela un surprende: lo es plu prosima relatada a la fresa ca nos ia suposa. Pos tempo, la labora va produi cisa rosas con odores e colores nova.

La prepara de la mapa nova de jenom ia ocupa oto anios, e ia revela jenes pertinente a la crea de odor e color e a la longia de vive de flores.

La studia, par un grupo de plu ca 40 siensistes de Frans, Deutxland, la Rena Unida e Xina, furni un comprende plu bon de la razonas perce la colores e odores de rosas es tan diversa. La informa jenetical va aida cultivores a developa varias nova cual dura plu longa en la vaso, o es plu capas de resiste pestes.

Lo lumina ance la familia Rosaceae, cual conteni no sola plantas ornal como la rosa, ma ance frutintes como pomos, peros e plantas de fresa.

La cultiva de rosas en jardines ia comensa a miles de anios ante aora, probable en Xina. En la periodo roman, rosas ia es multe creseda en Asia sude-ueste, do on ia usa los per parfum o como confeti.

2018-04-30

No imposta televidal per la sposi de Harry e Meghan

La BBC ia desprende la imposta de televide per comunias en la Rena Unida ci vole regarda coletiva la sposi de Prinse Harry e Meghan Markle a 19 maio.

Selebras su sielo e otra avenis spesial pote aora mostra publica la difusa direta de la rituo, sin compra un lisensa.

En Britan, cada casa cual regarda o rejistra televisas direta debe fa un paia anial per finansia la BBC, cual difusa programes sin anunsias comersial. Organizas como scolas, ospitales e bares fa ance esta paia.

La governa ia dise ce comites local ia reseta sentos de solisitas per organiza selebras en la stradas per onora la sposi. Multe consilios ia cansela la custa de clui la stradas, e on va estende la oras de funsiona de tavernas per la dia.

La xef de maneja de revenu de la BBC ia esplica: "En situas estracomun, la BBC pote permete un esenta tempora per televide, con esije ce la televide ave la sola intende de mostra un aveni cual, en la judi de la BBC, ave un importa nasional. La BBC crede ce la sposi real es un tal aveni."

Prinse Harry e Meghan Markle va es sposida par la Arcibispo de Canterbury en la Capel de San Jorj a la Castel de Windsor, a ueste de London.

2018-04-29

La mori de la fundor de la festa Om Ardente

Larry Harvey, fundor de la festa de artes Burning Man ("Om Ardente"), ia mori en San Fransisco con eda de 70 anios. El ia sufri un ataca serebral en la parte plu temprana de esta mense e ia mori en sua casa a la matina de ier.

Asta 70 mil persones asembla anial per la festa de contracultur en la Deserto Roca Negra en Nevada, SUA. Lo presenta instalas jigante de arte interatante e un om enorme de lenio cual on arde a la fini de la aveni.

Om Ardente ia es fundida en junio 1986 cuando Harvey e sua ami Jerry Goodell ia flami un om de lenio sur la Plaia Baker en San Fransisco per selebra la solstisio de estate. Esta ia inisia la festa, cual ia aveni en la deserto a la ves prima en 1990, e ia deveni rapida un de la culturales la plu bon conoseda de America.

En 2015, la Projeta Om Ardente ia reporta un revenu anial de $37,5 milion, de cual on ia reinvesti $30,4 milion per maneja la aveni.

Harvey ia ave la titulo Ofisior Xef de Filosofia. En 2016, el ia esplica la orijina de la festa:

"Lo ia es la aniversario de un caso de ama rompeda. On ia infla sempre plu acel raconta. Me ia arde mea xica de cor, vos oia, me ia arde la avocato de mea xica de cor – me ia inventa acel sola per crea interesa! De do la om ia veni, me no sabe. La spirito de lo es vivente e sana. Nos tende dise cuando on demanda sur la natur de la aveni: me no sabe – descovre lo es tua taxe."

2018-04-28

Un sacrifia antica de enfantes en Peru

Arceolojistes ia descovre la restantes de un sacrifia coletiva de enfantes cisa la plu grande en istoria. Plu ca 140 enfantes ia es sacrifiada a plu o min la mesma tempo en la rejion costal de la norde de Peru, a sirca 550 anios ante aora.

On ia fa la descovre prosima a la site Trujillo, a distantia corta de la sentro de la siviliza tximu antica. Plu ca 200 liamas ia es sacrifiada a lado de la enfantes – de ci tota ia es matada en un sola aveni.

En 2011, la descovre prima de vitimes de sacrifia umana a la loca, nomida Huanchaquito-Las Llamas, ia trova la restantes de 40 vitimes e 74 liamas en la escava de un templo de 3500 anios.

La conta final de 140 enfantes, anunsiada en esta semana, mostra ce la vitimes ia ave entre 5 e 14 anios, la plu entre 8 e 12.

On sabe ce los ia es vitimes de sacrifia par causa de marcas de talia a la osos, incluinte la sterno. Ance multe costelas ia es danada, cisa indicante ce la cor ia es estraeda. En ajunta, multe de la enfantes ia es pintida con un pigmento briliante roja, fada de sinabar – probable un parte de la rituo sacrifial.

Tota la liamas ia ave min ca 18 menses, e ia es enterada per fasa la Andes.

La escava ia furni ance un sujesta de la razona per la sacrifias. La strato de fango en cual la vitimes ia es enterada ia es cisa causada par deluvias en esta rejion seca, resultante de un aveni estrema de clima. Un tal aveni ta pote disturba pexerias maral e inonda la infrastrutur de canales cultival.

Par dati radiocarbonal de stofas descovreda a la loca, on crede ce la sacrifia ia aveni entre 1400 e 1450 de la eda presente. La tximus, ci ia adora un dio de luna, ia es concistada par la incas pos sola alga plu desenios. E pos 50 plua anios, la espanioles ia ariva en America Sude e ia concista la impero inca.

2018-04-27

Multe lampo de monson en Barat sude

La stato Andhra Pradesh en la sude de Barat ia rejistra 36 749 colpas de lampo en 13 oras a martedi. De alora nove persones, incluinte un xica de nove anios, ia es matada par lampo.

Tal colpas aveni comun en Barat en pluvones de monson. Tipal, la saison comensa en junio e continua asta setembre. Ma esta rejion esperia usual plu lampo ante la comensa de la monson.

On regarda la multe lampos a martedi como anomal, car datos de la anio pasada mostra ce on ia ave sola 30 000 colpas de lampo tra la intera de maio en la mesma rejion.

En esta anio, ventas fria de la Mar Arabi ia colide con ventas plu calda de Barat norde e ia produi un state cual ia formi plu nubes ca usual. Esta ia alti la posiblia de lampo. Plu, en un fenomeno rara, la nubes ia covre 200 cilometres, sin deveni pesos separada e plu peti.

Alga siensistes crede ce la caldi global va aumenta notable la frecuentia de lampo.

2018-04-26

Un encontra a la frontera de la Coreas

Doman, Kim Jong-un va deveni la gidor prima de Corea Norde (Txoson) ci entra a la teritorio de Corea Sude (Tehan) pos la fini de la gera corean en 1953. En detalias nova anunsiada, la Sude ia dise ce presidente Moon Jae-in va encontra personal Kim a la frontera, a 09:30 de ora local.

Sua discutes va foca a la indicas resente par la Norde ce lo ta pote sede volente sua armas nucleal. Esta es un avansa major pos anios de tensa cresente.

Ma Seoul ia averti ce la reali de un acorda intendeda per elimina la armas nucleal de Pyongyangva va es difisil, car la tecnolojia nucleal e misilal de Txoson ia avansa tan multe pos la ves la plu resente de discutes entre la du lados.

La consenta – la numero tre de sua spesie, pos los en 2000 e 2007 – resulta de menses de relatas boninte entre la du Coreas, e abri la via per un consenta posible entre Kim Jong-un e presidente Donald Trump de la SUA.

En ajunta a la aspiras nucleal de Corea Norde, on previde ce la gidores va discute un via a pas sur la penisola per fini formal la Gera Corean de 1950–3, e ance alga problemes economial e sosial.

Moon va encontra Kim e sua delega de nove ofisiores a la frontera, de do gardores onoral de Tehan va acompania la gidores a un rituo de bonveni en un plaza en Panmunjom, un compleso militar en la zona desmilitarida entre la du paises.

Discutes ofisial entre Moon e Kim va comensa a 10:30 de ora local a la Casa de Pas en Panmunjom. La duple va pausa pos la sesion prima per come en modo separada: la delega de la Norde va revade a sua lado de la frontera.

A un rituo en la posmedia, Moon e Kim va planta un pino usante tera e acua de ambos paises, per simboli "pas e susede". Pos acel, los va pasea en junta en Panmunjom ante comensa la ronda seguente de discutes.

La confere va conclui cuando la gidores suscrive un acorda e fa un declara juntada. On va fa un banceta a la lado tehan, e los va regarda un video nomida "Primavera de un" ante cuando Kim revade a sua pais.

Kim va es acompaniada par nove ofisiores, incluinte sua sore Kim Yo-jong, ci ia gida la delega txoson a la Juas Olimpial de Inverno en Tehan, plu temprana en esta anio. Ance Kim Yong-nam, la xef de stato par titulo, va es presente.

En un move no videda a conferes presedente entre la du Coreas, la delega va inclui ance diplomatas e ofisiores militar xef. Corea Sude va envia sete ofisiores, incluinte sua ministros de defende, esternas e uni.

2018-04-25

Un xico australian fuji solitar a Bali en aventura

Polisiores australian dise ce los va investiga como un xico de 12 anios ia viaja solitar a Bali, pos disputa con sua jenitores e usa sua carta de credito.

La xico, de Sydney, ia usa la interede per reserva sua volas e otel cuando sua jenitores ia deside cansela un viaja a acel isola indonesian. El ia vola a Bali tra Perth, presentante sola sua pasaporto e carta de identia scolal.

On ia trova el en Bali a 17 marto. La Polisia Federal Australian ia confirma ce on ia reporta sua manca a nove dias plu temprana cuando el ia parti de sua casa sin ariva a scola. On no ia revela cuanto dias el ia spende en Bali.

El ia usa un macina de autoservi en la airoporto de Sydney per rejistra se e embarca un avion a Perth, e alora un plu a Bali. La xico, identifiada par sola un nom falsa, ia dise ce ofisiores de airocompania ia fa demandas a el en Perth.

"Los ia solisita mera mea identia de studiante e mea pasaporto per demostra ce me ave a la min 12 anios e es en liseo," el ia esplica. "Lo ia es eselente car me ia desira vade en aventura."

El ia rejistra se per sua sala de otel en Bali par informa empleadas ce el espeta la ariva de sua sore.

La polisia australian ia es avisada sur la presentia de la xico en Bali a 17 marto. On ia deteni el per sua proteje ante reuni el con sua jenitores.

La polisia va esplora la detalias de la caso per serti ce cosas simil no va aveni futur. Un portavose ia dise ce on no ia furni un averti per preveni ce la xico viaja internasional. Tota airocompanias ave prosedes cual permete minores a viaja solitar, ma la constrinjes varia entre la companias.

2018-04-24

Finansia nova per un disionario gailica completa

En Scotland, on ia prepara un finansia de £2,5 ($3,5) per la fase veninte de la developa de la disionario completa prima de gailica. Faclair na Gàidhlig intende documenti la istoria, developa e usa de cada parola en la lingua, con multe plu detalias ca cualce disionario esistente.

Sua produi es posiblida par un colabora entre universias e la Sentra Nasional per Lingua e Cultur Gailica. La suporta la plu resente cual la governa de Scotland ia anunsia va es manejada par la Consilio de Finansia Scotes.

La disionario nova es un projeta de dura longa, e va coresponde a la recursos multivolumal cual on dispone per la linguas engles e scotes. Lo va ocupa cisa 30 anios de labora, e va conteni probable sirca 100 mil entradas.

La universias de Aberdeen, Edinburgh, Glasgow, Strathclyde e Sabhal Mòr Ostaig (sur la isola Skye) es envolveda en la projeta, cual es suportada par Bòrd na Gàidhlig, la organiza publica nasional con encarga per la lingua gailica.

John Swinney, ministro de educa, ci es encargada sur esta lingua celta, ia dise ce el es forte impresada par la labora fada asta aora e ce el espeta zelosa vide la avansa a la fase seguente.

La dirijor xef tempora de la Consilio de Finansia Scotes, John Kemp, ia comenta: "La disionario nova va vade ultra lingua a la cultur e erita gailica. Lo va nuri la crese e estende de educa gailica a tota edas e grados. En ajunta a sua pertine a la parlores e studiantes de gailica oji, Faclair na Gàidhlig va es un recurso importante per multe jeneras futur."

Profesor Boyd Robertson, xef de Sabhal Mòr Ostaig e reasemblor de la comite dirijante de la disionario, ia espresa sua opina: "Lo va dona a usores un disionario autoriosa, defininte e informante cual va fasili un comprende profonda de la materia e erita scriveda de la lingua, ofre comprendes detaliosa sur sua developa lingual, leteratural e cultural, e furni un sabe de la contribui fundal de la gailicas a la istoria, sosia e vive scotes. Par dona atestas direta de la lingua mesma, un disionario de esta spesie e grandia furni informas a un grado cual no ensiclopedia pote esede."

La labora preparante per la obra inclui la asembla de un banco de datos con 30 milion parolas gailica de fontes scriveda, e la usa de rejistras audio tenida en otra colies nasional.

2018-04-23

Compensante per la retira SUA de la acorda de Paris

Michael Bloomberg, maior pasada de York Nova, dise ce el va paia $4,5 milion como un sustitui per la obliga finansial a la acorda climal de Paris cual la SUA ia abandona.

El ia esplica ce el senti un encarga de aida boni la ambiente par causa de la deside de presidente Donald Trump de estrae la pais de la acorda. La retira ia es anunsiada en junio de la anio pasada e ia provoca desaprobas internasional. Sua efeto es ce la SUA va es la sola pais cual no partisipa en la acorda.

La acorda de Paris obliga la SUA e 187 otra paises a manteni la temperatur global levante a "clar su" 2°C plu ca la nivel preindustrial.

Bloomberg ia comenta: "America ia fa un promete e, como un american, si la governa no va fa lo, alora tota de nos ave un encarga. Me pote fa lo. Donce, si – me va envia a los un xece per la mone cual America ia promete a la organiza, como si los ta reseta lo de la governa federal."

En la anio pasada, sua asosia carital, Filantropias Bloomberg, ia ofre $15 milion per covre un otra manca relatada a cambia climal.

2018-04-22

La NU atenta remedia se sur Suria en Sveria

En un consenta rara estra York Nova, la Consilio de Securia de la Nasiones Unida fa discutes en un casa de cultiveria distante en la sude de Sveria.

On previde ce la sesion nonformal, cual aveni a cada anio, va foca a la gera en Suria e a vinse la divides profonda de opina de membros sur la tema. Sveria dise ce lo espera injeta momento nova a la prosede.

15 ambasadores consenta con António Guterres, la secretor jeneral, en un sesion de discute cual aveni usual en la norde de York Nova. En esta anio, lo aveni en Backåkra, invitada par Sveria, un membro nonpermanente de la organiza.

Los ia asembla en un casa de estate cual ia parteni a Dag Hammarskjöld, la secretor jeneral du de la NU, ci ia mori en un cade de avion en Africa en 1961. La ala sude conteni en estate la Academia Svensce, cual eleje la resetores de la Premio Nobel de Leteratur.

Carl Skau, visambasador de Sveria a la NU, ia dise ce la idea es "recrea dialogo" e "relansa momento" con "umilia e pasientia", a un semana pos la atacas airal par Frans, la Rena Unida e la Statos Unida contra Suria pos un ataca alegada cimical en Duma. "Lo es importante per la credablia de la consilio," el ia comenta.

La atacas airal, esecutada sin un deside de la Consilio de Securia, ia provoca un tensa ferose entre Rusia – un membro permanente e un aliada de Suria – e la SUA, Frans, la RU e Xina.

Ma a venerdi, Margot Wallström, la minstro svensce de esternas, ia averti contra nuri "esperas esedente ce la problem intera va es solveda" a la consenta. "Ante tota, nos nesesa ave tempo per parla sur la rol durante de la Consilio de Securia e la Nasiones Unida en la gera suri," el ia dise.

2018-04-21

Frans proibi descrive produidas vejetal como carne

En Frans, on va proibi la vende de produidas con funda vejetal su nomes cual sujesta carne, como stecas de soia e salsixes vejetaliste, car consumores es malgidada par los.

Produores va es no plu permeteda a usa "salsix", "steca" o cualce otra terma simil per descrive cosas cual no es intera o partal composada de carne. La cambia va afeta ance la presenta de produidas vejetaliste o vegan como alternativas a comedas con funda de lete.

Un fali de obedi la regula nova va incore un multa de asta 300 mil euros.

La regula ia es proposada como un ajusta a un lege de cultiva par Jean-Baptiste Moreau, un parlamentor-cultivor ci razona ce salsixes vegan e produidas con nomes simil es confusante per comprores.

El ia tuita, en franses: "Lo es importante ce on combate reclamas falsa. Nosa produidas debe es coreta identifiada: la termas #ceso o #steca va es reservada per produidas de orijina animal."

Moreau es un membro de la partito political La République En Marche! ("La Republica En Move!") de presidente Emmanuel Macron. La ajusta ia es aprobada par parlamentores franses a jovedi.

En la anio pasada, la Corte de Justia de la Uni European ia judi ce en la UE on no pote vende comedas con funda de planta su nomes usante termas como "lete", "bur" e "ceso".

2018-04-20

La desativi de un bomba en Berlin

Un evacua major aveni en Berlin a esta matina, per permete ce espertas desativi un bomba de la Gera Mundal Du. Construidas ia es vacuida de 09:00 en un raio de 800 metres sirca la construeria do on ia descovre la bomba.

En cada anio, on trova miles de bombas nonesplodeda de la gera de 1939–45. La polisia dise ce on ave no peril direta de la bomba brites, cual ave 500 cilogrames de pesa e ia es descovreda en Heidestraße a mercurdi pasada.

La area vacuida inclui la stasion sentral de ferovia, un ospital militar, la ministrerias de economia e transporta, e la ambasadas de Indonesia e Uzbecistan. La labora per desfunsiona la aparato va aveni sirca mediadia.

La compania de ferovia e otra transportores ia averti sur un disturba grande per trenes, trames e buses en la rejion. Volas a e de la airoporto Tegel, a distantia de sirca 7 cilometres, no es afetada, ma aviones aterante va evita vola supra la loca de la bomba.

Tegel es la airoporto la plu ativa de Berlin, e ia es cluida per tempo corta en agosto pasada pos la descovre de un bomba rusce de la Gera Mundal Du.

En setembre pasada, on ia evacua pasientes de ospitales en Frankfurt per permete la esplode controlada de un otra bomba enorme de acel gera.

2018-04-19

Porto Rica perde sua eletrica

La isola intera de Porto Rica ia sufri un perde de eletrica, a cuasi sete menses pos la destrui de multe de sua infrastrutur e rede de potia par Siclon Maria.

PREPA, la compania nasional de eletrica de la isola, ia dise ce lo labora per restora la servi a cuasi 3,4 milion persones en 36 oras. Lo ia esplica ce la fali ia es causada par un escavador operada par un contrator en la rejion sude de la isola.

Esta problem es la plu grande cual ia afeta la recovre de la isola, un teritorio de la SUA.

La compania ia clari ce lo labora prima sur la refurni de eletrica a ospitales, la airoporto de la capital San Juan, sistemes de pompi acua, e sistemes finansial.

PREPA es ja bancarota de julio pasada, e ia deveni frecuente discuteda en jornales pos setembre, cuando la isola ia es colpada par la tempesta la plu sever de 90 anios.

Abitores ia esperia multe rompes de eletrica pos Maria, un siclon de categoria 4, e eletrica ia manca ancora de 40 mil persones cuando la potia ia rompe denova ier. Esta ia aveni a min ca un semana pos cuando la cade de un arbor ia bloci la servi a 870 mil clientes.

Siclon Maria mesma ia causa la perde la plu grande de eletrica en la istoria de la SUA.

2018-04-18

Barat antica ia inventa la interede

Un ministro ci ia declara ce la interede ia es inventada par baratis antica, a miles de anios en pasada, ia trova se su un cuantia considerable de burla.

Biplab Deb, la ministro major de Tripura, un stato en la norde-este de Barat, ia fa la comentas a un aveni publica en la sera de ier. El ia sita un esemplo de Mahabharata, un de la du epicas major de induisme antica, per demostra sua reclama, ma no multe persones vole crede el.

Aora sua nom es modosa en Twitter car multe baratis broma sur el.

Deb ia dise ce la batalia de Kurukshetra en Mahabharata indica la esiste en Barat antica de no sola la interede, ma ance la tecnolojia de satelite.

El ia sujesta ce car un de la carateres, Sanjaya, ia pote raconta a sua re Dhritarashtra tota detalias de un batalia aveninte a distantia de multe cilometres, lo es donce demostrada ce Barat ia es capas de ambos tecnolojias.

Natural, esta ia provoca plu demandas, incluinte de un profesor de la istoria de Asia sude ci ia tuita: "Perce Abhimanyu no ia demanda a Quora como el pote evade la chakravyuha [un posa sirculo de bataliores]? Perce Sanjaya ia nara la Gera de Kurukshetra cuando Siri ia ta pote fa lo? Ance, vera Crixna ia ta debe flue la Bhagavad Gita [un parte famosa de Mahabharata] en Facebook Live."

Deb ia ajunta se a un lista de ministros barati ci ia dise ce multe tecnolojias moderna ia es inventada en la antica de sua pais.

En 2014, Narendra Modi, la ministro xef ia informa un asembla de dotores e empleadas medical ce sirurjia cosmetica ia esiste istorial en Barat. Plu resente, en setembre pasada, Satyapal Singh, ministro minor de educa, ia surprende par declara ce la refere prima a un avion es en Ramayana, la otra de la du epicas major.

2018-04-17

Un froda par tecnolojia en un esamina singapor

En Singapor, un ensenior ia confesa aida ses studiantes xines a froda en sua esaminas de otobre 2016, en lo cual acusores descrive como un conspira complicada.

Tan Jia Yan ia fa la esaminas como un aspiror privata e ia envia la demandas par FaceTime a aidores ci ia telefoni a la studiantes e ia leje a los la respondes. Ier, Sra Tan ia declara se como culpable de 27 acusas de froda.

La esaminas ia es los de nivel O, tipal fada par studiantes con sirca 16 anios. Tre otra suspetadas fronti acusas simil.

La conspira ia es descovreda pos cuando un supravidor ia oia sonas nonusual veninte de un de la studiantes. On ia prende la studiante a lado pos la esamina e ia demanda ce el desapone sua camiseta. On ia trova ce el porta un telefoneta, un aparato de Bluetooth, e escutadores de color de pel.

Un avocato ia descrive la "operas de froda" como "estrema refinada".

Tan ia es empleada a la Sentro Zeus de Educa a la tempo de la esamina. La otra tre suspetadas es la xef de acel sentro e du otra enseniores de ala. Los disputa la acusas contra se, ma on previde ce los va es litigada plu tarda en esta semana.

On alega ce la xef de la sentro, Poh Yuan Nie, ia reseta un depone de 8 mil dolares singapor (6100 dolares SUA) de un sitadan xines e mil dolares singapor per cada studiante enviada a la Sentro Zeus. Un repaia de tota la mone ia es projetada en caso ce la studiantes ta fali sua esaminas.

2018-04-16

Prisoni de un poesiste ci promove reuni Somalia

Un corte en Somaliland ia condena un poesiste joven a tre anios en prison. On ia judi ce Nacima Qorane es culpable de despeta la stato par promove ce Somaliland reuni con Somalia.

Grupos campaniante en Somaliland ia dise ce on ia viole la diretos umana fundal de Qorane. El ia es arestada en janero pos reveni de la capital somali Mogadishu, do, longo avocatos acusante, el ia resita poesia recomendante unia somali.

Somaliland ia autodeclara sua nondepende en 1991, ma ancora no es ofisial reconoseda a grado internasional. Pos un gera interna ferose, la norde-este de Somalia ia separa de la resta de la pais per deveni autonom. Sirca 3,5 milion persones abita en la teritorio.

En febrero 2018, la republica ia acorda permete ce la Amirias Arabi Unida institui un base militar a Berbera, un porto costal, como parte de la batalia par la AAU contra la rebelores huti de Iaman.

La litigores ia dise ce Sra Qorane ia descrive Somaliland como "un rejion" e ia "insulta e malacusa" sua governa.

La Sentro de Diretos Umana de Somaliland ia demanda ce la governa libri la poesiste e respeta diretos umana. La dirijor de la sentro ia comenta ce lo es "multe consernada par la condena e prisoni de Nacima Qorane". El ia ajunta: "Libria de espresa es tesorida e protejeda par la constitui de Somaliland. Nos urje la governa de Somaliland a respeta sua propre constitui."

En pasada, alga otra artistes e jornalistes ia es arestada en Somaliland per la mesma crimin.

2018-04-15

La SUA resta "cargada e preparada" contra Suria

Presidente Donald Trump ia averti la governa de Suria ce la SUA es "cargada e preparada" per ataca denova si lo esecuta plu atacas cimical.

La averti ia veni pos un colpa par misiles de la SUA, la Rena Unida e Frans a tre locas suri en responde a un ataca matante, sur cual on suspeta ce lo ia es cimical, en la vila Duma a un semana ante aora.

Suria nega la usa de cimicales e dise ce la ataca ia es finjeda par rebelores.

La Consilio de Securia de la Nasiones Unida ia rejeta un vota proposada par Rusia, aliada con Suria, condenante la atacas gidada par la SUA.

La onda de colpas representa la ataca la plu grande par potiosas ueste contra la governa de presidente Bashar al-Assad en sete anios de la gera interna de Suria.

2018-04-14

Un redui de emetes en barconi global

A la ves prima, la industria global de barconi ia acorda redui sua emetes de gases invernerial, pos un semana de discutes a la Organiza Maral Internasional (OMI) en London.

Transportas par barcon ia es escluida de acordas climal presedente, ma aora la emetes va es reduida par 50% ante 2050 en compara con la nivel de 2008.

La industria de barcones jenera sirca la mesma cuantia de gas invernerial como Deutxland. Si on ta conta lo como un nasion, lo ta es la emetor ses de la plu grandes de mundo. Como avioni, lo ia es escluida de negosias de clima car lo es un campo internasional: la Protocol de Cioto e la Acorda de Paris ia envolve prometes nasional per redui gases invernerial.

La SUA, Arabia Saudi, Brasil e alga otra paises no ia desira cualce gol per redui emetes de barconi. Ma la Uni European e statos de isola peti ia presa per un redui de entre 70% e 100%. La acorda de 50% es un compromete cual, en la opina de algas, es nonrealosa, an si otras dise ce lo es sufisinte forte.

Kitack Lim, la secretor jeneral de la OMI, ci ia preside la discutes, ia comenta: "Esta stratejia inisial no es un declara final ma un punto major de comensa."

La Isolas Majel, un nasion pico en la Mar Pasifica, ia abri la confere con un suplica. An si lo es la numero du de mundo par grandia de sua lista de barcones rejistrada, lo ia averti ce un nonreali de un redui profonda va menasa la survive de la pais contra la leva de nivel de mar par caldi global.

A la fini de la discutes, David Paul, ministro de ambiente majel, ia dise: "Ariva a esta punto ia es difisil, multe difisil. E lo ia envolve comprometes par tota paises, notable par nasiones de isola perilida como mea propre ci ia desira alga cosa multe multe plu aspirosa ca esta."

El ia ajunta: "Nos construi istoria. Si un pais como la Isolas Majel, un pais cual es multe nondefendable contra cambia climal – e cual depende spesial sur barconi internasional – pote aproba esta acorda, on ave no escusa credable per la nonpartisipa de cualce otra pais."

Laurent Parente, la ambasador de Vanuatu, un otra nasion de isolas pasifica, no ia es sasiada, ma ia espera ce la acorda va gida a un responde plu forte en la futur prosima.

Par contrasta, la xef de la delega SUA a la discutes, Jeffrey Lantz, ia clari ce sua pais oposa la acorda. "Nos no suporta la institui de un gol asoluta de reduis a esta tempo," el ia dise. "En ajunta, nos nota ce la ateni de reduis notable de emetes en la campo de barconi internasional va depende de inovas tecnolojial e de plu bonis en la nonperosia de enerjia."

Lantz ia repete ce la SUA, su presidente Donald Trump, ia anunsia sua retira de la Acorda de Paris sur cambia climal. El ia critica ance la modo en cual la OMI ia maneja la discutes, descrivente lo como "nonasetable e nonconveninte a esta organiza respetada".

Ma un majoria clar de la confere ia favore la redui.

Inovas rapida va es aora nesesada. Barcones va debe cisa opera plu lenta per usa min carburante. Desinias nova de barcones va es plu lisa, e motores va debe es min contaminante, cisa funsionante par potia de idrojen, par pilas, o an par la venta.

2018-04-13

Muses, drogas e polisiores

En Arjentina, on ia desemplea oto polisiores car los ia culpa muses per un desapare de drogas.

Investigores ia descovre ce 540 cilogrames de canaba manca de un teneria de polisia en Pilar, a norde-ueste de Buenos Aires. Un comisionor polisial pasada, Javier Specia, e copolisiores ia informa un judor ce la drogas ia es "comeda par muses".

Espertas forense ia duta ce muses persepi drogas como comables. E si muses ia ta come los, probable los ia ta mori en la teneria.

La polisiores va atesta ante la judor a 4 maio, e la corte va deside esce la drogas manca par "vantajosia o descapasia".

Un saisi de 6000 cilogrames de canaba es conservada en la teneria tra la du anios pasada. Ma la seguor de Specia, Emilio Portero, ia nota la drogas mancante cuando el ia comensa en la posto de comisionor. Portero ia avisa la departe de internas polisial, ci ia xerca en la teneria e ia trova ce sola 5460 cilogrames resta ancora.

Specia ia deveni suspetada cuando autoriosas ia trova ce el no ia suscrive la catalogo per la drogas confiscada cuando el ia resinia sua posto en april 2017.

On reporta ce la comisionor pasada es ance investigada car el ancora no ia presenta un declara jurada de revenu per la anio pasada.

2018-04-12

La SUA menasa Rusia sur la ataca en Suria

La SUA dise ce "tota posibles es en discute" en responde a un ataca suspetada de armas cimical en Suria, con ce otra gidores ueste continua considera sua reata. La SUA ancora no ia fa un deside final, ma ia dise ce lo regarda Rusia e Suria como culpable per la aveni. La Consilio de Securia Nasional de la SUA va consenta oji.

Ativistes, salvores e medicistes dise ce deses de persones ia mori a saturdi en la vila Duma, ocupada par rebelores. Ma la governa de presidente Bashar al-Assad, cual es militar suportada par Rusia, nega ce lo ia esecuta un ataca cimical.

En un tuita temprana ier, presidente Donald Trump ia menasa Rusia sur colpas de misil en Suria: "Prepara, Rusia, car los va veni, bon e nova e capas." En la mesma mesaje, el ia descrive la gidor de Suria como "un animal matante par gas".

La SUA, la Rena Unida e Frans ia acorda labora en junta, e on crede ce los prepara un ataca militar en responde a la ataca cimical alegada. La ministro de defende de la SUA ia dise ce sua pais evalua ancora la ataca, ma el ia ajunta ce la militar sta preparada "per furni posibles militar si los conveni como la presidente determina".

La Casa Blanca ia dise ce Trump no ia spesifa un scema per cuando colpas militar pote aveni. Un xasatorpedo SUA de misiles gidada es en la Mar Mediteraneo.

En la Rena Unida, on reporta ce Theresa May, ministro xef, pare preparada per permete un reata militar en Suria sin xerca la aproba de parlamento a ante: el no vole demanda ce la SUA espeta asta cuando el ia consulta la parlamentores.

On reporta ce Emmanuel Macron, la presidente de Frans, va fa un deside en la dias veninte. El ia dise ce cualce atacas va es dirijeda contra la "capasias cimical" de la governa suri.

Entretempo, António Guterres, la secretor jeneral de la NU, ia averti sur la nesesa de evita ce la situa "spirali ultra controla".

Ativistes oposante dise ce aviones de la governa suri ia cade bombas plenida con cimicales nosiva sur Duma, la final de la fortreses major de rebelores, prosima a la capital, Dimashq. Aidores local ia reporta ce on ia trata plu ca 500 persones per sintomes "indicante esposa a un ajente cimical".

Ier, la Organiza Mundal de Sania de la NU ia esije asede per serti reportas ce 70 persones ia mori, incluinte 43 ci ia mostra "sintomes coerente con esposa a cimicales multe nosiva". Un ecipo de la Organiza per la Proibi de Armas Cimical va vade a Suria "pos corta" per determina esce armas proibida ia es usada.

Duma ia es denova atacada par fortes suri e rusce en la semana pasada. Aora, rebelores parti de la vila su un acorda cual envolve la militar rusce.

Rusia ia descrive la reportas de la ataca cimical como "un provoca" desiniada per justi un interveni ueste contra sua aliada. Lo ia dise ier ce samples prendeda de la vila ia revela no sustantias cimical.

Figures major rusce ia averti sur un responde rusce a un ataca par la SUA. Ier, Alecsander Zasypkin, la ambasador rusce de Lubnan, ia repete un averti par la xef de la militar ce on va tira misiles a tera e ataca la locas de cual los ia es lansada si los menasa la vives de empleadas rusce.

Ance ier, un portavose per la ministro rusce de esternas ia demanda esce la intende de atacas ueste es cisa "sutrae rapida la trasas de la provoca" tal ce "esaminores internasional va ave no cosa per regarda en xerca atesta".

Parlante a ambasadores nova en Moscva, presidente Vladimir Putin ia dise ce el espera ce la sensa comun va domina e ce la situa va stabli. El ia dise ce Rusia "va manteni completa tota de sua obligas internasional".

2018-04-11

Sinco atletas camerunes abandona sua ecipo

A la Juas de Comunia de Nasiones en Australia, sinco atletas camerunes ia deveni asente de sua abiterias sin esplica. Ofisiores regarda esta como un "abandona". On ia reporta la atletas mancante a la polisia australian.

Tre levores de pesa e du boxores ia es final videda a oras diversa en lundi e martedi. Camerun ia dise ce la visas australian de la grupo va resta valida australian asta 15 maio.

La atletas ia es nomida como Olivier Matam Matam, Arcangeline Fouodji Sonkbou e Petit Minkoumba (levores de pesa), e Christian Ndzie Tsoye e Simplice Fotsala (boxores).

Un ofisior ia comenta: "La autoriosas es multe deludeda par la abandonores. Alga an no ia compete. La espera sinsera es ce los va reveni a la vileta per viaja a casa con la otras."

La governa australian ia averti atletas contra resta per plu longa ca sua visas.

La Federa de la Juas de Comunia de Nasiones ia dise ce lo monitori la situa, ma atletas ave par sua visas "la direto de viaja libre".

En 2012, sete atletas camerunes ia desapare cuando los ia es en London per la Juas Olimpial.

2018-04-10

Un greve afeta volas de Lufthansa

Lufthansa es obligada a cansela oji 800 volas car la "primavera de noncontentia" entre laborores de Europa ia ateni Deutxland. La airocompania ia sutrae un dui de sua 1600 volas scemida, afetante 90 mil pasajores.

Laborores fa un greve ante discutes de paia, pos ativia simil en Frans. On previde plu disturba per Air France oji pos sua greves a la fini de semana.

Lufthansa ia recomenda a pasajores de ci sua volas no es canselada ce los lasa plu tempo per viaja, e ce los ariva plu temprana a la airoportos.

La greve no envolve la empleadas de Lufthansa mesma, ma laborores de la campo publica como la mantenores de aviones sur tera a la airoportos de Frankfurt, München, Köln e Bremen.

Un servi normal va recomensa a mercurdi. Air France ia dise ce lo va opera oji 75% de sua volas, pos cansela un tri de los a saturdi.

2018-04-09

Misiles colpa un airoporto militar en Suria

Alga persones ia mori o ia deveni ferida cuando un airoporto militar suri ia es colpada par misiles, entre ansia internasional sur un ataca cimical suspetada contra un vila ocupada par rebelores.

La ataca oji ia colpa la base Tiyas, conoseda como T4, prosima a la site Homos. Suria ia dise inisial ce la Ueste es envolveda. La SUA e Frans ia menasa responde a la ataca cimical alegada, ma nega ce los ia colpa la base.

Israel ia ataca locas suri en la pasada, ma no ia comenta en esta caso.

Donald Trump, presidente de la SUA, ia dise ce on va ave un "custa grande per paia" pos la ataca cimical en Duma, en la rejion Guta Este, prosima a la capital, Dimashq. El ia nomi Bashar al-Assad, presidente de Suria, como un "animal".

Entretempo, la rebelores final en Duma ia sede e on transporta los de la enclave pos la reali de un acorda con la governa.

SANA, la ajenteria nasional de novas en Suria, la descrive inisial la colpa de misil a Tiyas como "un ataca suspetada de la SUA", ma ia omete plu tarda la refere a la SUA.

En april 2017, la SUA ia xuta 59 misiles cruser a Shayrat, un campo de avion militar en Suria, en responde a un ataca de armas cimical contra un otra vila ocupada par rebelores, Khan Shaikhun.

2018-04-08

Un om japanes ia caji sua fio tra 20 anios

La polisia japanes ia aresta un om de 73 anios ci los suspeta de teni sua fio en un caje de lenio tra plu ca 20 anios.

Yoshitane Yamasaki ia dise ce el ia enclui sua fio, ci ave aora 42 anios, car el ia sufri problemes mental e ia es violente a veses.

La caje ia ave sola un metre de altia e du metres de largia, e ia es situada en un cabana a lado de la la casa de Yamasaki en la site Sanda.

Aora la fio sufri de un dorso curvida, e es curada par autoriosas, en un loca de aida sosial en Japan ueste, de janero.

Un visita par un ofisior de site a la casa de Yamasaki ia atrae la atende de autoriosas a la caje. Investigores crede ce Yamasaki ia comensa restrinje sua fio de la eda de 16, cuando el ia comensa "malcondui".

Per la presente, la polisia ia fa no plu ca aresta la jubilor per caji sua fio per 36 oras a 18 janero.

On reporta ce Yamasaki ia aseta la alegas, disente ce el ia nuri sua fio a cada dia e ia permete el a bani en cada dia du.

2018-04-07

La reabri de la tram volante en Sarajevo

A dudes-ses anios pos sua destrui en la Gera Bosnian, la tram volante de Sarajevo ia recomensa funsiona.

La monte Trebević ia es un punto de vista usada par xutores e morterores serbsce en la aseja de la capital de Bosnia, cual ia ocupa 1425 dias entre 1992 e 1996.

On ia draga la campos de bombetas sola en anios resente.

La tram reabrida es aora nomida per un gardor pasada, Ramo Biber, ci ia es matada par fusilores serbsce en 1992, a la comensa de la gera.

32 gondolas viaja de la sentro de Sarajevo a la apico de la monte Trebević.

On no ia repara la tram direta pos la dana cual lo ia sufri en la gera. Sua restora ia custa $8 milion, de cual un dui ia es donada par un dotor american ci es sposida a un siensiste bosnian.

En 1984, la monte ia es usada per corsas de bob en la Juas Olimpial de Inverno.

2018-04-06

La presidente pasada de Brasil es condenada

Un judor brasilera ia comanda ce Luiz Inácio Lula da Silva, la presidente pasada, presenta se a la polisia ante la fini de la posmedia oji, per comensa un condena de 12 anios en prison per froda.

Ier, la Corte Suprema ia deside contra la solisita de Lula per resta libre en cuando el apela contra sua condena. Lula dise ce la acusas es political motivada, e intendeda per preveni el de aspira la presidentia en otobre. El ia ta es la aspiror la plu probable de gania.

En sua comanda, Sergio Moro ia dise ce Lula, ci ave 72 anios, debe presenta se ante 17:00 de ora local a la xeferia de la polisia federal en Curitiba, un site sude.

Moro ia dise ce un selula spesial "ia es preparada a ante… en cual la presidente pasada va es separada de otra prisonidas, con no risca a sua solidia moral o fisical".

Pos la anunsia, sentos de suportores de Lula ia asembla estra la sindicato de metalores prosima a São Paulo.

La acusas veni de un investiga antifrodal, conoseda como "Lava de Auto", cual ia implica politicistes major de partitos diversa.

Lula ia servi como presidente entre 2003 e 2011. An con un vantaje en sondas de opina per la eleje en otobre, el es ancora un figur dividente. En la pasada, el ia es un metalor e ativiste de sindicato. El ia deveni la gidor sinistriste prima ci ia susede deveni presidente en cuasi un dui de sentenio.

En sua presidentia, Brasil ia esperia sua periodo la plu longa de crese economial en tre desenios, permetente ce sua governa spende multe sur programes sosial. Deses de miliones de persones ia es estraeda de povria par la stratejias de sua governa, e, pos du periodos en serie, el ia parti de la posto con popularia recordo.

En 2014, acusores ia comensa investiga alegas ce dirijores a Petrobras, la compania nasional de petrolio, ia aseta sobornas per dona contratas a companias spesifada de construi. Lava de Auto ia descovre un rede vasta de froda e sobornas a politicistes de la spetro intera.

Lula mesma ia es condenada de reseta un aparte de plaia con valua de 3,7 milion reais ($1,1 milion), como un soborna par OAS, un compania de injenia.

2018-04-05

50 anios pos la asasina de Martin Luther King

Campanas ia sona en sites tra la SUA per onora la momento a 50 anios ante aora, cuando Martin Luther King, gidor de diretos sivil, ia es matada par la fusil de un supremiste blanca. Los ia sona a 39 veses – un per cada de la anios de la vive de King.

La campanas xef ia es a la motel en Memphis, Tennessee, do la asasina ia aveni. Jesse Jackson, un gidor major afroamerican ci ia es presente a la mata, ia dise a la asembla ce la dole es ancora forte sentida.

Dr King es regardada como un eroe en la SUA, e la aniversario de sua nase es onorada par un festa nasional.

A la asembla en Memphis en la sera de mercurdi, Martin Luther King III, un de sua fios, ia dise ce on ia fa progresas grande en relatas de raza, ma ce America es ancora multe distante de la state desirada.

King, comun conoseda par sua inisiales MLK, ia es fusilida cuando el ia sta sur la balcon de sua motel en un visita a Tennessee per protesta contra la paia basa de dejetores.

Un garlanda ia es poneda a la tomba de King en Atlanta, sua vila de nase, e ance en Chicago, un site colpada par tumultas pos la asasina en 1968. Ance ier, sentos de persones ia asembla en Washington per un prosegue de prea silente de la monumento MLK, erijeda en 2011, asta la Bolevar Nasional.

En un mesaje video, Barack Obama, la presidente pasada, ia dise: "Cuando nos atenta ancora, la spirito de Dr King joia ancora." Presidente Donald Trump ia tuita un video en cual el ia loda King a sua aniversario en janero.

En un proclama separada en cual el ia declara ce ier es "un dia per onora la erita de Dr King", Trump ia dise "lo cual va reali la ideales de Dr King no es la governa" ma vera la persones comun, ci "debe aspira ativa securi la sonia de vive en junta como un popla con un gol comun".

A la sera de martedi en un eglesa en Memphis, do King ia fa un parla a la dia ante sua mori, sua fia, la eglesor Bernice King, ci ave aora 55 anios, ia descrive la difisilia de lamenta publica sua padre.

Acompaniada par sua frate Martin Luther King III, el ia dise: "Lo es importante ce on vide du de la enfantes ci ia perde sua papa a la baleta de un asasinor a 50 anios a ante. Ma nos ia continua."

En un tuita plu tarda, el ia sita Maya Angelou, un poesiste afroamerican, ci ia ta ave 90 anios ier, disente en pertine a sua padre: "Me pote es e es plu bon car tu ia esiste."

2018-04-04

Zeland Nova va sutrae condenas omosesal istorial

Zeland Nova ia reali un lege per permete la sutrae de la rejistra criminal de persones ci on ia condena de atas omosesal en la pasada.

A presente, omes condenada ante la descriminali de omosesalia en 1986 ave ancora un crimin listada en sua rejistras ofisial. Sirca 1000 persones va cuali per la sutrae de rejistras cuando la projeta comensa en la anio veninte.

Legores ia espresa ance sua regrete a la persones afetada par la condenas.

Andrew Little, la ministro de justia, ia dise ce la lege "envia un sinial clar ce prejudi contra persones ge es no plu asetable, e nos es dedicada a coreti maltratas de la pasada".

La governa ia dise ce la condenas pertine a tre atas cual on ia descriminali en 1986 – sodomia, vulgaria entre mases, e manteni de un loca per atas omosesal.

Membros de familia va pote aplica per sutrae la rejistras de relatadas mor. Per cuali, la seso cual ia provoca la condena debe es acordada e entre persones con 16 anios o plu.

Un solisita per supresa condenas istorial per atas omosesal ia es prima introduida a parlamento en la anio pasada. Zeland Nova ia reali leges proibinte prejudi contra persones ge en 1993, e ia deveni la pais prima en la rejion de Asia Pasifica cual ia legali la sposi omosesal a dudes anios plu tarda.

2018-04-03

Feroviores franses greve contra la reformis de Macron

Gidores de tren e otra laborores de SNCF, la compania nasional de ferovia franses, ia comensa un greve major sur cual on previde ce lo va paralise viajas par tren tra Frans.

A la sera de ier, empleadas ia comensa tre menses de paras en cuando sindicatos resiste la reformis de labora par presidente Emmanuel Macron.

On previde un periodo la plu grande de greves industrial de pos la eleje de Macron en maio pasada. On espeta greves ance en la campos de eletrica, enerjia e colie de dejetadas.

A 22 marto, deses de miles de enseniores, curores e otra laborores ia greve con empleadas de ferovia – indicante un oposa grande de la projeta de Macron per librali la campo publica.

Laborores de SNCF ave regulas jenerosa, incluinte aumentas automata anial de paia, jubila temprana, 28 dias de vacanse paiada, e proteje contra desemplea. Sua relatadas prosima pote ance reseta biletas de tren sin paia.

La governa de Macron vole retira gradal la contratas spesial de SNCF, proposante ce empleadas nova va reseta contratas simil a los cual pertine a alga partes de industria. El intende abri la ferovias nasional per compete ante la fini de 2023, seguente un esije par la Uni European.

Sola 12% de la trenes de rapidia alta va opera oji, e la servi Ouigo de custa basa no va move. Sola un de sinco trenes rejional va funsiona. Servis internasional va es min afetada: on va opera ancora 75% de trenes de Eurostar e sirca 90% de servis de Thalys a Beljia, Nederland e Deutxland.

La sindicatos de ferovia intende greve per du dias en cada sincuple asta la fini de junio. Empleadas de Air France, ci esije un aumenta de paia par 6%, ia comensa ja greve, ma la plu de volas no es afetada.

La greves va proba la potia de la sindicatos franses. Pico plu ca 11% de empleadas franses parteni a un sindicato – un proportio entre la plu basas en la Uni European – ma tradisional la sindicatos ia tende engrana batalias difisil, e economial e political.

Multe sindicatistes regarda Macron como la person ci desira rompe la potia de la sindicatos. En setembre, greves ia fali preveni el de reali leges cual fasili empleas e desempleas par companias.

2018-04-02

Un laboratorio spasial cade en la Pasifica Sude

Tiangong-1, un laboratorio spasial desusada de Xina, ia reentra a la atmosfera de la Tera e ia desintegra supra la Pasifica Sude, a pico pos medianote (de ora global) oji.

Lo ia es lansada en 2011 per fa esperimentas de doci e orbita, como parte de atentas par Xina de construi un stasion spasial ante la fini de 2022. Ma lo ia sesa funsiona en marto 2016.

Parente, lo ia cade a tera en alga loca a norde-ueste de la isola Tahiti.

Per espertas, la predise de do lo va reentra ia es difisil. La ajenteria spasial de Xina mesma ia sujesta noncoreta ce lo va cade prosima a São Paulo en Brasil.

La Ajenteria Spasial European (ASE) ia predise ce Tiangong-1 va desintegra supra acua, cual covre multe de la surfas de la Tera. Lo ia asentua ce la probablia ce un person va es colpada par un peso de detrito es un des-milioni de lo ce on va es colpada par lampo en cualce anio.

On no sabe cuanto de la laboratorio ia ateni la surfas sin desintegra.

Ideal, on ia ta sutrae lo de orbita en manera projetada. Tradisional, on usa la puxadores de veculos grande per envia los a la loca maral la plu distante de tera, en la rejion entre Zeland Nova e America Sude. Ma lo pare ce, a esta ves, acel no ia es posible, par causa de un perde de lias de comanda.

Des-tre ajenterias spasial, gidada par la ASE, ia usa radar e oservas otical per segue la via de Tiangong-1 sirca la globo.

La modulo Tiangong ia ave 10 metres de longia, e sua nom sinifia "palasio sielal".

2018-04-01

Un xerpa atenta sua asende recordo de Everest

Per la plu de persones, la preparas per asende la monte la plu alta de mundo ta es un esperia difisil, plen de cosas nonconoseda. Ma no per Kami Rita Sherpa, un trepor nepali con 48 anios.

El va parti oji, esperante crea un recordo nova per la cuantia de asendes susedosa de Monte Everest. La recordo presente de 21 asendes susedosa parteni juntada a el e du otra trepores nepali. La otra du ia jubila, tal ce un bon asende va defini Kami Rita como la everestor la plu esperiosa.

El ia dise: "Me fa ancora un plu atenta de crea istoria, per dona orgulo a la comunia xerpa intera e mea pais."

Kami Rita labora como un gidor per un compania SUA cual organiza misones de trepa. El ia fa sua asende prima de Everest en 1994 e ia completi la plu resente en maio pasada.

Trepores stranjer depende usual de aida de gidores esperiosa como el, ci on paia per prepara la via, afisa cordas e porta la aparatos nesesada per trepa.

Kami Rita va gida un ecipo de 29 trepores de multe partes de la mundo a esta ves. La grupo, incluinte americanes e japaneses, va parti oji de la campa de base e va comensa la asende vera pos du semanas. La clima va deside cuando los ateni la apico.

"Si tota segue la intende, me va fa la asende final a la apico a 29 maio," el ia dise. Ma el vole continua rompe la recordo an si esta trepa susede. El ia comenta ce el desira ateni la apico de Everest a 25 veses. "Me desira crea istori," el ia dise.

2018-03-31

Malala Yousafzai revade a do el ia es fusilida

Malala Yousafzai, ganior de la Premio Nobel de Pas, ia revade a sua vila de nase en Pacistan a la ves prima pos es fusilida ala par militaristes taliban.

Yousafzai, ci ave aora 20 anios, ia es fusilida a la testa en 2012 car el ia campania per educa fema. La rejion Swat do sua familia ia abita ia es un fortres mlitariste en la pasada, e el ia es atacada en un bus de scola ala a la eda de 15.

Lo ia es nonclar esce el va visita la rejion, par causa de consernas de securia.

A jovedi, on ia anunsia ce Yousafzai ia revade de la Rena Unida Pacistan a la ves prima pos sua ataca. El ia fa un parla emosiosa a la ofisia de la ministro xef en Islamabad:

"Sempre lo ia es mea sonia ce me va vade a Pacistan e ala, en pas e sin teme, me pote move sur stradas, me pote encontra persones, me pote parla a persones. E me pensa ce lo es denova mea casa vea. Donce lo aveni vera, e me grasia tota de vos."

Un elicotor portante Yousafzai ia atera prosima a sua casa familial en Mingora a saturdi, entre securia forte. On previde ce sua visita a Pacistan va dura per cuatro dias.

Como xica de 11 anios, Yousafzai ia comensa scrive un jornal anonim sur sua vive su governa taliban. On ia fa un filma atestante sur el en 2009.

El ia deveni rapida un defendor franca de educa fema entre supresas par militaristes en Pacistan, e ia es atacada con intende en un bus en otobre 2012 par islamistes estrema. Sua raconta ia atrae atende internasional.

La adolesente ia reseta feris cual ia menasa sua vive, e ia nesesa ce on sutrae un parte de sua cranio per lejeri un infla contra sua serebro. Pos es tratada a un ospital militar en Pacistan, el ia es transportada a la Rena Unida per plu tratas, e per recovre en la site Birmingham, do sua familia continua abita.

Pos recovre, Yousafzai ia parla plu per la educa e diretos de enfantes tra la mundo. El ia institui la Reserva Malala con sua padre, con gol de "labora per un mundo do cada xica pote aprende e gida sin teme".

En 2014, el ia deveni la person la plu joven ci ia gania la Pas Nobel de Pas. El e Kailash Satyarthi, un ativiste barati, ia reseta lo en junta per sua laboras per diretos de enfantes.

Yousafzai ia continua campania en sua studias, e studia aora politica, filosofia e economia a la Universia de Oxford.

2018-03-30

68 persones mori en un focon en un prison venezuelan

Relatadas de 68 persones ci ia mori cuando un focon ia eruta a un polisieria en la site Valencia en Venezuela esije respondes sur la aveni. La arde ia comensa cuando prisonidas ia ensende materases en atenta sorti a mercurdi.

La Nasiones Unida ia demanda ce la autoriosas venezuelan fa un investiiga rapida e compensa la familias de la vitimes. La focon ia es un de la avenis la plu matante en la prisones de Venezuela.

A mercurdi, relatadas angusada ia asembla ante la polisieria, esijente informa sur sua amadas. La polisia ia forsa los a via par gas lacrimojen.

Tarek William Saab, la avocato acusante xef, ia dise ce 66 omes e du femes, ci ia visita la selulas en la note, ia es matada en la focon. El ia dise ance ce on va inisia "direta" un investiga.

On no ia confirma ofisial la avenis cual ia causa la focon, ma la asosia Un Fenetra a Libria, cual monitori la state de prisones, ia dise ce un prisonida ia fusili la gama de un polisior, e ce, corta a pos, materases en selulas ia es ensendeda. La arde ia sperde rapida.

Salvores ia rompe mures per atenta libri persones trapida par la flamas.

Prisones en Venezuela es suprafolida, e violentia e tumultas matante es comun. La pais ia batalia per casi sua prisonidas a media de un crise economial, e per esta razona lo usa complesos tempora como la prison en Valencia.

2018-03-29

La consentas de Corea Norde

La gidores de Corea Norde e Sude va fa sua confere prima de plu ca un desenio a 27 april.

Un declara juntada ia dise ce discutes entre Kim Jong-un de la Norde (Txoson) e presidente Moon-Jae-in de la Sude (Tehan) va aveni en la vileta fronteral Panmunjom.

La data ia es revelada pos un consenta entre ofisiores de ambos lados per prepara la encontra.

La anunsia segue a la dia pos reportas de discutes entre Kim Jong-un e Xi Jinping, presidente de Xina. A acel consenta en Beijing, la gidor de Corea Norde ia repete sua ofre de desnucleali la Penisola Corean.

Kim Jong-un ia dise resente ce el vole consenta con Donald Trump, presidente de la SUA. Trump ia aseta la ofre, e lo es posible ce los pote encontra lunlotra a tempo tan prosima como maio.

La presenta de un data per discutes entre la du Coreas es la move la plu resente en un eruta de ativia diplomata en esta anio, en cual Txoson ia es presente a la Juas Olimpial de Inverno en Tehan.

2018-03-28

Un gania de loto a sua aniversario 18

Un fem canadian ia gania masima pos compra sua bileta prima de loto a sua aniversario 18.

Charlie Lagarde, de la provinse Québec, ia compra un bileta de rasca en un botela de xampania per selebra ateni la eda de 18 anios a 14 marto.

El ia gania, e ia fronti un eleje entre prende un sola premio de milion dolares canadian o reseta mil dolares a cada semana per la resta de sua vive. Pos consulta un conselor finansial, la ganior joven ia eleje la paia anial de mil dolares, car lo no es impostada.

Un portavose per la compania de loto ia comenta: "Lo es estra imposta, alora lo coresponde a un salario de plu ca 100 mil dolares per anio, donce lo es un comensa eselente de la vive de acel fem joven."

Lagarde dise ce el vole usa la mone per viaja e paia per sua educa. "Me desira studia fotografia. Un de mea sonias es labora per National Geographic.

2018-03-27

La fumi confondente de un elefante barati

Un video de un elefante savaje en Barat cual pare espira sene ia confonde espertas tra la mundo. Vinay Kumar, un siensiste ci parteni a la Sosia de Conserva de Viventes Savaje de India, ia filma la video de 48 secondos en un visita laborante a la foresta Nagarhole en la stato Karnataka en April 2016.

Asta aora, el no ia comprende la importa de la video. Lo es la filma prima conoseda de un elefante savaje con esta condui, e siensistes es ancora no serta sur lo.

Kumar e sua ecipo ia vade a la foresta, en la temprana de matina, per monitori trapas de camera intendeda per fa imajes de tigres. El ia vide un elefante fema a no plu ca 50 metres de distantia, e ia comensa filma lo.

En la filma, la elefante pare come carbon de lenio lasada par un foco controlada sur la tera, e sofla la sene en espira a pos. Kumar ia dise: "Lo cual nos ia vide a acel dia ia pare cuasi como si la elefante fumi – el pleni sua trompa con sene, leva lo a sua boca, e espira a lo, produinte un sofleta de fuma."

Varun R Goswami, un biolojiste de elefantes ci ia esamina la video crede ce "la plu probable, la elefante ia atenta come carbon de lenio, car el ia pare prende alga cosa de la solo ardeda de foresta, soflante per sutrae la sene cual ia acompania lo en sua trompa, e consumante la resta".

El ia dise: "Carbon de lenio ave un capasia reconoseda de lia a toxinas, e an si lo ave cisa no multe contenida nural, animales savaje es cisa atraeda a lo per esta valua medisinal. Lo pote servi ance como un laxinte, duplinte sua usosia per animales cual consuma lo pos focones savaje, colpas de lampo o ardes controlada."

2018-03-26

Un focon en un sentro comersial en Sibir

A la min 53 persones ia mori ier en un focon cual ia destrui un compleso de botecas e diverterias en Cemerovo, un site en Sibir. Lo es posible ce 41 enfantes es entre la vitimes, e on no conose do plu ca 10 persones es.

La arde ia comensa a un solo alta de la compleso Seriso de Inverno, cuando multe de la vitimes ia es a la sinema. Persones ia salta de fenetras per evade la flamas.

La causa de la focon es ancora no conoseda, e autoriosas ia inisia un investiga. 660 laborores de crise ia es usada en la salva, e pompores ia batalia la flamas tra plu ca 17 oras.

Cemerovo, un loca major de mina de carbon, es situada a sirca 3600 cilometres a este de Moscva.

La sentro comersial ia abri en 2013. En ajunta a un sinema-multipleso, lo conteni restorantes, un sauna, un bolingeria e un zo per enfantes. On ia deteni cuatro persones per interoga, incluinte la xef de la compania cual maneja la sentro e la proprior de la compleso.

Ofisiores rusce ia dise prima ce 64 persones manca, ma ia clari plu tarda ce esta inclui vitimes de ci on no ia identifia sua restas. A la min nove de la corpos trovada asta aora es enfantes.

La servis de crise ia ateni final un salon de sinema a la solo tre, pos es impedida par fuma e la peril de partes colasante. Los ia trova no corpos a interna, ma teme ce alga persones ia es cisa covreda par detrito.

2018-03-25

Un protesta par tradisionalistes en Corvatsca

Miles de corvatsces ia asembla en la sentro de Zagreb contra un acorda european desiniada per proteje femes, protestante ce lo menasa valuas tradisional.

Los cexa ce la Acorda de Istanbul va legali la sposi omosesal e va boni diretos per persones transjenero.

Grupos de diretos fema ia fa un contraprotesta longo la via de la prosegue, disente ce sondas sujesta ce du tris de corvatsces suporta la acorda, an con la asende de la destra estrema pos la junta de Corvatsca a la Uni European en 2013.

Parlamento ancora no ia validi la acorda, ma la governa destra sentriste ia aproba lo, provocante disentis de en se mesma, de grupos conservaliste, e de la Eglesa Catolica.

Multe de la protestores suporta combate violentia de casa e violentia contra femes, ma dise ce la defini de jenero en la acorda es tro fluente, abrinte la via per un reconose plu grande de persones transesal e transjenero.

La acorda defini jenero como "la roles, conduis, atas e cualias sosial construida cual un sosia spesifada regarda como conveninte per femes e omes".

Organizas eglesal ia esije un referendo sur la validi, an si sondas indica ce la plu de corvatsces suporta la acorda. Serbia, Bosnia e Slovenia ia validi ja lo, ma Balgaria e Slovensco ia rejeta lo.